Sèng-keng kap koe-nn̄g. "Tı̀-ı̀ lu̍t-hoat ê chheh." (Si 119: 3)
Ū chı̍t ê Hoê-hoê kàu-tô͘ ài boé chı̍t-pún Sèng-keng, chóng-sı̄ i kóng i bô chı̂ⁿ, chiū ài ēng sı̀ lia̍p koe-nn̄g khı̀ oāⁿ chı̍t-pún. Keh jı̍t i the̍h chı̂ⁿ beh hêng kóng, "Lí só͘ hō͘ goá ê hit pún chheh sı̄ chin hó, goá só͘ hō͘ lí ê nn̄g khiok sı̄ pháiⁿ ê, hiān-sı̂ goá beh chiong hit pún chheh ê kè-chı̂ⁿ hêng lí."
Lán thang kóng chit-ê lâng oē hoán-hoé sı̄ tùi chit pún hok-im ê lêng-le̍k. Hok-im oē kiò-chhíⁿ lâng ê liông-sim. Hok-im oē hō͘ lâng kám-kak lêng-sèng-siōng ê su-iàu. Hok-im oē hō͘ lâng chhut sí jı̍p oa̍h.
Tú-hó toā. "Ài choè tāi-seng ê, tio̍h choè lín ê lô͘-po̍k." (Khó 10: 44)
Lâng kóng tı̄ chı̍t jı̍t, Bí-kok chóng-thóng Hoâ-sēng-tùn kap chı̍t tı̄n chun-kùi ê lâng khiâ bé kàu siâⁿ-goā. In ê bé thiàu kè chı̍t ê chio̍h chhiûⁿ, lō͘-bé ê chı̍t chiah ū that tó kúi-nā tè chio̍h. Chiong-kun Hoâ-sēng-tùn (bē choè chóng-thóng í-chêng ū choè chiong-kun) tùi in kóng, "Khah hó lán tio̍h koh-chài kā in thia̍p hó-sè." In chhı̀n-chhái ı̀n kóng, "Ū pa̍t lâng thang thia̍p, m̄-sái lán khı̀ tio̍h-boâ." Kàu in soàⁿ-tūi ê sı̂, Hoâ-sēng-tùn chiū khiâ-bé tò-tńg lâi goân-lō͘. I lo̍h-bé, soè-jı̄ thia̍p hó-sè hiah-ê chio̍h. I chı̍t ê pêng-iú lâi, khoàⁿ i án-ni choè, chiū kóng, "Lí m̄-thang choè, lí sı̄ siuⁿ toā, siuⁿ chun-kùi." I khiā tiāⁿ-tiāⁿ, tı̍t-tı̍t khoàⁿ i só͘ choè ê kang, ı̀n kóng, "Bô, goá sı̄ tú-hó toā."
Hok-im ê koân-le̍k. "Sı̄ Siōng-tè ê koân-lêng." (Lô 1: 16)
Tı̄ Pí-lı̄-sı̂ kok bó͘ só͘-chāi ê chı̍t-keng hok-im tông, ū chı̍t ê thoân-tō-su teh-beh tò-khı̀ Bí-kok. Hia ê tông-hoē chiū ūi-tio̍h i khui sòng-pia̍t hoē.
Hit-sı̂ chiū ū chı̍t ê lāu-lâng khí-lâi, khoán-sit chhin-chhiūⁿ siū-tio̍h kám-tōng, tùi hit-ê thoân-tō kóng, "Goá ài lí thoè goá tùi Bí-kok hiah-ê kap lí tâng-kang ê pêng-iú pò-kò chı̍t ê siau-sit, chiū-sı̄ goá í-chêng sı̄ chı̍t ê liû-bı̂n, goá cha̍p-gō͘ ê kiáⁿ iā lóng choè khit-chia̍h. Kàu tı̄ nn̄g nı̂ chêng, goá thâu chı̍t pái thiaⁿ-tio̍h hok-im, tı̄ hit sı̂ í-āu goá tit-tio̍h kiù, koh ín-chhoā cha̍p-chhit-ê chhin lâng lâi kui Chú. In hiān-sı̂ lóng tı̄-chia kap lán pı̂ⁿ-pı̂ⁿ teh hù-hoē. Chhiáⁿ lí thoè goán tùi chiah-ê Bí-kok ê pêng-iú kóng to-siā."
Boē pun-tit. "Khı̀....ka-kı̄ khı̀ boé lín ê iû." (Thài 25: 9)
Ū lâng kóng, "Chiah-ê tı̀-sek ê chāi-sek-lú m̄-khéng ēng iû pun hō͘ hiah-ê gōng ê chāi-sek-lú, che kiám m̄-sı̄ hián-bêng in chin kò͘-kí mah?" Kı̂-sı̍t che m̄-sı̄ kiò choè kò͘-kí, tı̄ hit khoán ê chêng-hêng, in boē-oē bô án-ni choè. Bat ū chı̍t ê hong-so ê hū-jı̂n lâng, i kui jı̍t chí-ū chhē-kiû ka-kı̄ ê khoài-lo̍k, i tùi tı̄ sı̀n Chú bô sím-mı̍h bêng-pe̍k, ia̍h bô tı̀-ı̀.
Kàu i kan-khó͘ ê sı̂ ū tit-tio̍h chı̍t ê hū-jı̂n lâng lâi an-ùi i. Chit-ê hū-jı̂n-lâng sı̄ chı̍t ê jia̍t-sim ê Ki-tok-tô͘, i oē hiáu-tit kı̂-tó ê pı̀-koat, i ê lêng-sèng chin-koâiⁿ sı̄ tùi i ê hi-seng ho̍k-bū. Tı̄ i teh an-ùi hit-ê hū-jı̂n-lâng ê kan-khó͘ ê sı̂, hit-ê hū-jı̂n-lâng tùi i kóng, "Chhiáⁿ lí chiong lí sı̀n Ki-tok ê sim pun goá, soà hō͘ goá tit-tio̍h lí hit khoán kı̂-tó ê lêng-le̍k."
Chhiáⁿ lí soè-jı̄ siūⁿ khoàⁿ, lâng oē sái tit ēng ka-kı̄ ê phín-tek hō͘ lâng á-boē? Lêng-hûn oân-choân sı̄ kò-jı̂n ê, só͘-í chit-ê jia̍t-sim ê hū-jı̂n-lâng ı̀n i kóng, "Lí nā ài chit khoán ê sı̀n, chit khoán ê lêng-le̍k, lí tio̍h ka-kı̄ khı̀ boé, tio̍h ēng kı̂-tó kap thiàⁿ choè kè-chı̂ⁿ, lí chiah oē tit-tio̍h."
Só͘ khiàm-ēng bô tâng. “To̍k-choâ ê lūi ah." (Má-thài 3: 7)
Lâng bat kóng Oē-sū-lí Iok-hān Sian-siⁿ ū chı̍t-pái tı̄ toā-koaⁿ kap kùi-cho̍k ê chū-hoē thoân tō-lí. I ēng "To̍k-choâ ê lūi" choè keng-toê, ia̍h kong-kek chek-pı̄ ta̍k-lâng. Ū chı̍t ê m̄ hoaⁿ-hí ê koaⁿ teh-beh chhut-lâi ê sı̂ tùi Oē-sū-lí Sian-siⁿ kóng, "Hit phiⁿ tō-lí bô ha̍p tı̄ siōng-téng lâng, eng-kai tio̍h khı̀ kaⁿ-lô ê só͘-chāi thoân hō͘ hoān-lâng thiaⁿ." Chit-ê ióng-kám ê sù-tô͘ kóng, "Bô, nā goá tı̄-hia, goá ê keng-toê sı̄ beh ēng, "Khoàⁿ Siōng-tè ê Iûⁿ-ko, I tam-tng sè-kan ê choē."
Tio̍h toā siaⁿ âu-kiò ê sı̂. "Siám-pı̄ beh kàu ê siū-khı̀." (Má-thài 3: 7)
Chı̍t ê khí chhù ê lâng tı̄ koe-lō͘-nı̍h, tùi i ê só͘-chāi teh chhek-liông chı̍t keng koâiⁿ-lâu ê kang-thiâⁿ. Chı̍t-ē kia̍h thâu, i khoàⁿ-kı̀ⁿ nn̄g ê lâng tú-tú beh tùi thang-á chhut-khı̀ kiâⁿ tı̄ nn̄g ki, ē-bı̄n bô thih ê pang-téng. I chek-sı̂ toā-siaⁿ kiò kóng, "Tò-tńg khı̀! M̄-thang kiâⁿ tı̄ hit tè sam chhâ. Heh! Lín lóng bô ba̍k-chiu á-m̄-sı̄?" Chit-ê lâng chin toā-siaⁿ jióng, tı̀-kàu lı̄ i kúi-nā chām hn̄g ê chı̍t ê kéng-chhat, kı̂-koài cháu lâi hit só͘-chāi kóng, "Eh! lí beh bēng-lēng sím-mı̍h sū? Kiám boē-sái khah soè-siaⁿ mah? Lí teh mih tāi-chı̀?" I ı̀n kóng, "Goá teh chó͘-tòng téng-bı̄n nn̄g ê gōng-lâng hō͘ in bián tú-tio̍h gûi-hiám. Lí ài goá cháiⁿ-iūⁿ, sı̄ ài goá gı̂m khùn si hō͘ in khùn-khı̀ á m̄-sı̄? Soè-siaⁿ kiám oē choè-tit mah?"
Khiàm-ēng lí choè lō͘. "In-ūi êng-kng Siōng-tè lâi choè." (I Ko-lím-to 10: 31)
Choē-choē nı̂ chêng ū chı̍t ê Bí-kok ê chóng-thóng tio̍h chhèng siong, chin siong-tiōng, lâng kng i khı̀ chı̍t ê chin siok-chēng ê hiuⁿ-siā tiau-ióng, soà ūi-tio̍h i te̍k-pia̍t khui chı̍t tiâu chhia-lō͘ thàu siâⁿ-chhı̄, thang hō͘ i-seng kap khàn-hō͘ í-kı̍p chhin-lâng lı̄-piān khı̀ chiàu-kò͘. Chhàu-khám chit tiâu chhia-lō͘ tio̍h tùi chı̍t ê choh-chhân lâng ê chhù ê thâu-chêng ê toē keng-kè.
Chit-ê choh-chhân lâng chin toā siū-khı̀, m̄-khéng. Ū lâng kā i kóng, "Che sı̄ ūi-tio̍h bó͘ keng chhù ê chóng-thóng, beh kiù i ê sı̀ⁿ-miā, chiah ū khiàm-ēng lí ê toē." Choh-chhân lâng chı̍t-ē thiaⁿ-kı̀ⁿ chiū kóng, "Ūi-tio̍h beh i-tı̄ chóng-thóng ê sı̀ⁿ-miā, sui-jiân tio̍h keng-kè goá ê chhù, goá iā kam-goān." I chiū hiàn i ê toē choè chhia-lō͘. M̄-chai lán ū hoaⁿ-hí hō͘ Chú ê lō͘ thàu kàu lán ê ke-têng, chhin-lâng, pêng-iú á bô?
Ti-chiok kám-un. "Chhut-sı̀ chiū nńg-kha." (Hēng-toān 14: 8)
Ū hé-chhia in-ūi tah-kheh siuⁿ-choē lâng, tı̀-kàu bô ūi thang chē, tio̍h khiā teh, chiū ū chin-choē lâng in-ūi khiā siuⁿ-kú kha-sng saⁿ hiâm. Kı̂-tiong ū chı̍t ê pái-kha ê chhut-siaⁿ kóng, "Lín iáu-kú sı̄ chin hó-miā, ū kha thang khiā." Chèng lâng thiaⁿ liáu chiū chai ti-chiok, sui-jiân kha-sng, m̄-káⁿ koh hiâm.
Thiⁿ Pē ê gia̍p. "M̄-thang chēng-chēng." (Hēng-toān 18: 9)
Siat-sú lí ê lāu-pē ū lâu gûn beh hō͘ lí kap hiaⁿ-tı̄, ia̍h lí kià hō͘ in, che kiám ū sím-mı̍h kong-lô thang khoa-kháu? Bô pun kiám oē the-sı̂ tit?
Siông-siông thiaⁿ-kı̀ⁿ lâng kóng, "Sè-sio̍k lâng bē tit-tio̍h kiù chin khó-sioh." Siáⁿ-sū kóng, "Khó-sioh?" In bē tit-tio̍h Kiù-chú só͘ beh hō͘ in ê hūn-gia̍h sı̄ chı̄-chūi ê kè-sit? Kiám sı̄ soan-tō-hoē tio̍h chı̄n pún-hūn nā-tiāⁿ? Chú Iâ-so͘ kiám bô tùi lán ta̍k lâng kóng tio̍h khı̀ pun I só͘ kau-tài lán ê un-sù hō͘ tông-pau mah? Lán ū khı̀ pun bô?
Boē kı̀-tit thoân-tō sian-siⁿ. "Goá chí-ū chai Ki-tok kap I tèng sı̍p-jı̄-kè nā-tiāⁿ." (I Ko-lı̂m 2: 2)
Ū chı̍t ê hui Ki-tok-kàu ê siū chı̍t ê Ki-tok-tô͘ bián-lē khı̀ hù hùn-heng-hoē. Kàu keh jı̍t hit-ê Ki-tok-tô͘ tú-tio̍h i, mn̄g i kóng, "Lí khoàⁿ hit-ê kóng tō-lí ê sian-siⁿ cháiⁿ-iūⁿ?" I ı̀n kóng, "Hit-ê kóng tō-lí ê sian-siⁿ, goá lóng bô chù-ı̀ tio̍h." Hit-ê Ki-tok-tô͘ thiaⁿ-liáu chin sit-chı̀ ê khoán. Hit-ê pún hui Ki-tok ê chiū koh kóng, "Hit-ê thoân-tō sian-siⁿ kú-khí Ki-tok kàu chin koâiⁿ chin bêng tı̄ goá ê ba̍k-chiu chêng, kàu hō͘ goá lóng boē kı̀-tit hit-ê thoân-tō sian-siⁿ, chí-ū tı̍t-tı̍t siūⁿ Ki-tok, tı̀-kàu hō͘ goá sêng-jı̄n Ki-tok í-keng choè goá ê Kiù-chú lah."
Siōng-tè kap koâiⁿ soaⁿ ê koan-hē. "Chin-oa̍h ê Siōng-tè chhòng-chō thiⁿ, toē, hái kap bān-mı̍h." (Hēng 14: 15)
Siōng-tè ū koân thang chhòng-chō thiⁿ, toē, hái, hiah toā ê tāi-chı̀, ia̍h chin chù-ı̀ tı̄ ke̍k bı̂-soè ê mı̍h. Ū lâng kàu Sūi-sū kok ê koâiⁿ soaⁿ-téng, khoàⁿ-kı̀ⁿ soaⁿ hiah koâiⁿ hiah toā, kong-kéng hiah súi, sı̀-bı̄n lóng ū seh, chiū siū kám-kek o-ló Siōng-tè. Tı̄ sin-piⁿ chiū ū chı̍t lâng the̍h chhut chı̍t ê hián-bı̂ kiàⁿ lâi khoàⁿ chı̍t chiah hô͘-sı̂n, chiū kóng, "Koh-khah kı̂-koài ê, sı̄ tı̄ soaⁿ-kha ê hô͘-sı̂n, i ê kha bô mn̂g, cháiⁿ-iūⁿ tı̄ chí soaⁿ-téng ê hô͘-sı̂n, i ê kha ū mn̂g chin-choē. Khó-kiàn Siōng-tè ia̍h chù-ı̀ kàu chiah nih bı̂-soè ê tāi-chı̀, chhin-chhiūⁿ hō͘ i chhēng be̍h khah sio." Chit-ê Siōng-tè chin-chiàⁿ sı̄ lán ê Siōng-tè.
Lâng cháiⁿ-iūⁿ chiah choè liû-bı̂n. "Thoân hok-im." (Hēng-toān 14: 21)
Chı̍t-pái ū chı̍t lâng tú-tio̍h chı̍t ê liû-bı̂n khit-chia̍h, chiū mn̄g i kóng, "Lí ta̍k-jı̍t beh tá-lo̍h khı̀ ū àn sím-mı̍h phiau-chún bô?" I ı̀n kóng, "Goá beh tá-lo̍h khı̀ sı̄ ēng ka-chiah ǹg-hong." Hit lâng chiū siūⁿ kóng, "Bô kı̂-koài chit hō ka-chiah ǹg-hong ê lâng, eng-kai tio̍h choè liû-bı̂n, in-ūi i bô hó-táⁿ hùn-chı̀ ê tí-khòng ê sèng-chit." Bô-lūn hó-gia̍h sòng-hiong, nā siông-siông nńg-chiáⁿ, bô chı̀, chhin-chhiūⁿ ka-chiah ǹg hong, lóng tio̍h choè liû-bı̂n. Pó-lô, Pa-ná-pa m̄-sı̄ án-ni.
Lí ū ke-thiⁿ thun-lún á-bô? "Keng-kè choē-choē kan-lân." (Hēng-toān 14: 22)
Ū chı̍t ê chí-bē khı̀ chhiáⁿ Bo̍k-su thoè i kı̂-tó, hō͘ i khah gâu thun-lún. Bo̍k-su chiū kap i kūi-teh kı̂-tó kóng, "Kiû Siōng-tè tio̍h hō͘ chit-ê chí-bē ke-thiⁿ tú-tio̍h choē-choē chhı̀-liān, khún-tio̍k, kan-khó͘..." Hit-ê chí-bē thiaⁿ kàu chia, chiū hut-jiân chhut siaⁿ kóng, "Tio̍h kín thêng, m̄-thang koh kı̂-tó lah; goá sı̄ ài lí thoè goá kiû hō͘ goá ke-thiⁿ thun-lún, m̄-sı̄ ài kiû ke-thiⁿ kan-khó͘ chhı̀-liān." Bo̍k-su ı̀n kóng, "Thun-lún sı̄ tùi kan-khó͘ chhı̀-liān lâi, lí khoàⁿ Ngá-kok 1: 3, 4, chiū oē chai. Lí ài ke-thiⁿ thun-lún, kiám m̄-sı̄ tio̍h tùi ke-thiⁿ chhı̀-liān kan-khó͘ mah?"
Ūi-tio̍h Chú ê Soan-kàu-su. "Ūi-tio̍h Chú Iâ-so͘ ê miâ, bô kò͘ sı̀ⁿ-miā." (Hêng-toān 15: 26)
Lí-bûn-su-teng sı̄ chı̍t ê khí-thâu kàu Hui-chiu pò͘-tō ê lâng, ia̍h ū tit-tio̍h kok-ka pò-siúⁿ. I tùi Hui-chiu tò-khı̀ Eng-kok ê sı̂, bat chı̍t-pái siū chhiáⁿ beh khı̀ chı̍t keng toā-o̍h ián-soat. Hit keng o̍h-tn̂g ê ha̍k-seng thiaⁿ-kı̀ⁿ i beh lâi ián-soat, chiū pı̄-pān choē-choē beh kā i kiáu-jiáu kún-chhiò ê hoat-tō͘ lâi khoán-thāi i.
Kàu Lí-bûn-su-teng chiūⁿ tâi-téng ê sı̂, chiū khoàⁿ-kı̀ⁿ i ê bı̄n chin sán, chin pháiⁿ-khoàⁿ, chı̍t ki chhiú ia̍h phah-pháiⁿ, ēng pò͘ pa̍k, tiàu teh, in-ūi i bat tú-tio̍h jia̍t pı̄ⁿ jı̄-cha̍p-chhit pái, ia̍h bat kap sai saⁿ phah, tı̀-kàu chhiú siū siong. Só͘-í hiah-ê ha̍k-seng tı̍t-tı̍t khoàⁿ, siū kám-tōng, lóng chēng-chēng, soà boē kı̀-tit ēng hiah-ê kiáu-jiáu kún-chhiò chhòng-tı̄ ê só͘ kiâⁿ. Koh thiaⁿ-kı̀ⁿ i ián-soat kóng, "Lín phah-sǹg goá cháiⁿ-iūⁿ kam-goān khı̀ kap hiah-ê chhiⁿ-hoan kóng-oē, mō͘-hiám? Chiū-sı̄ in-ūi tı̄ thiⁿ-téng ū chı̍t ūi Siōng-tè, I ū èng-ún bô pe̍h-chha̍t ê oē, kóng, Goá éng-éng kap lí tı̄-teh, kàu sè-kan ê lō͘-bé." Hiah-ê ha̍k-seng chiū chai i sı̄ chı̍t ê kap Chú kiat-liân ê lâng, chiū m̄-káⁿ khoàⁿ-khin i, hoán-tńg chun-kèng i.
Bô pa̍t-hāng hoat-tō͘. "Lín sı̄ Goá ê kan-chèng, sı̄ Goá só͘ kéng ê lô͘-po̍k." (Í-sài-a 43: 10)
Kó͘-chá ū chı̍t ê kò͘-sū teh khui-thiah chit chat, sı̄ kóng:----Tng Chú Iâ-so͘ chiūⁿ thiⁿ tò-khı̀ Thiⁿ Pē ê chiàⁿ-pêng ê sı̂, thiⁿ-sài Ka-pek-lia̍t lâi chih-chiap I, mn̄g I kóng, "Chú ah, Lí tı̄ sè-kan ê kang ū kau-tài chı̄-chūi?" Chú ı̀n kóng, "Ū kau-tài Pí-tek, Ngá-kok, Iok-hān......" Koh mn̄g kóng, "In choè oē lâi boē?" Ìn kóng, "Oē." Koh mn̄g, "In nā choè boē lâi beh cháiⁿ-iūⁿ?" Chú ı̀n kóng, "Tek-khak oē." Koh mn̄g, "Siat-sú in nā choè boē lâi, chiū ū sím-mı̍h pa̍t hoat bô?" Chú iô thâu ı̀n kóng, "Bô. Goá lóng bô siat pa̍t-hāng hoat-tō͘."
Che kiám m̄-sı̄ chı̍t ê chin-chin ê sū-sı̍t. Chú lóng bô ēng pa̍t ê hoat-tō͘ lâi kiù chit sè-kan, chí-ū sı̄ oá-khò Pí-tek, Ngá-kok, Iok-hān kap lí, goá, lâi choè chin-sı̍t ê kan-chèng, tiàm-tı̄ chit sè-kan kiâⁿ I ê só͘ kiâⁿ, kóng I ê só͘ kóng. Khoàⁿ Chú sı̀n-jı̄m lán kàu án-ni, lán kiám m̄-tio̍h sı̀n-khò I, choè kàu oē kham-tit hō͘ I sı̀n. Sèng Sı̂n nā pang-chān lán, lán chiū oē kham-tit.
Thiàⁿ ê la̍t
Ū nn̄g ê hiaⁿ-tı̄ in-ūi saⁿ-chiⁿ kong-gia̍p teh saⁿ-kò. Chhàu-khám sió-tı̄ teh-beh chia̍h chı̍t kan io̍h, lóng m̄-chai sı̄ to̍k-io̍h. Hiaⁿ chai, chiū koáⁿ-kín chó͘-tòng i. Khí-thâu sió-tı̄ m̄-sı̀n, phah-sǹg hiaⁿ í-keng beh pà-chiàm i ê ke-gia̍p, thái-thó ū iàu-kín i ê sı̀ⁿ-miā? Āu-lâi chiong hit kan io̍h hō͘ káu chia̍h, káu kó-jiân sí. I chiah chai hiaⁿ sı̍t-chāi sı̄ thiàⁿ i, chiū chiong hit-ê kong-gia̍p beh sàng i ê hiaⁿ, chóng-sı̄ hiaⁿ iā m̄-khéng sêng-siū, beh niū hō͘ i ê sió-tı̄.
Bô lūn chhiⁿ-mı̂ bô chhiⁿ-mı̂ lóng tio̍h hō͘ Chú chhoā-lō͘
Tı̄ Bí-kok ū chı̍t ê hū-jı̂n-lâng chin gâu choè si, miâ kiò Khó-bí, chóng-sı̄ i sı̄ chhiⁿ-mı̂, chiū ū chı̍t lâng kā i kóng, "Lí choè si hiah nih choē, cháiⁿ-iūⁿ lóng bô chı̍t siú kóng lí sı̄ chhiⁿ-mı̂, chí-ū chı̍t siú ê thâu-sū ū chı̍t kù kóng, Iâ-so͘ chhoā goá nā-tiāⁿ.” I ı̀n kóng, “Goá siá hit kù lóng bô siūⁿ goá ū chhiⁿ-mı̂, bô lūn chhiⁿ-mı̂ bô chhiⁿ-mı̂, lóng tio̍h khiàm-ēng Iâ-so͘ chhoā-lō͘."
Lu̍t-su ê gông-ngia̍h. "Só͘-í in sı̀-soàⁿ tı̄ ta̍k-ūi thoân hok-im." (Hēng-toān 8: 4)
Kúi-nā nı̂ chêng, goá tı̄ bó͘ ê siâⁿ teh kóng tō-lí, khoàⁿ tı̄ lâi-pin tiong-kan, ū chı̍t-ūi sı̄ siàu-liân ê lu̍t-su. Hoē soah, goá khı̀ kā i kóng, "Lí sı̄ Ki-tok-tô͘ á-m̄-sı̄?" I ı̀n kóng, "Sian-siⁿ, goá siūⁿ goá sı̄ Ki-tok-tô͘." Goá kóng, "Lí bat ín-chhoā pa̍t lâng lâi kui Ki-tok á-bô?" I kóng, "Bô, he m̄-sı̄ goá ê tāi-chı̀, he sı̄ lí ê tāi-chı̀, goá ê pún-hūn m̄-sı̄ choè hit hō kang, sı̄ tha̍k lu̍t-hoat. Lí ê pún-hūn sı̄ thoân hok-im." Goá kóng, "Lán lâi tha̍k Sèng-keng." Goá chiū hian-khui Hēng-toān 8: 4, soà chhiáⁿ i tha̍k. I tha̍k liáu chiū kóng, "Sı̄, chóng-sı̄ in lóng sı̄ sù-tô͘." Goá kóng, "Chhiáⁿ lí koh tha̍k tē-it chat." I tha̍k kóng, "Sù-tô͘ í-goā in lóng sı̀-soàⁿ tı̄ ta̍k-ūi." Koh kóng, "In lóng sı̀-soàⁿ tı̄ ta̍k-ūi thoân hok-im." Tùi án-ni i bô oē thang ı̀n.
Sit-lo̍h ta̍k-hāng ê sı̂. "Tio̍h chı̄n-tiong kàu-sí." (Khé 2: 10)
Ū chı̍t ūi siàu-liân ê seng-lí lâng, tú-tio̍h chin tāng ê chhı̀-liān. Tı̄ siū chhı̀-liān ê tiong-kan, i ê sim chı̍t-pái kè chı̍t-pái siūⁿ beh poē-poān Siōng-tè. Chóng-sı̄ tng i tú-tio̍h chhı̀-liān ê sı̂, i chı̍t-pái lâi chhē bo̍k-su. I khan nn̄g ê bô lāu-bú ê kiáⁿ, chı̍t ê sı̀ hè, chı̍t ê la̍k hè. I sui-bóng saⁿ-cha̍p-goā hè nā-tiāⁿ, iáu-kú i siū-tio̍h hiah toā ê kan-khó͘, tı̀-kàu thâu-mn̂g lóng pı̀ⁿ pe̍h. I nı̂-nı̂ só͘ siu-jı̍p ê nn̄g-bān kho͘ bô khı̀, liân pún-chı̂ⁿ iā bô khı̀, chhia iā boē khı̀. Ta̍k-hāng bô khı̀, chí-ū chhun nn̄g ê só͘ thiàⁿ ê gín-ná kap i pún-sin. I kim-kim khoàⁿ bo̍k-su kóng, "Tò-tńg siūⁿ goá keng-kè só͘ siū ê kan-khó͘, goá chhē-chhut Siōng-tè bô m̄-tio̍h."
Lí ēng sím-mı̍h hoat-tō͘? "Hui-le̍k cháu chı̀n-chêng kā i kóng, Lí bêng-pe̍k só͘ tha̍k ê mah?" (Hēng-toān 8: 31)
Ū chı̍t-pái A-le̍k-san-tāi Sian-siⁿ tı̄ hùn-heng hoē bêng-pe̍k ê sı̂, chı̍t ê Ki-tok-tô͘ tùi i kóng, "Goá put-chí chàn-sêng lí ê cheng-sı̂n, chóng-sı̄ bô chàn-sêng lí choè kò-jı̂n-kang ê hoat-tō͘." Sian-siⁿ ı̀n kóng, "Kiaⁿ-liáu goá ēng ê hoat-tō͘ bô tú-hó, m̄-chai lí ēng sím-mı̍h hoat-tō͘?" I ihN-ihN ngı̍h-ngı̍h ı̀n kóng, "Goá hán-tit choè chit hō kang." A-le̍k-san-tāi Sian-siⁿ koh kóng, "Goá só͘ ēng ê hoat-tō͘ sui-bóng bô tú hó, m̄-kú iâⁿ-kè lí ê bô choè."
