Im-ga̍k Sûi-pit
Im-ga̍k kap kūn-tāi lâng ê seng-oa̍h, put-chí ū bı̍t-chiap ê koan-hē, sı̄ lán lâng ê jı̍t-siông seng-oa̍h, só͘ boē thang bô--tit ê chı̍t-hāng. Lán lâng ê hı̄-khang put-sı̂ oē thang thiaⁿ-tio̍h sin khoán ê im-ga̍k, tı̀-kàu su-siúⁿ kám-chêng ke chin hong-hù, ū sin ê koan-liām seⁿ--chhut-lâi. Im-ga̍k oē hō͘ lâng ū sin ê kám-kak, oē kiong-kip lâng ū koan-liām hong-hù ê chhâi-liāu, che sı̄ sím-mı̍h in-toaⁿ? Chiū-sı̄ hit-ê sèng-chit kap lán lâng pún lâi ê sèng-chit ū kiōng-thong ê sèng-chit tı̄-teh. “Jı̂n chi chho͘, sèng pún siān.” Lán lâng pún-té ê sèng-chit sı̄ hó, ēng im-ga̍k ê oē lâi kóng, chiū-sı̄ “súi.” Chin hó thiaⁿ ê im-ga̍k, chiū-sı̄ chin súi ê im-ga̍k. Só͘-í lâng ê sim-koaⁿ nā hó, chiū thiaⁿ-tio̍h hó ê im-ga̍k, oē siū kám-hoà, pı̀ⁿ-chò chin súi ê sim-koaⁿ, kap im-ga̍k tú-tú oē tiau-hô; sı̍t-chāi sı̄ chin bı̂-biāu ê mı̍h. Chin, Siān, Bí, chit 3 hāng nā oân-choân ē tit tiau-hô, chiàu i ê te̍k-sèng lâi hoat-hui, chiū lán lâng ê seng-oa̍h ē hiòng-siōng, ē chheng-khı̀-siùⁿ. Kho-ha̍k iau-kiû “Chin,” chong-kàu iau-kiû “Siān,” gē-su̍t iau-kiû “Bí.” Chit 3 hāng hō͘ lán lâng ê jı̂n-seng-koan tit-tio̍h chē-chē ê àm-sı̄, bô hān ê kàu-hùn, lâi tiāⁿ-tio̍h lán lâng ê seng-oa̍h phiau-chún. Te̍k-pia̍t chit-ê “Bí” ê seng-oa̍h kap lán ê jı̍t-siông seng-oa̍h chin ū iân. Him-bō͘ “Bí” sı̄ chin lí-sióng, chóng-sı̄ nā khiàm “Chin” kap “Siān” chiū ū gûi-hiám-sèng tı̄-teh. Só͘-í lán lâng ê lí-sióng nā tùi chong-kàu, tō-tek lâi seⁿ-chhut, hit-ê súi chiū ū kè-ta̍t, chiū ū lı̄-ek. Lán lâng ê sim-sèng tùi súi lâi tiau-hô, chiū lán ê kám-chêng ke chin chhin-bı̍t, chin sio-lō͘; só͘-í ē hō͘ lâng seⁿ-chhut tông-chêng ê sim. Hō͘ lâng ê sim-koaⁿ kiat-liân ê mı̍h chiū-sı̄ “ài.” Tı̄ ài ê tiong-kan, lán ē thang hoat-kiàn-tio̍h sûn-chin ê “súi.” Chong-kàu im-ga̍k sı̄ chı̍t hāng chin súi ê mı̍h, nā ū him-bō͘ ı̀-ài ê lâng, i ê sim-koaⁿ ē chiām-chiām pı̀ⁿ hó, kàu ū chhin-chhiūⁿ pún-lâi ê sèng-chit. “Siān.” Nā ài im-ga̍k ê lâng, iû-goân ē ài chong-kàu, in-ūi chit nn̄g hāng sı̄ chin chiap-kı̄n ê mı̍h, nā sı̀n chong-kàu ê lâng iû-goân ài im-ga̍k, chit nn̄g hāng éng-oán ū koan-liân tı̄-teh. Siōng-tè só͘ chhòng-chō toā chū-jiân ê sè-kài sı̄ chin súi, kap gē-su̍t chin ū iân-hūn. Im-ga̍k sı̄ choè tē-it ko-siōng ê gē-su̍t, só͘-í ēng che lâi chàn-bí chō-hoà ê Chú, sı̍t-chāi sı̄ chin ha̍p-lí-tek ê sū.
Gē-su̍t-ka chin ài kap chū-jiân kau-poê, chū-jiân ê im-ga̍k kha̍p--tio̍h sim-lāi ê khı̂m-soàⁿ, chiū boē kı̀m-tit bô chàn-bí Siōng-tè, kap I só͘ chō ê bān-mı̍h. Lâm-hng ê tó-sū, put-sı̂ ū chin súi ê hong-kéng hian-khui tı̄ ba̍k-chiu-chêng. Chin súi ê tó-sū.
“Tâi-oân,” ē thang hoat-kiàn-tio̍h im-ga̍k ê pó-khò͘. Sù-kùi lóng ū im-ga̍k ián-chàu. Tiàm tı̄ to͘-hoē seng-oa̍h ê lâng, nā chı̍t pái khı̀ soaⁿ-kan, chháu-tē thit-thô, lâi chiap-tio̍h chū-jiân ê hong-kéng, kiám bô ke chin chheng-sóng mah? Soaⁿ--nı̍h ê hoe, khong-tiong ê poe-chiáu, khe-chúi ê siaⁿ-im, bô chı̍t-hāng bô teh hián bêng chō-bu̍t Chú ê ài, bô chı̍t-hāng bô teh o-ló I ê toā koân-lêng. Chin-chiàⁿ súi bô pí!
Nā chin-sı̍t ài im-ga̍k ê lâng, tek-khak iû-goân ē hō͘ im-ga̍k ài--tit. Só͘ kóng, só͘ khoàⁿ, só͘ thiaⁿ ta̍k-hāng sı̄ im-ga̍k, su-siúⁿ, kám-chêng, í-kı̍p tùi jı̂n-seng ê kiàn-kái lóng ū im-ga̍k ê khı̀-bı̄ tı̄-teh. Chin ài gián-kiù im-ga̍k ê lâng, tek-khak sı̄ hō͘ im-ga̍k só͘ kám-hoà. Nā ū chı̄n-sim khı̀ chhoē, tek-khak ē tú-tio̍h; ū him-bō͘ ı̀-ài, tek-khak ē tit-tio̍h. Ūi-tio̍h gē-su̍t lâi cheng-chı̀n, chiah sı̄ hó ê chı̀-goān. Ko-siōng ê gē-su̍t, tio̍h pun hō͘ pa̍t-lâng saⁿ-kap ū hūn, chiah ū ta̍t gián-kiù ê bo̍k-tek. “Hō͘ lâng ê, pí tùi lâng the̍h--ê khah ū hok-khı̀” (Sù-tô͘ 20:35). Beh pun hō͘ pa̍t-lâng, ū-sı̂ tio̍h khiàm ián-chàu-chiá lâi chài-hiān, chiah ē ta̍t bo̍k-tek; só͘-í tit-tio̍h tông-chı̀ ê oān-chō͘ sı̄ chin pit-iàu ê sū. Bô-lūn im-ga̍k-ka, á-sı̄ kàu-hoē ê im-ga̍k thoân-thé, tāi-ke chin saⁿ-hô, ta̍k lâng ê sim-koaⁿ lóng chhin-chhiūⁿ im-ga̍k ē tiau-hô, án-ni chiah ē thang ián-chàu hó thiaⁿ ê im-ga̍k,m̄-nā pún-sin tit-tio̍h lı̄-ek, soà ē thang pun hō͘ pa̍t-lâng. Saⁿ tông-chêng, oān-chō͘, che sı̄ jı̂n-seng chı̍t-hāng chin súi ê tāi-chı̀. “Lán kiâⁿ hó m̄-thang sit-chı̀, in-ūi nā bô chı̍h-chām, kàu kı̂ ē siu-sêng” (Ka-lia̍p-thài 6:9). Che sı̄ gián-kiù im-ga̍k ê lâng, só͘ tio̍h phāu ê cheng-sı̂n. “Siu-sêng” sı̄ chı̍t hāng ê hoaⁿ-hí, “pun hō͘ lâng” sı̄ koh chı̍t hāng ê hoaⁿ-hí. Lóng-chóng ê hoaⁿ-hí, sı̄ tùi kám-siā, chàn-bí lâi piáu-hiān. Chin ê chong-kàu sı̀n-gióng ē seⁿ-chhut kám-siā, chàn-bí ê sim. Kám-siā, chàn-bí ê jı̂n-seng chiah ū tông-pau-ài, siā-hoē hōng sū ê cheng-sı̂n chhut-hiān. Chong-kàu-bı̄ kap gē-su̍t-bı̄ ê jı̂n-seng, sı̄ put-chí ū ı̀-gı̄, ū kè-ta̍t. Che sı̄ lán lâng ê lí-sióng kap hi-bōng, iā-sı̄ jı̂n-seng ê hēng-hok.
(Tâi-oân Kàu-hoē Kong-pò tē 606 hō, 1935 nı̂ 9 goe̍h)