Ia̍p Chhong-hái Hêng-su̍t

Hó pêng-iú Ia̍p Chhong-hái sı̄ Tâi-lâm siâⁿ-lāi ê lâng. I ê kong bat chò Chó-sı̄-nn̂g ê koaⁿ; lāu-pē bat chò Koān--nı̍h ê su-iâ, iā bat chò Iâm-koán ê ló-tia. I chhut-sı̀ tı̄ Tông-tı̄ cha̍p-saⁿ-nı̂ (chiū-sı̄ Chú-āu 1873). Chū sè-hàn chiū ū tha̍k-chheh. Kàu cha̍p-jı̄-hoè lāu-pē sí, cha̍p-la̍k-hoè lāu-bó iā sí. I sı̄ tē-jı̄--ê, i ū chı̍t ê hiaⁿ chá-chá chiū koè-sin. Tùi cha̍p-la̍k-hoè khí i ū chò sió-khoá seng-lí.

Kàu tı̄ 1896, kha ū seⁿ-thiàⁿ, chiū lâi Hú-tang-hāng kū-i-koán chiū I-seng, soà sı̀n tō-lí. Kàu tı̄ 1898 hō͘ Ba̍k-sa ê kàu-hoē chhiáⁿ khı̀ kà-o̍h. Tı̄ 1899 ū jı̍p Tiong-o̍h tha̍k poàⁿ-nı̂; hit nı̂ ê ē-poàⁿ-tang ū hō͘ Tiàm-á-kháu cha̍p-hoè-tiàm Ha̍p-chhun chhiáⁿ khı̀ chò chiáng-kūi. Hoān-sū chı̄n-tiong, pān-sū khı̂n-kín; hō͘ chē-chē lâng só͘ o-ló. Koè-nı̂ 1900 chiū lâi tha̍k Toā-o̍h, sı̄ kap goán kúi-nā-lâng pêⁿ-pêⁿ tùi Sòng Bo̍k-su phoà-pit. Lūn i tha̍k-chheh, sı̄ in-khı̂n chhut-la̍t; teh kau-poê lâng, iā chin láu-sı̍t koh tiong-hō͘. Chāi o̍h-lāi tha̍k-chheh khah bô nn̄g-nı̂-poàⁿ.

Tı̄ hit nn̄g-nı̂-lāi ū pàng-ké sı̀-pái, i bat khı̀ toà saⁿ-só͘-chāi ê kàu-hoē. Chhin-chhiūⁿ tı̄ Ka-poà-soá ū chin gâu siat-hoat kàu-hoē ê sū; thè hiaⁿ-tı̄ siat-hoat tê-gı̂n ê hoat-tō͘, chiū-sı̄ tia̍h ngó͘-kok lâi seng-sek. Koh chin gâu lı̄-ek gín-ná, poê-iúⁿ hiaⁿ-tı̄. Iā ū khı̀ Kiàn-kong-chng, Tiong-lō͘. Só͘ kàu ê só͘-chāi chin ū iú-ek lâng; sı̍t-chāi hō͘ chin chē lâng put-chí toā o-ló; chin-chiàⁿ sı̄ Sèng-hoē ê toā êⁿ-thiāu. Bô-phoe kàu tı̄ 1901, nı̂-thâu ū khí-sàu, chia̍h-io̍h bô sím-mı̍h kong-hāu; āu-lâi ū tı̀ kha-khı̀ ê chèng, chhoán toā-khùi ê pēⁿ. Khó-sioh! ná-kú ná-tāng. Kàu kū-le̍k 4 goe̍h chhe 6 (se-le̍k 5 goe̍h 13 hō), hit chá-khí toā-khùi lóng bô thang chhoán; tı̄ tiong-tàu chiū lı̄-khui goán tò-khı̀ Pē ê tau. Beh sí ê sı̂ ū kóng chı̍t-kù, “Goá chin kan-khó͘, goá beh tò--khı̀”. Chhin-chhiūⁿ án-ni kúi-nā-pái. Che sı̄ hián-bêng i thoat-lı̄ sè-kan ê khó͘-hái.

Lūn i-ê chhin-chhek khiok lóng bô lâi khoàⁿ--i; chóng-sı̄ Toā, Tiong, Lú, kap sió-o̍h, koh hiaⁿ-tı̄ kúi-nā-lâng, kè-kiōng oá ū pah-gō͘-lâng sàng-chòng. Lūn khoàⁿ chit-chân-sū, chiū eng-kai kiû Siōng-tè “hō͘ lán ē-hiáu sǹg lán ê jı̍t-chí” (Si-phian 90 : 12).

(Tâi-lâm Hú-siâⁿ Kàu-hoē-pò tē 206 koàn, 1902 nı̂ 5 ge̍h)