In-ūi lán bô hó ê kiàn-chèng
Ū chı̍t pái, chı̍t ê Ki-tok-tô͘ kiat-hun chhiáⁿ-kheh, kap chin-choē Tâi-oân ê kiat-hun chhiáⁿ-kheh kāng-khoán, chú-lâng iā chhiàⁿ khong-lo̍k-tūi lâi chhiùⁿ-koa, thiàu-bú, nāu-jia̍t kún-kún. Khong-lo̍k-tūi ê sió-chiá khí-thâu chhēng chin-choē saⁿ, āu-lâi, soà jú-chhēng jú-chió, chhun saⁿ-tiám-sek ê iû-éng-saⁿ. Ū 3 ê bo̍k-su chē kāng chı̍t tè toh, it-tı̍t hàiⁿ-thâu, m̄-káⁿ kóng sím-mı̍h, āu-lâi chı̍t ūi kàu-hoē ê lú chheng-liân khoàⁿ kah boē-chò--tit chiah kā chú-ka kóng. Chú-ka chiah kiò khong-lo̍k-tūi ê sió-chiá, saⁿ tha̍h--leh. Kong-lo̍k-tūi ê sió-chiá thiaⁿ-tio̍h chú-lâng kiò i chhēng saⁿ chiū kı̂-koài kóng, “Háⁿ? m̄-bián thǹg o͘h? bô khah-chá kóng leh!....” Khó-kiàn chit-ê sió-chiá bô kám-kak Ki-tok-tô͘ ū sím-mı̍h bô kāng-khoán. Téng nı̂ 2 goe̍h, goá lâi kàu tiong-pō͘ chı̍t keng kàu-hoē bo̍k-hoē. Tē-it pái khı̀ sûn chı̍t ê lú hoē-iú, i chin chū-jiân bô kám-kak pháiⁿ-sè kā goá kóng, i teh chò ”Tá. chia. ló.” ê “thiāu-á-kha”. Kóng tio̍h chiah-nı̍h chū-jiân, khó-kiàn, i bô kám-kak chò chit-khoán ê kang-chok ū siáⁿ-mı̍h m̄-tio̍h. Koh thiaⁿ-kóng, ū chin-choē Ki-tok-tô͘ iā chin-ài chhiam “Tá. chia. ló.”. Koh tò-chhù kiû bêng-pâi. iā ū kàu-hoē tióng-chip teh chhiam, sı̄m-chı̀ tiúⁿ-ló chò cho͘-thâu. Iā ū Ki-tok-tô͘ chhù-lāi tiàu kui-chhù-keng ê âng-choá, teh bē Bêng-pâi. Khó-lêng, in iā bô kám-kak ū siáⁿ-mı̍h m̄-tio̍h. Soán-kí ê sı̂, chin-choē Ki-tok-tô͘ iā bé-phiò bē-phiò, thè lâng bé-phiò. In tāi-khài iā bô kám-kak ū choē. Chı̍t ê siā-hoē, tāi-pō͘-hūn lâng lóng teh chò ê phàiⁿ-tāi, hit-ê siā-hoē ê lâng chiū chha-put-to boē kám-kak tio̍h án-ni chò ū siáⁿ-mı̍h bô thò-tòng, in-ūi “ta̍k-ê lâng lóng án-ni mah! “ Só͘-í, bé-phiò bē-phiò, chhiam “Tá. chia. ló.”, chē-chhia bián pâi-tūi, pùn-sò chhı̀n-chhái tò, khí-chhù thau-kang kiám-liāu, chò tāi-chı̀ ài sàng âng-pau ...... téng- téng, lóng bô siáⁿ-mı̍h choē-ok-kám. Ki-tok-tô͘ tı̄ chit-chióng siā-hoē hong-khı̀ ē-bı̄n, nā tō-lí thiaⁿ bô jı̍p-ní, chin-lí sı̀n bô jı̍p-sim, chiū ē kap siā-hoē-chiūⁿ tāi-pō͘-hūn ê lâng kāng-khoán tùi chiah-ê pháiⁿ bô choē-ok-kám, kāng-khoán chū-jiân teh chò chiah-ê tāi-chı̀. Bo̍k-koài hit-ê saⁿ jú-chhēng jú-chió ê sió-chiá ē ēng kı̂-koài ê sim mn̄g kóng, “ Háⁿ? m̄-bián thǹg o͘h? ” bo̍k-koài lâng ē mn̄g lán, “Lín Ki-tok-kàu kám ū teh chhut Bêng-pâi? ” Bo̍k-koài ē lâi kā lán bé-phiò... in-ūi lán ū hiah-nı̍h choē ê Ki-tok-tô͘ bô hó--ê kiàn-chèng, bô piáu-hiān chhut lán khı̀-sak pháiⁿ--ê hong-khı̀. Sin ūi bo̍k-su, goá mā kám-kak chin pháiⁿ-sè, chin khui-khiàm Siōng-tè. Ū hiah-nı̍h choē ê pháiⁿ, hoē-iú bô kám-kak he sı̄ choē-ok, khó-kiàn goán choè bo̍k-su ê lâng bô chı̄n-chit hō͘ hoē-iú chai hó, pháiⁿ. (Hong-hiòng siang-ge̍h-khan tē 3 kı̂, 1990 nı̂ 3 ge̍h)