Mô͘-sı̂n-á Halulu (Halulu-the-evil-one)
Jı̍t-thâu chhiah-iāⁿ-iāⁿ koà tı̄ thiⁿ-téng, Aukele tı̄ chiáu-hiaⁿ-tı̄ ê chhù--nı̍h khùn kah chiok lo̍h-bı̂n--ê. Tiàm hoē-gı̄-sek lāi, Namaka tng teh kah i ê hiaⁿ-tı̄ khui-hoē thó-lūn. “Aukele sı̄ siáng? i tàu-té ū sáⁿ sı̂n-kı̂ ê ui-la̍t?” Namaka teh mn̄g: “siūⁿ bē-kàu i koh ē-tàng phiah koè goá-ê chiáu-mo͘-kı̂-á, kā Moela piàn-sêng hoé-hu, koh chai-iáⁿ liāu-lí ū to̍k! I tùi lán ê ui-hia̍p sı̍t-chāi chiok toā--ê. Lán it-tēng ài kā i thâi tiāu!”
“Bē-sái tit,” pe̍h-chiáu-hiaⁿ kóng: “Lán bē-sái án-ne chò.”
Namaka ê ba̍k-chiu ná hoé teh to̍h, sih--leh sih--leh: “Ūi-sáⁿ-mı̍h?”
“Nā-sı̄ i oa̍h--leh, tùi lán khó-lêng khah iú-lı̄,” kı̂-tiong chı̍t-ê hiaⁿ-tı̄ hoê-tap: “siūⁿ khoàⁿ-māi--leh, toā-chí-thâu-á! Tı̄ lí thóng-tı̄ “Halani jı̍t-lo̍h-chi-tó” ê chit kúi tang, kám bat chhut-hiān chiah-nı̍h lı̄-hāi ê lâng? Jı̂-chhiáⁿ koh chiah-nı̍h ian-tâu? Nā-sı̄ kā i thâi-sat, tùi lí tàu-té ū sím-mı̍h hó-chhù--leh? Ūi-sím-mı̍h bô-ài i pı̀ⁿ-chiâⁿ lí ê lâng--leh? kah Aukele kiat-hun! Ká-sú ū i tı̄ sin-khu piⁿ, lí tō ē chiâⁿ-chò thian-hā bû-te̍k--a”
Khı̀-hun bān-bān-á teh piàn-hoà, goân-pún tı̄ Namaka bı̄n--nı̍h ê hùn-nō͘, chiām-chiām piàn-chò kan-sı̂n-á chhiò--lo͘. “Lí kóng liáu chin tio̍h,” i sêng-jı̄n kóng:“m̄-koh tı̄ goá tông-ı̀ beh kè hō͘ chit-ê chheⁿ-hūn-lâng chı̀n-chêng, i pit-su ài seng kah mô͘-sı̂n-á Halulu kı̀ⁿ chı̍t-bı̄n.”
Phú-chiáu-hiaⁿ khòng-gı̄ kóng: “Lí kám chin-chiàⁿ kam kā i sàng-khı̀ kah hit-ê choan-bûn teh chia̍h lâng-bah ê Halulu kı̀ⁿ-bı̄n? Kàu-taⁿ ná-chhiūⁿ iáu bô lâng ū hoat-tō͘ àn i-hia thoat-sin!”
Namaka tı̀m-thâu kóng: “Hèⁿ! Goá chai! nā bô, kám ū sím-mı̍h khah hó ê khó-giām hong-hoat--leh? Nā-sı̄ Aukele ē-tàng an-choân thoat-sin, goá tō kè hō͘ i.”
Sui-jiân sı̀-ê hiaⁿ-tı̄ lóng bô chàn-sêng chit-ê pān-hoat, m̄-koh Namaka iû-goân chiâⁿ kian-chhı̂ án-ne chò.
Tán Aukele khùn-pá cheng-sı̂n, ùi chài-seng-hio̍h ê chhiū-hio̍h khip-siu êng-ióng, tō khı̀ chhoē lú-cho̍k-tiúⁿ Namaka.
Lú-cho̍k-tiúⁿ Namaka khoàⁿ-tio̍h Aukele, bı̄n-á chhiò--leh chhiò--leh: “Aukele, lêng-le̍k kāng-khoán ê lâng bô it-tēng ài chò te̍k-jı̂n, goá siūⁿ beh khı̀ hái-kı̂ⁿ hioh-khùn chı̍t-kang, lí kám ū chhù-bı̄ beh chò-hoé lâi-khı̀?”
Aukele chiap-siū i-ê iau-chhiáⁿ, chah tio̍h I ê hô͘-lô͘ toè Namaka khı̀, thiⁿ-khı̀ chiâⁿ hó, thiⁿ-téng chı̍t-sut-á hûn to bô, Namaka kéng chı̍t-ūi khah oá hái-kı̂ⁿ ê toā-chio̍h-thâu chē lo̍h-lâi, put-sı̂ ū hái-éng chhiâng koè-lâi. Chit-ê sı̂-chūn Aukele poàn-sı̀n-poàn-gı̂, kám-kak tio̍h chiâⁿ hoâi-gı̂, tàu-té lí Namaka sı̄ teh pı̀ⁿ sáⁿ-mı̍h báng--leh? I chù-ı̀ teh khoàⁿ hái-chúi.
“Ē kiaⁿ--simh?” Namaka teh kā Aukele thí-chhiò. Sûi-āu I chhiong hiòng hái-kı̂ⁿ, thiàu-jı̍p hái--nih. Aukele koáⁿ-kín tı̄ soa-po͘ téng ó͘ chı̍t-ê khang beh kā hô͘-lô͘ tâi khit-lâi. Tı̄ i beh chiong soa-á khàm-khí-lâi chı̀n-chêng, iū-koh thiaⁿ tio̍h Lono ê siaⁿ-im.
“Sí-bông í-keng poe hiòng chia lâi--loh, Aukele! Mô͘-sı̂n-á Halulu í-keng beh chia̍h Lí--a!”
Tu̍t-jiân-kan jı̍t-thâu khı̀ hō͘ chı̍t-tah o͘-iáⁿ khàm tiâu-leh, poàn-khong tiong poe lâi chı̍t-chiah toā-chiáu ná-chhiūⁿ la̍h-hio̍h teh lia̍h ke-á-kiáⁿ kāng-khoán, hiòng Aukele chhiong koè-lâi. Aukele hiám-hiám-á bē-hù the̍h i hit-kha hô͘-lô͘, tō hō͘ chit-chiah toā-chiáu kau hiòng thiⁿ-téng poe cháu khı̀.
Chit-chiah toā-chiáu poe khı̀ chiâⁿ kú, poe lâi-kàu chı̍t-ê chiok chhim koh bô lâng ê soaⁿ-kheⁿ. Chiah chiong Aukele pàng lo̍h-lâi, tō má-siōng poe cháu. Aukele sı̀-kho͘ lián-tńg khoàⁿ-khoàⁿ--leh, hoat-kak chit-ê só͘-chāi saⁿ-pêng sı̄ chio̍h-piah, chı̍t-pêng sı̄ hiong-kông ê hái-éng, siūⁿ beh lı̄-khui chit-ê só͘-chāi sı̄ bô hiah-nih kán-tan. Eh! káⁿ-ná ū lâng teh kóng-oē--ó͘? I ê thâu-khak toè siaⁿ-im oa̍t-lâi-oa̍t-khı̀, nn̄g-lúi ba̍k-chiu kim-kim-khoàⁿ, chit-ê sı̂-chūn ū nn̄g-ê lâng àn piah-téng ê chio̍h-tōng pê chhut-lâi,chit nn̄g-ê lâng Aukele koè-khı̀ m̄-bat khoàⁿ-koè, seⁿ-chò ū kàu sán, sán kah chhun kut-thâu, bô saⁿ-niú bah, ba̍k-sı̂n beh-sí nā-hàiⁿ, lia̍h Aukele kim-kim-khoàⁿ, ná-chhiūⁿ chiâⁿ khó-liân I ê khoán.
“Che sı̄ Halulu chheⁿ-chhau ê àm-tǹg!” Kı̂-tiong chı̍t-ê sió-khoá sau-siaⁿ sau-siaⁿ án-ne kóng.
“Hit-chiah chân-jím ê chiáu-á bián siūⁿ beh chia̍h goá!” Aukele toā-siaⁿ kóng: “Kín kā goá kóng, hit nn̄g-chiah koài-bu̍t tang-sı̂ ē koh tńg-lâi chia?”
“Jı̍t-thâu lo̍h-soaⁿ ê sı̂-chūn --- ē thàu toā-hong. Halulu tō ē lâi--a! I chı̍t-kài àm-tǹg ài chia̍h nn̄g-ê lâng. ”chit-ê lâng kóng-oē chiâⁿ khéng-tēng, bô chhiūⁿ thâu-tú-á hit-ê hiah-nı̍h sè-siaⁿ.
“Lín khah ē bô-ài khuh jı̍p-khı̀ chio̍h-tōng lāi--neh?” Aukele teh mn̄g.
“Ū--a! Goán ū chhı̀-koè--a, m̄-koh i lóng iōng sı̍t-á kā goán siàn chhut-lâi.” “Iōng khah lāi ê chio̍h-thâu kā i-ê sı̍t-á koah hō͘ tn̄g!”
“Mā ū chhı̀ koè, in-ūi i ē-hiáu mô͘-hoat, siū-siong chiâⁿ-khang lâu-hoeh ê só͘-chāi liam-mih tō koh hó khı̀--a kan-taⁿ iōng hoé chiah ū hoat-tō͘ húi-biat Halulu--niâ khó-sioh goán bô hoé-chéng thang khí-hoé.”
“Goá ū hoat-tō͘,” Aukele kóng: “Lán ài án-ne chò.”I chı̍t-pō͘ chı̍t-pō͘ siông-sè kā i-ê kè-oē kóng hō͘ In thiaⁿ.
Jı̍t-thâu beh lo̍h-soaⁿ ê sı̂, chia-ê lâng pê jı̍p-khı̀ siōng chhim ê chio̍h-tōng lāi, chiàu Aukele ê chí-sı̄, jı̍p-khı̀ lú-chhim lú-hó. Aukele chhiú giâ i sı̂n-kı̂ ê to-á, khuh tı̄ chio̍h-tōng khang-chhùi ê só͘-chāi.
Chiâⁿ kín chı̍t-chūn hong ká koè--lâi-a. Soà lo̍h-lâi sı̄ phi-phi-phia̍k-phia̍k ia̍t sı̍t ê siaⁿ-im. Chı̍t-phı̀ⁿ chiok toā ê o͘-hûn kā kui-ê soaⁿ-kheⁿ khàm tiâu-tiâu, Aukele khoàⁿ-kı̀ⁿ chit-chiah chân-jím khó-phàⁿ ê toā-chiáu-á chhiong àn chio̍h-tōng lo̍h-lâi.
I iōng chiàⁿ-chhiú-pêng ê sı̍t-á chhun jı̍p-khı̀ chio̍h-tōng ê khang-chhùi--nih, sı̀-kè bong-lâi bong-khı̀, siūⁿ beh sa khoàⁿ ū chı̍t-koá mı̍h-kiāⁿ thang lâi hàu-ko͘ bô. Che sı̄ hā-chhiú ê hó ki-hoē, Aukele iōng i sı̂n-kı̂ ê to-á, chhân-chhân kā i-ê toā-ki sı̍t-á phut lo̍h-khı̀.
Halulu thiàⁿ kah ki-ki kiò, chiong siū-siong ê sı̍t-á kiu tò tńg-lâi, choán chı̍t-ē sin, kè-siok kā i tò-pêng ê sit-á chhun jı̍p-khı̀ chio̍h-tōng lāi, Aukele ê to-á kāng-khoán bô kheh-khı̀ kā liô lo̍h-khı̀ chit-sı̂ Halulu ê sı̍t-á chin-chiàⁿ siū-siong chhám-tāng. Soà lo̍h-lâi kı̂-tiong chı̍t-ki kha-jiáu-á koh khı̀ hō͘ Aukele chām tn̄g-khı̀.
Chit-chiah chiáu-á ê ai-kiò siaⁿ káⁿ-ná lûi-kong leh tân--leh. M̄-koh iû-goân bē sí-sim, lēng-goā hit-ki kha-jiáu sûi toè leh chhun jı̍p-khı̀ tōng-lāi, kāng-khoán koh hō͘ Aukele chām tn̄g. Chit-sı̂ bô kha bô sı̍t ê Halulu, chı̍t-bı̄n chhám-kiò, chı̍t-bı̄n kā i pháiⁿ khoàⁿ bı̄n ê thâu-khak tu jı̍p-khı̀ chio̍h-tōng lāi.
Aukele iû-goân m̄ pàng I soah, chhiú giâ-tio̍h chit-ki sı̂n-kı̂ ê to-á, chhut-la̍t hiòng Halulu tn̂g-tn̂g ê ām-kún phut lo̍h-khı̀, kiat-kó chı̍t-lia̍p chhiūⁿ koài-bu̍t ê thâu-khak liàn ko̍h tı̄ chio̍h-khut ê thô͘-kha. Chı̍t-tiûⁿ kek-lia̍t ê chhám-chiàn tō án-ne kiat-sok. Kín-tiuⁿ, kiaⁿ-hiâⁿ khióng-pò͘.
Ta̍k-ê lóng hoaⁿ-hí kah khàu chhut-lâi, chia-ê lô͘-lē tàu-saⁿ-kāng kā chām-tn̄g ê chiáu-á si-thé tı̀m lo̍h-khı̀ soaⁿ-kheⁿ ê tiong-ng, jiân-āu Aukele àn hô͘-lô͘ the̍h chhut i ê ûi-kin, tı̄ khong-tiong sūn-chhiú chı̍t-ē ia̍t, bô chı̍t-tah-kú-á, Halulu ê si-thé tō sio kah chhun chı̍t-tui hoé-hu chham kut-thâu niā-niā.
Chit-má só͘-ū ê lâng lóng m̄-bián koh siū tio̍h hit-chiah chiáu-á ê ui-hia̍p--a, m̄-koh in iû-goân hō͘ lâng koaiⁿ tı̄ chit-ê soaⁿ-kheⁿ lāi-té. “Chit-kú ta̍k-ê lâi chia̍h koá mı̍h-kiāⁿ, hó-hó-á hioh-khùn chı̍t-ē.” Aukele kiàn-gı̄ kóng:“Bı̂n-á-chài lán tō ū hoat-tō͘ chhoē tio̍h chhut lō͘--a.”
I kā chài-seng ê chhiū-hio̍h-á pun hō͘ só͘-ū ê lô͘-lē chí iau. Chū-chiông lâi kàu chit-ê só͘-chāi í-āu, chia-ê lô͘-lē tō m̄-bat hó-hó-á hioh-khùn koè, só͘-í ta̍k-ê chı̍t tó lo̍h-lâi tō khùn kah chin ka-choē. Tng ta̍k-ê khùn kah lo̍h-bı̂n ê sı̂, soah lâi hō͘ chı̍t-chūn ia̍t sı̍t-á ê siaⁿ-im chhá cheng-sı̂n.
