Sió-pêng-iú, ngó͘-an! Lâi lâi lâi Lâi tha̍k sè-kài-sú Thiaⁿ goá kóng kò͘-sū Kin-á-jı̍t beh kóng “Jı̄-bó ê kò͘-sū”
Sè-kài tē-tō͘ tián khui lâi khoaⁿ Ū chı̍t ê kok-ka chin toā lı̄ lán chin kı̄n Lán chin sek-sāi Lēng-goā la̍k ê kok-ka lı̄ lán chin hn̄g Lán chin chheⁿ-so͘
Tı̄ chı̍t-ê sè-kài hoē-gı̄ Hit-ê lán chin sek-sāi ê kok-ka Kā lán ê kok-miâ chhiúⁿ--khı̀ Hāi lán choá-thâu bô miâ choá-bé bô sèⁿ Hāi lán bô sêng lâng-hêng Hāi lán tı̄ sè-kài ê bı̄n-cheng iûⁿ--khı̀ Hāi lán tı̄ tē-kiû siau--sit-khı̀
Lēng-goā ū la̍k ê kok-ka Lán chin chheⁿ-so͘ Koan in sin-khu chin tiōng-iàu ê pō͘-ūi hō͘ lán
Ū chı̍t-ê Au-chiu ê kok-ka Chiok ū kut-khı̀ Ēng i kok-miâ tiong-ng ê lêng-kut koan hō͘ lán Chò lán khiā--khí-lâi ê hit-ki lêng-kut T
Chı̍t-ê Pak-bí-chiu ê kok-ka Koan i ê téng-poàⁿ-sin hō͘ lán chò lán ê téng-poàⁿ-sin A
Tang-au chiàn-loān tiong ê chı̍t-ê kok-ka Koan i ê thâu-khak hō͘ lán chò thâu-khak chò lán chū-kí I
Lâm-bí-chiu chı̍t-ê sàn-chiah ê kok-ka Kā i ı̂ⁿ-ı̂ⁿ ê sim-koaⁿ Hoâiⁿ-chhiat chò nn̄g-poàⁿ Chı̍t-poàⁿ chò lán chiàⁿ-chhiú sèng-lı̄ ê chhiú-sè V Lēng-goā chı̍t-poàⁿ chò lán tó-chhiú lēng chı̍t-ê sèng-lı̄ V Sim-koaⁿ-á-bah ûi--khí-lâi ê hái-éng-poaⁿ un-jiû ê siang-chhiú W
A-chiu ê siâⁿ-chhı̄ kok-ka Koan i ê ē-poàⁿ-sin hō͘ lán chò ē-poàⁿ-sin A
Chı̍t-ê Lâm-bí chiok sè ê kok-ka Khò ūn-hô seng-chûn ê kok-ka Koan in ê siang-kha hō͘ lán chò siang-kha N Hō͘ lán ē-tàng khiā--khí-lâi Hō͘ lán ē-tàng thong-hêng sè-kài
Sè-kài ū la̍k ê kok-ka khek in ê kut koah in ê bah Hō͘ lán bô sêng lâng ê lâng-hêng Siau-sit khı̀ ê lâng-hêng Iûⁿ--khı̀ ê lâng-hêng Koh khiā--khí-lâi Khiā thêng-thêng tı̄ sè-kài ê bı̄n-chêng
Sió-pêng-iú, hit la̍k ê kok-ka ê miâ Ài kı̀ hō͘ tiâu Khek tiàm lán ê sèⁿ-miā lāi-té Sui-jiân in ê miâ khoàⁿ--khí-lâi sió-khoá chheⁿ-so͘ Sió-khoá koài-koài:
AUS RIA C NADA CROAT A PUERT RICO SING PORE PA AMA
Chia-ê miâ Ài kı̀ hō͘ tiâu-tiâu-tiâu Chit la̍k ê kok-ka í-keng chiâⁿ-chò lán ê chı̍t-pō͘-hūn Lán mā í-keng chiâⁿ-chò chit la̍k-ê kok-ka ê chı̍t-pō͘-hūn
Tān-sı̄ bô khó-lêng sı̄ kā lán ê miâ chhiúⁿ khı̀ chhàng Hit-ê kok-ka ê chı̍t-pō͘-hūn In-ūi lán ê miâ kap in ê miâ Liân chı̍t-ê jı̄-bó To bô koan-hē