Jı̄-cha̍p Sè-kí ê Chú-jı̍t-o̍h 05

Tē 5 Phiⁿ Chóng-lūn Tē 5 chiuⁿ Chú-jı̍t-o̍h kap ka-têng ê liân-lo̍k Chong-kàu-tek ê jı̂-tông kàu-io̍k ê toā ki-koan, pí Chú-jı̍t-o̍h á-sı̄ í-goā, siōng ū la̍t sı̄ chāi-tı̄ ka-têng. Siat-sú nā bô ka-têng ê pang-chān, chiū Chú-jı̍t-o̍h ê kàu-io̍k chha-put-to lóng pı̀ⁿ bô hāu. Tùi Chú-jı̍t-o̍h ê jı̂-tông só͘ si-hêng kàu-io̍k, chı̍t-lé-pài kú chí-ū 1 tiám-cheng, chóng-sı̄ tı̄ ka-têng kàu-io̍k jı̂-tông, hit ê sı̂-kan sı̄ bô-hān. Só͘-í jı̂-tông kàu-io̍k ê toā pō͘-hūn lóng sı̄ tı̄ ka-têng si-hêng. Thiaⁿ kóng múi-nı̂ ū 400 bān ê âng-eⁿ-á chhut-sı̀ lâi sè-kan, chóng-sı̄ chiah ê eⁿ-á sek bô sio-siāng, iā bô pêⁿ toā-hàn, m̄-kú nā bô siū lāu-bó ê pó-hō͘ chiū bē tit thang ka-tı̄ seng-chûn, chit ê sū lóng sio-siāng. Bat ū chı̍t ê lâng kiò chò Hé-à kóng, “A-tong ê lo̍k-hn̂g sı̄ tı̄ ka-têng, chóng-sı̄ chāi-tı̄ lán ka-têng chiū-sı̄ lo̍k-hn̂g”, chhin-chhiūⁿ Bí-kok ê gín-ná siông-siông ài chhiùⁿ “bô pí ka-têng khah hó ê só͘-chāi” ê khoán, chāi-tı̄ jı̂-tông bô pí ka-têng khah iàu-kín ê só͘-chāi, iā bô khah hoaⁿ-hí ê só͘-chāi. Lâng ê âng-eⁿ-á pí cheng-seⁿ ê kiáⁿ toā bē hiah kín chiū-sı̄ Siōng-tè ê chí-ı̀ ài beh hō͘ âng-eⁿ-á tı̄ lāu-bó ê sin-piⁿ khah kú. Ná chhin-chhiūⁿ niau-á-kiáⁿ á-sı̄ káu-á-kiáⁿ ē liâm-piⁿ toā, chiū m̄-bián hō͘ pē-bó hoân-ló, iā chin chió mâ-hoân, chóng-sı̄ sū-sı̍t pē-bó teh iúⁿ-chhı̄ kiáⁿ-jı̂ tio̍h keng-koè 10 nı̂, 15 nı̂ hiah tn̂g ê nı̂ goe̍h ê tiong-kan, mê-jı̍t bô pàng-sang chı̄n-sim teh ióng-io̍k. Án-ni teh kàu-io̍k jı̂-tông, choè iàu-kín m̄-sı̄ ēng giân-gú teh kà-sı̄, sı̄ ēng hêng-ûi teh kā kám-hoà. Ka-têng choè toā ê bo̍k-tek sı̄ chāi-tı̄ chō-chiū jı̂n-keh, só͘-í Ki-tok-tô͘ ê ka-têng ē thang kóng sı̄ chō-chiū chhin-chhiūⁿ Ki-tok ê jı̂n-keh ê só͘-chāi. A-tó-kín chit ê lâng kóng, “Hē jı̂-tông tı̄ ka-têng ê lí-iû, chiū-sı̄ in-ūi beh hō͘ i ǹg thiⁿ-nih hoat-ta̍t.” Hiān-chāi Jı̍t-pún ê sı̄-toā-lâng chin toā chhò-gō͘ ê só͘-chāi sı̄ siūⁿ kóng kà jı̂-tông ê só͘-chāi chí-ū sı̄ ha̍k-hāu, iā ka-têng lóng bô koan-hē ê khoán. Só͘-í tùi sàng jı̂-tông khı̀ ha̍k-hāu ê sū put-chí ū teh ló͘-le̍k, m̄-kú tùi tı̄ ka-têng teh si-hêng kàu-io̍k lóng bô teh chı̄n-la̍t, kin-á-jı̍t teh chiông-sū tı̄ phó͘-thong kàu-io̍k ê lâng choè khó͘-sim ê tiám, chiū-sı̄ ài beh hō͘ ha̍k-hāu kap ka-têng khoàⁿ án-choáⁿ thang saⁿ liân-lo̍k. It-poaⁿ ê pē-bó bô chı̄n-la̍t tı̄ ka-têng ê kàu-io̍k ê lí-iû, chiū-sı̄ in siūⁿ kóng kàu-io̍k sı̄ chí-ū o̍h nā-tiāⁿ, bô teh siūⁿ kóng sı̄ kā in thoàn-liān, chō-chiū jı̂n-bu̍t. In siūⁿ kóng chí-ū tı̄ ha̍k-hāu o̍h tha̍k kap siá, chiū ē chō-chiū hó ê jı̂n-bu̍t. Jı̂-tông tı̄ ha̍k-hāu só͘ o̍h ê, pē-bó tio̍h hō͘ i tı̄ ka-têng lâi piáu-ián khoàⁿ-māi. Phı̀-jū nā tı̄ Chú-jı̍t-o̍h ū ha̍k-sı̍p tùi Siōng-tè kı̂-tó, tı̄ ka-têng nā bô hō͘ i kı̂-tó, koh pē-bó ka-kı̄ nā bô kı̂-tó, sui-jiân tı̄ Chú-jı̍t-o̍h ū só͘ kà ê, iā lóng bô lō͘-ēng. Khoàⁿ Chú-jı̍t-o̍h chò gín-ná thit-thô ê só͘-chāi, á-sı̄ siūⁿ kóng gín-ná tı̄ chhù-nih kiám-chhá só͘-í kā sàng khı̀ Chú-jı̍t-o̍h, chit-khoán ê siūⁿ-hoat chin m̄-tio̍h. Sui-jiân sı̄ Ki-tok-tô͘ ê pē-bó, iáu-kú m̄-chai jı̂-tông ê chong-kàu kàu-io̍k só͘-í sàng gín-ná khı̀ phó͘-thong ê ha̍k-hāu chin giâm-keh, m̄-kú sàng khı̀ Chú-jı̍t-o̍h bô siūⁿ kàu hiah iàu-kín. Lán kok ê Ki-tok-tô͘ ê jı̂-tông iáu-kú chió, chóng-sı̄ nā siat-sú in ê pē-bó jı̄n-chin lóng sàng in ê jı̂-tông lâi Chú-jı̍t-o̍h, chiū bô-lūn tó-ūi ê kàu-hoē khak-sı̍t ē chō-chiâⁿ chin hó ê Chú-jı̍t-o̍h. Koh sui-jiân m̄-sı̄ sı̀n-tô͘ ê gín-ná, nā liáu-kái Chú-jı̍t-o̍h ê kè-ta̍t, in ê pē-bó ún-tàng iā beh sàng in khı̀ Chú-jı̍t-o̍h. Tı̄ chong-kàu-tek jı̂-tông kàu-io̍k nā m̄-sı̄ kàu-su kap pē-bó chò-hoé lâi kā kàu-io̍k, bē thang khoàⁿ tio̍h cha̍p-hun ê hāu-kó. Koan-hē Chú-jı̍t-o̍h kap ka-têng ê liân-lo̍k siōng tio̍h chù-ı̀ ê tiâu-kiāⁿ, si: (1) Chong-kàu kàu-io̍k kap phó͘-thong kàu-io̍k sio-siāng, ūi-tio̍h beh chō-chiū oân-choân ê jı̂n-bu̍t bô bē-ēng-tit ê, só͘-í tek-khak tio̍h hō͘ jı̂-tông khı̀ tha̍k Chú-jı̍t-o̍h ê sū. (2) Chú-jı̍t-o̍h ê ha̍k-khò tek-khak tio̍h tı̄ chı̍t lé-pài ê tiong-kan hō͘ in chún-pı̄. (3) Tı̄ Chú-jı̍t-o̍h só͘ o̍h ê tāi-chı̀ hō͘ in tı̄ ka-têng lâi sı̍t-hêng. (4) Nā phoà-pēⁿ á-sı̄ ū sū-kò͘ beh khiàm-se̍k ê sı̂, tio̍h kài chhut chhéng-ká. (5) Hiàn-kim tek-khak tio̍h hō͘ gín-ná chah khı̀. (6) Tio̍h hō͘ in giâm-siú Chú-jı̍t-o̍h ê sı̂-kan. Chò pē-bó ê lâng nā kı̀-tiâu téng-bı̄n só͘ siá chiah ê sū iā koh kā sı̍t-hêng ê sı̂, kòng-hiàn tı̄ jı̂-tông ê chong-kàu kàu-io̍k m̄-chai beh loā toā! Án-ni Chú-jı̍t-o̍h kap ka-têng ē-thang liân-lo̍k, chiah ē-thang si-hêng oân-choân ê chong-kàu kàu-io̍k.