Iōng-hoat khoàn-hô
Ta-ke chiūⁿ-tâi.
Goá sı̄ ta-ke, lâng kóng, chhoā sim-pū tō hó-miā, kiám ū iáⁿ? Nā goá chhoā gah chit-ê sim-pū, chin put-hàu koh kiau-thâu. Tian-tò hō͘ goá teh khı̀-tn̂g ló͘-tō͘, chia̍h beh chia̍h, sat-bó m̄-ài lia̍h. Pùn-sò put-sı̂ hē kàu tú mn̂g-khiā, chin-chiàⁿ lám-noā koh pı̂n-toāⁿ. Lâng kóng ū he lô tō ū he kó͘, ū hit-hō ang tō ū hit-hō bó͘. Liân goá ê kiáⁿ iā kā goá koái ga̍h goā put-hàu lí kiám chai? Chím-thâu-kúi chin-chiàⁿ ū siàⁿ, goá chiah ē chiah pháiⁿ-miā .
Kiáⁿ kap Sim-pū chiūⁿ tâi. ( Sim-pū teh háu )
Kiáⁿ mn̄g: Ūi sím-mı̍h? thài teh háu? m̄-thang háu, lí nā háu goá ê sim ē sng nē, ū sím-mı̍h tāi-chı̀ lán hó-hó á lâi kóng.
Sim-pū kóng: Hńg. Kó͘-chá lâng kóng ê oē kài ū iáⁿ, kóng kín-pháng bô hó-se, kín-kè bô hó ta-ke. Tong-sı̂ goá kā goán A-niâ kóng, khah bān leh, i tō m̄ ò͘, kin-ná-jı̍t chiah ē lâi tú-tio̍h chit ê pháiⁿ ta-ke, chia̍h chhēng bô, phah mē ū. Chı̍t-ki chhùi, ná phoà-ke-chhéng leh, put-sı̂ gia̍k-gia̍k-kiò, chı̍t-jı̍t chia̍h-pá, chiū-sı̄ kap chhù-piⁿ chē, kóng sim-pū put-hàu, kiáⁿ put-hàu. Ah, he chin chiàⁿ sı̄ goá ê toā pháiⁿ-miā. Ām-kún-á siⁿ liû tú-tio̍h lah, ko͘-put chiong kóng tām-po̍h lâi tháu goá chı̍t-pak khı̀.
Kiáⁿ kóng: Kiám chin-chiàⁿ án-ni?
Sim-pū kóng: Goá bô ke kóng, in-ūi lí siông bô tı̄-teh, só͘-í lí lóng m̄-chai.
Kiáⁿ kóng: Hó, A-niâ nā chin-chiàⁿ hiah pháiⁿ, goá beh lâi kā i thâi-sí. Chóng-sı̄ goá ū thiaⁿ lâng kóng, lâng ū 3 nı̂ ê chhı̄-leng, 10 goe̍h jı̍t ê hoâi-thai, goá sı̄ i siⁿ ê, chit hō ê in goá iáu-boē pò-tap. Goá siông bô tı̄-teh, lí tı̄-teh, lí tio̍h thè goá pò-tap chit ê in, nā pò-tap liáu, goá chiū beh lâi kā i thâi-sí.
Sim-pū kóng: Beh án cháiⁿ-iūⁿ pò-tap?
Kiáⁿ kóng: Sio̍k-gí kóng, lāu-lâng chiâⁿ sè-kiáⁿ, lí tio̍h chhin-chhiūⁿ io sè-kiáⁿ, thiàⁿ sè-kiáⁿ ê sim lâi thiàⁿ-sioh chit-ê lāu-toā lâng, iau chiū hō͘ i chia̍h, àm chiū hō͘ i khùn, soà kā i kah phoē, koâⁿ chiū kā i chhēng saⁿ, lāu-lâng nā ū siū-khı̀ liām sím-mı̍h, lí tio̍h ēng thun-lún, un-jiû hoaⁿ-hí ê hó oē hō͘ i ē tiām-tiām. Lín chò hū-jı̂n-lâng khah ē hiáu siūⁿ, nā siūⁿ goá sè-hàn ê sı̂, i án-ni io goá. Lí thè goá pò-tap.
Sim-pū kóng: He, goá bē hiáu.
Kiáⁿ kóng: Ē-noh, hū-jı̂n-lâng, io-kiáⁿ, thiàⁿ-kiáⁿ ê sim, che sı̄ chū-jiân siⁿ-chiâⁿ--ê, mà m̄-bián o̍h.
Sim-pū kóng: Iah tio̍h goā kú?
Kiáⁿ kóng: Lí kiaⁿ siuⁿ kú sı̄ bô? Goá siūⁿ m̄-bián goā kú, 4 goe̍h-jı̍t tō hó, goá chiū beh kā i thâi-sí .
Sim-pū kóng: 4 goe̍h jı̍t tō ā khoài-khoài à, hó nò͘.
Ta-ke chiūⁿ tâi . ( Sim-pū phâng chúi beh kā i sé bı̄n )
Sim-pū kóng: A-niâ gâu-chá , lán lâi sé bı̄n hó bô?
Ta-ke kóng: Goá iā soà bē hiáu sé. ( bán-bán chhoah-chhoah )
(Chhēng saⁿ, chia̍h pn̄g lóng kāng-khoán tōng-chok kap thāi-tō͘ )
( Choè āu mē sim-pū kóng 6 goe̍h koah-chhài ké ū sim )
Sim-pū thè tiûⁿ.
Ta-ke (khiā khit lâi kóng): Goán chit ê sim-pū kı̄n-lâi tō-à chin iú-hàu lah, iā siông-siông beh kā goá sé-tn̄g, lāi-bı̄n ê pùn-sò tō-à m̄-bat chhin-chhiūⁿ í-chêng hē kàu tú mn̂g-khiā , sı̀-koè chheng-khı̀, léng-lı̄ ,kóng-oē un-jiû siông-sè, khin-siaⁿ, sè-soeh , iā ē khí-lâng khí-kheh , goá sı̍t-chāi chin hoaⁿ-hí. ( Kiáⁿ teh boâ to )
Sim-pū mn̄g: Tiāⁿ-tiāⁿ khoàⁿ lí teh boâ to, sı̄ beh chhòng sím-mı̍h?
Kiáⁿ kā i iô chhiú kóng: khah sè-siaⁿ leh, 4 goe̍h jı̍t beh kàu lah , lí bē kı̀-tit lah sı̄ bô ?
Sim-pū kóng: Hà, lí beh thâi a-niâ ò͘, bē ēng tit, bē ēng tit. A-niâ sı̄ lán ê pó-poè, lí nā beh kā i thâi, goá sı̄ beh hoah kiù lâng o͘, soà beh kā án kū-kong a kóng. Lâi , lí boâ hit ki to kiám ū lāi, goá khoàⁿ chı̍t-è. (chiū kā i chhiúⁿ lâi . )
( Kiáⁿ ké-ı̀ beh koh kā i chhiúⁿ tò-tńg. thè-tiûⁿ.)
Jiân-āu chhiùⁿ, tāi-ke khan-chhiú iū tâng-sim ê koa chò kiat-sok.
Soat-bêng: Tú chiah lán só͘ khoàⁿ chit chhut ke̍k, sui-jiân chin té, chóng-sı̄ chin ū ı̀-gı̄, ē-tàng chò lán chin hó ê kà-sı̄; in-ūi lán múi chı̍t ê lâng lóng tio̍h keng-koè chò lâng ê kiáⁿ, sim-pū, ta-ke . Taⁿ lán tı̄ lán múi chı̍t ê lâng ê lı̍p-tiûⁿ, lán eng-kai tio̍h cháiⁿ-iūⁿ lâi tiau-hô, hō͘ lán ê ka-têng ē hô-pêng , chiâⁿ-chò Ki-tok-hoà bí-boán ê ka-têng neh. S.K. Má-thài 7:12. Iâ-so͘ ê kà-sı̄ kóng,“Lín ài lâng cháiⁿ-iūⁿ khoán-thāi lín, lín iā tio̍h án-ni khoán-thāi lâng” Tú-chiah lán ū khoàⁿ-kı̀ⁿ Ta-ke teh khı̀-tn̂g ló͘-tō͘ ê tiûⁿ-bı̄n, iā ū khoàⁿ-kı̀ⁿ sim-pū teh put-pêng ê tiûⁿ-bı̄n, kai-chài tùi-tı̄ hāu-siⁿ ê gâu tiau-hô, hō͘ lán iā thang khoàⁿ-kı̀ⁿ in bí-boán hēng-hok ê ka-têng. Sio̍k-gú kóng ka hô bān-sū sêng, ka put-hô bān-sı̀ kêng, koh kóng, Hiân sim-pū m̄-kiaⁿ lı̄-hāi ta-ke. Chí kiaⁿ lí ēng Chú ê thiàⁿ, ēng un-jiû kap khiam-pi hó-lé khı̀ khoán-thāi i , siong-sı̀n thih, chio̍h ê sim iā ē iûⁿ-hoà. Chhiáⁿ tāi-ke èng-iōng khoàⁿ-māi. Chiok múi chı̍t ê ka-têng oân-boán, hēng-hok, khoài-lo̍k .
