Jı̄m-bū
Tāi-ha̍k ta̍k-tang hioh-joa̍h kap hioh-koâⁿ, goá lóng chin ài chham-ka iâⁿ-tūi. 1 hong-bı̄n sı̄ siūⁿ beh ke ha̍k-sı̍p 1-koá ū chhù-bı̄ ê khò-têng, sūn-soà mā chioh ki-hoē sı̀-kè khı̀ khoàⁿ-khoàⁿ--leh, siūⁿ beh tı̄ tāi-ha̍k kı̂-kan kā Tâi-oân se̍h thàu-thàu...... Ta̍k-kài iâⁿ-tūi, goá lóng tiām-tiām-á chē tı̄ Tâi-á-kha, iōng chông-pài ê gán-sı̂n khoàⁿ Tâi-á-téng toā-kha ê káng-su, thián--khui ê pe̍h-sek phō͘-á-choá lāi-té, lóng sı̄ jı̄n-chin kı̀-lo̍k in kóng ê oē. Hit-chūn, khó-lêng án-choáⁿ siūⁿ to siūⁿ bē kàu ū 1-kang goá mā ē ū ki-hoē tı̄ Tâi-á-téng kóng-oē. Kin-nı̂ ê “Sè-kài Tâi-gí Bûn-hoà-iâⁿ” tı̄ Ko-hiông kí-pān, TGB ê sêng-oân sı̄ kang-chok jı̂n-oân, só͘-í TGB tı̄ Sin-tek ê『幹訓』tú koè bô 2 kang, goán tō tı̄ thàu-hong lo̍h-hō͘ ê hong-thai-thiⁿ, 1-lō͘ ùi Tām-chúi sái mê-chhia lâi kàu Ko-hiông. Ko-hiông ê jı̍t-thâu kāng-khoán chin jia̍t-chêng, seng-oa̍h ê pō͘-tiau mā bô pak-pō͘ hiah tı̂m-tāng, sı̄ tām-po̍h-á bê-lâng ê siâⁿ-chhı̄; goá iōng chin khin-sang ê sim-chêng chún-pı̄ beh khai-sí iâⁿ-tūi ê seng-oa̍h. Siūⁿ bē kàu, tú kàu Ko-hiông ê tē 1 kang àm-sı̂, Tek-hoâ tō kā ta̍k-ê “soan-pò͘”: pún-lâi TGB hū-chek ê “Lô-má-jı̄ kàu-ha̍k”, in-ūi tiûⁿ-tē khong-kan bô hoat-tō͘ hun-cho͘ ê koan-hē, só͘-í goán ū 1-chiat khò ê sı̂-kan ài chiūⁿ-tâi kóng-oē. Thó-lūn ê kiat-kó, Toā-thâu-liân, Ui-chı̀, Chiau-hông kap goá lóng ài chiūⁿ-tâi. Ui-chı̀ sı̄ chú-chhı̂-jı̂n, tē 1 pō͘-hūn Chiau-hông seng siāu-kài “TGB Ha̍k-seng Tâi-oân Gí-bûn Chhiok-chı̀n-hoē”; soà--lo̍h-lâi Ui-chı̀ kóng “Sı̄ án-choáⁿ beh siá Tâi-bûn”; Toā-thâu-liân kà “Lô-má-jı̄”, goá iōng Hak-fa chò pó͘-chhiong; siōng boé--á goá ài hun-hióng “Siá Tâi-bûn ê keng-giām”, chit pō͘-hūn kı̂-thaⁿ-lâng mā ē-tàng chò-hoé hun-hióng. Chū chai-iáⁿ chit-hāng “jı̄m-bū” liáu-āu, goá goân-pún khin-sang chhut jı̍t-thâu ê sim-chêng, 1-sı̂ soah o͘-im--khí-lâi. Siūⁿ-tio̍h beh tı̄ hiah-nı̄ chē toā-lâng (lāi-té koh chiâⁿ-chē lāu-su) bı̄n-thâu-chêng kóng-oē, koh ài chē tı̄ hiah-nı̄ koân ê Tâi-á-téng hiah kú ê sı̂-kan; koh-chài kóng, che sı̄ soan- thoân TGB ê hó ki-hoē, nā-sı̄ goá kóng kah làu-khùi tō hāi--a, chin-chiàⁿ jú siūⁿ tō jú kiaⁿ......Chū sè-hàn, goá tō chiâⁿ gâu kín-tiuⁿ, ta̍k-kái lāu-su tiám-miâ ài kóng-oē, goá tō kiaⁿ kah phı̍h-phı̍h-chhoah, táⁿ sı̄ pí niáu-chhí-á koh khah sè. Tāi-ha̍k tiāⁿ-tiāⁿ tú-tio̍h ài “kháu-thâu pò-kò” ê khò-têng, put-tek-í it-tēng ài kóng-oē ê sı̂-chūn, chiūⁿ-tâi chı̀n-chêng goá tō ē khai-sí ūi-thiàⁿ, kín-tiuⁿ kàu chiâⁿ bô lō͘-iōng ê thêng-tō͘. Chiūⁿ-tâi hit-kang, goán chhēng “Káu-pâi Kong-ha̍k-hāu” ê o͘-saⁿ kiâⁿ khı̀ Tâi-á-téng, goá pún-té chiok kín-tiuⁿ--ê, ūi mā khai-sí tiuh-tiuh-thiàⁿ, m̄-koh khoàⁿ Toā-thâu-liân, Ui-chı̀, Chiau-hông in lóng chiok léng-chēng--ê, koh khoàⁿ-tio̍h Taco tı̄ Tâi-á-kha it-tı̍t thè goán ka-iû, tō khah bô hiah kiaⁿ--a. Tâi-á-téng ê sı̂-kan koè kah te̍k-pia̍t bān, goá ê ba̍k-chiu lóng m̄-chai beh khoàⁿ toeh, kan-taⁿ it-tı̍t khoàⁿ tē 1pâi 1-ê chiok jı̄n-chin thiaⁿ goán kóng-oē ê Jı̍t-pún liû-ha̍k-seng (cha-bó͘-gín-á), koh ū khoàⁿ-tio̍h chē tı̄ kak-á ê Tek-hoâ án-ne niâ. Ui-chı̀ kap Chiau-hông kóng liáu tō oāⁿ Toā-thâu-liân kà “Lô-má-jı̄”--a, goá ài iōng Ha̍k-fa kóng kúi ê sû, tē 1 kái tı̄ hiah-nı̄ chē lâng bı̄n-thâu-chêng kóng Ha̍k-fa, hit-chióng kám-kak chiok te̍k-pia̍t--ê, sui-bóng kín-tiuⁿ m̄-koh mā chin hoaⁿ-hí. Goán hit-chiat khò kiat-sok liáu-āu, ū chin chē sian-pái lóng lâi kā goán kó͘-lē, mā ū lâng chú-tōng lâi mn̄g TGB ê siau-sit. Thàu koè chit-ê ki-hoē, ū jú lâi jú chē lâng chai-iáⁿ TGB, mā ta̍uh-ta̍uh-á koan-sim chit-ê thoân-thé, hit-chióng khai-sí hō͘ lâng chù-ı̀ ê kám-kak chin-chiàⁿ chiok hó--ê. Chit-kái chiūⁿ-tâi kóng-oē ê keng-giām mā hō͘ goá ha̍k-sı̍p chin chē, iōng Ha̍k-fa kóng Lô-má-jı̄ sı̄ siōng chhin-chhiat ê kı̀-tı̀, tı̄ iâⁿ-tūi kı̂-kan tiāⁿ-tiāⁿ tú-tio̍h ū lâng lâi kap goá kóng Ha̍k-fa, in tùi Ha̍k-fa ê koan-sim kap tiōng-sı̄ hō͘ goá chin kám-tōng, mā hō͘ goá 1-chióng un-loán ê kám-siū. Goá mā hoat-kak, kín-tiuⁿ ê kò-sèng khó-lêng sı̄ poàⁿ-seⁿ-sêng--ê, chóng--sı̄, táⁿ mā-sı̄ ē-tàng hùn-liān-- ê, ùi lo̍k-im “Phah-phú-kng” kàu Ko-hiông ê chiūⁿ-tâi kóng-oē, koè-têng tiong-kan ê kín-tiuⁿ kap kiaⁿ-hiâⁿ lóng tńg-oāⁿ chò āu 1-kài ê ióng-khı̀, kó͘-lē ka-tı̄ kā siūⁿ-hoat kóng--chhut-lâi, hō͘ ka-tı̄ 1-kái pí 1-kái koh khah chē sêng-tióng ê ki-hoē. (TGB Thong-sı̀n tē 35 kı̂, 2002 nı̂ 8 goe̍h)