A-bêng sı̄ chı̍t ê 8 hoè ê gín-ná, i ê chhù chin sòng-hiong, in-ūi i ê pa-pa tı̄ A-bêng iáu chin sè-hàn ê sı̂ chiū koè-sin lah, A-bêng lóng bô a-hiaⁿ, a-ché, iā bô sió-tı̄ sió-moē, chí ū kap ma-ma toà tı̄ chı̍t keng chin sè-keng ê chháu-chhù.
A-bêng ê ma-ma, ta̍k-jı̍t tio̍h khı̀ kā lâng ín saⁿ-á lâi sé, thàn-chı̂ⁿ lâi tia̍h-bí kap bé-chhài, chóng-sı̄ só͘ thàn ê chı̂ⁿ kan-ta ū kàu chia̍h saⁿ-tǹg nā-tiāⁿ, só͘-í bô chı̂ⁿ thang hō͘ A-bêng khı̀ tha̍k-chheh. In-ūi in iā sı̄ sı̀n Iâ-so͘, ta̍k lé-pài A-bêng chiū kap ma-ma khı̀ hù Chú-jı̍t-o̍h kap lé-pài. A-bêng ē hiáu liām-kim-kù, iā o̍h chin chē siú tı̄ Chú-jı̍t-o̍h teh gı̂m ê si.
A-bêng sui-jiân sè-hàn, iáu-kú chin iú-hàu, siông-siông pang-chān ma-ma choè kang, ma-ma khı̀ siu saⁿ ê sı̂, i iā siông-siông toè ma-ma khı̀, ū sı̂ ma-ma chin bô êng, A-bêng chiū ka-kı̄ khı̀ kā lâng siu saⁿ tńg-lâi hō͘ ma-ma sé, só͘-í hiah ê toà tı̄ keh-piah ê a-peh-à a-ḿ-à lóng o-ló i chin koai.
Ū chı̍t ē-po͘ put-hēng ê tāi-chı̀ lâi lah, chiū-sı̄ chı̍t ê hó-gia̍h lâng N̂g sian-siⁿ phah-m̄-kı̀ⁿ chı̍t ê phoê-pau-á, lāi-bı̄n ū 200 kho͘, koh ū chı̍t kha chin ta̍t-chı̂ⁿ ê soān-chio̍h chhiú-chí. Tú-hó phah-m̄-kı̀ⁿ chhiú-chí í-chêng, A-bêng ū khı̀ N̂g sian-siⁿ ê chhù siu saⁿ, só͘-í N̂g sian-siⁿ chiū giâu-gı̂ sı̄ i thau-the̍h khı̀, chiū phài lâng khı̀ lia̍h A-bêng lâi, kiò i tio̍h chiàu sı̍t sêng-jı̄n thau-the̍h phoê-pau, A-bêng kóng “goá bô the̍h”. In chiū ēng soh-á kā i pa̍k, tiàu tı̄ chhiū-á-oe, ēng chhoê-á kā i phah, kı̂-sı̍t A-bêng bô thau-the̍h phoê-pau-á, i sui-jiân sè-hàn, chhù-nı̍h sòng-hiong, chóng-sı̄ bô bē kı̀-tit tı̄ Chú-jı̍t-o̍h só͘ thiaⁿ ê kà-sı̄ kap ma-ma ê kà-sı̄, i kā in kóng, khak-sı̍t bô thau-the̍h, in iā m̄ sı̀n, i chí-ū lâu ba̍k-sái piáu-sı̄ sim-lāi ê kan-khó͘. Hut-jiân-kan i kı̀-tit Chú-jı̍t-o̍h ê lāu-su bat kóng “tı̄ hoān-lān kan-khó͘ tiong thang kiû-kiò Iâ-hô-hoa lí ê Siōng-tè”. I chiū khún-chhiat kı̂-tó kóng, “Siōng-tè ah, kiû Lí pang-chān goá, kā goá sin-oan, kiù goá thoat-lı̄ gûi-hiám.”
Kàu hông-hun-àm, A-bêng siū phah, seng-khu chin chē siong, in-ūi iau kap thiàⁿ, koh hō͘ lâng tiàu hiah kú chiū hūn-khı̀.
Chin-chiàⁿ, Siōng-tè bô pàng-sak kiû kiò I ê lâng, iā bô pàng-sak khó-lı̂n ê ko͘-jı̂. Tng A-bêng chhíⁿ khí-lâi ê sı̂, i í-keng bô siū pa̍k, khùn tı̄ chı̍t téng chin súi ê bı̂n-chhn̂g, i ê ma-ma, N̂g sian-siⁿ kap chı̍t ê i-seng khiā tı̄ sin-piⁿ, N̂g sian-siⁿ kā A-bêng kóng, “A-bêng chhiáⁿ lí sià-bián goá, goá ū oan-óng lí, kā lí hêng-hoa̍t, taⁿ goá í-keng chai phoê-pau-á m̄ sı̄ lí thau-the̍h ê, goá iā chai lí sı̄ chı̍t ê koai gín-ná, goá hoaⁿ-hí pang-chān lí, lâi pó͘ goá chit pái ê koè-sit.”
Kúi jı̍t āu, A-bêng seng-khu hó lah, tùi ma-ma thiaⁿ kóng, chiū-sı̄ N̂g sian-siⁿ ê sè-hàn kiáⁿ, in-ūi hòng-tōng khai chin choē chı̂ⁿ, koh khiàm chè, chiū thau-the̍h lāu-pē ê phoê-pau-á, āu-lâi khoàⁿ-kı̀ⁿ A-bêng hō͘ lâng phah, sim-koaⁿ kan-khó͘ chiū kā i ê lāu-pē sêng-jı̄n, A-bêng chiah siū tháu-pàng.
A-bêng ióng-kiāⁿ liáu-āu, N̂g sian-siⁿ chiū sàng chı̍t pit chı̂ⁿ hō͘ A-bêng thang tha̍k-chheh, koh kā i ê ma-ma chhoē chı̍t ê khah hó ê kang thang chò, tùi hit tia̍p liáu-āu, in bó-kiáⁿ hoaⁿ-hí khoài-lo̍k teh koè jı̍t, A-bêng iā lı̍p-chı̀ toā-hàn beh hiàn-sin chò Siōng-tè ê kang, lâi pò-iông Siōng-tè ê thiàⁿ.
(Ka-têng ê pêng-iú tē 43 kı̂, 1961 nı̂ 9 ge̍h)
