Ké-á-kiáⁿ ê ma-ma ū chı̍t-jı̍t hō͘ hô-lı̂ kā-khı̀, chit 9 chiah ke-á-kiáⁿ chı̍t-choê chhut-hoat beh khı̀ kiù in ê ma-ma. Kiâⁿ kàu chı̍t-châng chhiū-kha, thiaⁿ-kı̀ⁿ tio̍k-bo̍k-chiáu tı̄ chhiū-téng teh kiò ke-á-kiáⁿ, “Ke-á-kiáⁿ, lín beh khı̀ tó-ūi? Lín ma-ma leh?” Ke-á-kiáⁿ kóng, “Ma-ma hō͘ hô͘-lı̂ lia̍h-khı̀ lah, goán beh lâi-khı̀ kiù ma-ma”. Hit-chiah tio̍k-bo̍k-chiáu kóng, “Hó, goá iā kap lín lâi khı̀ kiù lín ma-ma, hit chiah hô͘-lı̂ thài khó͘-ò͘ⁿ!” “Hó, chin hó, tio̍k-bo̍k chiáu hiaⁿ.” Tio̍k-bo̍k chiáu ê chhùi chhin-chhiūⁿ chı̀ⁿ, sı̄ chı̍t ê chin lāi ê bú-khı̀.
In tı̄ lō͘-tiong tú-tio̍h chı̍t-chiah mô͘-hē mn̄g in kóng, “Ke-á-kiáⁿ, ka-á-kiáⁿ, lín beh khı̀ tó-ūi? Ná bô kap lín ma-ma chò-hoé khı̀?” Ke-á-kiáⁿ koh chiong beh kiù ma-ma ê sū kā mô͘-hē kóng. Mô͘-hē ı̀n kóng, “Án-ni, goá iā lâi pang-chān lín khı̀ kiù ma-ma”. Ke-á-kiáⁿ tı̀m-thâu, mô͘-hē chiū kap in chò-hoé khı̀, kiâⁿ kàu chhiū-kha, tı̄ lō͘-nı̍h chı̍t-ki chhiū-ki, hiám-hiám ke̍h-tó. Hut-jiân chhiū-ki mn̄g in, “Ke-á-kiáⁿ, ke-á-kiáⁿ, lín beh khı̀ tó-ūi? Ūi sím-mı̍h bô kap lín ma-ma chò-hoé khı̀?” Ke-á-kiáⁿ koh chiong beh kiù ma-ma ê sū kóng hō͘ chhiū-ki thiaⁿ. Chhiū-ki kóng, “Hit chiah hô͘-lı̂ thài khó͘-ò͘ⁿ, goá iā lâi pang-chān lí khı̀ kiù ma-ma.” Ke-á-kiáⁿ khoàⁿ i kóng, “Lí iā boē cháu, beh án-choáⁿ kap goán khı̀ kiù ma-ma?” Chhiū-ki kóng, “Tio̍k-bo̍k-chiáu nā khéng pang-chān goá, chiong goá kā khı̀ chiū oē ēng-tit.” Ke-á-kiáⁿ tı̀m-thâu, Tio̍k-bo̍k-chiáu kā chhiū-ki chò hoé khı̀.
Poàⁿ-lō͘ hut-jiân chhoe chı̍t-tı̄n ê hong, ke-á-kiáⁿ, mô͘-hē, tio̍k-bo̍k-chiáu kap chhiū-ki lóng kiâⁿ boē khı̀. Ke-á-kiáⁿ kóng, “Hong-peh-ah, chhiáⁿ lí m̄-thang hoat siū-khı̀, hō͘ goán kiâⁿ, in-ūi goán ma-ma hō͘ hô͘-lı̂ kā khı̀, goán beh koáⁿ-kín lâi khı̀ kiù ma-ma!” Hong-peh-ah kóng, “Goân-lâi sı̄ án-ni o͘h, khó-lı̂n ê ka-á-kiáⁿ, án-ni goá iā lâi pang-chān lín khı̀ kiù ma-ma.” Hong-peh-ah choán hong-hiòng chiong in chhoe kàu hô͘-lı̂ ê tōng-kháu, tio̍k-bo̍k chiáu chiong tōng-mn̂g thóng chı̍t-khang, mô͘-hē kap hong-peh-ah chiū jı̍p khı̀, chhun ke-á-kiáⁿ, tio̍k-bo̍k-chiáu kap chhiū-ki lóng tı̄ goā-bı̄n chún-pı̄ èng-chiàn, mô͘-hē sô jı̍p-khı̀ chúi-kng ê lāi-bı̄n, hong-peh-ah khiā tı̄ hang-lô͘ kháu. Hô͘-lı̂ tú chiong ke-bú hē lo̍h tiáⁿ, chún-pı̄ khí-hoé sa̍h-se̍k thang chia̍h, i chhun-chhiú lo̍h khı̀ chúi-kng iúⁿ-chúi ê sı̂, hut-jiân hō͘ mô͘-hē kā chı̍t-ē, hô͘-lı̂ thiàⁿ chı̍t-ē thiàu khí lâi. Hô͘-lı̂ koh lâi hang-lô͘ kháu beh khí hoé, hit sı̂ hong-peh-ah hoat siū-khı̀, chhoe chı̍t-chūn hong, chiong hoé-hu eng tùi hô͘-lı̂ ê ba̍k-chiu lo̍h khı̀. Hô͘-lı̂ kiaⁿ chı̍t-ē, chông tùi goā-kháu chhut-khı̀. Tú-kàu mn̂g-kháu, hō͘ chhiū-ki ke̍h chı̍t-ē, chiū án-ni tó-lo̍h--khı̀. Hit sı̂ tio̍k-bo̍k-chiáu kap ke-á-kiáⁿ chı̍t-chê cháu oá lâi thóng hô͘-lı̂ ê ba̍k-chiu, hô͘-lı̂ tio̍h toā-siong, chiū án-ni cháu-khı̀, ke-á-kiáⁿ ū tâng-sim, koh khò tāi-ke ê pang-chān, hun-kang ha̍p-chok, chiong ma-ma kiù chhut-lâi, chiah ê ke-á-kiáⁿ kā chiah ê pêng-iú seh-tō-siā, ná chhiùⁿ-koa chiū tńg-khı̀.
Sió pêng-iú, lín ê pêng-iú nā tú-tio̍h sím-mı̍h khùn-lân, tio̍h saⁿ pang-chān. Chı̍t ê lâng ê khùi-la̍t chin soè, chóng-sı̄ nā kúi-nā ê ha̍p choè-hoé chiū pı̀ⁿ-chiâⁿ toā khùi-la̍t.
(Ka-têng ê pêng-iú tē 53 kı̂, 1962 nı̂ 7 goe̍h)
