Jı̄-cha̍p Sè-kí ê Chú-jı̍t-o̍h 09

Tē 2 Phiⁿ Koán-lí-hoat Tē 1 chiuⁿ Koán-lí ê ı̀-gı̄. Chú-jı̍t-o̍h sı̄ chong-kàu-tek ê jı̂-tông kàu-io̍k ê toā ki-koan, só͘-í tek-khak tio̍h kin-kù ha̍k-lí-tek, sim-lí-tek kap sin kàu-io̍k-ha̍k ê toā goân-lí lâi si-hêng kàu-io̍k, Chú-jı̍t-o̍h ê koán-lí-hoat kap phó͘-thong ê ha̍k-hāu ê koán-lí-hoat lóng bô cheng-chha. Chiū-sı̄ tio̍h siông-sè gián-kiù jı̂-tông ê sū kap kàu-io̍k, ēng choè chı̀n-pō͘ ê hoat-tō͘ lâi koán-lí Chú-jı̍t-o̍h. Taⁿ koan-hē chiah ê sū-hāng, tı̄ ē-bı̄n chiām-chiām lâi kóng khí. Tē 2 chiuⁿ Kui-chek Siōng tē-it iàu-kín ê sı̄ kui-chek, che sı̄ kap siat-lı̍p Chú-jı̍t-o̍h tông-sı̂ bô bē ēng-tit ê. Hāu-tiúⁿ sı̄ sím-mı̍h lâng soán-chhut? Kàu-oân kap ia̍h-oân beh án-choáⁿ kā in chiok-thok? Sím-mı̍h khoán lâng beh chò ha̍k-seng? Koan-hē chiah ê sū ê kui-chek nā bô, kiat-kio̍k ha̍k-hāu bē sêng-lı̍p. Kin-á-jı̍t Jı̍t-pún ê Chú-jı̍t-o̍h, chí-ū chhin-chhiūⁿ chū-chı̍p jı̂-tông, iā kā in kà sím-mı̍h nā-tiāⁿ, bô ū chit-khoán ê ha̍k-hāu. Bô-lūn tó-ūi ê ha̍k-hāu tek-khak tio̍h ū kui-chek, tùi án-ni chiū ū tia̍t-sū. Nā bô kui-chek, bô tia̍t-sū ê ha̍k-hāu, sı̄ chí-ū chia̍h miâ, bē thang kóng sı̄ chin-chiàⁿ ê ha̍k-hāu. Kı̀ⁿ-nā ē-thang kiò-chò ha̍k-hāu, ha̍k-seng iā tio̍h ū chu-keh, kàu-oân iā ū chek-jı̄m, koh ha̍k-seng kap kàu-su tio̍h hō͘ chı̍t ê kui-chek lâi koán-hat. Chóng-sı̄ kui-chek m̄-sı̄ it-tēng ê hêng-sek. Sûi ê ha̍k-hāu ē-thang chū-iû lâi chò, ē-bı̄n pâi-lia̍t Sukiyabasbi kàu-hoē ê Chú-jı̍t-o̍h ê kui-chek, chò lia̍t-ūi ê chham-khó. Chú-jı̍t-o̍h ê hiàn-hoat Tē 1 tiâu Bêng-chheng: Pún-hāu chheng-chò Jı̍t-pún To̍k-lı̍p Tiúⁿ-ló Sukiyabasbi kàu-hoē Chú-jı̍t-o̍h. Tē 2 tiâu Bo̍k-tek: Pún-hāu ūi-tio̍h poê-iúⁿ oân-choân ê Ki-tok-tô͘ ê sı̀n-gióng, kap chiàu án-ni seng-oa̍h, gián-kiù kap kà Sèng-keng chò bo̍k-tek. Tē 3 tiâu Ha̍k-seng: Lâi pún-hāu chhut-se̍k 2 pái í-siōng, koh sē-iok beh kè-sio̍k chhut-se̍k ê lâng thang chò pún-hāu ê ha̍k-seng. Pún-hāu ê ha̍k-seng lóng ū tâu-phiò-koân. Tē 4 tiâu Ia̍h-oân: Pún-hāu siat ē-bı̄n só͘-kı̀ ê ia̍h-oân.
Hāu-tiúⁿ, Hù hāu-tiúⁿ, Su-kı̀, Koè-kè, Su-che̍k-cho͘, Im-ga̍k-cho͘, Chiap-thāi hóng-būn cho͘.
Pún kàu-hoē ê bo̍k-su éng-oán sı̄ Chú-jı̍t-o̍h ê bo̍k-su. (Tàn-sı̄ chiah ê ia̍h-oân khó-í kiam-jı̄m)
Ia̍h-oân kap kàu-oân cho͘-chit hia̍p-gı̄-hoē, iā hāu-tiúⁿ chò chit ê hoē-tiúⁿ, chiah ê chit lóng sı̄ 1 nı̂-kú boán-jı̄m. Tàn nā bô hō͘-jı̄m-chiá tio̍h kè-sio̍k chāi-chit. Tē 5 tiâu Soán-kú: Hāu-tiúⁿ sı̄ múi-nı̂ tı̄ 4 goe̍h tē-it ê Chú-jı̍t, tı̄ kàu-hoē ê hô-hoē soán-kú, kı̂-thaⁿ ê ia̍h-oân sı̄ tı̄ hia̍p-gı̄-hoē soán-kú. Tē 6 tiâu Ia̍h-oân ê gı̄-bū. 1. Hāu-tiúⁿ: Chiáng-lí choân-poaⁿ ê chit-bū, kam-tok chı̍p-hoē, koat-tēng seng-kip, koh tio̍h chı̄n choân-la̍t, put-lūn ha̍k-hāu lāi-goā, tio̍h tô͘-bô͘ pún-hāu ê lı̄-ek. 2. Hù hāu-tiúⁿ: Pang-chān hāu-tiúⁿ ê chit-bū, nā hāu-tiúⁿ bô tı̄-teh ê sı̂, tāi-lí hāu-tiúⁿ. 3. Su-kı̀: Chhú-lí ha̍k-seng ê miâ-phō͘, chèng-khak chò koan-hē ha̍k-seng ê chhut-se̍k, hiàn-kim ê chóng-gia̍h ê kı̀-lio̍k, put-iàu sı̂ tı̄ múi-chiu, múi-goe̍h, múi-nı̂, tio̍h pò-kò. 4. Koè-kè: Pún-hāu ê hùi-iōng kap ūi-tio̍h chû-siān sū-gia̍p siu-chı̍p hiàn-kim, koh chiàu hia̍p-gı̄-hoē ê bēng-lēng lâi chi-chhut, tı̄ nı̂-hoē pò-kò i ê koat-sǹg. 5. Su-chek-cho͘: Chiàu hia̍p-gı̄-hoē ê bēng-lēng koán-lí pún-hāu tô͘-su-sek só͘ ū ê kàu-kho-su, chham-khó-su, kap kı̂-thaⁿ ê su-che̍k. 6. Im-ga̍k-cho͘: Chiàu hāu-tiúⁿ ê bēng-lēng, chiáng-lí pún-hāu ê im-ga̍k. 7. Chiap-thāi hóng-būn cho͘: Tı̄ hāu-lāi chiàu-kò͘ ha̍k-seng, koh nā in-ūi phoà-pı̄ⁿ kap kı̂-thaⁿ ê sū-kò͘ ê sı̂ liâm-piⁿ khı̀ kā hóng-būn. 8. Hia̍p-gı̄-hoē: Jı̄m-bián kàu-oân, kap ia̍h-oân ê kái-soán, soán-tēng kap kó͘ bé pún-hāu tô͘-su-sek ê chham-khó-su kap kı̂-thaⁿ bûn-ha̍k su-lūi, koh gı̄-lūn hiàn-kim ê chi-chhut, chı̄n-la̍t tô͘-bô͘ pún-hāu ê chı̀n-pō͘ kap hoat-tián. Pún-hoē só͘ koat-gı̄ ê sū-hāng, tek-khak tio̍h hō͘ pún-hāu ê hoē-gı̄ hù-gı̄. Tē 7 tiâu Kàu-oân ê gı̄-bū: Ūi-tio̍h beh kà ê ha̍k-khò tio̍h ū cha̍p-hun ê chún-pı̄, chhut-se̍k hia̍p-gı̄-hoē, pún-hāu khai-sí ê sı̂-kan tio̍h giâm-siú, kok pan ê kui-lu̍t tio̍h giâm, hō͘ ha̍k-seng ē chù-ı̀ chai Chú-jı̍t-o̍h ê thiàⁿ-sioh in. Koh ūi-tio̍h án-ni thè in kı̂-tó, á-sı̄ khı̀ in tau hóng-būn, te̍k-pia̍t nā ūi-tio̍h phoà-pı̄ⁿ á-sı̄ khiàm-se̍k ê sı̂, chek-sı̂ khı̀ hóng-būn, chı̄n-la̍t ūi-tio̍h ta̍t-sêng pún-hāu só͘ kui-tēng ê bo̍k-te̍k. Tē 8 tiâu Pun-pan: Pún-hāu i-chiàu ha̍k-seng ê ha̍k-le̍k, kap tı̀-sek ê thêng-tō͘ pun chò 8 pan. Bōng pan: Iù-tı̄-hn̂g cho͘.
Hí pan: Chho͘-sió lú-seng.
Ài pan: Ko-sió lú-seng.
Jím pan: Lú tiong ha̍k-seng.
Hūi pan: Sió-ha̍k lâm-seng.
Sı̀n pan: Chho͘-tiong lâm-seng.
Lo̍k pan: Ko-tiong ha̍k-seng.
Hô-pêng pan: Toā-lâng lâm-lú. Tē 9 tiâu Khai-hoē: Pún-hāu múi lé-pài-jı̍t siōng ngó͘ 9 tiám khí kàu 10 tiám, lóng siū-gia̍p chı̍t-tiám-cheng kú. (Tàn chiàu kùi-chiat, ū sı̂ to-siáu ê piàn-keng.) Tē 10 tiâu Te̍k-pia̍t chū-hoē: Pún-hāu múi-nı̂ 12 goe̍h 25 jı̍t khui Kiù-chú-tàn chiok-hō-hoē, koh chı̍t-nı̂ chı̍t-pái khui ūn-tōng-hoē. Tē 11 tiâu Siúⁿ-hoa̍t: Chı̍t-nı̂ ê tiong-kan nā lóng m̄-bat khiàm-se̍k ê ha̍k-seng tı̄ Kiù-chú-tàn chiok-hō-hoē ê sı̂ siúⁿ siúⁿ-pâi. Koh chı̍t-nı̂ tiong chhut-se̍k siōng hó ê pan siúⁿ iu-sèng-kı̂. Hoān-nā pún-hāu ê ha̍k-seng, khoàⁿ chò bô sek-tòng ê sı̂, tùi hia̍p-gı̄-hoē ê koat-gı̄ kā tû-miâ. Tē 12 tiâu Siu-chèng: Pún hiàn-hoat nā ū iú-koân-chiá ê tâu-phiò kàu 4 hūn 3 ê sı̂, ē-tit thang sûi-sı̂ kái-chèng, ke-thiⁿ.