Ióng-kám ê Lông-hu
Tı̄ A-hui-lı̄-ka-chiu kı̄n tı̄ bó͘ hái-piⁿ ê só͘-chāi ū chı̍t ê thâu-mn̂g chhùi-chhiu pe̍h ê lāu choh-sit lâng kú-kú khiā ke tı̄ hia. I nā bô só͘ sū-sū chiū siông-siông chhut-khı̀ khiā tı̄ hái-kı̂ⁿ teh khoàⁿ goā-hái só͘ teh keng-koè ê chûn-chiah. Ū 1 jı̍t chit ê lāu-peh ah, tiàm tı̄ chhù-lāi ê sı̂, hut-jiân-kan khí toā hong-thai. Koh tiap-á-kú chiū ū 1 ê siàu-liân lâng chhiⁿ-hiông cháu lâi pò kóng, Chit-tia̍p ū chı̍t chiah chûn hoān-hong, phah kàu chhùi-kô͘-kô͘. I chek-sı̂ khiâ chı̍t chiah só͘ ài-sioh ê bé khı̀ kàu hái-kı̂ⁿ. Hong-éng sui-jiân chin toā, iáu-kú hiah ê chúi-siú kiò kiù lâng ke̍k pi-siong ê siaⁿ thiaⁿ hiān-hiān. I siūⁿ ài beh khı̀ kiù in, m̄-kú tı̄ sin-piⁿ bô poàⁿ chiah chûn. Siūⁿ-liáu bô piàn-pō͘, ko͘-put-chiong pháu hit chiah bé siû-lo̍h chúi khı̀ kiù hiah ê siū chhám ê chúi-siú. Tı̄ hoāⁿ-téng ū chin chē lâng khoàⁿ i teh khı̀, tāi-ke kiaⁿ kàu beh phoà-táⁿ, chóng--sı̄ chit ê lāu choh-sit peh ah, lóng bô sió-khoá tah-hiahN, hó-táⁿ tı̍t-tı̍t kap bé siû kàu chûn kòng-phoà ê só͘-chāi. Thêng bô chia̍h chı̍t poah hun kú, i kap bé lóng koh siû tò-tńg, tı̄ bé-téng-nı̍h ū chài 2 miâ chúi-siú, chèng lâng khoàⁿ liáu, bē kı̀m-tit khui-siaⁿ phah-chhiú hoaⁿ-hí o-ló i ê ióng-kám kàu án-ni. I lóng bô thêng-khùn, liâm-piⁿ koh khí-sin khı̀ kiù 2 lâng, chhin-chhiūⁿ án-ni kè-kiōng ū 7 pái. Tē it lō͘-bé pái koh khı̀, tı̄ bé-téng iû-goân hō͘ 2 lâng chē, siû tò-tńg lâi kàu poàⁿ-chām, i ê seng-khu nńg-ka̍uh-ka̍uh, soà hō͘ toā éng khàm-ba̍t, put-ti khı̀-hiòng. I pún-sin sòng-sit sı̀ⁿ-miā, chóng--sı̄ hit chiah bé kap 14 miâ ê chúi-siú lóng an-jiân tit-tio̍h kiù. Hé! Chit 14 miâ ê chúi-siú m̄ chai beh lâu loā-chē ê ba̍k-sái lâi kám-siā chit ê lāu in-jı̂n! Taⁿ lán ê Kiù-chú Iâ-so͘ m̄-nā ūi-tio̍h 14 lâng nā-tiāⁿ, I ū kam-goān pàng-sak sı̀ⁿ-miā lâi chín-kiù choân sè-kài ê jı̂n-lūi. Só͘-í lán eng-kai ka-poē chheng-chàn Kiù-chú bû-liōng bû-sò͘ ê thiàⁿ-thàng.“Lâng ūi-tio̍h pêng-iú hiàn sı̀ⁿ-miā, thiàⁿ bô ū pí chit-ê khah toā--ê.”“Lán iáu-kú chò choē-jı̂n ê sı̂, Ki-tok thè lán sí.” (Tâi-oân Kàu-hoē-pò tē 438 koàn, 1921 nı̂ 9 ge̍h)