Iûⁿ--sı̄ Keh ê Sió-toān
Iûⁿ--sı̄ Keh, lâng khah-siông kiò i Chheng-liâng chím. Tı̄ Chú-āu 1854 nı̂ chhut-sı̀, tı̄ 1938 nı̂ kū-le̍k 10 goe̍h 20 jı̍t siū Chú kéng-tiàu; hióng-siū 84 hoè. 51 hoè ê sı̂ sı̀n Chú, kiōng 33 nı̂ kú. I sı̀n Chú ê tōng-ki, sı̄ tùi ke-lāi sí-sit. Boē sı̀n Chú ê í-chêng, ho̍k-sāi bô-iáⁿ-chiah-ê sı̂n-bêng chin ū kèng-khiân, sū-put-ti sı̂n-bêng bē-ē pó-pı̀ lâng. Siāng chı̍t-nı̂ sí 3 ê lâng; khí-thâu sí tiōng-hu, bô loā-kú sí chı̍t ê sun-á, iū-koh bô loā-kú sí i ê tē 4 sim-pū; ia̍h koh ū gia̍p-sán ê sio-kò, hoat-ı̄ⁿ siông-siông tiàu mn̄g. Ai--ah ! Chhut jı̍p lóng sı̄ pi-ai lâu ba̍k-sái. Ū chı̍t-jı̍t hoat-ı̄ⁿ tiàu mn̄g, i chiū khı̀ hù mn̄g. Āu-lâi tùi Tâi-lâm Ho͘-chio kóng keng-koè, khoàⁿ-kı̀ⁿ jı̂n-san jı̂n-hái lóng tùi Thài-pêng-kéng Lé-pài-tn̂g jı̍p-khı̀, phah-sǹg káⁿ sı̄ teh chò hı̀, i iā kap lâng chē tı̄-hia. Koh bô loā-kú, chiū chı̍t ê sian-siⁿ chiūⁿ-tâi kóng tō-lí kap gı̂m-si. Khí-thâu thiaⁿ bē-hiáu, chí-ū kı̀ sian-siⁿ tha̍k chı̍t siú Si kóng, “Goá ba̍k gia̍h-khí ǹg thiⁿ, Siōng-tè só͘ tiàm só͘-chāi ; Siōng-tè mê-jı̍t bô khùn siông chhéⁿ, kò͘ goá kàu lóng bô hāi”. I thiaⁿ-tio̍h chit siú si, tú-tú ha̍p tı̄ í chêng khı̀ Má-chó͘-biō-lāi só͘ thiu ê chhiam-si siāng-ı̀, chin ū sim-sek ê só͘-chāi. Kàu soah beh tò-khı̀ ê sı̂, soà thau-the̍h chı̍t pún hàn-jı̄ Si tò-khı̀, chiū chı̍t-siú chı̍t-siú chhiàⁿ lâng tha̍k hō͘ i thiaⁿ, tha̍k ê lâng khı̂n-khı̂n chı̍t-siú koè chı̍t-siú tı̍t-tı̍t tha̍k ; kàu āu-lâi iû-goân tú-tú tha̍k-tio̍h hit siú hō͘ i thiaⁿ, thiaⁿ-liáu chin ū ı̀-bı̄. Tùi án-ni ta̍k lé-pài khı̀ An-sūn Lé-pài-tn̂g lé-pài. Jı̂-hō͘ ná jı̍p sı̀n-gióng, chiū gia̍h to phoà sı̂n-chú chú-pn̄g, pu̍t-chó͘-chhat-á kap kı̂-thaⁿ lóng thoa-thoa lo̍h-lâi pàng hoé sio-sio khı̀. Sin Hô-sūn-liâu ê lâng khoàⁿ i thiaⁿ tō-lí, chiū kā i ki-chhı̀ khoàⁿ-khin, iàm-chiān, siat-to̍k. Choè-āu tē-it gâu khún-tio̍k--ê, chiū-sı̄ Iûⁿ Chiau-gı̄ Bo̍k-su ê lēng-sian-hū, put-chí oàn-hı̄n tō-lí, tú-tú chhin-chhiūⁿ Sò-lô ná oàn-hı̄n tō-lí Siōng-tè ná beh ēng--i. Kàu bô loā-kú i iā hō͘ chit ê lú sı̀n-tô͘ ín-chhoā lâi kui Chú; kı̂-thaⁿ iáu ū ín-chhoā chē-chē lâng lâi sı̀n Chú. Tı̄ hit só͘-chāi lóng bô sán-pô, ū lâng beh seng-sán tio̍h chhiáⁿ i khı̀ chò sán-pô, lóng bô the̍h lâng ê chı̂ⁿ. Lâng ba̍k-chiu seⁿ chu-á, khí-ı̀ khı̀ hō͘ i gia̍h, iā-sı̄ án-ni kan-ta hù lâng lı̄-piān, ta̍k lâng kám-sim siàu-liām. Kı̀ⁿ-nā lâng thiaⁿ-tio̍h i hō͘ Siōng-tè chín-tiàu khı̀ Pē ê tau, ta̍k lâng bô m̄ siong-sim lâu ba̍k-sái. Tı̄ chhut-chòng ê jı̍t, chóng sǹg kiáⁿ-jı̂ sim-pū, lāi-goā-sun, sun-sài, kan-á-sun chóng-kiōng ū 86 lâng. Lán tı̄ sè-kan m̄-thang khang-khang koè-jı̍t, tio̍h o̍h i gâu kiat koé-chí, ín-chhoā lâng lâi kui Chú. A-men.
(Tâi-oân Kàu-hoē Kong-pò tē 667 hō, 1940 nı̂ 10 goe̍h)