Choè-āu, Chèng-kı̂ iáu-sı̄ peh--khí-lih, kā lâng lóng kiò chhéⁿ liáu-āu, beh ùi lâu-téng lo̍h--lâi ê sı̂, o͘-ian it-tı̍t chhèng tùi i phı̄ⁿ-khang jı̍p--khı̀, hāi i ba̍k-sái it-tı̍t lâu, kiâⁿ kàu saⁿ lâu ê sı̂ í-keng kiâⁿ bē lo̍h--khı̀-a, kám-kak ka-tı̄ tō beh sí tı̄ chia--a. M̄-koh Chèng-kı̂ iáu-sı̄ khò ı̀-chı̀-le̍k keng kàu lâu-kha, hoé mā hō͘ koáⁿ--lâi ê siau-hông-tūi phah hoa--a.
Hit-pái liáu-āu, in sı̀ ê kám-chêng koh khah hó--a, Chèng-kı̂ tiāⁿ-tiāⁿ kóng in sı̄ “seⁿ-sí chi kau”, kı̂-thaⁿ lâng lóng jı̄n-ûi án-ne kóng ke-bó-phoê ē lak kui thô͘-kha, m̄-koh Chèng-kı̂ soah kám-kak chin un-loán, in-ūi i tı̄ hiah kín-kip ê sı̂-chūn, khoàⁿ-tio̍h Cheng Chùn ê léng-chēng kap Sió-n̂g ê siān-liông, chit chióng pêng-iú chin hán-tit ū.
Chèng-kı̂ choán-ha̍k ê sı̂ sı̄ ko-jı̄, lâi Tâi-pak tha̍k-chheh tú-hó sı̄ beh seng ko-saⁿ, mā-sı̄ beh liân-khó ê chêng chı̍t tang. Chit tang, Chèng-kı̂ piàn kah ke chin bat tāi-chı̀, ta̍k kang lóng tha̍k kah chin oàⁿ chiah khùn, mā tiāⁿ-tiāⁿ the̍h-tio̍h in pan ê tē it miâ. I chin-chiàⁿ beh phah-piàⁿ khó tāi-ha̍k.
Chit-chūn, Chèng-kı̂ soah mā khai-sí teh koan-sim chèng-tı̄--a. I khai-sí tùi chit-má ê chèng-hú put-boán, jı̄n-ûi in koh hú-pāi koh o͘-se. I mā bô jı̄n-ûi hoán-tùi-phài--ê ū joā hó, in m̄-bat beh kā in ê chú-tiuⁿ kóng chheng-chhó. Chèng-kı̂ phêng-lūn ê chu-sı̀n tāi-pō͘-hūn sı̄ ùi tiān-sı̄ kap pò-choá khoàⁿ--lâi-ê. I mā tiāⁿ-tiāⁿ kap Cheng Chùn in thó-lūn, liáu-āu, Cheng Chùn lóng kám-kak: “Chèng-kı̂ siuⁿ ke̍k-toan--a.”
Tō tı̄ liân-khó chêng nn̄g kò-goe̍h, tùi-hoāⁿ Tiong-kok ê ha̍k-seng khai-sí chı̍p-hoē, beh iau-kiû bı̂n-chú. Tiong-kok ê ha̍k-seng tı̄ Thian-an-mn̂g kóng-tiûⁿ jú chı̍p jú chē, Chèng-kı̂ mā kám-kak ka-tı̄ seng-khu lāi-té ū chı̍t chióng khı̀ kiōng beh chhèng--khí-lâi, i chiok chù-ı̀ chit kiāⁿ tāi-chı̀ ê hoat-tián, tiāⁿ-tiāⁿ án-ne chheh soah tha̍k bô siáⁿ ē lo̍h.
Tiong-kok ha̍k-seng phoe-phoàⁿ『官倒』, iau-kiû sı̍t-hêng chin-chiàⁿ ê siā-hoē chú-gı̄, in ná chhiùⁿ-koa ná lâu ba̍k-sái, hō͘-siong mo͘h chò-hoé, kui phiàn âng-kı̀-kı̀ ê kı̂-á, kā Thian-an-mn̂g kóng-tiûⁿ chiàm kah ba̍t-chiù-chiù, ná-chhiūⁿ sı̄......kek-bēng, tio̍h! Sı̄ kek-bēng, hiah-ê ha̍k-seng beh iōng in ê sèⁿ-miā kap jia̍t-chêng, ín-tōng kek-bēng ê hong-tiau.
Tâi-oân ê tiān-sı̄-tâi it-tı̍t teh pò-tō chit hāng tāi-chı̀, Chèng-kı̂ ê sim-chêng mā kui kang toè tiān-sı̄ sin-bûn teh khí-khí lo̍h-lo̍h. Chiâⁿ put-hēng, Tiong-kok ha̍k-seng ê jia̍t-chêng, soah hō͘ chiàn-chhia ê lián-á kauh--koè-khı̀, 6 goe̍h chhe 4, Tiong-hoâ Jı̂n-bı̂n Kiōng-hô-kok chèng-hú phài kun-tūi tı̀n-ap, lâng kā kiò chò『六四天安門事件』.
Chèng-kı̂ pang--khı̀-a. I bô siong-sı̀n kèng-jiân ū chèng-hú ē iōng ki-koan-chhèng sàu-siā ka-tı̄ ê ha̍k-seng. 6 goe̍h chhe 4 hit kang, i háu kui kang. Liáu-āu, Chèng-kı̂ hit kúi kang lóng gōng-sı̂n gōng-sı̂n, thâu-khak lāi chin loān, Cheng Chùn in lóng chiâⁿ hoân-ló i ē chò chhut siáⁿ-mih gōng tāi-chı̀ chhut--lâi, it-tı̍t teh kā an-ùi. Lı̄ liân-khó chhun chı̍t kò-goe̍h, Chèng-kı̂ soah siáⁿ-mih chheh to tha̍k bē lo̍h sim.
Chit-chūn, i hiông-hiông siūⁿ-tio̍h chin chē tāi-chı̀: Sı̄ án-choáⁿ ē án-ne? Lán ê chèng-hú m̄-sı̄ tiāⁿ-tiāⁿ kóng beh『反攻大陸, 解救同胞』? Sı̄ án-choáⁿ chit-ê chèng-hú chiah hú-pāi koh chiah bû-lêng? Sı̄ án-choáⁿ kok-ka ū chu-keh pak-toa̍t jı̂n-bı̂n ê sèⁿ-miā? Kok-ka sı̄ ūi-tio̍h thâi-lâng lâi chûn-chāi--ê? Tha̍k-chheh beh chhòng siáⁿ? Sı̄ ūi-tio̍h beh êng-hoâ hù-kùi? Sı̄ ūi-tio̍h ē-tàng chiàm koân-ūi lâi chau-that kē-chàn ê lô-tōng-chiá? Chèng-kı̂ thâu-khak lāi put-toān teh siūⁿ, mā it-tı̍t kā chiah-ê siūⁿ-hoat siá--lo̍h-lâi.
Boé--á, Chèng-kı̂ in pē-bó chai-iáⁿ i ū tām-po̍h-á koài-koài, siūⁿ beh kiò i tńg chhù toà, m̄-koh Chèng-kı̂ kā kı̄-choat. Chit chūn ê Chèng-kı̂ sim-koaⁿ lāi chin ke̍k-tōng, siáⁿ-mih lâng ê oē mā thiaⁿ bē jı̍p--khı̀. Choè-āu, i chò chı̍t ê koat-tēng. Chèng-kı̂ kā kàu-kho-su pa̍k chò chı̍t khûn, the̍h khı̀ ke-á-lō͘ bē hō͘ siu pháiⁿ-tâng kū-siā--ê, i soán chı̍t ê thàu-chá lı̄-khui, bô kap Cheng Chùn in sio-sı̂, i koat-tēng beh iōng ka-tı̄ ê khùi-la̍t kái-piàn siā-hoē. 7--goe̍h, siâm-á khai-sí teh kiò.
(TGB Thong-sı̀n tē 55 kı̂, 2004 nı̂ 4 goe̍h)
