Bat ū chı̍t jı̍t teh lo̍h toā-hō͘, tı̀-kàu chē-chē gín-ná bē thang chhut-khı̀, tio̍h tı̄ lāi-bı̄n chhit-thô.
Bó͘ kháu-chàu ū 7 ê gín-ná, toā-hàn--ê hō-chò Jı̂n-tek, chiū kiò i ê sió-tı̄ sió-moē tı̄ in tau ēng lé-pài ê hoat-tō͘ chò chhit-thô. In ū pı̄-pān só͘-chāi chhin-chhiūⁿ lé-pài-tn̂g ê khoán. Tı̄-hia ū pâi nn̄g saⁿ choā ê í, iā chiong chı̍t tè the-í chò tâi-á, ēng kha-ta̍h-í thang hō͘ lâng peh-chiūⁿ tâi-téng.
In khoàⁿ-tâi-á chhòng kàu hiah hó-sè, chiū tāi-ke sio-chiⁿ beh choè bo̍k-su, chóng-sı̄ Jı̂n-tek káng-bo̍k-su eng-kai tio̍h hō͘ i choè, in-ūi i oē-hiáu liām Sèng-keng ê chat tē-it choē, sǹg-sı̄ khah ha̍p-gı̂.
Gín-ná ê a-ko͘ chē tı̄ piⁿ-á teh thiaⁿ,lio̍h-á teh kı̂-koài in sun-á só͘ kóng ê oē.
Kı̂-û ê gín-ná kóng, Hó, hō͘ Jı̂n-tek chò bo̍k-su, chiū in tāi-ke beh lûn-liû lâi khioh lâng só͘ beh hiàn ê chı̂ⁿ. In chiū ēng chı̍t tè phiat-á lâi khioh, iā ēng liú-á chò chı̂ⁿ.
Khui hoē gı̂m-si liáu, Jı̂n-tek chiū chiūⁿ tâi-á-téng, i ū koà in a-kong ê ba̍k-kiàⁿ, chin-chiàⁿ sı̄ chhin-chhiūⁿ bo̍k-su ê khoán. I chiū khui chhùi kóng, Hiaⁿ-tı̄ chí-moē, kin ē-po͘ goá ê tê-ba̍k chiū-sı̄“Lín kı̀ⁿ-nā ài lâng khoán-thāi lín-ê, lín ia̍h tio̍h án-ni khoán-thāi lâng”. Liâm-piⁿ chiū ū siaⁿ teh piān-pok kóng, Hé !Jı̂n-tek ah ! m̄ thang kóng hit-ê. Lí chá-khí kā goá chhiúⁿ hit lia̍p kiû, sı̄ goá chin ài ê chhit-thô mı̍h. Jı̂n-tek ı̀n kóng, Bô iàu-kín, bô iàu-kín, goá beh koh kóng pa̍t-ê. Chiū koh kóng, Kin-á-jı̍t goá ê tê-ba̍k chiū-sı̄ “ Bo̍h-tit phoe-phêng”. Sûi-sı̂ koh chı̍t-ê khí-lâi, kóng, Jı̂n-tek ah ! chit-ê ia̍h m̄ thang; chā-hng Sūn-in bô tı̄ ha̍k-hāu, lí chiū kóng káⁿ sı̄ i khı̀ chhit-thô, m̄ ài lâi tha̍k. Jı̂n-tek ê bı̄n âng-âng, soà kóng, Hó ah ! Goá beh koh-kéng pa̍t-ê. “ Hō͘ lâng ê, pí tùi lâng the̍h-ê, khah ū hok-khı̀ ”. Chèng tāi-ke chiū chhut siaⁿ kóng, Chit-ê koh khah bē sái-tit, lí kin-á-jı̍t chiong só͘ ū ê thn̂g-á chia̍h liáu-liáu, bô lâu poàⁿ tih hō͘ goán, chit khoán ê tê-ba̍k lí koat-toàn m̄ thang ēng.
Kàu hit-tia̍p sè-hàn bo̍k-su chin hoân-ló, soà lâu ba̍k-sái. In a-ko͘ thiaⁿ-liáu chek-sı̂ khí-lâi, kóng, Lí khoàⁿ, tē-it hó ê tê-ba̍k sı̄ chit chat “ Lín tio̍h saⁿ-thiàⁿ”. Lán nā ē hiáu liām Sèng-keng ê oē sı̄ hó, iáu-kú m̄ ta̍t-tio̍h chiàu Sèng-keng ê oē khı̀ kiâⁿ sı̄ khah hó.
(Tâi-lâm-kàu-hoē-pò tē 431 koàn, 1921 nı̂ 2 goe̍h)
