Iâu-giân thang kiaⁿ

Chá-chêng tı̄ Bí-chiu lâm-pêng bó͘- siâⁿ, hia put-chí iâu-giân sēng-hêng , jı̂n- sim chin kiaⁿ-hiâⁿ, sio-thoân kóng ū chı̍t-ê kúi tı̄ siâⁿ-lāi sı̀-kè chia̍h gín-á . Mn̄g kúi tùi tah-lo̍h lâi, chiū kóng m̄- chai ; mn̄g kúi sı̄ cha-po͘ á-sı̄ cha-bó͘ , iā kóng m̄ chai . Nā sı̄ sio thoân i chia̍h chin chē gín-á , chiū ta̍k-lâng kóng , ta̍k lâng sı̀n , tı̀-kàu lâm-hū ló-iù kiaⁿ-hiâⁿ kàu-ke̍k .

Hit-tia̍p ū chı̍t-ê goā-kok lâng kiâⁿ- iû tı̄ in ke-chhı̄ , tùi chı̍t-ê gín-á thó hoé chia̍h-hun , gín-á khoàⁿ-kı̀ⁿ , chiū chhiok-tio̍h i sim-lāi ê kiaⁿ-hiâⁿ , chiū piàⁿ miā cháu , kiaⁿ-liáu hō͘ thoa khı̀ chia̍h , cháu kàu poa̍h-tó siak-tio̍h thâu-khak . Ke- chhı̄ ê lâng hut-jiân khoàⁿ-tio̍h goā-ūi lâng, koh khoàⁿ-kı̀ⁿ gín-á phı̄ⁿ-thâu phoà, lia̍h i chò chia̍h gín-á kúi, tú-á chia̍h chı̍t-chhùi, só͘-í phı̄ⁿ-thâu ū khang. Tùi án-ni chiū toā-siaⁿ âu-kiò, chèng-lâng chū-chı̍p lia̍h hit-ê goā-ūi lâng cheng- phah; sûn-cha khióng-kiaⁿ siong-hāi sı̀ⁿ- miā, chiong i ah-sàng kàu koaⁿ-hú, chèng-lâng iā lóng khı̀, ta̍k-ê chí i sı̄ chia̍h gín-á ê kúi.

In chı̍t lâng kóng, I chia̍h 110 ê lah ! Koh chı̍t lâng kóng, Kiám nā 110 ê, chha-put-to 200 khah ke . Iū koh chı̍t-lâng kóng, Put-chí 200 ê, goá sı̍t-chāi khoàⁿ-kı̀ⁿ i chia̍h 250 ê lah . Ū ê kóng, I lia̍h-tio̍h gín-á lóng sı̄ chhiⁿ chia̍h; ū ê kóng, Goá boē-bat thiaⁿ-kı̀ⁿ i chhiⁿ chia̍h , lóng sı̄ koè sio se̍k chiàⁿ chia̍h; ū ê kóng, lóng m̄-sı̄ án-ni, i lóng chhiat kui-tè lâi chia̍h, iā liû tn̂g-tō͘ chia̍h. Chèng-lâng jiáu-loān hun-hun, só͘ kóng m̄ nā chı̍t iūⁿ.

Hit-sı̂ koaⁿ-hú chai in sı̄ iâu-giân, kiaⁿ-liáu peh-sı̀ⁿ kong-jı̍p gê-mn̂g-lāi; chiū kā hit lâng oāⁿ pa̍t-iūⁿ saⁿ-á-khò͘, hō͘ i tùi pa̍t tiâu-lō͘ tô-cháu .

Hāiⁿ--ah! chit-hō sū chin-chiàⁿ kı̂-koài. Chiông-tiong koh khah kı̂-koài, chiū-sı̄ chèng-lâng só͘ kóng--ê chhin-chhiūⁿ lóng sı̍t-sū; cha-khó kàu chim, siâⁿ-lāi lóng bô ū chı̍t kháu-chàu sit-lo̍h gín-á!

(Tâi-oân Hú-siâⁿ Kàu-hoē-pò tē 212 koàn, 1902 nı̂ 11 ge̍h)