Tiān-sı̄ khoàⁿ tio̍h 1 chhut kū tiān-iáⁿ, kiò chò 『青青河畔草』, sı̄ leh kóng gín-á ê loân-ài kò͘-sū, koh ū bí-lē ê chhân-hn̂g kéng-tı̀, goá hiông-hiông khı̀ siūⁿ tio̍h kò͘-hiong ê kong-kéng kap gín-á sı̂-tāi hit toāⁿ m̄-chai beh án-choáⁿ kóng khí ê kám-chêng, lı̂m-sı̂ lı̂m-iāu tō khı̀ thiah 1 tiuⁿ lo̍h lâm ê hoé-chhia-toaⁿ, tńg khı̀ kò͘-hiong chhiau-chhoē goá ê gín-á sı̂.
Poâⁿ Oân-lı̂m kheh-ūn kàu goán chng goā ê ke-á to beh e-po͘ 4 tiám--a, tı̄ chhia-pâi-á piⁿ bé 1 ê khok-á-te kap 2 tè chı̀ⁿ-koé, ná kiâⁿ ná chia̍h, kám-kak bô gín-á sı̂ hiah hó-chia̍h, khok-á-te soah bô chham o-á, kan-taⁿ kú-chhài niâ. Koè chúi-chhiāng, ùi Toā-lûn koh kiâⁿ chiâⁿ pah pō͘, tō ū 1 ê phòng-phuh liâu-á, chhut-chúi-kháu ê thih-kóng chin toā-khang, thiu--chhut-lâi ê chúi toā-káng pe̍h-siak-siak. Joa̍h--lâng, ùi ha̍k-hāu beh tńg khı̀ chhù--nih chia̍h tàu, cháu gah kui sin-khu koāⁿ, kàu chia tō chin hoaⁿ-hí, seng hò͘ chúi sé bı̄n sé ām-kún, chiah koh lim kúi chhùi-á chí chhùi-ta, chheng-liâng ê chúi thàu sim-pı̂. Chit sı̂, goá chı̀ⁿ-liāu chia̍h gah chin sò, liâu-á iáu tı̄--leh, m̄-koh bô leh thiu chúi, iā-tō bián lim--a.
Liâu-á piⁿ ê chhân bô leh pò͘, kái chò chèng phû-tô ê hn̂g, tong-jiân tō bián phoàⁿ chúi. Chit 2 nı̂, Kong-bē-kio̍k kái-cho͘ chò kong-si, phû-tô iōng chı̀n-kháu--ê, hùi-chí chèng-choh ê khè-iok, phû-tô mā hùi--a, kui-phiàn hn̂g khē leh hng. Chit khoán kek chiú ê phû-tô, chū chò gín-á sı̂-tāi, goán tau chhù-āu tō chèng 2 châng, chhiⁿ-phû-tô kàu beh se̍k tō hoán n̂g, jı̍t-thâu-kng chhiō--tio̍h ē thang kng, chia̍h--khı̀-lâi chin tiⁿ. Goá mn̄g a-pa kóng chit khoán phû-tô sı̄ siáⁿ-mih chéng, i kóng sı̄ “Go͘-lú-lián”, goá kı̀ im m̄-chai ı̀-sù, it-tı̍t kàu ē-hiáu koá Eng-gí kap Jı̍t-gí liáu-āu, chiah chai sı̄ “Golden” ê Jı̍t-gí hoat-im, eng-kai sı̄ “Goruden”, Kong-bē-kio̍k toā-liōng khè-chok, kái miâ chò ‘Kim-hiong’ phû-tô.
Sūn phòng-phuh liâu-á kàu goán chng--nih, kui lō͘ lóng choân-sı̄ hùi-hng ê hn̂g-á, hó tio̍h hiah-ê ia̍h-á, chiáu-á, chū-iû poe tı̄ ki-hio̍h ê khang-phāng. Lō͘-bı̄n khōng táⁿ-má-ka, chhoē bô chá-sı̂ gû-chhia-kau ê hûn-jiah, chhia kam-chià ê chhiah-gû-á koà ê lin-long-á iáu tı̄ goá kı̀-tı̀ lāi leh hiáng. Goán siōng hèng toè gû-chhia āu kiâⁿ, sái gû-chhia--ê chai goán gín-á ê sim-chêng, lóng ē tı̀ⁿ bô khoàⁿ--kı̀ⁿ, kam-chià hō͘ goán thau thiu khı̀ chia̍h, ū 1 kái, Kheh-lâng gín-á A-phng-á toā-sim-koaⁿ, kā lâng làu kui pé, chài kam-chià--ê lo̍h lâi kā mā, liáu-āu thiu 1 ki hō͘--i, chhu--ê khǹg tńg--khı̀. Nā ū hoê-thâu khang-chhia, goán ē peh--khí-lih chē, kui tı̄n gín-á pàng hō͘ gû thoa. Chúi-chhiāng piⁿ hit chō kiô, beh khí ê lō͘ chin kiā, chhia nā chài siuⁿ tāng tō chin chhut-la̍t chiah khàng ē khí, ū ê gû tı̀ⁿ la̍t soah siàm sái, kiā téng gû-sái tia̍t-pia̍t chē, Tâi-oân ū chin chē só͘-chāi, lóng kiò chò “Gû-sái-kiā”. Goán nā khoàⁿ tio̍h chài tāng ê gû-chhia beh peh kiā, lóng ē chū-tōng khı̀ tàu sak, kā gû tàu chàn 1 ē la̍t.
Beh jı̍p chng tō ē khoàⁿ tio̍h lóng-sı̄ chhih-tek-á, chit chng ê 4 kho͘ liàn-tńg lóng-sı̄ chhih-tek-á, kā chng-thâu pau āⁿ giap tı̄ tiong-ng, Tâi-oân ū chit khoán ê chng tō kiò chò “Tek-ûi-á”, chit chng mā-sı̄. Chhih-tek-á ū chin chē lı̄-iōng, chá-sı̂ tō chhú khah chho͘ ê tek-á lâi khí chhù, tō-sı̄ “Tek-kóng-á chhù”. Chhih-tek-sún chú-thng bián lām bı̄-sò͘ tō chin tiⁿ. Sàn-chiah ê nı̂-tāi, khiàm bah-liāu iû-chho, khah êng ê àm-mı̂-á sı̂, goán a-chek ē iōng chhoê-á tàu boâ chiam ê chho͘ iân-soàⁿ chat, chè-chō 1 ki lak-chǹg, iōng tiān-thô͘ ê Ba-té-lih chhiō lō͘, choan-kang khı̀ tek-nâ lak niáu-chhí. Niáu-chhí ba̍k hō͘ Ba-té-lih chhiō--tio̍h, soah gāng--khı̀, lak-chǹg tō lak--lo̍h, chin chún, chit chhiú kang-hu eng-kai sı̄ Pêⁿ-po͘ lâu--lo̍h-lâi-ê. Chhù--nih ê cha-bó͘--ê chá tō sio-chúi chhoân leh tán, kā niáu-chhí pak phoê, thâi sé hó-sè, lo̍h tiáⁿ bián poàⁿ-tiám-cheng tō se̍k, bah chin chhiⁿ-tiⁿ. Thiaⁿ kóng chia̍h niáu-chhí-á-bah bē-sái koh chia̍h lí-á, nā-bô, ē toā-ām-kui, bô lâng chhı̀--koè, m̄-koh goán bô giâu-gı̂--koè.
Nǹg koè chhih-tek-nâ lō͘-á kàu chia hun siang-chhe, 1 tiâu iân kau-kı̂ⁿ se̍h chng-goā, tùi thiòng-á-po͘ koè, kau-á té lâ-á chin kāu, koāⁿ 1 kha tâng-kóng-á chhı̀n-chhái bong 1 khùn tō tı̄ⁿ-tı̄ⁿ, nā khı̀-ūn khah hó, koh ē khioh tio̍h hô͘-liu iah-sı̄ jı̂m tio̍h thô͘-sat. Lēng-goā 1 tiâu sı̄ jı̍p chng-lāi ê lō͘, iân lō͘ ū Hōng-hông-chhiū, tng khui ê sı̂, pí hoé khah iām ê âng, ē hō͘ lâng sim-koaⁿ sio-lo̍h. Ou-chhùi-pit-á kap o͘-chhiu kám-sı̄ kāng thiāu-á lāi ê chek-peh hiaⁿ-tı̄, tiāⁿ-tiāⁿ ē tàu-tı̄n sńg, ha̍p-chhiùⁿ “o͘-chhiu ka̍h-ka̍h-kiu̍h”. Goá khah ài Ìⁿ-á, boé-liu bē-su sı̄ iōng ka-to chián--ê, khui-chhe ê soàⁿ-tiâu chin tı̍t, se-hong lâng ài chhēng “Ìⁿ-boé-ho̍k”, goá kám-kak Ìⁿ-á sı̄ chhēng-chhah chin sin-sū ê chiáu-á. Piān-nā beh-àm sı̂, ē tı̄ chhù chêng nı̂-chı̂ⁿ kha háu-kiò, kap Jı̍t-pô ng-ko̍k-ke poe sio jiok.
Chit sı̂, kui chng chhih-tek-á bô kúi bô͘, ūi-beh chhú sún-á choan-kang chèng ê moâ-tek tian-tò ū khah chē. Ìⁿ-á ká-ná chiok kú tō hán-tit lâi poê-toè--a, chhun 1 koá bô lō͘ bô chhù ê chhek-chiáu-á chiú tı̄ tiān-hoé-soàⁿ téng, khoàⁿ chit chhut lông-chhoan piàn-chhian ê hı̀-bûn. Kau-á 1 tang hán-tit ū kúi jı̍t ū chúi, nā ū mā ná khı̀-si-á, bē-su sı̄ thó͘-tē lâu-chhut-lâi ê ba̍k-sái.
Goán tau mā hoan chò chng-á-chhù--a, āu-bı̄n ê kau-á iáu koh tı̄--leh, chúi chin chhàu. Chhù sı̄ ǹg chhân, chit sı̂ mā leh chèng cha̍p-chháu, koaⁿ-chin-á tn̂g gah koaⁿ-bang hoe pe̍h-pe̍h. Kū hō͘-lêng hoan tiāu, liân hit châng Khó͘-lēng-á mā chá tō chhoh--khı̀, Khó͘-lēng kha goá gín-á sı̂ tâi ê kı̀-tı̀, hō͘ âng-mn̂g-thô͘ khōng tiâu-tiâu, bô tè chhoē khí.
Chhù āu chùn-kau-á ê lēng-goā hit pêng sı̄ 1 hō͘ ū chhiûⁿ-ûi-á ê sin-sū lâng ê chhù-the̍h, bô leh kap chng-lāi lâng lâi-khı̀. Chū kó͘ khí chit chng tō lóng-sı̄ choh-sit lâng, hán-tit ū lâng siū kàu-io̍k, thiaⁿ a-pa kóng goán cha-po͘ chó͘ bat chò Hàn-bûn-sian--ê, tı̄ chng--nih khui àm-o̍h-á kà lâng bat Hàn-jı̄, ū-sı̂ iā ē kóng kó͘, a-pa kóng goá siá siáu-soat ê thian-hūn sı̄ chéng tio̍h a-chó͘--ê, m̄-koh goán a-kong tō bô-ài o̍h jı̄, soah tn̄g--khı̀. Hit hō͘ lâng sı̄ goán chng ê sin-sū ka-têng, téng 1 tē--ê tō bat jı̄, chò koè tı̀n-bı̂n tāi-piáu, ū 2 ê hāu-seⁿ tı̄ Bí-kok tha̍k chheh, tha̍k soah soah lâu tı̄ hia, bô-koh tńg--lâi. In hit ê siōng sè ê cha-bó͘-kiáⁿ tha̍k kok-hāu kap goá kāng-nı̂--ê, chhēng-chhah ê khı̀-chit kap goán it-poaⁿ ê chng-kha gín-á bô kâng, ná kong-chú--leh, ha̍k-hāu lāi lāu-su tia̍t-pia̍t khah sioh--i, tông-o̍h mā him-siān--i. Seng kàu 3 nı̂ ê sı̂, ha̍k-hāu koh têng pian pan, goá soah kap i kāng 1 pan, lāu-su pâi chē-ūi ê sı̂, goá sı̄ tha̍k thâu-miâ--ê, tong-jiân pun tē 1 pâi, i tı̄ pa̍t-pan sêng-chek thiaⁿ-kóng chiah phó͘-phó͘--á niâ, lāu-su thiàⁿ--i, kiò i kap goá chē chò-hoé. Goá chū sè-hàn tō bô kāng-nı̂-hoè ê cha-bó͘-gín-á phoāⁿ, bē-hiáu kap ı̄-sèng chih-chiap, m̄-káⁿ kap i kóng-oē, liân beh khoàⁿ--i to m̄-káⁿ, kan-taⁿ thàn i bô chù-ı̀, iōng ba̍k-boé khı̀ kā thau sàu.
Goá éng-oán ē-kı̀-tit i khui chhùi kā goá kóng ê thâu 1 kù oē: “Chhiáⁿ lí mài iô í-á.” Goá siūⁿ-beh hoē sit-lé, oē kâm tı̄ chhùi--nih, kóng bē chheng-chhó, goá m̄-sı̄ thiau-kang beh iô í-á, goán ê í-á liâm chò hoé, goá sı̄ hoaⁿ-hí gah phı̍h-phı̍h chhoah, í-á toè leh tín-tāng. 3 nı̂--ê ke chin chia̍p khó-chhı̀, chiu-khó, goe̍h-khó, kı̂-khó, goá kāng-khoán pó-chhı̂ tē 1 miâ, lāu-su hoat siúⁿ, iōng 1 pún liān-sı̍p phō͘, téng-thâu tǹg “Chióng”, goá phō͘-á lóng bián bé. Hit chūn phō͘-á kap ū pau phoê ê iân-pit lóng-sı̄ 5 kak, ū 1 pái, i kóng iân-pit siuⁿ chē, beh iōng pit kap goá oāⁿ phō͘-á, tú-hó goá 1 ki pit lóng siá gah chéng-thâu-á kiōng-beh gı̀m bē tiâu, ū-sı̂ beh siah iân-pit, siuⁿ té soah siah tio̍h chéng-thâu boé, tō kap i oāⁿ.
Koè 2 kang, lé-pài-jı̍t, beh àm-á sı̂, goá khı̀ chhı̄ gû tńg-lâi, thàn thiⁿ iáu boē chiâu àm, tı̄ mn̂g-kháu-tiâⁿ boé siá jı̄. Hit nı̂, goán iáu bô khan tiān-hoé, àm-sı̂ lóng-sı̄ tiám hoan-á-iû hoé tha̍k chheh. A-pa ùi goā-kháu jı̍p--lâi, gia̍h 1 ki sàu-se gím-á kiò goá kūi--lo̍h, tō kā goá sut. Chū seng 2 nı̂--ê khí, goá chāi-lâi m̄-bat bô khó tio̍h tē 1 miâ, a-pa mā goá chit kái nah ē thè-pō͘. Goá soah sa bô, bêng-bêng goá kāng-khoán thâu-miâ, a-pa nah ē oan-óng--goá ? Hō͘ a-pa sut 3 ê liáu-āu, i chiah kóng tı̄ thó͘-tē-kong biō-á chêng ê toā chhêng-chhiū kha kap 1 tı̄n chng-lāi lâng khai-káng, keh-piah chhù-the̍h ê chú-lâng tı̄ hia tián pó, kā lâng kóng goá ē lóng pó-chhı̂ tē 1 miâ sı̄ in cha-bó͘-kiáⁿ bô kap goá kāng-pan, chit pái bô kâng--a, in cha-bó͘-kiáⁿ khó tē 1 miâ, lāu-su siúⁿ i 1-pún phō͘-á, téng-thâu tǹg 1 jı̄ “Chióng”, i m̄-kam hō͘ cha-bó͘-kiáⁿ the̍h khı̀ siá jı̄ iōng, choan-kang iōng la̍h-choá hong khí-lâi chò kı̀-liām. A-pa kóng 1 pan bē ū 2 ê tē 1 miâ, pa̍t-lâng ū phō͘-á chò chèng-bêng, goá tek-khak sı̄ lak miâ. Goá kā sin iân-pit gia̍h hō͘ a-pa khoàⁿ, kā tāi-chı̀ kóng--chhut-lâi, a-pa chiah chai goá siū óng-khut, pháiⁿ-sè pháiⁿ-sè, hō͘ goá 1 kak-gı̂n, piáu-sı̄ tāi-chı̀ hut têng-tâⁿ--khı̀.
Goá bô ūi án-ni tō khı̀ hit ê súi tông-o̍h, 1 kak-gı̂n ē-tàng bé 5 tiuⁿ oē-seng-choá, koh lâi ê oē kiám-cha, goá tō bián koh sı̀-koè kā lâng chioh lâi hō͘ sian-siⁿ giām. Ē lé-pài khó chhı̀ liáu, goá tong-jiân mā koh the̍h tio̍h thâu-miâ siúⁿ ê phō͘-á, i koh beh kap goá iōng iân-pit oāⁿ, goá siūⁿ tio̍h hō͘ lâng sut 3 ē sàu-se gím-á, m̄ khéng kap i oāⁿ. Goá iā kiaⁿ i pı̀ⁿ bı̄n bô ài koh kap goá kóng oē, m̄ káⁿ kā i phiàn in lāu-pē ê tāi-chı̀ chhut-phoà, kan-taⁿ kóng “Goá sǹg bē hô”. Boé--á, i kóng goá nā kap i oāⁿ, siōng-khò ê sı̂, goá ē-sái thau khan i ê chhiú, án-ni, goá bián-kóng mā tâu-hâng. Koâⁿ--lâng ê sı̂, goá bô kāu-saⁿ thang chhēng, chhiú léng-ki-ki, m̄ chai sı̄ cha-bó͘-gín-á ê chhiú seⁿ-pún tō khah sio iah-sı̄ i chhēng thài-khong-i, kā i ê chhiú khan--leh, ū kàu hó ! Goá hi-bāng ha̍k-hāu ê siáu-sú-á boē-kı̀-tit iô hā-khò cheng-á.
Hit kang Lán-lâng sı̄ 3 goe̍h 14, pài-la̍k tha̍k 1 po͘ niâ, beh pàng-o̍h ê sı̂, i tu 1 tiuⁿ choá-tiâu-á hō͘--goá, kóng beh chhiáⁿ goá e-hng khı̀ in tau. Goá tńg khı̀ chhù, m̄ káⁿ kā a-pa kóng, chhoē goán i--á, kóng tông-o̍h beh chhiáⁿ goá khı̀ in tau chia̍h àm. He sı̄ goá thâu-pái hō͘ lâng iau-chhiáⁿ khı̀ chò lâng-kheh, a-i choan-kang kái 1 niá a-pa khah bô phoà ê tn̂g-khò͘, iōng chhâi-hông-chhia-á bú 1 po͘ tah-tah, goá bô phoê-toà, koh thı̄ⁿ 1 tiâu pò͘-toà-á hō͘ goá hâ. Goá chhēng iáu-sı̄ siūⁿ khoah, m̄-koh, i--á chin boán-ı̀.
Goá tùi āu-piah kau chhu 1 tè pang-á koè khı̀ hit ê chhù-the̍h. Chhiûⁿ-ûi-á lāi koh ū chèng hoe chèng chháu, goá bē-hù khoàⁿ súi, chhiū téng ê pa̍t-á chin toā-lia̍p, n̂g--á bô lâng bán, iā-ū lián-bū kap iū-á. Hó-gia̍h lâng tau ê chhù iáu-sı̄ bô kāng, hit chūn kui chng kan-taⁿ chit kháu chàu sı̄ hiā-chhù, chhun--ê lóng tek-khó͘-á chhù khàm chháu chò chhù-téng, nā hong-thai lâi tō iōng chio̍h-thâu-á teh--leh, chiah bē chhù-koà hō͘ hong hian--khı̀. Chhù lāi tiān-hoé kng phà-phà, kı̂-koài, goán kui chng to iáu-bô chhāi tiān-hoé-thiāu, in nah ū tiān-hoé? Tông-o̍h chhut-lâi chiap--goá, seng chhoā goá khı̀ chhù piⁿ liâng-têng-á kha chē, kà goá 1 koá oē, kiò goá bē-sái làu-khùi.
Kàu hit sı̂ goá chiah chai-iáⁿ hit kang sı̄ i ê seⁿ-jı̍t, in lāu-pē kap i--á, i sı̄ kiò “pa-pa” kap “ma-ma”, kau-tài i chhiáⁿ khah chē tông-o̍h khı̀ in tau chia̍h seⁿ-jı̍t toh, i kiaⁿ tông-o̍h kóng chhut i bô khó koè tē 1 miâ ê tāi-chı̀, m̄ káⁿ chhiáⁿ in lâi, bô chhiáⁿ 1-ê-á lâi mā kóng bē tit koè, chiah pài-thok goá kā i tàu am-khàm. In pē-bú chin hoan-gêng--goá, kui toh lóng-sı̄ goá hán-tit chia̍h--koè ê chhiⁿ-chhau. A-peh it-tı̍t leh chhàu-toāⁿ kóng goá hō͘ in cha-bó͘-kiáⁿ jiok--koè, chhiáⁿ goá m̄-thang khoà-ı̀, chı̄n-liōng chia̍h, sǹg an-ùi--goá. Tông-o̍h tō sai-nai kiò pa-pa mài koh kóng che, a-peh soà--lo̍h koh o-ló cha-bó͘-kiáⁿ chiah-nı̄ sè-hàn tō chai kò͘-khiam, kā pa̍t-lâng lâu bı̄n-chú. I koh kóng téng ha̍k-kı̂, nā ū the̍h siúⁿ ê phō͘-á tńg--khı̀, i tō siúⁿ 10 kho͘, iā siúⁿ pah goā kho͘--a. Ma-ma kóng i chin koai, lóng khiām--khí-lâi, beh pài-thok tı̄ Jı̍t-pún ê a-ı̂ thè i bé “o͘-nin-gió” tńg--lâi. Goán tông-o̍h ū pah goā kho͘ ? Goá thiaⁿ 1 ē kiōng-beh hūn--khı̀.
Chia̍h pá, a-ḿ koh pau ke-thúi kap 1 tè san-chân-bah, beh hō͘ goá chah--tńg-khı̀. Tông-o̍h gia̍h 1 ki bián tiān-thô͘ ē kng koh bô sêng ba-té-lih--ê, sè-sè-ki-á chin súi kóng sı̄ “chhiú-tiān-á”--ê, iân in tau chhiûⁿ-ûi-á piⁿ ê chhân-hoāⁿ-á-lō͘ poê goá kiâⁿ. Chhiⁿ chin kng, ná thiⁿ-téng ū chin chē ki chhiú-tiān-á, m̄-koh lı̄ siuⁿ hn̄g, chhiō bē kàu thô͘-kha. Àm-thâu-á chúi-ke toā-sè-chiah háu, lāu-á siaⁿ khah tı̂m, ná chàu kē-im, thûn-á sı̄ tiong-im, sin-á siaⁿ iù-iù tō sı̄ koân-im, tı̄ àm-bin-bong ê chhân--nih chàu-ga̍k khan-khek. Chhân-hoāⁿ-á-lō͘ sè-tiâu, i kiaⁿ poa̍h-tó, chhun chhiú hō͘ goá khan, koh jú kiâⁿ jú oá. Goá siūⁿ beh kap i kiâⁿ khah oá koh m̄ káⁿ, chı̄n-liōng siám kiâⁿ chhân-hoāⁿ piⁿ, soah poa̍h lo̍h chhân-té, i toè goá siak--lo̍h. Goá ê saⁿ-khàu lóng tâm, ka-chài i poa̍h tı̄ goá seng-khu téng, bô bak tio̍h chúi. Sin kái hó ê tn̂g-khò͘ tâm bô iàu-kín, i phak tı̄ goá seng-khu ê khı̀-bı̄, kui-kò-goe̍h lóng bô thè.
Tha̍k 4 nı̂ ê sı̂, in kui ke tō lóng soá khı̀ Bí-kok, tú khai-ha̍k hit kang, lāu-su soan-pò͘ chit-ê siau-sit, goá sim-koaⁿ-thâu chhih-chha̍k, nâ-âu-kńg tı̄ⁿ-tı̄ⁿ, bô-tiuⁿ-bô-tı̂ ba̍k-sái liàn--lo̍h-lâi. Phah khui iân-pit a̍p-á, kúi chat chhun 1 tè-á-kiáⁿ ê iân-pit iōng phō͘-á choá pau--khı̀-lâi, goá bô beh koh iōng. Tńg khı̀ chhù tō iōng iân-phiáⁿ khok-á té--leh, kap 1 tiuⁿ siá i ê miâ kap seⁿ-jı̍t ê choá-tiâu-á khǹg chò-hoé, hong hō͘ ba̍t, kā tâi tiàm hō͘-lêng-á piⁿ hit châng khó͘-lēng-á kha, hō͘ chit ê pı̀-bı̍t tı̄ hia puh-íⁿ, seⁿ-thoàⁿ.
Sı̄--lah, kū-le̍k 3 goe̍h 14 hit kang, goá 1-sı̀-lâng bô khó-lêng boē-kı̀--tit, m̄-sı̄ 『青青河畔草』 hit chhut chhin-chhiūⁿ gín-á pān-ke-hoé-á ê loân-chêng, hit kang mā-sı̄ goá ê seⁿ-jı̍t, goán tú-hó sı̄ kāng nı̂ kāng goe̍h kāng jı̍t seⁿ-jı̍t, chit chân tāi-chı̀ sı̄ hit kang goá tńg--khı̀ liáu-āu, i--á sa̍h poàⁿ ut mı̄-soàⁿ leh tán--goá, kóng chū-lâi sı̄ “Toā-lâng seⁿ-jı̍t chia̍h bah, gín-á seⁿ-jı̍t chia̍h phah”, goá chhēng tn̂g-khò͘ ná sin-sū koh hō͘ lâng chhiáⁿ khı̀ chē toh, sǹg toā-lâng--a, thâu kái kā goá kóng goá ê kū-le̍k seⁿ-jı̍t. Bô bah, mı̄-soàⁿ mā ē-sái. Goá kā bah the̍h hō͘ a-i, kóng beh pau hō͘ sió-tı̄, sió-moē chia̍h--ê. A-i kín khı̀ sio hiuⁿ kám-siā pu̍t-chó͘, kóng i khah chá bat hē goān, tán goá chò seⁿ-jı̍t it-tēng beh ū bah, tú leh hoân-ló, chiâⁿ-sı̍t tō ū--a.
Goá koh khı̀ chng-thâu se̍h 1 po͘, se̍h tùi kau āu koè, thó͘-tē-kong biō-á kap hit lo̍h ū chhiûⁿ-ûi-á ê chhù-the̍h lóng bô--khı̀-á, goân-pún ê só͘-chāi khí 1 keng toā biō, hiuⁿ-hoé chin ōng. Biō chêng hit châng toā chhêng-chhiū goân-chāi, kan-taⁿ lāu gah chhùi-chhiu jú lâi jú tn̂g.
