Siáⁿ-sū siông-siông thoân Iâ-so͘? "Thoân Iâ-so͘." (Hēng-toān 8: 35)
Chı̍t ê soan kàu-su kóng, bat ū chı̍t ê pún-toē lâng tùi i kóng, "Lí í-keng saⁿ-jı̍t kú káng-lūn Iâ-so͘, lí siáⁿ-sū m̄ koh kóng pa̍t mı̍h?" Soan-kàu-su mn̄g kóng, "Lí chá-khí tǹg chia̍h sím-mı̍h?" Ìn kóng, "Chia̍h-bê." I kóng, "Jı̍t-tàu-sı̂ chia̍h sím-mı̍h?" Ìn kóng, "Chia̍h-bê." Kóng, "Ê-hng-tǹg chia̍h sím-mı̍h?" Ìn kóng, "Bê." I koh mn̄g, "Chā-jı̍t chia̍h sím-mı̍h?" Ìn kóng, "Bê." Koh-chài mn̄g, "Lí kui-nı̂ thàng-thiⁿ teh chia̍h sím-mı̍h?" I chin gông-ngia̍h ı̀n kóng, "Bê." Soan-kàu-su kóng, "Lí siáⁿ-sū beh tı̍t-tı̍t chia̍h bê?" I kóng, "In-ūi goá tio̍h chia̍h-bê, goá chiah oē oa̍h." Soan-kàu-su kóng, "Goán tio̍h thoân Iâ-so͘ iā tú-tú chhin-chhiūⁿ án-ni, in-ūi I sı̄ lán ê oa̍h-miā."
Tài Tek-seng ê lāu-bú. "Goá siūⁿ kàu tı̄ lí lāi-bı̄n bô ké ê sı̀n, chit-ê sı̀n tāi-seng sı̄ tı̄.....lí ê lāu-bú Iú-nı̂-ki ê sim-lāi." (II Thê-mô͘-thài 1: 5)
Tài Tek-seng Sian-siⁿ ê lāu-bú put-chí chù-ı̀ i ê kiáⁿ oē têng-thâu-siⁿ, i chí-ū chı̍t-ê hāu-siⁿ nā-tiāⁿ. I ê kiáⁿ ū bat kı̀ i têng-thâu-siⁿ ê sū, kóng, "Ū chı̍t-pái goá ê lāu-bú khı̀ pa̍t-ūi tiàm kúi-nā-jı̍t. Hit-sı̂ i ū khah êng, chiū siūⁿ beh ēng sı̂ thoè goá pek-chhiat kı̂-tó. Só͘-í chı̍t-jı̍t chia̍h jı̍t-tàu pá, khı̀ pâng-keng, choan-mn̂g kūi-teh pek-chhiat lâu ba̍k-sái tùi Siōng-tè kiû, chhin-chhiūⁿ bô beh soah, kàu tit-tio̍h èng-ún. Hut-jiân sim-lāi chai Siōng-tè ū ún i só͘ kiû, kiáⁿ tit-tio̍h kiù. I chiah kám-siā Chú, o-ló I.”
Kè nn̄g lé-pài kú, chhin-ài ê lāu-bú tò-lâi ke-lāi, goá khı̀ mn̂g-kháu ngiâ-chih i, kā i kóng, 'Goá ū chin hó siau-sit beh pò lí chai.' I ēng chhiú phō͘ goá, kóng, 'Sim-koaⁿ kiáⁿ, goá lóng chai, goá kúi-nā-jı̍t teh kám-siā Chú, thèng-hāu lí só͘ beh pò goá ê hó siau-sit.' Goá mn̄g, 'Lí thái-thó oē chai? A-ché ū kā lí kóng mah? A-ché kóng i m̄ kā lí kóng.' Lāu-bú kóng, 'Bô lâng kā goá kóng.'
I chiah tùi goá kóng i cháiⁿ-iūⁿ thoè goá kı̂-tó tit-tio̍h ún-chún. Goá chhim-sı̀n kı̂-tó ê lêng-le̍k kiám oē kı̂-koài mah? Chit-ê Tài Tek-seng Sian-siⁿ chiū-sı̄ tē-it tāi-seng kàu Tiong-kok lāi-toē thoân-tō siat kàu ê lâng. (Hit sı̂ hái-kháu ta̍k só͘-chāi ū, chóng-sı̄ i sı̄ tı̄ lāi-toē séng.)
Tı̄ 1931 nı̂, Lāi-toē hoē choè kang ê, ū chı̍t chheng saⁿ pah lâng, koh tı̄ chı̍t nı̂ ê lāi-bı̄n, ū chiap-la̍p gō͘ chheng chhit pah lâng jı̍p-kàu. Che lóng sı̄ tùi i ê lāu-bú jia̍t-sim ê kong-hāu.
Chhit hè ê sı̂. "Soè-hàn cha-bó͘ gín-ná." (II Lia̍t 5: 2)
Má-teng-i-liû sı̄ chı̍t ê kang-thâu ê cha-bó͘-kiáⁿ, nı̂ tú-tú chhit-hè nā-tiāⁿ, iáu-kú i chin khéng choè hó-sū, iā chin ū tı̀-sek.
Chı̍t-jı̍t chhia-lō͘ pháiⁿ-khı̀, hé-chhia kàu hia, siat-sú bô thêng, chiū oē chin gûi-hiám, choân chhia ê lâng beh lóng sí. Chit-ê cha-bó͘ gín-ná kín-kín phah tiān-oē thong-ti hū-kūn ê chhia-lō͘ ê tāi-lí. Tāi-lí mn̄g kóng, "Lí oē chhut-khı̀ kiò chhia thêng á-boē?" I ı̀n kóng, "Goá iáu soè-hàn, iáu-kú goá beh chhı̀ choè." Só͘-í i kap i ê toā-chí chin ióng-kám khı̀ kàu chhia-lō͘. In bat chhia ê sin-hō, chai tio̍h ēng âng ê kı̂ pò gûi-hiám, só͘-í kàu chhia lâi ê sı̂, in chiū chiong in ê âng kûn ia̍t hō͘ chhia-nı̍h ê lâng khoàⁿ, kiò in thêng. Tùi án-ni choân chhia ê lâng tit-tio̍h pó-choân in ê sı̀ⁿ-miā.
Pí i-hó Nái-bān khah tiōng-iàu ê. "Soè-hàn cha-bó͘ gín-ná." (II Lia̍t 5: 2)
Gō͘ ê chúi-siú khı̀ thiaⁿ Tek-seng Phok-sū ián-soat, ū chı̍t ê káu hè ê cha-bó͘ gín-ná chù-ı̀ khoàⁿ hiah-ê chúi-siú, āu-lâi i pek-chhiat kiû Chú tio̍h tı̄ hit-ê-hng hō͘ in hoé-kái.
Tng Tek-seng Phok-sū chhiáⁿ lâng chı̀n-chêng jı̄n Chú ê sı̂, chı̍t ê chı̀n-chêng, chı̍t ê chhut-khı̀. Chóng-sı̄ cha-bó͘ gín-ná kiû Chú tio̍h hō͘ chhut-khı̀ ê hit lâng oa̍t tò-jı̍p-lâi, kó-jiân kè kúi hun-cheng i chiū koh jı̍p-lâi, soà liâm-piⁿ chı̀n-chêng khı̀ jı̄n Chú. Iáu chhun saⁿ ê iû-goân chē tı̄ ūi-nı̍h, ū kúi-nā lâng khǹg in, in khiok kū-choa̍t. Lō͘-bé cha-bó͘ gín-ná chhin-sin khí-lâi khı̀ khǹg in tio̍h chiap-siū Chú. In āu-lâi lóng peh khí-lâi chı̀n-chêng, hó-táⁿ jı̄n Ki-tok.
Gâu kéng. "Chóng-sı̄ Nái-bān siū-khı̀." (II Lia̍t 5: 11)
Nái-bān ài tit-tio̍h i-hó, chóng-sı̄ bô hoaⁿ-hí i-hó i ê lâng só͘ kā i kóng ê hoat-tō͘. I sı̄ ke̍k gû-gōng, tú-tú chhin-chhiūⁿ bó͘ ê hū-jı̂n-lâng teh tùi chûn-chú hiâm kiù-seng-khoân bô ài ēng. Chûn-chú kóng, "Hiâm kiù-seng-khoân siáⁿ tāi-chı̀?" Hū-jı̂n-lâng kóng, "Lí kiám bô khoàⁿ-kı̀ⁿ in hiah lâ-sâm, siat-sú lâng chhēng chı̍t niá súi-saⁿ, tio̍h koh koà kiù-seng-khoân, hit niá saⁿ beh éng-oán boē koh chhēng tit!" Chin gōng, kò͘ súi saⁿ, bô siūⁿ kiù sı̀ⁿ-miā.
Tio̍h siū chhiáⁿ chiah thang khı̀ á-m̄-sı̄? "Lín tio̍h choè goá ê kan-chèng.....tı̍t-kàu toē-ke̍k." (Hēng-toān 1: 8)
Chı̍t ê lâng khı̀ siⁿ-hūn ê só͘-chāi thoân-tō tò-lâi, i chı̍t ê pêng-iú mn̄g i kóng, "Lí siáⁿ-sū beh khı̀ hit hō siⁿ-hūn lâng ê só͘-chāi? In ū chhiáⁿ lí á-bô?" Ìn kóng, "Bô." I kóng, "Án-ni, lí siáⁿ-sū beh khı̀?" Ìn kóng, "Tng beh jı̍p-khı̀ goá ê chhù, goá khoàⁿ-kı̀ⁿ tı̄ goá só͘ keng-kè ê chhù, ū toā ê kng, sı̄ in-ūi pò͘-lı̂ hō͘ hong chhe, tı̀-kàu siuⁿ oá mûi-khı̀ teng, soà sio khí-lâi. Chóng-sı̄ in-ūi chit ke ê lâng lóng bô chhiáⁿ goá kiò chhíⁿ in, in an-sim teh khùn, goá iā m̄-ài kiáu-jiáu in, só͘-í goá chiū choè goá jı̍p-khı̀ goá ê chhù." I ê pêng-iú liâm-piⁿ kóng, "Bô, lí tek-khak bô iáⁿ án-ni choè, lí kā in kóng in ê chhù teh tio̍h hé sio, lóng bô ke-kang." Thoân-tō kóng, "Sı̍t-chāi sı̄ án-ni, hit só͘-chāi ê peh-sı̀ⁿ bô chhiáⁿ goá, chóng-sı̄ goá chai in bô tit-tio̍h Ki-tok, sı̄ chin gûi-hiám, goá ài in tit-tio̍h pêng-an kap hoaⁿ-hí."
Jı̍p-kàu ê iàu-kín. Pí-tek kóng. "Lín tio̍h hoán-hoé, hōng Iâ-so͘ ê miâ siū soé-lé, hō͘ choē tit-tio̍h sià." (Hēng 2: 38)
Ū Tō͘-tek-ka tùi chı̍t ê bo̍k-su kóng lūn i pún-sin sı̄ cháiⁿ-iūⁿ sêng-sı̍t, toan-giân, i ê seng-bēng sı̄ tú-tú chhin-chhiūⁿ kàu-hoē lāi ê hoē-iú, i tùi tı̄ thiⁿ-téng ê ǹg-bāng iā kap in saⁿ-tâng, chóng-sı̄ i m̄-ài jı̍p-kàu. Bo̍k-su bô tı̍t-chiap ēng oē ı̀n i, chóng-sı̄ i mn̄g i, tı̄ lō͘-bé pái ê soán-kú chóng-thóng, i ê chhù-piⁿ Khà-lo̍k-su-ki cháiⁿ-iūⁿ soán-kú. I ı̀n kóng, "Khà-lo̍k-su-ki bô tâu-phiò, in-ūi i m̄-sı̄ kong-bı̂n." Bo̍k-su kóng, "I ê khoán-sit chhin-chhiūⁿ kong-bı̂n, sêng-sı̍t koh chiàu kui-kú, pí ū choè kong-bı̂n ê kun-tiúⁿ pài-pó khah hó." Tō͘ Tek-ka kóng, "Khà-lo̍k-su-ki sı̄ chin hó, chóng-sı̄ i sı̄ Tek-kok ê peh-sı̀ⁿ." Kóng, "Án-ni i tio̍h tùi lán ê kok-ka soan-sè i beh éng-éng sūn-ho̍k, i chiah oē sái-tit choè kong-bı̂n." Ìn kóng, "Tek-khak ê." Kóng, "Lâng choè kong-bı̂n sı̄ tùi i khiā-khí tı̄ chı̍t-ê kok-tiong koh sūn-thàn kok-hoat mah?" Ìn kóng, "Sı̄, i tio̍h jı̍p che̍k." Bo̍k-su kóng, "Lí tio̍h tı̄ Siōng-tè ê kok kiû tit-tio̍h kong-bı̂n ê tē-ūi, hō͘ lí tiàm tı̄ hit lāi-bı̄n seng-hoa̍t. Chı̄-chūi tēng choè kong-bı̂n ê tiâu-kiāⁿ? Sı̄ Bí-kok chèng-hú, á-sı̄ Khà-lo̍k-su-ki? Chı̄-chūi tēng choè Thiⁿ-téng ê kong-bı̂n ê tiâu-kiāⁿ? Sı̄ lí á-sı̄ Siōng-tè?"
Lán ū hō͘ mn̄g-toê kā lán chhı̀-kek á-bô? "Tio̍h choè Goá ê kan-chèng." (Hēng 1: 8)
Chı̍t jı̍t chı̍t ê choè lāu-pē ê lâng, kà i ê soè-hàn gín-ná, lūn Ki-tok-tô͘ eng-kai ū sím-mı̍h thài-tō͘. Kóng liáu, gín-ná kóng, "Lāu-pē, goá bat khoàⁿ-kı̀ⁿ Ki-tok-tô͘ á-m̄-bat?" Chit-ê mn̄g chhı̀-kek i ê lāu-pē chin thiám, kàu hō͘ i éng bô boē kı̀-tit. Lán ta̍k-jı̍t só͘ choè ê, tio̍h hián-chhut Ki-tok ê khoán-sit, hō͘ lâng khoàⁿ-kı̀ⁿ lán, chiū chai lán sı̄ Ki-tok ê ha̍k-seng.
Thâi lâng ê mn̄g bo̍k-su. "Tio̍h choè Goá ê kan-chèng." (Hēng 1: 8)
Khà-tek pún sı̄ chı̍t ê choē-hoān, āu-lâi i tit-tio̍h Siōng-tè ê chín-kiù. I bat tı̄ bó͘ ê siâⁿ khui hùn-heng-hoē. Ū chı̍t ê siàu-liân lâng, í-chêng bat khiā tı̄ bó͘ ê bo̍k-su ê keh-piah, i ū hoān-tio̍h thâi lâng ê choē. Khà-tek kap hit-ūi bo̍k-su khı̀ chhē i. Khà-tek khoàⁿ i ū hoán-hoé, chiū chhoā i jı̄n-bat Ki-tok. Chit-ê siàu-liân lâng tùi án-ni tit-tio̍h kiù. Hit-sı̂ i ê bı̄n hián-bêng chin iu-būn, kí hit-ê bo̍k-su kóng, "Goá kap lí khiā keh-piah saⁿ ge̍h jı̍t kú, lí lóng bô kā goá kóng Iâ-so͘ ê tō-lí. Siat-sú ū, goá káⁿ boē choè thâi lâng ê lâng."
Siū bong lâi tit-kiù. "Kā i hoāⁿ-chhiú." (Hēng 8: 17)
Ko-lia̍p Su-bí sı̄ chı̍t ê chhiⁿ-mı̂ ê choè si ê lâng. I chı̍t pái tı̄ chı̍t keng soan-tō-tông, mn̄g khoàⁿ lāi-bı̄n ū bô pē-bú ê gín-ná á-bô? Beh chhiáⁿ i chı̀n-chêng lâi hoāⁿ-chhiú. Liâm-piⁿ ū chı̍t ê bô lāu-bú ê soè-hàn gín-ná lâi. Ko-lia̍p Su-bí chiū ēng chhiú phō i, kā i chim, thoè i kı̂-tó. Ko-lia̍p Su-bí kàu hoē-soah chiū chhut-khı̀. i choè chı̍t siú si kiò choè "Kip-kiù tı̂m-lûn ê lâng."
Chı̍t-pái ū bó͘ ê sian-siⁿ tı̄ lé-pài tn̂g-lāi teh-beh gı̂m hit siú si, soà kóng-khí Ko-lia̍p Su-bí só͘ choè ê sū. Tùi lâi-pin ê lāi-bı̄n ū chı̍t lâng thiàu chhut-lâi kóng, "Goá chiū-sı̄ hit-ê-hng hō͘ i chim ê gín-ná. Goá éng bô boē kı̀-tit i kā goá bong, tı̍t-kàu goá choè Ki-tok-tô͘ ê jı̍t."
Mn̄g Toê. Lūn "Chit-ê Iâ-so͘, lín phah-sǹg cháiⁿ-iūⁿ?" Má-thài 26: 66.
Chóng-tok Pí-lia̍p-to! Lí phah-sǹg cháiⁿ-iūⁿ? Goá khoàⁿ I bô choē. Iok-hān 18: 38.
Boē Chú ê Iû-tāi! Lí phah-sǹg cháiⁿ-iūⁿ? Goá boē bô choē ê ê huih, ū choē lah. Má-thài 27: 4.
Chha̍t! Lí phah-sǹg cháiⁿ-iūⁿ? Chit lâng só͘ kiâⁿ ê, bô chı̍t hāng m̄-tio̍h. Lō͘-ka 23: 41.
Peh-chóng! Lí phah-sǹg cháiⁿ-iūⁿ? Chit lâng chin-chiàⁿ sı̄ Siōng-tè ê Kiáⁿ. Má-khó 15: 39.
Kiâⁿ soé-lé ê Iok-hān! Lí phah-sǹg cháiⁿ-iūⁿ? Sı̄ Siōng-tè ê Iûⁿ-ko, chiū-sı̄ tam-tng sè-kan ê choē ê. Iok-hān 1: 29.
Mô͘-kúi! Lí phah-sǹg cháiⁿ-iūⁿ? Sı̄ chı̀-koâiⁿ Siōng-tè ê Kiáⁿ Iâ-so͘. Lō͘-ka 8: 28.
Sù-tô͘ Iok-hān! Lí phah-sǹg cháiⁿ-iūⁿ? Sı̄ Tāi-pı̍t ê kun-thâu, koh sı̄ i ê hō͘-è, sı̄ kng-bêng ê khé-bêng-chhiⁿ. Khé-sı̄-lio̍k 22: 16.
Sù-tô͘ Pí-tek! Lí phah-sǹg cháiⁿ-iūⁿ? Sı̄ Ki-tok chin-oa̍h Siōng-tè ê Kiáⁿ. Má-thài 16: 16.
Sù-tô͘ To-má! Lí phah-sǹg cháiⁿ-iūⁿ! Sı̄ goá ê Chú, goá ê Siōng-tè. Iok-hān 20: 28.
Sù-tô͘ Pó-lô! Lí phah-sǹg cháiⁿ-iūⁿ? Goá lia̍h bat goá ê Chú Ki-tok Iâ-so͘ choè tē-it hó. Hui-lı̍p-pí 3: 8.
Thiⁿ-sài! Lí phah-sǹg cháiⁿ-iūⁿ? Sı̄ chín-kiù ê, chiū-sı̄ Chú Ki-tok. Lō͘-ka 2: 11.
Thiⁿ Pē! Lí phah-sǹg cháiⁿ-iūⁿ? Chit-ê sı̄ Goá só͘ thiàⁿ ê Kiáⁿ, Goá só͘ hoaⁿ-hí ê, lín tio̍h thiaⁿ I. Má-thài 16: 5.
Taⁿ lūn Chú Iâ-so͘, Sèng-keng ū chin-choē teh kan-chèng I sı̄ Siōng-tè ê Kiáⁿ, lán ia̍h beh choè I ê kan-chèng á m̄? Kı̀ⁿ-nā sı̀n Iâ-so͘ choè Ki-tok ê, che sı̄ Siōng-tè siⁿ ê. Ū I ê Kiáⁿ ê chiū ū oa̍h. Bô ū Siōng-tè ê Kiáⁿ ê, chiū bô ū oa̍h. I Iok-hān 5: 1, 12.
An-ùi sit-lo̍h soè-kiáⁿ ê pē-bú ê sim. Goá ū soè-kiáⁿ, kó͘-chui soè-kiáⁿ, I ê nı̂ hè m̄ chai; In-ūi tı̄-hia bô sǹg nı̂ ge̍h, Tı̄ i só͘ tiàm só͘-chāi. I kap goán toà, nı̂-ge̍h bô kú, Hō͘ goán hoaⁿ-hí khoài-lo̍k, Chiah ū kap goán lı̄-pia̍t saⁿ-sı̂, Khı̀ tiàm Thiⁿ Pē ê kok.
M̄ chai tı̄-hia iūⁿ-siùⁿ cháiⁿ-iūⁿ, Iông-māu cháiⁿ-iūⁿ hó-khoàⁿ, Boē oē phah-sǹg tùi i ê bı̄n, Hián chhut êng-kng joā-toā.
Tiàm tı̄ thian-tông su-sióng cháiⁿ-iūⁿ, Cháiⁿ-iūⁿ khoàiⁿ-lo̍k chiâⁿ-sèng, Chit hō hok-khı̀ lán boē oē chai, Siōng-tè iáu-bē hián-bêng. Kı̂-tó Bûn. Goān tit-tio̍h kek-lia̍t kiù lâng ê sim, Goān tit-tio̍h kek-goā ê khó-lı̂n; Goān tit-tio̍h hi-seng ê toā thiàⁿ-thàng, Goān tit-tio̍h hé jia̍t ê cheng-sı̂n. Goān tit-tio̍h pek-chhiat kı̂-tó ê la̍t, Thang ūi-tio̍h tâng-pau lâi piàⁿ sim; Khò Chú ê lêng-le̍k, kı̂-tó chiū tek-sèng, Goān tit-tio̍h Sèng Sı̂n toā kàng-lı̂m.
D=E Siōng-tè tı̄ Thiⁿ. In Excelsis 298
1. Siōng-tè tı̄ thiⁿ, i kiám oē thiaⁿ, Soè-kiáⁿ kı̂-tó ê siaⁿ? Chin-chiàⁿ oē thiaⁿ, m̄ bián kiaⁿ-hiâⁿ, I àⁿ hı̄-khang teh thiaⁿ.
2. Siōng-tè tı̄ thiⁿ, I kiám oē khoàⁿ, Goá kiâⁿ sím-mı̍h pháiⁿ-tāi? Chin-chiàⁿ oē khoàⁿ, I teh siòng goá, Mı̂-jı̍t só͘ choè I chai.
3. Siōng-tè tı̄ thiⁿ, I kiám oē chai, Siat-sú goá kóng pe̍h-chha̍t? Chin-chiàⁿ oē chai, sui-bóng soè-siaⁿ, Chı̍t kù ia̍h boē khǹg-ba̍t.
4. Siōng-tè tı̄ thiⁿ, I kiám iàu-kín, Goá só͘ tú-tio̍h kéng-gū? Chin-chiàⁿ koan-sim, goá só͘ khiàm-ēng, Ta̍k-hāng sı̄ I siúⁿ-sù.
5. Siōng-tè tı̄ thiⁿ, goá thang chhē I, Āu jı̍t kap I khiā-khí? Nā ū choân-sim kèng-thiàⁿ khò I, I beh tiàn goá chiūⁿ thiⁿ.
D=A Maitland Revival Hymns 206
Nā ū lâng ài tè goá, chiū tio̍h khoàⁿ bô ka-kı̄, jı̍t-jı̍t giâ i ê sı̍p-jı̄-kè lâi tè goá. Lō͘-ka 9: 23.
1. Kiám-nā Kiù-chú tio̍h pē sı̍p-kè, Sè-kan chèng lâng bô hūn? Sı̍t-chāi sı̍p-kè ta̍k lâng tio̍h pē, Chiū goá ia̍h tio̍h ū hūn.
2 .Goá chı̍t-sı̀-lâng tio̍h pē sı̍p-kè, Kàu sí chiah thang pàng-lı̄, Hit sı̂ chiūⁿ thiⁿ, hoaⁿ-hí moá ı̀, Bián-liû ún-tàng oē tı̀.
3 .Tı̄ chō-ūi chêng kng ná chúi-chiⁿ, Tı̄ Chú siong-jiah kha chêng, Beh thǹg bián-liû, phak-lo̍h kèng-pài, O-ló Chú miâ bô thêng.
4 .Sı̍p-kè ke̍k pó, bián-liû ke̍k kim, Koh oa̍h hok-khı̀ jı̍t chí; Khún-kiû Chú chhe êng-kng thian-sı̂n, Hû goá lêng-hûn chiūⁿ thiⁿ.
Do=Ab Tò-lâi Ke Revival Hymns 231.
Tò-lâi ke. Lō͘-ka 15: 18.
1 .Goá chêng bê-lō͘ lı̄-khui Siōng-tè, Taⁿ beh tò-lâi ke; Ū kiâⁿ chhoa̍h lō͘, tek-choē Thiⁿ Pē, Taⁿ beh tò-lâi ke. Hô. Tò-lâi ke, tò-lâi ke, M̄ koh lı̄-khui Pē; Kiû Pē chhun chhiú lâi phō goá, Goá beh tò-lâi ke.
2 .Goá ū phah-sǹg choē-choē kong-im, Taⁿ beh tò-lâi ke; Goá taⁿ hoán-hoé, iu-būn, kek sim, Goá beh tò-lâi ke.
3 .Hoān-choē bê-lō͘ goá chı̄n ià-siān, Taⁿ beh tò-lâi ke; Beh khò Chú un, kap I kiat-liân, Goá beh tò-lâi ke.
4 .Lêng-hûn ū pı̄ⁿ, sim-sı̂n siū siong, Taⁿ beh tò-lâi ke; Kiû sù khùi-la̍t, hō͘ sim ióng-chòng, Goá beh tò-lâi ke.
5 .Goá só͘ ǹg-bāng, goá só͘ hoaⁿ-hí, Taⁿ beh tò-lâi ke; Chí-ū sı̀n Chú ū thoè goá sí, Taⁿ beh tò-lâi ke.
