Iú-ek ê e̍k-oā

Chāi chá tı̄ bó͘ só͘-chāi ê lō͘-tiong, ū nn̄g ê kı̂-sū saⁿ tn̄g, chı̍t-ê tùi hit pêng lâi, chı̍t-ê tùi chit pêng khı̀. Hit nn̄g ê kı̂-sū tú-tú saⁿ-tn̄g tı̄ chı̍t-châng chhiū-kha, iā hit châng chhiū ū tiàu chı̍t ê tún tı̄-teh. Tùi hit pêng lâi ê kı̂-sū khoàⁿ-tio̍h hit ê tún chiū kóng, “Chit ê sı̄ kim--ê.” Tùi chit pêng khı̀ ê kı̂-sū iā khoàⁿ-tio̍h hit ê tún chiū kóng, “Chit ê sı̄ gûn--ê.” Chı̍t-ê kóng sı̄ kim--ê, chı̍t-ê kóng sı̄ gûn--ê. Tùi án-ni hit nn̄g ê kı̂-sū, soà saⁿ-chı̀ⁿ, m̄-jı̄n su, m̄ saⁿ-niū, ná chı̀ⁿ ná jia̍t, ná chı̀ⁿ ná siū-khı̀, kàu āu-lâi soà saⁿ-thâi, iā nn̄g-ê lóng sí tı̄ hit ê tún ê ē-kha ! Chin khó-lı̂n ! hit nn̄g ê kı̂-sū, saⁿ-chı̀ⁿ, soà saⁿ-thâi, sí tı̄ in só͘ teh saⁿ-chı̀ⁿ ê tún ê ē-kha ! Hit ê tún, chı̍t pêng sı̄ kim--ê, chı̍t pêng sı̄ gûn--ê. Hit nn̄g ê kı̂-sū, chhut-la̍t chú-tiuⁿ in ka-kı̄ só͘ khoàⁿ--ê, lóng bô saⁿ niū, lóng m̄ jı̄n-su, khiok kò͘ lâng ū i chı̍t pêng ê lí. Khó-sioh, in bô chun-tiōng pa̍t-lâng ê chú-tiuⁿ, bô chham-khó pa̍t-lâng ê só͘-khoàⁿ--ê, tı̀-kàu tú-tio̍h chit khoán ê saⁿ-chiⁿ. It-poaⁿ ê lâng ū-sı̂ chhut-la̍t chú-tiuⁿ in ka-kı̄ ê só͘-khoàⁿ--ê, só͘-siūⁿ--ê, khiok sı̄ hó; chóng-sı̄ iā tio̍h oē-hiáu thé-thiap pa̍t-lâng ê chú-tiuⁿ, chiong pa̍t-lâng ê ı̀-kiàn, lâi chham-khó,chiah oē saⁿ lı̄-ek. Tı̄ sè-kan, khah-siông lâng saⁿ-chiⁿ boē soah, sı̄ in-ūi in chhin-chhiūⁿ hit nn̄g ê kı̂-sū, khoàⁿ tún ê chı̍t pêng, lia̍h choè chin tio̍h; boē kı̀-tit iáu ū chı̍t pêng tı̄-teh. Tio̍h khoàⁿ nn̄g bı̄n, chiah oē chiâu-chn̂g. Ǹg-bāng lán tāi-ke, bô-lūn koan-hē tı̄ sím-mı̍h sū, oē ēng saⁿ chun-tiōng, saⁿ thé-thiap, saⁿ lí-kái ê cheng-sı̂n, lâi chú-tiuⁿ, chham-siông, saⁿ lı̄-ek, lâi êng-kng Siōng-chú ê miâ. (Tâi-oân Kàu-hoē Kong-pò Tē 624 Hō, ‘Koà-chhài-chí Pò Tē 134 Hō’ 1937 nı̂ 3 goe̍h)