Iú-bı̄ toán-giân 01

Ùi Wiki Tô·-su-kóan
Thâu-sū Chiah-ê toán-giân sı̄ tùi chē-chē sin-bûn pò khioh lâi hoan-e̍k. Ǹg-bāng khoàⁿ chiah-ê sı̍t-sū ē chò ka-kı̄ ê bián-lē, koh ē bián-lē pa̍t-lâng. 
"Goá ê sı̂n-hûn tio̍h o-ló Chú." (Si 103:1) 
Lâng kóng ū chı̍t pái, ū chı̍t ūi im-ga̍k-ka chin chhut-miâ ê sian-siⁿ, kap chin-choē chàu-ga̍k ê, gı̂m-si ê, teh tāi-seng liān-sı̍p. Tng in gı̂m-si, hong-khı̂m kap kó͘ kap ta̍k-chéng ê ga̍k-khı̀ ê siaⁿ chin toā ê sı̂, tiong-kan ū chı̍t ê chē tı̄ āu-piah kak teh pûn pit-ko-lô (soè-soè ê ta̍t-á) ê, sim-lāi siūⁿ kóng, "Goá mih-sái án-ni choè? Tı̄ chiah-nih toā siaⁿ ê lāi-bı̄n ke goá chit-ê soè-soè ê ta̍t-á siaⁿ sı̄ bô sím-mı̍h ı̀-sù." Só͘-í i chiū thêng teh. Hut-jiân chí-hui-oân kia̍h i ê chhiú kiò tāi-ke lóng thêng. Hit sı̂ i chiū mn̄g, "Pit-ko-lô tı̄ tah-lo̍h?" Chin bín-chia̍t lēng-lāi ê hı̄-khang oē liâm-piⁿ thiaⁿ-chhut soè-soè ê ta̍t-á siaⁿ bô pûn i ê tiāu, iā soà liân-lūi-tio̍h kui tı̄n ê im-ga̍k. Goá ê sı̂n-hûn ah! Tio̍h chı̄n lí ê la̍t choè lí ê hūn. Lí sui-jiân sı̄ sió-khoá, hō͘ lâng khoàⁿ boē chhut, iáu-kú Siōng-tè teh chhē lí khoàⁿ ū o-ló I á-bô? I teh soè-jı̄ thiaⁿ lí ê siaⁿ. I ê toā ú-tiū ê im-ga̍k, in-ūi lí ê kám-siā I, chiâⁿ-choè khah hong-hù, khah hó thiaⁿ. "Goá ê sı̂n-hûn tio̍h o-ló Chú." 
Bô m̄-hiâm. "Í-sek-lia̍t lâng hiâm Mô͘-se." (Chhut 16: 2) 
Hek-jı̂n hu-jı̂n sı̄ chı̍t ê tē-it gâu-hiâm ê lâng, bô-lūn sím-mı̍h mı̍h, á-sı̄ sím-mı̍h lâng, i m̄-bat bô-hiâm. Lō͘-bé ū chı̍t ūi bo̍k-su, i siūⁿ-tio̍h ū chı̍t-hāng tāi-chı̀ sı̄ hit-ê hū-jı̂n-lâng bô thang koh hiâm sím-mı̍h ê. Só͘-í i tı̄ koe-lō͘-nı̍h tn̄g-tio̍h chit-ê hū-jı̂n-lâng ê sı̂, chiū chhiò-chhiò kā i kóng, "Ah! Lí chit pái tek-khak chin hoaⁿ-hí, in-ūi goá thiaⁿ-kı̀ⁿ lâng kóng lí chit-pái ê han-chû sı̄ tē-it hó, siu-sêng chin-choē." Chit-ê hū-jı̂n-lâng chiū kā i tı̍t-tı̍t khoàⁿ, ı̀n i kóng, "Bô kàu chin pháiⁿ, chóng-sı̄ bô pháiⁿ han-chû thang chhı̄ ti." 
Lí Sian-siⁿ Má-ná. 
Lí Sian-siⁿ sı̄ chı̍t ê chin lāu koh sòng-hiong ê Ki-tok-tô͘. I ê keh-pak hiaⁿ-tı̄ sı̄ chı̍t ê hê-siūⁿ. I ta̍k-pái the̍h mı̄-pau kap mı̍h lâi hō͘ Lí Sian-siⁿ ê sı̂, Lí Sian-siⁿ chiū kóng, "Che sı̄ goá ê Thiⁿ Pē ê un-hūi." In-ūi i chai he sı̄ Thiⁿ Pē pı̄-pān ê. Hit-ê hê-siūⁿ chin siū-khı̀ i kóng, "Nā m̄-sı̄ goá hō͘ lí chia̍h mı̍h, Siōng-tè tek-khak boē chiàu-kò͘ lí bô iau-gō." I ı̀n kóng, "Chia̍h-mı̍h sı̄ lí hō͘ goá, he sı̄ Siōng-tè hō͘ lí ū hit hō sim ê." Hit-ê hê-siūⁿ kóng, "Hó, goá chhiáⁿ lı̄-khui lí, khoàⁿ lí āu-lâi cháiⁿ-iūⁿ." 
Kúi-nā jı̍t āu, Lí Sian-siⁿ lóng bô mı̍h thang chia̍h, chóng-sı̄ tı̄ i teh kı̂-tó ê sı̂, tı̄ tiâⁿ-nı̍h ū o͘-a ê siaⁿ. Kúi-nā chiah o͘-a teh saⁿ-phah, ka-la̍uh chı̍t-tè ti-bah kap chı̍t-tè mı̄-pau. 
Kàu teh chú hit tè bah ê sı̂, hit-ê hê-siūⁿ jı̍p-lâi kóng, "Lí ê Thiⁿ Pē ū hō͘ lí chia̍h-mı̍h á-bô?" Hit-chūn i khoàⁿ-kı̀ⁿ hit-tè bah, i gōng-ngia̍h kóng, "Lí tùi tá-lo̍h tit-tio̍h hit-tè bah ah?" I kóng, "Goá ê Thiⁿ Pē kià lâi ê." 
Tùi hit-sı̂ hit-ê hê-siūⁿ chin ài mn̄g siông-sè lâi bat Siōng-tè. Í-āu i hoé-kái soà chiâⁿ-chò thoân-tō-su, tı̄ Gı̄-hô-thoân chiàn-cheng ê sı̂, i siū thâi-sí. 
Thó chı̍t-chiah soè chiah káu. "Chú goá ài tit-tio̍h khoàⁿ-kı̀ⁿ." (Lō͘ 18: 41) 
To-má Sian-siⁿ chı̍t-pái teh tùi i soè pêng-iú kóng, lūn Iâ-so͘ i-hó chhiⁿ-mı̂ Pa-tí-mái ê sū. Kóng liáu chiū mn̄g i, "Siat-sú lí chhiⁿ-mı̂, lí beh tùi Iâ-so͘ thó sím-mı̍h?" I ı̀n kóng, "Goá beh tùi I thó chı̍t chiah soè chiah káu-á koà liān-á, thang chhoā goá kiâⁿ." M̄ chai lán ū joā-choē pái chhin-chhiūⁿ hit-khoán kiû káu, bô kiû ba̍k-kng? Che sı̄ tùi sı̀n Chú bô chhim. 
Bô hong lâi. "Chú, kà-sı̄ goán kı̂-tó." (Lō͘ 11: 1) 
Goá ê hiaⁿ-tı̄ kā goá kóng, i bat phoà-pı̄ⁿ chin siong-tiōng, kàu khah hó ê sı̂, i tiàm-tı̄ soaⁿ-nı̍h teh tiau-ióng i ê sin-khu. 
Tı̄-hia ū chı̍t ê ô͘, ū chı̍t jı̍t i chē tı̄ chûn-á-nı̍h. Hit-sı̂ hong-khí, chûn chiū sūn-sūn kiâⁿ, hut-jiân hong chı̄ⁿ, chûn iā thêng. I loán-jio̍k bô la̍t thang kò kàu hoāⁿ-nı̍h, i chiū kiû Chú hō͘ hong koh khí. 
I ê chhù-piⁿ khoàⁿ-kı̀ⁿ chit-ê sū, chiah chiong i ê chûn pa̍k tı̄ ka-kı̄ ê, āu-lâi kò oá hoāⁿ. 
Che chiū-sı̄ Chú ū thiaⁿ i ê kı̂-tó. I só͘ ài ê sı̄ kàu hoāⁿ-nı̍h, i soà kà-sı̄ Chú tio̍h ēng sím-mı̍h hoat-tō͘. Chóng-sı̄ Chú bô ēng i só͘ kà-sı̄ ê hoat-tō͘. Chú sı̄ ēng hit-ê chhù-piⁿ khı̀ thoa i ê chûn, án-ni ū chiâⁿ i ê só͘-ài, bô chiàu i ka-kı̄ só͘ kiû khí-hong. 
Tē-it toā ê chó͘-gāi. "Goá kám-siā Lí, in-ūi goá bô chhin-chhiūⁿ pa̍t-lâng." (Lō͘ 18: 10) 
Kiau-ngō͘ sı̄ lêng-sèng chı̀n-pō͘ ê toā chó͘-gāi. Hā-lí tú-á choè bo̍k-su ê sı̂, ū kap chı̍t ê gâu loê-chhân ê gı̄-lūn tō-lí. Chı̍t jı̍t in só͘ thó-lūn ê sı̄ "Sím-mı̍h sı̄ lêng-sèng ê chı̀n-pō͘ kap khoài-lo̍k ê that-gāi." Hā-lí Bo̍k-su kóng, "Tek-khak sı̄ m̄-jı̄n ka-kı̄ ê pháiⁿ." Choh-chhân ê kóng, "Tē-it khùn-lân ê, chiū-sı̄ lán ài kóng ka-kı̄ ê hó." 
Lâng ê sè-le̍k chhin-chhiūⁿ hóng. “M̄-thang hō͘ lín ê hó siū lâng húi-pōng.” (Lô 14:16) 
Chı̍t-pái tı̄ Hoâ-sēng-tùn bó͘ ê kang-chhiúⁿ lāi, ū chı̍t ê soè-soè ê kńg toé 1/2000 niú ê hóng. Chiah-ê hóng hut-jiân ka-la̍uh tı̄ toē-pán-nı̍h, soàⁿ-soàⁿ-khı̀, ēng bín-á kā i bín khí-lâi, koh ēng kúi-nā khoán ê io̍h-chúi soé toē-pán, ǹg-bāng thang tit-tio̍h kı̂-û ê, chóng-sı̄ bô-lūn soé joā-choē pái, iáu sı̄ ū hóng tı̄ toē-pán-nı̍h, múi soé chı̍t pái, chiū ū thang tit-tio̍h sı̀-pah kho͘ gûn ê hóng. 
Lō͘-bé chı̍t ê choè-ba̍k ê lâi siah toē-pán. Kàu saⁿ nı̂ āu só͘ siah ê phı̀ⁿ ēng hé sio, chhun hiah-ê hóng bô sio-khı̀. Lâng só͘ éng-hióng ê, bô lūn hó á sı̄ pháiⁿ, lóng sı̄ boē-oē siau-bô ê. 
M̄-sı̄ beh boē ê. "Bô hē that-gāi mı̍h tı̄ hiaⁿ-tı̄ ê lō͘." (Lô 14: 13) 
Ū chı̍t lâng miâ kiò Oē-ná, sı̄ chı̍t ê kùn-kiû choan-ka, ū miâ-siaⁿ ê lâng. Lâng kóng chı̍t pái ū chı̍t keng choè hun kong-si, chhiáⁿ i tio̍h èng-ún in chiong i ê siōng ı̀n tı̄ hun-a̍h-téng. Oē-ná tı̍t-tı̍t kū-choa̍t. Hun kong-si ê chı̍t lâng chin kı̂-koài, koh thiám-mı̄ i kóng, "Lín choè kiû-oân ê, kiám m̄-sı̄ tē-it ài chı̂ⁿ ê mah?" Kùn-kiû oân chin siū-khı̀ ı̀n kóng, "Goá tek-khak bô sūi-piān ài chı̂ⁿ. Siat-sú goá ēng goá ê siōng kap miâ ı̀n tı̄ hun-a̍h-téng, kiat-kó hō͘ chin-choē gín-ná ài chia̍h hun, goá chiū káⁿ kóng, bô-lūn lí hō͘ goá joā-choē chı̂ⁿ, goá iā bô beh choè chit-hō sū." 
Choè chin-sı̍t ê lâng. "M̄-thang pāi-hoāi i-----in-ūi Ki-tok thoè i sí." (Lô 14: 15) 
Ū chı̍t ê choè-chiú ê lâng, chin hó-gia̍h, In-ūi i ê hó-gia̍h, āu-lâi tı̄ chèng-hú ê lāi-bı̄n ū tit-tio̍h chin koâiⁿ ê tē-ūi. 
I ū chı̍t tiuⁿ chhiú chhah tı̄ i ê goā saⁿ ê tē-á-lāi ê siōng, kùi tı̄ hit-ê siâⁿ ê kong-thiaⁿ. Ū chı̍t jı̍t, ū chı̍t ê sòng-hiong ê hū-jı̂n-lâng khoàⁿ i. Lâng mn̄g i, "He sı̄ chı̍t tiuⁿ chin súi ê siōng á m̄-sı̄?" I ı̀n kóng, "Kang-hu sı̄ kàu-gia̍h hó, koh-khah hó, iáu-sı̄ tio̍h chiong i ê chhiú ūi tı̄ goá ê tiōng-hu ê tē-á-lāi, (I ê tiōng-hu sı̄ boé chiú ê lâng) án-ni chiū oē tú-tú chhin-chhiūⁿ i ê pún lâng." Ì-sù sı̄ i tùi boē chiú lâi tit-tio̍h chı̂ⁿ. I ka-kı̄ tit-tio̍h chı̂ⁿ, chóng-sı̄ pa̍t lâng siū-tio̍h chiú ê hāi. 
Tit-tio̍h sià-bián ê chêng-hêng. "I kiò goá tháu-pàng siū lia̍h ê lâng." (Lō͘ 4: 19) 
Tı̄ 1899 nı̂, Bí-kok bó͘ séng-tiúⁿ khı̀ kàu Khian-lâm siâⁿ, hit jı̍t tú-tú sı̄ kám-un jı̍t. I thiaⁿ-kı̀ⁿ lâng kóng Mú-tí Sian-siⁿ tı̄ kaⁿ-lāi teh kóng tō-lí, chiū chiong chı̍t tiuⁿ sià-choē toaⁿ, kià i hō͘ kaⁿ-lāi chı̍t ê hū-jı̂n-lâng. Chit-ê hū-jı̂n-lâng pún tio̍h siū koaiⁿ cha̍p nı̂ kú, chit-sı̂ sı̄ tú koaiⁿ saⁿ nı̂ kú niā-tiāⁿ. Mú-tí Sian-siⁿ chin hoaⁿ-hí hō͘ i kau-tài. 
Tı̄ i teh-beh kóng-soah ê sı̂, i chiū soan-pò͘ kóng, tı̄ in tiong-kan ê chı̍t lâng, teh-beh siū sià-bián, ū chı̍t tiuⁿ ê pı̂n-kù tı̄ chhiú-nı̍h. 
I chioh chit-ê beh lâi kóng bêng Siōng-tè ê sià-bián lâng. Chóng-sı̄ āu-lâi i khoàⁿ chhut tı̄ hiah-nih kín-tiong ê chêng-hêng, i boē-sái-tit koh tı̍t-tı̍t kóng lo̍h-khı̀. 
I chiū kiò hit-ê beh siū sià-bián ê hū-jı̂n-lâng ê miâ, kah i chı̀n-chêng lâi siū Séng-tiúⁿ só͘ sàng kám-un-jı̍t ê lé-mı̍h. Hū-jı̂n-lâng tiû-tû tia̍p-á-kú, āu-lâi âu-kiò chı̍t siaⁿ, iā khàu, iā chhiò, soà poa̍h-tó. I koh khí-lâi, koh-chài poa̍h-tó tı̄ kò͘ hoān-lâng ê ê kha. Mú-tí Sian-siⁿ khoàⁿ chit-hō sè-bı̄n chí-ū thang kán-kán kóng Siōng-tè sià-bián choē-koà ê hok-khı̀. 
Lō͘-bé Sian-siⁿ kóng, "Siat-sú lâng oē bêng-pe̍k tit-tio̍h sià-choē, tit-tio̍h tháu-pàng ê un-tián, lâng iā oē hoaⁿ-hí kàu tòng-boē tiâu." 
"Nā m̄-sı̄ hō͘ goá khoàⁿ-kı̀ⁿ teng ê jiah, goá tek-khak m̄-sı̀n." (Iok-hān 20: 25) 
Sè-kan lâng lóng teh khoàⁿ hiah-ê chiap-siū Ki-tok ê lâng, kiò I ê miâ ê lâng, chhēng Ki-tok ê lâng ū chiong Ki-tok hián-bêng tı̄ sè-kan á-bô? Sè-kan ta̍k só͘-chāi lóng teh kóng, "Nā bô hō͘ goá khoàⁿ-kı̀ⁿ teng ê jiah, goá tek-khak m̄-sı̀n." Siat-sú lán ê thêng-tō͘ bô pí sè-kan lâng khah koâiⁿ, lán ê tō-tek phiau-chún bô pí in khah koâiⁿ, koh lán ê pān-sū iā bô pí in khah hó, sè-kan lâng beh cháiⁿ-iūⁿ sı̀n lán, koh chı̀n chı̍t pō͘, sè-kan lâng beh giâu-gı̂ lán só͘ tāi-piáu ê Ki-tok. 
Gûi-hiám ê liông-sim. “Jia̍t-sim” (hêng 22:3) 
A-le̍k-san-tāi bat kóng, "Tng liông-sim tit-tio̍h Siōng-tè ê kng chiò ê sı̂, thang kóng sı̄ chı̍t ê chin ko-siōng ê koân-sè, chóng-sı̄ tng lán teh gû-gōng, hoān-choē á-sı̄ choè kè-thâu ê sū ê sı̂, chit khoán ê koân-la̍t beh hō͘ lán tùi-te̍k Ki-tok." Bat ū Ìn-tō͘ lâng, tùi Eng-kok ê chip-chèng-koaⁿ kóng, "Goán ê liông-sim kah goán nā tiōng-hu sí, hū-jı̂n-lâng tio̍h sio tı̄ sio sin-si ê chhâ-tui-nı̍h." Eng-kok koaⁿ ı̀n kóng, "Lín nā án-ni choè, goán ê liông-sim kah goán tio̍h chiong lín tiàu-sí." 
Sin oa̍h-miā. "Chú, goá tio̍h cháiⁿ-iūⁿ choè?" (Hēng 22: 10) 
Lō͘-tek sı̄ bó͘ só͘-chāi ê toā kho-ha̍k-ka, chı̍t-pái i the̍h chı̍t-châng chhiū, chit châng chhiū chin hoán-siông, āu-lâi pı̀ⁿ-kàu chin pháiⁿ-khoàⁿ, koh ū to̍k. Chóng-sı̄ keng-kè chit-ūi kho-ha̍k-ka, ēng hoat-tō͘ kā i oāⁿ-sin, i lóng-chóng ê kū-sı̍p-koàn tùi án-ni bô-khı̀, i ê lêng-le̍k liâm-piⁿ ū sin ê hoat-tián, koh chiâⁿ-choè chı̍t-châng khó-ài oē kiat-sı̍t ê chhiū. Lâng oē ēng hoat-su̍t khı̀ choè hit-khoán ê kı̂-sū, chiong chhiū ê kū-sı̍p-koàn tû-khı̀ hō͘ i pı̀ⁿ-choè súi koh oē kiat-sı̍t. Hô-hòng Siōng-tè kiám boē choè chhut kı̂ ê sū, hō͘ chı̍t ê lâng lı̄-khui kū ê sı̍p-koàn, koh têng chhòng-chō i choè chı̍t ê chèng-tı̍t chiâⁿ-sèng ê lâng mah? 
Lí sı̄ po-lê-tû á-m̄-sı̄? "Siōng-tè hun-piat goá, hoaⁿ-hí ēng I ê Kiáⁿ chí-sı̄ goá." (Ka-lia̍p-thài 1: 15, 16) 
Tı̄ tiàm-lāi khah siông ū po-lê-tû pâi-teh, bo̍k-tek chiū-sı̄ chiong só͘ beh boē ê mı̍h pâi tı̄ lāi-bı̄n, hō͘ lâng thang khoàⁿ. Siōng-tè hiān-sı̂ beh chiong Ki-tok hián-bêng tı̄ lâng, beh khip-ín lâng lâi tit-tio̍h Ki-tok, chiū-sı̄ tāi-seng kéng-soán chı̍t pō͘ hūn ê lâng lâi choè po-lê-tû. 
I só͘ sit-lo̍h ê. "Goá khoàⁿ bān-sū choè ū sún-hāi, in-ūi goá lia̍h jı̄n-bat Iâ-so͘ choè tē-it hó ê." (Hui 3: 8) 
Ū chı̍t ê lāu hū-jı̂n-lâng bô kàu chin hó-gia̍h. I kàu chin oàⁿ chiah lâi choè Ki-tok-tô͘. Chı̍t jı̍t i kap i ê cha-bó͘-sun tı̄ siâⁿ-nı̍h ê koe-lō͘ teh kiâⁿ, chı̍t ê khit-chia̍h lâi chiong ka-kı̄ ê sū kóng hō͘ in thiaⁿ. Lāu hū-jı̂n-lâng thiaⁿ-liáu lı̂n-bín i, tùi tē-á the̍h-chhut poàⁿ kho͘-gûn hō͘ i. 
Koh kiâⁿ bô joā-hn̄g, koh ū chı̍t ê hū-jı̂n-lâng teh thèng-hāu in lı̂n-bín i, i iā hiat chı̍t kho͘-gûn tı̄ i ê tē-á. I ê sun khoàⁿ i án-ni choè chiū kóng, "Án-má lí tùi choè Ki-tok-tô͘ í-āu, ū sit-lo̍h chin-choē, ū iáⁿ bô?" I ı̀n kóng, "Ū-iáⁿ, goá ū sit-lo̍h goá ê kip-sèng, phoe-phêng pa̍t lâng, phah-sńg sı̂ khı̀ kiû bô ı̀-sù ê khoài-lo̍k, goá iā ū sit-lo̍h tham-sim kap kò͘-kí sim, goá sı̍t-chāi sit-lo̍h chin-choē." 
Thang kiaⁿ ê mn̄g. "Chió chèng chió siu." (II Lı̂m 9: 6) 
Bó͘ ke tı̄ Lé-pài-jı̍t chá-khí tùi lé-pài-tn̂g tò-lâi liáu-āu, lāu-pē chiū phoe-phêng tı̄ chá-khí só͘ kóng ê keng-toê, cha-bó͘ kiáⁿ chiū phoe-phêng gı̂m-si-pan só͘ gı̂m ê chin pháiⁿ; lāu-bú kóng toâⁿ-khı̂m ê lâng ê māu-pēng. In án-ni teh phoe-phêng. Hut-jiân soè-hàn gín-ná kóng, "A-pâ, lán só͘ toê ê, chí-ū chı̍t nn̄g lui nā-tiāⁿ, chū-jiân só͘ thiaⁿ ê sı̄ boē moá lán ê ı̀, lí ū siūⁿ án-ni á-bô?" 
Hó nı̂-tang. "Iā choē ê, siu-sêng iā choē." (II Lı̂m 9: 6) 
Choē-choē nı̂-chêng, ū chı̍t ê siàu-liân Bí-kok-lâng, lú-hêng tı̄ Bí-kok ê bó͘ séng. Chı̍t-pái jı̍t í-keng lo̍h-soaⁿ, i kàu chı̍t ê choh-chhân lâng ê chhù, chhiáⁿ in hit-ê-hng hō͘ i hioh tı̄-hia, in chin hoaⁿ-hí chiap-la̍p i. 
Tú-tú hit-sı̂ koh ū chı̍t lâng kap i ê hū-jı̂n-lâng lâi, iā chhiáⁿ in hō͘ in nn̄g-lâng hioh. Chit-ê lâng ū hoān-tio̍h hı̀-lô-pı̄ⁿ, i sı̄ teh-beh khı̀ bó͘ ê soaⁿ-téng tiau-ióng sin-khu, i só͘ toà ê chí-ū sı̀-kho͘ gûn kàu-gia̍h thang choè lō͘-hùi nā-tiāⁿ. 
Thâu chı̍t ê lâi ê siàu-liân-lâng, khoàⁿ-kı̀ⁿ in lâi, chiū kóng i kam-goān ēng ka-kı̄ só͘ beh ēng ê pâng kap chhn̂g niū hō͘ in nn̄g lâng, i ka-kı̄ beh khùn tı̄ cheng-siⁿ ê tiâu, á-sı̄ thô͘-kha. Keh chá-khí, hit-ê hoān-tio̍h hı̀-lô ê lâng teh-beh khí-sin, chú-lâng the̍h chı̍t-pah kho͘ gûn hō͘ i thang ēng, nā í-āu bô thang hêng, iā m̄-sái hoân-ló. 
Kè jı̄-cha̍p nı̂, hit-ê thâu chı̍t ê siàu-liân lâng, koat-toàn beh koh lâi thàm í-chêng hó khoán-thāi i ê chú-lâng iáu tı̄-teh á-bô? Āu-lâi i ū chhē-tio̍h i. Tâng-sı̂ koh chı̍t ê iā lâi, kóng i ka-kı̄ chiū-sı̄ 20 nı̂ chêng siū chú-lâng hó khoán-thāi ê lâng-kheh, hō͘ in put-chí kı̂-koài. I ū tú-tú thiaⁿ-kı̀ⁿ lâng kóng, chit-ê choh-chhân lâng ū sit-lo̍h i ê chı̂ⁿ, tú-tú chin kan-khó͘. Só͘-í i chek-sı̂ lâi kā i kóng, "Goá khiàm-ēng ê sı̂, lí ū hō͘ goá chı̍t pah kho͘, chit-chūn goá beh chı̍t pah pē hō͘ lí."