Iâ-so͘ siū chhı̀
1. Chú Iâ-so͘ soé-lé āu,
Sèng Sı̂n sûi-sı̂ kàu,
Chhoā Chú kàu tı̄ khòng-iá khı̀,
Tı̄ hia tú-tio̍h Mô͘-kúi chhı̀.
2. Chú kı̀m-chia̍h toān jı̍t-sı̍t,
Kè-kiōng sı̀-cha̍p jı̍t,
Choân-jiân bô chia̍h chin kan-khó͘,
Seng-khu iau-gō naih pak-tó͘.
3. Chú Iâ-so͘ pak-tó͘ iau,
Mô͘-kúi lâi khiâu-tiàu,
Ài I lo̍h bāng siū bê-he̍k,
Mô͘-kúi lia̍h che chò sim-sek.
4. Thâu chı̍t kù chiū chhut-siaⁿ,
Nā-sı̄ Siōng-tè Kiáⁿ,
Bēng-lēng chio̍h-thâu pı̀ⁿ-chò piáⁿ,
Goá chiū sı̀n Lí chin ū iáⁿ.
5. Iâ-so͘ kóng, tı̄ Sèng-keng,
Kı̀-chài chin-chiàⁿ bêng,
Lâng oa̍h m̄-nā oá-khò piáⁿ,
Ài thiaⁿ Siōng-tè kóng ê siaⁿ.
6. Tē-jı̄ pái kóng liáu-āu,
Mô͘-kúi koh-chài kàu,
Chhoā I ke̍k koân ê sèng-siâⁿ,
Ài beh hō͘ I bô sı̀ⁿ-miā.
7. Hō͘ Chú khiā tiān bé-liu,
Ài I bē thang kiù,
Kiò I tùi chia thiàu--lo̍h-khı̀,
Siōng-tè ún-tàng oē pó-pı̀.
8. Tı̄ Sèng-keng iā ū kı̀,
Chú beh hû-chhı̂ lí,
Chhiáⁿ Lí kín-kín thiàu--lo̍h-khı̀,
Thiⁿ-sài hû Lí bô tāi-chı̀.
9. Iâ-so͘ kóng koh ū kı̀,
Bêng-bêng ū chí-sı̄,
Bo̍h-tit chhı̀ Chú lí Siōng-tè,
Siōng-tè sı̄ lán ê Thiⁿ-pē.
10. Tē-saⁿ pái bô hoat-tō͘,
Chiū oāⁿ pa̍t khoán lō͘,
Mô͘-kúi chhoā I chiūⁿ koân soaⁿ,
Bān-kok êng-kng pò Chú khoàⁿ.
11. Kā Chú kóng nā pài goá,
Pí che koh-khah toā,
Goá chiū lóng-chóng beh hō͘ Lí,
Hō͘ Lí toā-toā ū hok-khı̀.
12. Iâ-so͘ kóng, Sat-tàn thè,
Siogn7-tè m̄-sı̄ ké,
Chin-sı̂n Siōng-tè lí tio̍h pài,
M̄-thang án-ni loān-loān lâi.
13. Tùi án-ni lóng bô hāu,
Mô͘-kúi chiū kín cháu,
Thiⁿ-sài it-chı̄n lóng chiâu kàu,
Hoaⁿ-hí ngiâ Chú liâ sū-hāu.
