Sam-jū-keng ū chı̍t kù, kóng, “Jı̂n chi chho͘, sèng pún siān.” Koh tı̄ pa̍t pún chheh, kóng, “Jı̂n chi chho͘, sèng pún ok.” Chit nn̄g kù, lóng pı̂ⁿ-pı̂ⁿ sı̄ lán Hàn-bı̂n-cho̍k úi-tāi ê ha̍k-chiá só͘ chú-tiuⁿ ê, sui-bóng hit ê cheng-chha sı̄ chı̍t jı̄ nā-tiāⁿ, iáu-kú hit ê saⁿ-lı̄ sı̄ “Lióng ke̍k-toan” ê hn̄g. Lâng ê khí-goân sı̄ “Hó” kap lâng ê khí-thâu sı̄ “Pháiⁿ,” chit nn̄g khoán ke̍k-toan ê chú-tiuⁿ, put-chí ū thang hō͘ lán chim-chiok ê só͘-chāi, iā put-chí ta̍t-tit lán chù-ı̀, khak-sı̍t lán bô chù-ı̀, iā sı̄ boē-ēng-tit. In-ūi chit nn̄g ê chú-tiuⁿ, sı̄ choa̍t-tùi boē-thang saⁿ-oá. Chóng-sı̄ kı̂-sı̍t lán nā chim-chiok gián-kiù ê sı̂, chit nn̄g ê chú-tiuⁿ, to lóng ū i ê chin-lí tı̄-teh.
Ki-tok-kàu ê Sèng-keng, Chhòng-sè-kí 2:7, 21, 22, ū kı̀-bêng Siōng-tè chhòng-chō lâng ê chêng-hêng, iā 25 chat ū kóng-bêng lâng ê sèng, goân-pún sı̄ hó, bô chı̍t-tiám-á chho͘-sio̍k, siâ-phiah, ù-oè kap hiān-sı̂ ta̍k jı̍t só͘ teh khoàⁿ, só͘ teh tú-tio̍h ê “Pháiⁿ”, sı̄ kàu-ke̍k ê sûn-chin, sèng-kiat. Che khak-sı̍t hō͘ lán thang sêng-jı̄n lâng ê khí-goân sı̄ “Hó”. Lán iā tio̍h án-ni sêng-jı̄n, chiah oē ēng-tit.
Siâng-sı̂ lán tùi “Sèng pún ok” ê hong-bı̄n, iā tio̍h kiám-thó. In-ūi khoàⁿ sè-kài jı̂n-lūi ê le̍k-sú, lâng ê phín-sèng ná-lâi ná-bái, ná-lâi ná hú-pāi; tō-tek jı̍t-jı̍t ná tūi-lo̍h, kò-jı̂n tùi kò-jı̂n ê kám-chêng ná bái; ka-têng tùi ka-têng ê chiap-chhiok, ná so͘-oán; kok-ka tùi kok-ka ê koan-hē, ná lı̄-khui; bı̂n-cho̍k tùi bı̂n-cho̍k ê khı̀-hun, ná piàn ná hiong; tāi-ke saⁿ chhai-gı̂, khió-ka̍k, hêng-hiong, cheng-tò͘, bô beh saⁿ niū, iā bô beh saⁿ sià-bián.
Tùi án-ni, hō͘ lán kám-kak-tio̍h ū-iáⁿ “Jı̂n chi chho͘, sèng pún ok.” Tı̄ Chhòng-sè-kí 2:17, 3:1-24, koan-hē Siōng-tè só͘ chhòng-chō, thâu chı̍t-tùi ê ang-bó͘ ê chêng-hêng chin siông-sè. Chiū-sı̄ Siōng-tè chhòng-chō lâng ê sı̂, sèng sı̄ “Hó,” chóng-sı̄ ūi-tio̍h ûi-ke̍h, ge̍k-bēng, bô thiaⁿ-thàn chhòng-chō-chiá Siōng-tè ê bēng-lēng, tı̀-kàu siâng chı̍t ê lâng, tı̄ té-té ê kı̂-kan-tiong tùi “Hó,” piàn choè “Pháiⁿ,” choè-chhut jı̂n-lūi lióng ke̍k-toan ê seng-oa̍h ê khí-goân.
Tùi chit ê sū-sı̍t, hō͘ lán ū ki-hoē thang bêng-pe̍k chı̍t hāng sū, chiū-sı̄ jı̂n-seng pún-jiân sı̄ “Hó,” ūi-tio̍h ge̍k-bēng, tı̀-kàu piàn “Pháiⁿ.” Nā án-ni pàng i tı̍t-tı̍t khı̀, kàu bé ún-tàng sı̄ choa̍t-bāng. In-ūi ūi-tio̍h ge̍k-bēng, chiū siū chiù-chó͘ koáⁿ-chhut “Lo̍k-hn̂g,” thó͘-toē iā ūi-tio̍h ge̍k-bēng siⁿ chhı̀-phè, tùi hit-sı̂ khí, lâng tio̍h tio̍h-boâ keng-choh, choè khó͘-kang, koāⁿ lâu moá-bı̄n chiah ū thang chia̍h, hū-jı̂n-lâng ū seng-sán ê gûi-hiám kap kan-khó͘. Tùi án-ni, lâng chiū iu-ut khí--lâi, āu-lâi chiū chı̀n kàu choa̍t-bāng.
Chóng kóng, lâng siū chō ê sı̂ sı̄ “Hó,” sı̄ tiàm tı̄ “Hó” ê chiam-hong, tı̄ ke̍k-siān ê téng-tiám, sı̄ phiau-chún ê seng-oa̍h, choè tē-it bí-boán, bû iu, bû lū, ke̍k-kı̂ kūn-oá tı̄ chō-bu̍t Chú, iā tit-tio̍h chō-bu̍t Chú Siōng-tè choè in ê pêng-iú. Chit khoán sı̄ jı̂n-seng tı̄ oē-tit án-ni kè-sio̍k i ê seng-oa̍h, chiū-sı̄ hui-siông thang moá-ı̀, chiū bô ū “Hó” “Pháiⁿ” ê hun-pia̍t, iā chiū bô ū “Jı̂n-seng ê lióng ke̍k-toan” (thâu).
Chóng-sı̄ ūi-tio̍h ge̍k-bēng, chiū thâu chı̍t-tùi siū chhòng-chō ê lâng tùi “Hó” ê ke̍k-thâu, poa̍h-lo̍h kàu tı̄ choa̍t-tùi ko͘-sêng “Pháiⁿ” ê ke̍k-thâu ê chhut-hoat-tiám, iā thang kóng poa̍h-lo̍h kàu tı̄ “Pháiⁿ” ê ke̍k-thâu.
Chiū-sı̄ “Ge̍k-bēng,” “Ko͘-sêng,” “Hoān-choē” boē thang tit-tio̍h chō-bu̍t Chú choè in ê pêng-iú, kiù-kèng tio̍h saⁿ pun-lı̄, iā ná lı̄ ná hn̄g. Kiat-kó, jı̂n-seng chiū ná “ù-oè” ná “iu-ut”, choè-āu chiū kàu tı̄ “choa̍t-bāng,” chiū-sı̄ kàu tı̄ “Pháiⁿ” ê ke̍k-thâu.
Só͘-í chiong-kūn boa̍t-sè ê chit sı̂ ê “lán” tek-khak tio̍h hui-siông tiuⁿ-tı̂, kéng-séng, in-ūi lán oē-hiáu tio̍h ài “Hó”, m̄-thang ài “Pháiⁿ”, m̄-kú lán boē-oē choè “Hó”, hoán-tńg ná chhim-jı̍p tı̄ “Pháiⁿ”. Lán nā ài tùi “Pháiⁿ” jı̍p tı̄ “Hó”, boē thang ǹg-bāng lán ka-kı̄ ê kái-piàn, tek-khak tio̍h oá-khò chı̍t ê toā iú-le̍k-chiá lâi kà-sı̄, pang-chān, ín-chhoā, kiù-sio̍k, lán chiah ū ǹg-bāng thang tùi “Pháiⁿ” ê chit-thâu, jı̍p tı̄ “Hó” ê hit-thâu.
Chit ê toā iú-le̍k-chiá, chiū-sı̄ Iâ-so͘ Ki-tok. I choè lán ê tiong-pó, choè lán ê Kiù-chú, thoè lán tèng sı̍p-jı̄-kè, lâu-chhut pó-huih, tùi choē-ok kiù-sio̍k lán chhut-lâi, chiū-sı̄ hō͘ lán thang kap Siōng-tè koh hô, koh saⁿ chhin-kūn.
Oāⁿ-oē lâi kóng, sı̄ hō͘ lán tùi sí (pháiⁿ, choa̍t-bāng) tit-tio̍h tiông-seng, tit-tio̍h chheng-gı̄, ho̍k-tò choè Siōng-tè ê kiáⁿ-jı̂ ê bêng-hūn, tit-tio̍h chiâⁿ-sèng, choè-āu tit-tio̍h êng-kng, chiū-sı̄ éng-oán kap Siōng-tè saⁿ-kap khiā-khí.
Lí ài khiā-khí tı̄ tó chı̍t-thâu? “Hó” á-sı̄ “Pháiⁿ”? Goá khak-sı̀n lí ài khiā tı̄ “Hó” chit-thâu.
Chhiáⁿ lí koáⁿ-kín lâi chiū-kūn I----lí ê Kiù-chú Iâ-so͘.
(Tâi-oân Kàu-hoē-kong-pò tē 799 kı̂, 1955 nı̂ 7 ge̍h)
