Só͘ chhun jı̍t-chí sı̄ iú-hān
Iáu-koh khoà-lū chit sè-kan
Sè-kan o͘-àm goá chin kiaⁿ
Khoà-lū kiáⁿ-sun thàn in kiâⁿ
Ūi-tio̍h sè-kan khah kè-thâu
Siōng-tè tō-lí pàng tı̄ āu
Kı̂-tó Siōng-tè tio̍h chiàu-kò͘
M̄-thang hō͘ in kiâⁿ bê-lō͘
Ūi-tio̍h kiáⁿ-sun kı̂-tó lâu ba̍k-sái
Goá ê khó͘-sim chí-ū Siōng-tè chai
Ǹg-bāng kiáⁿ-sun só͘ choè ài lı̍p-chı̀
Sūn-thàn Siōng-tè lâi kiâⁿ hó chí-ı̀
M̄-thang pàng-sak chin tō-lí
Chiah-si Siōng-tè ê kiáⁿ-jı̂
Tio̍h jı̄n Siōng-tè ê sèng-kiáⁿ
Beh kiù bān-lâng ê sı̀ⁿ-miā
Taⁿ lán tō-lí nā m̄ thiaⁿ
Chiong-lâi chiū boē kàu thiⁿ-siâⁿ
Tio̍h ū jı̂n-ài lâi saⁿ-thiàⁿ
Chiū oē êng-kng Chú ê miâ
Miâ-siaⁿ tē-ūi lóng chiām-sı̂
Put-pí thian-tông ê hok-khı̀
Ū-thang chia̍h ēng chin kiong-hí
Siōng-tè sù hok ná ke-thiⁿ
Lán sı̄ Siōng-tè ê kiáⁿ-jı̂
Tè Chú lâi kiâⁿ oē sèng-lı̄
Hó-pháiⁿ sı̄ Chú ê chí-ı̀
Lán tio̍h pàng-sim kau-thok i
Sè-kan kan-khó͘ khoài kè-khı̀
M̄-bián kè-thâu lâi siong-pi
Lán tio̍h ti-chiok lâi hoaⁿ-hí
Chiū oē pêng-an kè jı̍t-chí
Pêng-an choè toā ê hok-khı̀
Chhiáⁿ lán tāi-ke tio̍h chún-pı̄
Kàu-sı̂ Chú beh chhoā lán khı̀
Chhoā lán kı̀ⁿ pē chin hoaⁿ-hí
Sı̄ I kéng-soán ê kiáⁿ-jı̂
Pêng-iú chhin-lâng beh saⁿ-kı̀ⁿ
Kiù-chú hoaⁿ-hí lâi ngiâ-chih
Tāi-ke chheng-chàn teh gı̂m-si
Khò Chú tit-tio̍h toā sèng-lı̄
