Siⁿ tı̄ kau-á-kı̂ⁿ,
Siōng siám-pı̄ ê ta-thô͘--nih.
Kut-la̍t koh jı̄n-hūn.
Lia̍p-chek ta̍k-tih chúi-hūn.
Théng-khui chhiⁿ-iām ê hoe,
Thong-nı̂ bô hoè,
Hōng-hiàn hún-âng, sûn-pe̍h ê chheng-chhun,
Tèng-ân iù-iù ê kun.
Sui-bóng soè-hàn, tān-sı̄ ióng-kiāⁿ,
Chhı̀n-chhái toā, koh gâu siⁿ-thoàⁿ.
Chí kham choè chhàu-chiān ê iá-hoe,
Iû-chāi lâng khoe:
“Bô hâng-chêng, bô sin-kè.“
Oē kham-tit tio̍h-boâ, soah pı̀ⁿ bô lâng beh?
M̄-bat chē kó͘-ge̍k hoe-poâⁿ,
M̄-bat pau-tio̍h lé-choá,
Iû-goân chiú chı̍t-tè pha-hng ê hn̂g,
Boē kı̀-tit ka-kı̄ chiām-chiām ko͘-n̂g.
Tng chun-kùi ê hoe-châng it-chı̄n ko͘-tâ,
To̍k-to̍k goán bô ùi hong-koâⁿ.
Thong-nı̂ khui-moá,
Chng-thāⁿ phú-phú ê ke,
Thèng-hāu hong-seh nā koè,
Chéng-chí poe-moá sı̀-koè.
Jı̍t-jı̍t chhun, jı̍t-jı̍t chhun,
Ēng chı̍t-sı̀-lâng ê chheng-chhun,
Ngiâ-chih chhun-thiⁿ ê èng-ún
(Tâi-bûn Bóng-pò tē 34 kı̂, 1999 nı̂ 7 goe̍h)
