Jı̂n-seng ê Siang-chhe-lō͘

Ū chı̍t ê siàu-liân lâng; i tú-tn̄g teh siūⁿ phok-sū lūn-bûn, hó-gia̍h, kap i ê ài-jı̂n ê sı̂, sí-lâng ê kut-thâu chioh toā-kó͘ ê hêng-chōng hō͘ i khoàⁿ-kı̀ⁿ. Hit-sı̂ i chiū mn̄g I, kóng, "Lí sı̄ sím-mı̍h" ? Toā kó͘ chiū ı̀n, kóng, "Goá ê chit-bū chiū-sı̄ teh koán-lí lâng ê oa̍h-miā, goá chit ê toā-kó͘ nā kòng chı̍t-ē, sè-kan ê lâng chiū sí chı̍t-ê. Koh chı̍t-tiám cheng, chiū beh kòng chı̍t-ē." I án-ni ı̀n-tap. Siàu-liân lâng chiū soà-chiap koh mn̄g, "M̄-chai sı̄ beh ūi-tio̍h sím-mı̍h lâng ?" Ìn, kóng, "Chiū-sı̄ beh ūi-tio̍h lí." Ah ! hit-sı̂ siàu-liân lâng kiaⁿ chı̍t-ē, thó͘ toā-khùi, kóng, "Chhun chı̍t tiám cheng ê oa̍h-miā !” Hit-sı̂ tú-tú ū chı̍t ê pêng-iú lâi beh thàm i, kā i kóng, "Hó pêng-iú, lí sı̍t-chāi chin hó lı̄-ūn, lí ê phok-sū lūn-bûn í-keng thong-koè. Koh bô kú phok-sū-hō beh kàu lí ê chhiú. Tio̍h hoaⁿ-hí ! tio̍h hoaⁿ-hí !" Hit-sı̂ chit ê siàu-liân lâng lóng bô thiaⁿ-tio̍h pêng-iú só͘ kóng ê oē, in-ūi i ê sim-lāi choan-choan teh siūⁿ "sı̂-kan" ê sū; in-ūi i tı̄ chit ê beh sí ê sı̂-hāu, miâ-siaⁿ ū sím-mı̍h lō͘-ēng ? Āu-lâi koh tē-jı̄ ê pêng-iú lâi kā i kóng, "Pêng-iú ah ! lí chin hēng-hok lah ! lín a-peh ê ûi-sán siong-sio̍k í-keng koat-tēng; chı̍t-pah-bān kho͘ teh-beh kàu lí ê lak-tē-á." Hit-sı̂ siàu-liân-lâng iā sı̄ bô teh thiaⁿ i ê pêng-iú só͘ kóng ê oē, in-ūi i só͘ chhun ê sı̂-kan sı̄ 25 hun nā-tiāⁿ; tı̄ chit-sı̂ ū thang tit-tio̍h 100 bān kho͘, ū sím-mı̍h lō͘-ēng ? Sı̍t-chāi sı̄ bô lō͘-ēng. Só͘-í siàu-liân lâng ê sim toā hoân-ló, ū iu-chhiû ê bı̄n-māu. Tē-saⁿ, chiū-sı̄ ū chı̍t ê súi ê bı̄n-sek ê hū-jı̂n lâi, chiū tùi siàu-liân lâng kóng, "Tio̍h saⁿ-kap hoaⁿ-hí, in-ūi lán nn̄g lâng ê kiat-hun í-keng hó-sè lah ! Bı̂n-á-jı̍t nā siat-sú beh kú kiat-hun-sek, iā oē ēng-tit." Hū-jı̂n-lâng ū chin toā hoaⁿ-hí ê bı̄n-iông; chóng-sı̄ siàu-liân lâng tú-tú hoán-tùi hū-jı̂n-lâng só͘ tùi i kóng ê, iā lóng bô jı̍p i ê hı̄-khang. Í-siōng só͘ kóng ê ,sı̄ hı̀-chhut, sı̄ lâng só͘ choè--ê, m̄-kú iā sı̄ ē thang kóng sı̄ jı̂n-seng só͘ siông-siông tú-tio̍h ê sū-sı̍t. Phok-sū lūn-bûn iā sı̄ hó, pù-ū sı̄ lâng só͘ ı̀-ài--ê, him-bō͘ ài-jı̂n iā m̄-sı̄ pháiⁿ; chóng-sı̄ kàu lâng iáu chhun ū chı̍t-tiám cheng kú ê oa̍h-miā, hit-sı̂ hit ê siàu-liân lâng boē thang tùi hit saⁿ hāng lâi tit-tio̍h an-ùi. Chiū-sı̄ bêng-ū ê phok-sū-hō, pah-bān ê hù-kùi, bí-jı̂n ê ài-chêng; m̄-sı̄ i to̍k-it ê hi-bōng. Chhéng-mn̄g hiaⁿ-tı̄ chí-bē, lín só͘ khǹg to̍k-it ê hi-bōng sı̄ sím-mı̍h ? Iâ-so͘ ū kóng, "Lâng tit-tio̍h thong sè-kan, lâi sit-lo̍h i ê sı̀ⁿ-miā, ū sím-mı̍h lı̄-ek ? Lâng beh ēng sím-mı̍h lâi tùi-oāⁿ i ê sı̀ⁿ-miā ? Lâng to̍k-it ê hi-bōng, chiū-sı̄ éng-oán ê oa̍h-miā lah. Iâ-so͘ koh kóng, "Ài kiù sı̀ⁿ-miā ê, hoán-tńg sit-lo̍h i; ūi-tio̍h Goá lâi sit-lo̍h sı̀ⁿ-miā ê, beh tit-tio̍h i. " Chhiáⁿ lán tāi-ke hiaⁿ-tı̄ chí-bē, tio̍h hiàn ka-kı̄ hō͘ Chú tiàu, chò Chú ê kang, ūi-tio̍h Siōng-tè chò bô pó-sioh sı̀ⁿ-miā ê. Chhiáⁿ lán tio̍h kéng ū kong-hui kiù-lêng-chiá ê seng-gâi; nā bô, lán kiám-chhái oē chhin-chhiūⁿ hit ê siàu-liân lâng beh khiā tı̄ sit-bāng ê Siang-chhe-lō͘. Tio̍h hiàn-sin ūi Chú chò kang, lâi chín-kiù Tâi-tó ê tông-pau, sı̄ sim só͘ goān. (Tâi-oân Kàu-hoē-pò tē 504 koàn,1927 nı̂ 3 ge̍h)