Ông Kı̂ in kap Chèng-kı̂ hun-khui liáu-āu, kéng chı̍t kang àm-thâu-á cháu khı̀ chhı̄-khu ê Tiong-chèng Kok-tiong chhoē hùn-tō chú-jı̄m in kiáⁿ, kā phah kah poàⁿ-sió-sí, chiàⁿ-lúi ba̍k-chiu koh hiám-á chheⁿ-mê.
Kèng-chhat-kio̍k siàu-liân-cho͘--ê sı̀-kè teh thàm siau-sit, m̄-koh lóng chhoē bô soaⁿ-soh iah-sı̄ chèng-kı̀, chit kiāⁿ àn choaⁿ-á án-ne chún-soah. Ông Kı̂ mā chèng-sek choán kàu lēng-goā chı̍t ê siā-khu ê kok-tiong khı̀ tha̍k, koh lâi kap Chèng-kı̂ tō khah hán-tit liân-lo̍k--a, Chèng-kı̂ chit-má khah chia̍p kap Sím Lêng-sı̀n chò-hoé, chhun ê sı̂-kan lóng teh chún-pı̄ liân-khó.
Liân-khó chêng saⁿ kò-goe̍h, Sím Lêng-sı̀n iok Chèng-kı̂ chhut--lâi, àn-sǹg àm-sı̂ beh hó-hó-á lâi siáu--chı̍t-tiûⁿ. Chèng-kı̂ kiàn-gı̄ chhoē Tân Bûn-pin chhut--lâi, nn̄g ê tō sio-chio kiâⁿ khı̀ Tân Bûn-pin in tau, kiâⁿ kàu in mn̂g-kha-kháu, soah thiaⁿ-tio̍h lāi-té ū chı̍t chūn chı̍t chūn teh háu ê siaⁿ.
Tân Bûn-pin khoàⁿ-tio̍h Sím Lêng-sı̀n kap Chèng-kı̂ lâi kàu in mn̂g-chhùi, kā chhiú-thâu ka-kang ê tiān-soàⁿ khǹg--leh, kā seng-khu piⁿ teh háu ê ma-ma khoàⁿ--chı̍t-ē, ta̍uh-ta̍uh-á kiâⁿ--chhut-lâi.
“Goán a-hiaⁿ e-po͘ khı̀ Ke-lâng-hô sńg chúi, soah khı̀ tū--sí, goá ài kā chhù--nih tàu-saⁿ-kāng, hoān-sè bô hoat-tō͘ khó liân-khó--a.”
Sím Lêng-sı̀n kap Chèng-kı̂ thiaⁿ-tio̍h chit-ê siau-sit, gāng-gāng khiā tı̄ hia, koè ū chı̍t-khún-á, chiah bok chhut kúi kù an-ùi ê oē, kóng soah, tiām-tiām-á lı̄-khui, tı̄ àm-àm ê ke-á-lō͘ sô--leh sô--leh.
“Hó--lah, lán lâi khı̀ chhoē Chheng--á.” Chheng--á sı̄ siā-khu--nih ê kak-thâu, siā-khu ê lâng lóng ē kiaⁿ--i, miâ-siaⁿ chin bái, Sím Lêng-sı̀n m̄-chai tang-sı̂ khai-sí kap in teh tàu-tı̄n.
“Án-ne kám hó?”
“Ū siáⁿ bô hó--ê? Kiâⁿ--lah, in tng teh phah moâ-chhiok neh!”
Sím Lêng-sı̀n chhoā Chèng-kı̂ lâi kàu chı̍t keng jı̄ lâu ê kong-ú, lāi-té bô siáⁿ thang-kng, o͘-o͘ àm-àm, lóng sı̄ chia̍h-hun ê ian-bū. Chèng-kı̂ khoàⁿ-tio̍h sı̀ ê lâng ûi chò chı̍t toh, tng teh phah moâ-chhiok, kı̂-tiong chı̍t ê thǹg-pak-theh, kah-chiah-phiaⁿ lóng chhiah-jı̄.
“Hmh, lí lâi--a-o͘, chē--chı̍t-ē, tán--leh thâi hún-chiáu lâi chia̍h.”
“Siáⁿ-mih hún-chiáu-á?” Chèng-kı̂ oá-kı̄n Sím Lêng-sı̀n, sè-sè-siaⁿ kā mn̄g.
“Tō-sı̄ in khı̀ thau lia̍h pa̍t-lâng chhı̄ ê hún-chiáu-á, chú moâ-iû chin hó-chia̍h--o͘!”
Tō án-ne, Chèng-kı̂ tı̄ Chheng--á in chhù chia̍h bô siáⁿ hó-chia̍h ê hún-chiáu-bah, chia̍h kah chin put-an, chia̍h soah, sim-koaⁿ-thâu ngāi-gio̍h ngāi-gio̍h choaⁿ-á tńg chhù.
Āu--lâi Chèng-kı̂ chhoē Sím Lêng-sı̀n tâm, khǹg i m̄-thang koh kap Chheng--á in hit phāng lâng tàu-tı̄n khah hó. Sím Lêng-sı̀n kā kóng, Chheng--á kı̂-sı̍t mā chin khó͘-liân, pa-pa chò chheng-kiat-tūi hông lòng--sí, ma-ma kā lâng sé-saⁿ thàn só͘-hùi tō͘ jı̍t-chí, Chheng--á bô lâng koán, m̄-chiah ē piàn pháiⁿ.
Chèng-kı̂ m̄-chai beh án-choáⁿ kā ı̀n.
Joa̍h--lâng ê liân-khó kiat-sok liáu-āu, Chèng-kı̂ cháu khı̀ chhoē N̂g Siok-cheng .
Siok-cheng chhēng chı̍t su joa̍h--lâng ê iûⁿ-chong, tı̀ chı̍t téng cha̍h jı̍t-thâu ê bō-á, sim-chêng khin-sóng kap Chèng-kı̂ tı̄ khe-piⁿ sàn-pō͘.
“Lí kám chai? Goá kóng--ê bô m̄-tio̍h, goá chin-chiàⁿ khó bē tio̍h lú-tiong, ha ha......” Siok-cheng ba̍k-chiu nih--leh nih--leh: “Goá siūⁿ, goá ē-sái khó séng-lı̍p ko-chit, thiaⁿ kóng mā bē-bái, lı̄ chhù koh kı̄n......”
“Siok-cheng .” Chèng-kı̂ chin chèng-keng kā kóng: “Lí sim-lāi kám bē kan-khó͘?”
“Kan-khó͘? Bē--lah, hoâiⁿ-tı̍t chheh tha̍k bē iâⁿ--lâng, tō-sı̄ án-ne mah.”
“Kám kóng chheh tha̍k bē iâⁿ--lâng, tō chù-tēng ài hō͘ lâng ta̍h tı̄ kha-té?” Chèng-kı̂ bı̄n-sek bô-sı̂n bô-sı̂n, khoàⁿ tùi tng beh lo̍h-soaⁿ ê jı̍t-thâu.
“Chèng-kı̂ , lí chiok kı̂-koài neh! Goá thiaⁿ bô lí teh kóng siáⁿ. Tio̍h--lah, lí kám khó ū tiâu? Kám beh khı̀ tha̍k?”
“Tiâu sı̄ ū tiâu, m̄-koh sêng-chek bô hó, goá siūⁿ beh khı̀ tha̍k bí-kang-kho, goá khah ài oē-tô͘, te̍k-pia̍t sı̄ oē bàng-kah, goá siūⁿ beh chò oē bàng-kah tē it liû ê lâng.”
“Chin--ê-o͘? Án-ne chiok hó neh.”
Chèng-kı̂ sim-lāi teh siūⁿ, kám ū khó-lêng ta̍k kang lóng kap Siok-cheng tàu-tı̄n. M̄-koh i bô siūⁿ-tio̍h kóng, in-ūi i ka-tı̄ bô chù-ı̀, koh nn̄g ê lâng ha̍k-hāu bô kāng keng, seng-oa̍h ê kū-lı̂ soah jú lâi jú hn̄g, ta̍uh-ta̍uh-á nn̄g ê lâng liân-lo̍k, chū-hoē ê ki-hoē jú lâi jú chió, koh Siok-cheng chai-iáⁿ i kap chı̍t-koá lô͘-moâ kiâⁿ chin oá, kap i tō ta̍uh-ta̍uh-á so͘-oán--khı̀-a.
Khı̀ tha̍k ko-tiong liáu-āu, in-ūi ha̍k-hāu lı̄ chhù ū chı̍t chat, Chèng-kı̂ ta̍k kang chin chá tio̍h-ài khí-chhn̂g, poâⁿ nn̄g pan chhia kàu ha̍k-hāu, pàng-o̍h tńg kàu chhù mā lóng chin oàⁿ--a, kap chhù--nih ê lâng chih-chiap mā jú lâi jú chió, Chèng-kı̂ hiông-hiông kám-kak chin thiòng.
Mā in-ūi chhù--nih ê lâng chit-má khah bô ki-hoē chhap Chèng-kı̂ ê tāi-chı̀, i tı̄ ha̍k-hāu ê seng-oa̍h mā khai-sí hong--khí-lâi, kap kok-tiong ê sı̂ pí--khí-lâi soah jú hòng-tōng, kui kang kiat-tóng-sêng-kûn, kap lâng sio-chèⁿ. Tāi-pō͘-hūn tông-o̍h lóng kiaⁿ jiá tāi-chı̀, tō khah bô-ài kap Chèng-kı̂ kau-chhap, piáu-bı̄n siōng koh ká-ná chin kā chun-tiōng, hō͘ Chèng-kı̂ kioh-sı̄ ka-tı̄ sı̄ in pan ê láu-toā, soah khai-sí hiáng-siū ui-koân chah--lâi ê hó--chhù, chhiūⁿ chhı̀n-chhái kā tông-o̍h khui-chhùi iah-sı̄ sió-khoá ui-hia̍p--chı̍t-ē, tō ē ū chı̂ⁿ thang khai.
Tong-jiân, chit khoán seng-oa̍h ûi-chhı̂ bô kú.
Ū chı̍t-pái, i ūi beh kek toā-pān chò láu-toā, thè ka-tı̄ pan ê tông-o̍h chhut-thâu kái-koat tāi-chı̀, soah hō͘ lâng kiò chhut-khı̀ kàu-sek.
“Chhoē goá chhòng siáⁿ?”
“Lí lâi tō chai.”
Ín i chhut--lâi ê lâng chhoā i khı̀ ha̍k-hāu ê sı̍t-sı̍p kang-tiûⁿ, hit-ê só͘-chāi khoàⁿ--khí-lâi chin phian-phiah, sı̀ pêng tún chiâⁿ chē thih-kùn-á.
Chèng-kı̂ khoàⁿ-tio̍h chı̍t ê saⁿ-nı̂-á--ê teh tán--i, kiâⁿ oá ê sı̂ i chiah tı̀-kak bô siáⁿ tio̍h, kı̂-thaⁿ lâng lio̍k-lio̍k-sio̍k-sio̍k ùi piⁿ--á kiâⁿ--chhut-lâi, chhiú--nih lóng gia̍h thih-kùn-á.
Chit siaⁿ hāi--a, in lâng chiah chē, bē-sái kap in ngē-piàⁿ, beh cháu koh bē-hù--a, nā chhú-lí bô hó-sè......, Chèng-kı̂ sim-koaⁿ-té chiok kín-tiuⁿ--ê.
“Thiaⁿ kóng lí chin hiau-pai, it-nı̂--ê sı̄ lí teh chhoā--ê sı̄--bô?” Chhoā-thâu--ê khui-chhùi kā mn̄g.
“Lí siūⁿ beh kóng siáⁿ tō kín kóng, bián koh a-ḿ a-peh kóng chı̍t tui.” Chèng-kı̂ sim-lāi siūⁿ kóng hoâiⁿ-tı̍t siám bē khı̀--a, kui-khı̀ khah khı̀-phek--leh, chhiūⁿ cha-po͘-kiáⁿ án-ne kap in piàⁿ khoàⁿ-māi.
“Hmh! Ū-iáⁿ sı̄ kioh-siàu.” Chhoā-thâu--ê kóng: “Thiaⁿ kóng lí beh thè lín pan--ê kái-koat tāi-chı̀, chin tú-hó, kap i ū būn-tê ài kái-koat--ê tō-sı̄ goán sè-hàn--ê.”
Táng--ê sı̄ Chèng-kı̂ in kāng pan ê tông-o̍h, choè-kı̄n i jiá-tio̍h ha̍k-hāu lāi-té chı̍t ê sió kak-thâu, cháu lâi kap Chèng-kı̂ chham-siông, Chèng-kı̂ bô khó-lū tō tap-èng beh kā thı̄n, siūⁿ bē kàu soah án-ne lâi jiá-tio̍h mâ-hoân.
Kı̂-sı̍t Chèng-kı̂ kap Táng--ê kau-chêng bô joā chhim, i kan-taⁿ sı̄ chı̍t-sı̂ chhàu-phùi chiah tap-èng beh kā thı̄n, nā ūi-tio̍h chit chióng tāi-chı̀ hông bok sı̍t-chāi chin bē-hô.
“Goân-lâi sı̄ án-ne, goá chai-iáⁿ--a, m̄-koh lí nā beh tâm-phoàⁿ, án-ne mā siuⁿ bô sêng-ı̀--a.” Chèng-kı̂ teh siūⁿ, tùi-hong kı̀-jiân siūⁿ beh kái-koat tāi-chı̀, ka-tı̄ koh sı̄ tē saⁿ chiá, in èng-tong bē ta̍h ngē, koh-chài kóng in mā m̄-chai ka-tı̄ bakuh ū ngē--bô, choaⁿ-á koh kā chhiàng chı̍t kù: “Lí kóng siáⁿ?”
Piⁿ--á ê lâng hō͘ i ê oē kek--tio̍h, siūⁿ beh tāng-chhiú, m̄-koh sûi hō͘ chhoā-thâu--ê tòng--leh: “Goán m̄-sı̄ chiam-tùi lí lâi--ê, goá chit-má kā oē kóng hō͘ chheng-chhó, goán sè-hàn--ê tı̄ ha̍k-hāu nā chhut siáⁿ-mih tāi-chı̀, lí tō chhám--a, chai--bô?”
“Tı̄ ha̍k-hāu goá ē-tàng pó-chèng, m̄-koh nā tı̄ goā-kháu chhut tāi-chı̀, goá tō bô hoat-tō͘--a.”
“Kiâⁿ, lâi cháu.” 30 kúi-ê lâng kā thih-kùn-á phiaⁿ--leh, kiâⁿ chhut sı̍t-sı̍p kang-tiûⁿ, lâu Chèng-kı̂ chı̍t ê lâng khiā tı̄ hia.
Chèng-kı̂ chhoán chı̍t ē toā-khùi, kui-ê lâng ná hi--khı̀ kāng-khoán.
(TGB Thong-sı̀n tē 53 kı̂, 2004 nı̂ 2 goe̍h)
