Iû-le̍k Chiang-choân Kàu-hoē

Tı̄ kū-nı̂ Chhiu-hoē ê sı̂, ū phài goá kap Lâu Bo̍k-su koè-khı̀ Ē-mn̂g hù in ê Chóng-hoē . Kàu kin-nı̂ kū-le̍k chiaⁿ-goe̍h 1 jı̍t chiū tah-chûn koè-khı̀, iû-le̍k ta̍k só͘-chāi ê kàu-hoē. Siū in Se-kok kúi-nā ê Sian-siⁿ í-kı̍p pún-tē chèng tng-chit-ê lâng hó khoán-thāi kóng bē-liáu. Sèng-keng kóng, “Lín nā saⁿ-thiàⁿ, chèng-lâng bat lí sı̄ goá ê ha̍k-seng” (Hān 13:35); thang chai Kiù-chú ê oē ū èng-giām. Kàu 2 goe̍h 8 jı̍t 4 tiám cheng tùi Hō͘-boé chiūⁿ soaⁿ; kám-siā Siōng-tè, tāi-ke seng-khu lóng pêng-an; koh tit-tio̍h Tâi-pak Koa Î-su Sian-seⁿ kap Tân Chheng-gı̄ Bo̍k-su ngiâ-chih khı̀ in chhù, hó-lé khoán-thāi; che iā-sı̄ Siōng-tè ê in-tián.

Taⁿ ài chiong Tn̂g-soaⁿ kàu-hoē ê chêng-hêng, tāi-lio̍k kı̀ tı̄ ē-té, hō͘ lia̍t-ūi chai :------

Lūn goā-kok lâi Chiang-choân siat-kàu ū saⁿ-ê kong-hoē. 1. Bí-kok Tiúⁿ-ló-kàu. 2. Eng-kok Tiúⁿ-ló-kàu (kap lán chit-pêng siāng kong-hoē). 3. Lûn-tun Hô-hoē (Chit-ê Kàu ū Bo̍k-su kap Chip-sū, chóng-sı̄ bô Tiúⁿ-ló; kı̂-û tō-lí kap Tiúⁿ-ló-kàu siāng). Chit 3 ê kong-hoē put-chí tâng-sim hia̍p-le̍k. Thoân-kàu hun-chò saⁿ só͘-chāi. 1. Siat tı̄ Ē-mn̂g. 2. Siat tı̄ Chiang-chiu. 3. Siat tı̄ Choân-chiu. Hia ê pài-tn̂g ióng koh hó-khoàⁿ; siāng tē-it toā-keng--ê, chiū-sı̄ tı̄ Kó͘-lōng-sū, ē iông-ún 800 goā lâng; iā ū chı̍t-ê toā-cheng, kúi-nā-lí hn̄g to ē thiaⁿ-kı̀ⁿ. Pún-tē Bo̍k-su 30 goā lâng. Thoân-tō Sian-siⁿ oá chı̍t-pah lâng. Niá sé-lé ê toā lâng 3700 lâng. Iân-hāng ū nn̄g-bāng liân. Lūn Choân-sio̍k ê kàu-hoē, tı̄ kū-nı̂ ê tiong-kan, pí Chiang-sio̍k khah chı̀n-pō͘.

(Chiah-ê lâng-gia̍h kap iân-hāng sı̄ sio̍k Tiúⁿ-ló-kàu nā-tiāⁿ, Hô-hoē bô sǹg chāi-lāi.)

Lı̄ Choân-chiu-siâⁿ ê pak-lō͘ iok ū 12 phò͘, hō-chò Éng-chhun, tı̄ hia ū kàu-hoē ū siat I-koán, chiū-sı̄ hiān-kim tı̄ Hú-siâⁿ ê Má I-seng ê hiaⁿ toà tı̄-hia; Lâu Bo̍k-su ū khı̀, i khah chai-iáⁿ. Chóng-sı̄ goá ū khı̀ Kim-chéⁿ, lı̄ Choân-chiu siâⁿ ê sai-lâm-pêng chhit-phò͘, sı̄ hái-kı̂ⁿ ê só͘-chāi. Hit-ê kàu-hoē ê Bo̍k-su Khó͘ Seng-iām. Khí-thâu chhiáⁿ Bo̍k-su ê sı̂, kan-ta 32 lâng nā-tiāⁿ. Tiong-kan ū chı̍t ê hiaⁿ-tı̄ sèⁿ Si miâ Kim-chhoan, chiàu in kóng chin jia̍t-sim, iā kap hit 31 lâng pêⁿ-pêⁿ chò tē-ki, tâng-sim chhut-la̍t chhiáⁿ Bo̍k-su. Chit-ê lâng goân-pún sio̍k A-kâu tông-hoē ê tiúⁿ-ló, āu-lâi tńg-khı̀, kin-nı̂ 73 hoè; kı̀ⁿ-tio̍h goá khı̀ chin hoaⁿ-hí. Hit-ê kàu-hoē ū Chho͘-téng sió-o̍h-tn̂g, koh ū chı̍t-keng sió Lú-o̍h, sı̄ pún-tē Lú Sian-siⁿ teh kà. Múi Sèng-jı̍t chū-chı̍p pah-goā-lâng, téng-po͘ 9 tiám chò kı̂-tó-hoē, ē-po͘ 2 tiám chò Chú-jı̍t-o̍h. Pài-it-mê Chheng-liân bián-lē-hoē. Pài-jı̄ Iù-tô͘-hoē, sı̄ iù-chíⁿ ê ha̍k-seng ka-tı̄ chū-chı̍p. Pài-saⁿ pò͘-tō-hoē, sı̄ hoē-iú lûn-liû khı̀ ta̍k só͘-chāi kóng tō-lí. Koh múi-goe̍h chı̍t-pái lé-pài-mê chū-chı̍p chò Hiàn-chú-hoē, ta̍k-lâng tio̍h chiong hit-goe̍h-jı̍t só͘ le̍k-koè ê sū, he̍k-sı̄ léng-sim, he̍k-sı̄ jia̍t-sim, he̍k sı̄ ū kı̂-tó, ū khoàⁿ Sèng-chheh, á-sı̄ ū kóng tō-lí hō͘ lâng thiaⁿ, tio̍h chiàu láu-sı̍t lâi kóng-bêng; āu-lâi Chú-lí chiū chhiáⁿ-lâng khí--lâi bián-lē, á-sı̄ sio-thè kı̂-tó. Kàu lé-pài soah chiū phâng poâⁿ-á khioh-chı̂ⁿ. Che hō-chò Hiàn-chú-hoē. Chiàu-khoàⁿ chit-ê kàu-hoē chin oa̍h-tāng. Múi-nı̂ iân-hāng 700 goā kho͘.

Lūn Choân-chiu siâⁿ-lāi ū nn̄g-keng lé-pài-tn̂g; chı̍t-keng tı̄ Lâm-ke; Bo̍k-su Tân Soan-lēng; pài-tn̂g iông-ún 300 goā lâng; iā ū khí-lâu hō͘ Bo̍k-su toà. Koh chı̍t-keng tı̄ Sai-ke; Bo̍k-su Gô͘ Hong-pho; pài-tn̂g iông-ún nn̄g-saⁿ-pah lâng. Chit-ê Gô͘ Bo̍k-su ū siat chı̍t-ê hoat-tō͘ hō-chò sûn-ke pò͘-tō-hoē, múi pài-saⁿ mê-hng chhit-tiám poàⁿ, hiaⁿ-tı̄ lûn-liû chhiáⁿ Bo̍k-su khı̀ in chhù kóng tō-lí, Bo̍k-su tio̍h chiàu in hit-mê só͘ tha̍k ê sèng-keng khui-thiah tām-po̍h, lâi khó͘-khǹg bián-lē in, hō͘ hiaⁿ-tı̄ chí-moāi khah chai-iáⁿ tō-lí. Koh pài-sı̀ kap pài-la̍k chò Kı̂-tó-hoē.

Nā-sı̄ Tân Soan-lēng Bo̍k-su ê tông-hoē ia̍h chin oa̍h-tāng. Pài-jı̄ siat chı̍t-ê Kiù-chhin-hoē; múi lé-pài kàu hit mê-hng chhit-tiám-poàⁿ-cheng, Bo̍k-su chiū chio kúi-nā-ê hiaⁿ-tı̄ chò-hoé khı̀ in chhù, hit-sı̂ chú-lâng ū chhiáⁿ in ê chhin-lâng chhù-piⁿ pêng-iú chē-chē lâng tı̄-hia, beh chiap-la̍p Bo̍k-su kap hiah-ê lâng kóng tō-lí. Goá kap Lâu Bo̍k-su iā ū khı̀ hù, hit mê-hng chin lāu-jia̍t; goán khoàⁿ-liáu toā hoaⁿ-hí. Siat chit-ê hoē, tú-tú sı̄ Pó-lô só͘-kóng, “Siat-sú goá ē kiù hiaⁿ-tı̄ kut-jio̍k ê chı̀-chhin, sui-jiân hō͘ Ki-tok khı̀-choa̍t iā kam-goān,” Lô-má 9:3. Iā tú-tú chhin-chhiūⁿ Ko-nı̂-liû tāi-seng chū-chı̍p chhin-chhek kap tâng-liâu thèng-hāu Pí-tek kàu, thang kóng tō-lí hō͘ in thiaⁿ, Sù-tô͘ Hēng-toān 10:24,25.

Chiàu goá khoàⁿ in jı̄n-ūi Bo̍k-su siat chit nn̄g-khoán ê hoē, ū chin-toā ê lı̄-ek. (1) Thang lı̄-ek kàu-hoē-lāi ê lâng, hō͘ hiaⁿ-tı̄ chí-moē khah bē hoān-choē. (2) Thang lı̄-ek kàu-hoē-goā ê lâng, hō͘ sè-sio̍k lâng khah ū ki-hoē thang bat Kiù-chú. Chit-ê Kiù-chhin-hoē goán Hú-siâⁿ tı̄ múi lé-pài mê-hng í-keng ū siat kúi-nā nı̂, miâ sui-bóng bô siāng, chóng-sı̄ ı̀-sù ū saⁿ-tâng. Goá ǹg-bāng sio̍k siâⁿ-chhı̄ kap po͘-thâu ê kàu-hoē, tio̍h o̍h chit-ê hó hoat-tō͘ khı̀ kiâⁿ, ún-tàng ē hō͘ kàu-hoē oa̍h-tāng heng-khí.

Tı̄ Lâm-ke ê tông-hoē, koh tı̄ pài-saⁿ mê ū siat chı̍t ê Bián-lē-hoē, miâ-kiò Chong-tō-hoē. Hit mê-hng, ū kúi-nā cha̍p ê siàu-liân lâng chū-chı̍p. Tāi-seng ū chhut tê-ba̍k hō͘ chı̍t-ê hoē-iú khı̀ chò; kàu hit mê-hng tio̍h tha̍k hō͘ chèng-lâng thiaⁿ. Liáu-āu he̍k-sı̄ ū lâng khí-lâi bián-lē kúi-kù, he̍k-sı̄ ū lâng khí-lâi kı̂-tó kúi-kù. Kàu lé-pài soah, chiū phâng-poâⁿ khioh-chı̂ⁿ, chò Bián-lē-hoē ê só͘-hùi.

Tı̄ Choân-chiu siâⁿ-lāi Kok-ka ū siat chı̍t-keng Tiong-o̍h tn̂g, tiong-kan iā ū kà Thian-bûn, Tē-lí, Hàn-bûn, Eng-bûn, Pit-soàn hiah-ê ha̍k-būn; ū chhiáⁿ lán kàu-hoē-lāi ê lâng khı̀ kà. Koh ū chı̍t-keng kàu-hoē ê Tiong-o̍h, kiò-chò Poê-goân Tiong-o̍h-tn̂g, chiū-sı̄ Eng-kok kong-hoē siat-ê. Hit-ê Hāu-tiúⁿ sı̄ Bo̍k-su, miâ kiò An Lé-sùn. Lāi-bı̄n Toā-o̍h thiaⁿ kap hun-pan teh kà ê sió-o̍h thiaⁿ lóng chiâu-pı̄; ha̍k-seng só͘ toà ê siok-sià, chiū-sı̄ lâu-téng. Só͘ tha̍k ê chiong-thêng ū ān-tiāⁿ 4,5 nı̂ kú. Lāi-bı̄n koh khí nn̄g-keng o̍h-tn̂g; chı̍t-keng sı̄ Ko-téng sió-o̍h-tn̂g, chı̍t-keng sı̄ Chho͘-téng sió-o̍h-tn̂g; 3 keng ê ha̍k-seng kè-kiōng ū chiâⁿ-pah lâng, sian-siⁿ ū chiâⁿ-cha̍p ê. Chiàu án-ni khoàⁿ, chit-keng o̍h-tn̂g chiah heng-khí oa̍h-tāng, sı̄ tùi Chú-lı̄ ū piàn-thong ê iân-kò͘, bô chhin-chhiūⁿ hit-hō kiu-kiu ê lâng, m̄-káⁿ chhun-kha chhut-chhiú, tı̀-kàu bô sím-mı̍h jı̂n-châi thang ēng.

Lı̄ Tiong-o̍h bô loā-hn̄g, koh ū chı̍t-keng Lú-o̍h, ha̍k-seng 30 goā lâng, sı̄ Ko Ko͘-niû, Tân Ko͘-niû, teh chú-jı̄m. Iā ū Lâm ê I-koán, sı̄ Pe̍h I-seng teh hoāⁿ. Koh ū chı̍t-keng Lú I-koán, lāi bı̄n ê Lú I-seng, sı̄ sı̀ⁿ Lâi kap sı̀ⁿ Tiok. Nā lūn Choân-chiu-siâⁿ ê kàu-hoē thang Kóng sı̄ chiâu-pı̄.

Koh kı̄n-lâi thoân-kàu ê hong-khı̀ put-chí khui. Koaⁿ-hú Sin-sū iā ū hâng-ho̍k. Chhin-chhiūⁿ kū-nı̂ Tân Soan-lēng 60 hoè, i ū chò Bo̍k-su 30 nı̂ kú, hit-tia̍p kàu-hoē chò lāu-jia̍t. Koaⁿ-hú iā lâi kā i khèng-hō. Goá ū khoàⁿ-kı̀ⁿ hip chı̍t-tiuⁿ-siōng, thâu chı̍t-choā pâi-lia̍t 10 goā lâng; Tiuⁿ Thài-siú pún-hú sı̄ Choân-chiu hú, chē tı̄ tiong-ng; kı̂-û lióng-pêng lóng sı̄ toā-sió bûn-bú koaⁿ-oân, Tân Soan-lēng khiā tı̄ Thài-siú ê āu-piah. Che iā thang kui êng-kng Siōng-tè.

Koh tı̄ kū-nı̂ cha̍p-goe̍h kan, Tiong-kok Hông-siōng ūi-tio̍h beh hêng Goā-kok ê chè, hoan-hù tı̄ ta̍k-séⁿ, ta̍k-hú, ta̍k-koān ê koaⁿ-oân, tio̍h kó͘-bú peh-sı̀ⁿ tê-gı̂n hō͘ Hông-tè thang hêng-chè. Só͘-í hit-sı̂ Tiuⁿ Thài-siú tı̄ siâⁿ-lāi kéng chı̍t keng Khai-goân-sı̄ ê biō chin khoah-toā, tāi-seng ū chhiáⁿ Sin-sū tio̍h ián-soat lâi kó͘-bú peh-sı̀ⁿ; m̄-kú Sian-sū khoàⁿ-kı̀ⁿ lâng hiah-chē, bô siáⁿ káⁿ khui-chhùi. Hit-sı̂ chiah chhiáⁿ Gô͘-Hong-pho Tân Soan-lēng nn̄g-ê Bo̍k-su chiū tâi khó͘-khǹg bián-lē; peh-sı̀ⁿ thiaⁿ-liáu sim siū kám-kek, ū ê hiàn kúi-ê gı̂n, ū ê hiàn gı̂n-kak-á, ū ê hiàn chı̂ⁿ; koh ū chı̍t-lâng hiàn chı̍t-tùi kim chhiú-chí; hit-pái hiān-siu 60 goā kho͘. Sin-sū khoàⁿ-liáu iā put-chí hâng-ho̍k.

Goá kóng chit-hō siau-sit, sı̄ hō͘ lán chai tı̄-hia hiān-kim thoân kàu ê ki-hoē. Koaⁿ-hú í-kı̍p Sin-sū-ka, lóng m̄-káⁿ khún-tio̍k. Tàn-gāi ū chı̍t-lâng chó͘-tòng, chiū-sı̄ hit-hō toā chong-cho̍k ê ke, lāi-bı̄n nā ū chı̍t lâng lâi thàn tō-lí, chiū kong-gia̍p lóng m̄ pun hō͘ i; beh ín-chhoā hit-hō lâng sı̄ khah oh-tit. Kám-siā Siōng-tè, hiān-sı̂ lán chit-pêng khah chió chhin-chhiūⁿ án-ni ê chó͘-tòng.

Lūn Ē-mn̂g ê kàu-hoē put-chí heng-ōng; ū kúi-nā keng pài-tn̂g chin-toā koh súi. Pún-tē Bo̍k-su ū kúi-nā lâng; sı̄ goā-kok saⁿ-ê kong-hoē lâi siat ê. Chhin-chhiūⁿ Sin-ke ê Tông-hoē sio̍k tı̄ Bí-kok ê Tiúⁿ-ló-kàu. Chit-keng pài-tn̂g chin hó-khoàⁿ; hit-sı̂ khí hó, thong Tiong-kok iáu-boē ū pài-tn̂g; kàu-taⁿ 58 nı̂ kú. Chá-chêng tú-tú khí-hó, kan-ta 3 lâng jı̍p-kàu nā-tiāⁿ. Hiān-kim chū-chı̍p ū 300 goā lâng. Ū khí chit-chō Bo̍k-su lâu hō͘ pún-tē Bo̍k-su N̂g Hô-sêng toà. I kin-nı̂ oá 60 liân hoè.

Koh chı̍t-keng tı̄ Tek-chhiū-kha, hit-keng pài-tn̂g iā chin súi koh toā-keng; ū khí chı̍t-keng lâu teh khǹg toā-cheng, hit-ê cheng ê siaⁿ thiaⁿ chin hn̄g. Koh khí chı̍t-chō lâu hō͘ Bo̍k-su toà, hit-ê Bo̍k-su Tēⁿ Phêng-thêng, kin-nı̂ oá 60 hoè.

Lı̄ Ē-mn̂g-ke put-chí hn̄g. ū chı̍t só͘-chāi hō-chò Ē-káng, iā ū chı̍t-keng pài-tn̂g. Chit-ê kàu-hoē ê tē-ki, chiū-sı̄ chı̍t-ê Tiúⁿ-ló put-chí chhut-la̍t; hit-ê Tiúⁿ-ló sèⁿ Lô͘, miâ Liông; i chá-chêng bat koè-lâi Tâi-lâm kà Toā-o̍h. Hiān-kim í-keng koè-óng. I ū 4, 5 ê kiáⁿ chin châi-tiāu. Ū thiaⁿ-kı̀ⁿ hit-ê Ē-káng ê só͘-chāi, khí-thâu bô kúi-lâng teh chū chı̍p, ta̍k lé-pài lóng sı̄ Lô͘ Tiúⁿ-ló kap in chū-chı̍p; sui-jiân ū-sı̂ lo̍h-hō͘, i iā bô hiâm kan-khó͘, kam-goān tùi Kó͘-lōng-sū tah-chûn koè-khı̀ kap in chū-chı̍p. Kàu-taⁿ ū khí pài-tn̂g, Bo̍k-su-keng, sio-o̍h thiaⁿ, lóng chiâu-pı̄. Kàu kin-á-jı̍t lâng iáu-kú teh siàu-liām Lô͘ Tiúⁿ-ló ê tio̍h-boâ. I-ê siōng goá ū khoàⁿ-kı̀ⁿ.

Hit-ê Bo̍k-su Iûⁿ Hoâi-tek, oá 40 hoè lâng, chin gâu thiàⁿ hiaⁿ-tı̄ chí-moē; iā chin gâu iok-sok ke-lāi ê kiáⁿ-jı̄. Khoàⁿ i ta̍k lé-pài só͘ chò ê kang-tiâⁿ, sǹg-sı̄ ū tiāⁿ-tio̍h. Ū siat chı̍t-keng káng-tō͘-tn̂g tı̄ ke-chhı̄, múi lé-pài 2 pái tı̄-hia kóng tō-lí. Koh lēng-goā chı̍t-pái chio Sin-ke Tek-chhiū-kha ê Bo̍k-su chò-hoé chhut-mn̂g pò͘-tō. Koh tı̄ lé-pài-mê iā ū kap hiaⁿ-tı̄ chū-chı̍p chò kı̂-tó-hoē. Chiàu goá khoàⁿ chit-ê Bo̍k-su chin oa̍h-tāng chò-kang; goá chin him-bō͘ i.

Goá tı̄ chiaⁿ-goe̍h chhe 5 toà hia koè lé-pài. Hit chá-khí lé-pài soah, tāi-ke ū hiàn kám-in-gı̂n; hiān-siū ê, ū 90 goā kho͘; kap boē lâi kau ê kè-kiōng ū pah chhut. Tı̄-hia ta̍k só͘-chāi ê kàu-hoē kı̀ⁿ-nā chiaⁿ-goe̍h chhe hit lé-pài, ta̍k-lâng lóng ū chiàu i kū-nı̂ só͘ thàn ê gı̂n, chē-chió chiàu lâng só͘ kam-goān lâi hiàn, hō-chò kám-in gı̂n, thang chò kàu-hoē ê lō͘-ēng; ū só͘-chāi hiàn nn̄g-saⁿ-pah kho͘. Chiàu goá khoàⁿ chit-ê hoat-tō͘ chin hó. Lâng tùi nı̂-thâu kàu nı̂-boé khah-chē lóng hō͘ Siōng-tè chiàu-kò͘, siúⁿ-sù in ū ki-hoē thang thàn chı̂ⁿ; sui-jiân ū-ê tio̍h kan-khó͘ liáu-chı̂ⁿ, he, sı̄ khah-chió. M̄-kú iā sı̄ Siōng-tè ê hó ı̀-sù, só͘-í lóng tio̍h hiàn. Siat chit-ê hoat sı̄ hō͘ ta̍k-lâng ka-tı̄ séng-chhat, nā chim-chiok siūⁿ, chiū chai goá chı̍t-nı̂ ê tiong-kan, tit-tio̍h Siōng-tè ê in-tián loā-nı̍h-chē; kàu chiaⁿ-goe̍h chhe hit lé-pài, bē-kı̀m-tit ài chiong Siōng-tè ê mı̍h hiàn hō͘ Siōng-tè, chhin-chhiūⁿ kā Siōng-tè seh to-siā.

Goá khoàⁿ lán Tâi-lâm ê Soan-tō-hoē, siông-siông teh khoàⁿ-lū bô kàu; in-ūi Phêⁿ-ô͘ koh ke-thiⁿ chı̍t-ê thoân-tō sian-siⁿ, múi-nı̂ tio̍h pah-goā kho͘. Chiàu goá ê gû-kiàn teh siūⁿ, thái m̄ o̍h chit-ê hó hong-hoat, lâi chı̀n-pō͘ iân-hāng, hō͘ sèng-tō koh-khah khui-khoah bô khiàm khoeh gı̂n-hāng ê chó͘-tòng ? Sio̍k-gú kóng, Ū-chı̂ⁿ chiah kiâⁿ ū-lō͘. Goá ǹg-bāng lia̍t-ūi tng-chit-ê lâng siūⁿ-khoàⁿ-māi leh; nā hó, kàu Chhiu-hoē ê sı̂, tāi-ke thang gı̄-lūn hō͘ i tiāⁿ-tio̍h; kàu mê-nı̂ chiaⁿ-goe̍h chiū thang kú-hêng.

Lūn hit-pêng ê Soan-tō-hoē ū thang chhiáⁿ Bo̍k-su kap Thoân-tō ê khı̀ Kim-mn̂g ta̍k só͘-chāi thoân; m̄-nā só͘-hùi ū kàu-gia̍h, koh ū chhun chheng-goā kho͘. Che sı̄ gâu siat ta̍k-hāng ê hoat-tō͘ chiah ē án-ni.

Ē-mn̂g ê tùi-bı̄n chiū-sı̄ Kó͘-lōng-sū, tı̄-hia ū chı̍t-keng Toā-o̍h, miâ kiò Hoê-lân-chai; ha̍k-seng 30 liân ê, sı̄ 3 ê kong-hoē ha̍p chò-hoé teh kà. Iā ū Sı̂m-goân Tiong-o̍h tn̂g, ha̍k-seng 60 goā ê; chiong-thêng ū kà Eng-bûn kap Koaⁿ-oē, múi-nı̂ chı̍t-lâng thiap 40 kho͘. Koh ū chı̍t-keng Eng-hoa Chu-ı̄ⁿ; ha̍k-seng pah-sı̀-gō͘ lâng. Kı̂-û chhin-chhiūⁿ Lú-o̍h, Sió-o̍h, sǹg bē-liáu. Chóng-kōng tı̄ Kó͘-lōng-sū ê o̍h-tn̂g, pí pa̍t só͘-chāi siāng tē-it chē.

Lūn Chiang-chiu siâⁿ ê kàu-hoē, sı̄ Bí-kok ê Tiúⁿ-ló-kàu siat ê. Tı̄ Tang-poáⁿ-āu-ke ū chı̍t-keng pài-tn̂g, tú-hó kap Thian-chú-kàu tùi-bı̄n. Pún-tē Bo̍k-su Ông Lı̂m-Kak sı̄ siàu-liân lâng. Pài-tn̂g iông-ún sı̀-pa̍h-goā lâng. Lāi-bı̄n ū chı̍t-keng sió-o̍h-tn̂g, kàu-oân 3 lâng. Thoân-tō 2 lâng, Tiúⁿ-ló 4 lâng, Chip-sū 5,6 lâng. Tiong-kan ū chı̍t-ê Tiúⁿ-ló sı̀ⁿ Tân miâ Khé-jū, i-ê sió-tı̄ sı̄ Kí-jı̂n, i pún-sin chò I-seng, tı̄ lé-pài-jı̍t i ê kang chò put-chí chiâu-kàu. Chiàu só͘ thiaⁿ tı̄ ta̍k lé-pài-jı̍t, tùi 9 tiám lâi kàu 12 tiám; ē-tàu tùi 2 tiám lâi kàu 4 tiám; ê-hng koh tùi 7 tiám poàⁿ lâi kàu 9 tiám. I chò Tiúⁿ-ló ê bô͘-iūⁿ, chē-chē lâng kèng-ho̍k i.

Chiàu khoàⁿ chit-ê kàu-hoē chin oa̍h-tāng. Tı̄ téng-po͘ 9 tiám poàⁿ chò sió lé-pài, kàu 10 tiám toā lé-pài; ē-po͘ 2 tiám chò Chú-jı̍t-o̍h; hiaⁿ-tı̄ chí-moē hun-chò chiâⁿ-cha̍p só͘-chāi teh tha̍k Sèng-chheh. Kàu 3 tiám chiàⁿ toā lé-pài, poàⁿ-tiám cheng kú chiū soah. Kàu ê-hng 7 tiám poàⁿ koh chū-chı̍p tha̍k Sèng-chheh; kàu 8 tiám ū chı̍t lâng chò Chú-lí, chhoā chèng-lâng lé-pài, āu-lâi he̍k-sı̄ kı̂-tó, he̍k-sı̄ chiong tō-lí bián-lē kúi-kù, miâ chò Hú-tek-hoē; chiū-sı̄ pang-chān tek-hēng ê ı̀-sù. Hit mê-hng chū-chı̍p ū pah-goā lâng, khoàⁿ liáu chin lāu-jia̍t, goán ê sim put-chí hoaⁿ-hí. Tı̄ pài-tn̂g tùi-bı̄n ū khui chı̍t-keng chheh-pâng, tiàm-hō kiò-chò Ek-bûn su-sek, m̄-sı̄ chiong chheh teh bē lâng ê chı̂ⁿ, ı̀-sù sı̄ pâi-lia̍t chē-chē hāng ê chheh hō͘ lâng ta̍k jı̍t lâi khoàⁿ. Che iā-sı̄ chı̍t-hāng thang chān lâng bat tō-lí.

Chiàu khoàⁿ chit-ê kàu-hoē chiah heng-khí, bo̍k-koài kı̂-jiân, in-ūi tng-chit-ê lâng tâng-sim chin oa̍h-tāng gâu siat-hoat. Ū thiaⁿ-kı̀ⁿ kúi-nā ê Tiúⁿ-ló lóng o̍h i-seng, khui tiàm iā lı̄ bô loā-hn̄g; iáu-kú tı̄ sèng-jı̍t ē saⁿ-hô saⁿ-thiàⁿ saⁿ-chān chò kang, bô chhin-chhiūⁿ hit hō kan-ta kò͘ ka-tı̄ á-sı̄ tông-gē siong-tò͘, chin-chiàⁿ thang hō͘ lâng kèng-ho̍k.

Tı̄ Chiang-chiu siâⁿ-lāi ū chı̍t keng Tiong-se o̍h, ha̍k-seng chin-chē lâng, lāi-bı̄n kà-hoat put-chí chiâu-pı̄, lóng-sı̄ kàu-hoē lāi ê lâng kó͘-bú tê-gı̂n ka-tı̄ siat-hoat, m̄-bián oá-khò goā-kok lâng.

(Tâi-lâm Hú-siâⁿ Kàu-hoē-pò tē 266~269 koàn, 1907 nı̂ 5~8 ge̍h)