Iām-joa̍h ê saⁿ-goe̍h thiⁿ,
tah-sim ê kiâm-sip-bı̄,
sûi hong phiau-tı̄ bô-ū chhiū-bo̍k jia ńg ê hái-kı̂ⁿ.
tng pek lâng ê joa̍h-khı̀,
joa̍h kah liân hái-chiáu iā cháu khı̀ bih;
tùi lín lâi kóng, chò-iâm ê lâng ah!
seng-oa̍h tú-tú chiah khai-sí.
Tı̄ chēng-be̍k ê sè-kài,
ta̍k-jı̍t bı̄n tùi bû-giân ê toā-hái;
tı̄ bô-sek ê àm-mı̂,
ko͘-chip kā sim ê chu-bı̄ siáⁿ-lâng chai.
chí-ū thâu-téng ê koe-le̍h,
chhiú-tiong ê thô͘-pê,
tiām-tiām poê lín pê chhut chı̍t-phiàn siám kng ê thiⁿ-tē.
Tng sin-khu ê jia̍t koāⁿ,
oāⁿ chò chı̍t-lia̍p chı̍t-lia̍p ná chiⁿ ê pe̍h-soa;
tı̄ Tâi-oân se-lâm ê hái-hoāⁿ,
gı̂m chhut hit-siú Phoân-kó͘ í-lâi chiū ū ê si-koa;
chı̍t-ê ū bı̄ ê siā-hoē,
tùi hia chiām-chiām lâi siⁿ-thoàⁿ.
(Tâi-oân Kàu-hoē Kong-pò tē 2091 kı̂, 1992 nı̂, 3 goe̍h)
(Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)
