Chhut-miâ ê sèng-si ê kò͘-sū
Iûⁿ káu-cha̍p-káu, chit siú sèng-si (tē 117 siú) ê oē, sı̄ chı̍t ê So͘-kek-lân ê sió-chiá, Miss Elizabeth C. Clephane siá--ê. Sı̄ kun-kù Lō͘-ka tē 15 chiuⁿ, tē 3 chat kàu tē 7 chat, lâi siá--ê.
1874, Mo͘dy Sian-siⁿ kap Sankey Sian-siⁿ, tùi Bí-kok khı̀ Eng-kok pò͘-tō ê sı̂, in chē hé-chhia, tı̄ chı̍t ê hé-chhia chām, tú beh khui-chhia ê sı̂, ū chih-tio̍h in ê iû-kiāⁿ.
Tı̄ hé-chhia lāi, Mo͘dy tı̀-ı̀ tha̍k ke-lāi kià-lâi ê phoe, Sankey tı̄ pò-choá ê chı̍t-kak ū khoàⁿ-tio̍h Iûⁿ káu-cha̍p-káu chit siú si. Sankey tha̍k liáu chiū kā Mo͘dy kóng, chit siú si sı̄ lán só͘ teh hi-bōng--ê, bo̍k-chiá ê si. Hit-sı̂ Mo͘dy in-ūi tha̍k choē-choē phoe, soà bô chù-ı̀ Sankey, iā chit ê sū chiū án-ni kè-khı̀.
Koh bô kúi-jı̍t, Mo͘dy káng-tō ê toê-ba̍k sı̄ “Hó ê bo̍k-chiá.”
Khah-siông, Mo͘dy káng-tō liáu-āu, Sankey chiū kéng khah kūn-oá tı̄ toê-ba̍k ê Sèng-si, iā jı̍h-khı̂m lâi gı̂m.
Mo͘dy káng-tō, “Hó ê bo̍k-chiá”liáu, Sankey siūⁿ m̄-chai beh gı̂m tó chı̍t-siú si. Hut-jiân ū siaⁿ kóng,“Gı̂m hit siú si.” Sankey kóng, “M̄-kú goá bô hit ê tiāu.” Hit ê siaⁿ koh kóng, “Gı̂m hit siú si.”
Sankey chē lo̍h-khı̀, i ê chéng-thâu-á kha̍p-tio̍h hong-khı̂m jí ê sı̂, tiāu chiū chı̍t-im chı̍t-im chiap-soà chhut-lâi, chiū-sı̄ lán hiān-kim só͘ teh gı̂m tē 117 siú, tú-tú hit ê tiāu.
Mo͘dy tùi káng-tâi lo̍h--lâi, phēng tı̄ hong-khı̂m, ba̍k-sái tı̄ ba̍k-chiu,mn̄g kóng, “Lí tùi tá-lo̍h tit-tio̍h chit ê tiāu?” Chit siú si chiâⁿ-choè chin chhut-miâ ê si. Chit siú si ê oē, chhiong-moá tio̍h Chú ê thiàⁿ-sim, ai-siong, chû-pi,iā hit ê tiāu, piáu-hiān tio̍h un-jiû, chhin-chhiat, ū kám-tōng joā-nih choē lâng.
(Tı̄ lán ê Sèng-si, Sankey só͘ choè khek--ê, chit siú tē 117 siú, í-goā iáu ū tē 163 siú, tē 168 siú, tē 223 siú).
( Tâi-oân Kàu-hoē Kong-pò tē 801 koàn, 1955 nı̂ 9 ge̍h)
