Jı̍t-pún ê Koài-sū

Chha-put-to cha̍p-nı̂-chêng , tı̄ Jı̍t-pún ê chng-siā ū chı̍t-lâng khı̀ hioh tı̄ hit kheh-tiàm, tı̄ hia chia̍h hó-mı̍h , iā toà hó só͘-chāi , chhiáⁿ lâng lâi chhoe-siau chhiùⁿ-khek, lim-chiú khoài-lo̍k chı̍t-tiûⁿ. Kàu beh khùn ê sı̂ , hoan-hù tiàm-chú , kah i bı̂n-á-chài 11 tiám-cheng tio̍h kiò i chhíⁿ. Hit ê tiàm-chú chiū chiàu i ê oē , kàu hit-sı̂ jı̍p-khı̀ beh kiò ; khoàⁿ-kı̀ⁿ bı̂n-chhn̂g-chêng soan-chhut chı̍t-ki hô͘-lı̂ boé, hut-jiân kiaⁿ kàu bē-kò͘--tit , sûi-sı̂ cháu-chhut-lâi , phah-sǹg hit-ê lâng-kheh tek-khak sı̄ iau-koài. Ka-tı̄ teh siūⁿ--kioh m̄-kú ū hoan-hù i , nā bô kiò i, iū kiaⁿ-liáu hō͘ i koè-siàu khiàn-chek. Ko͘-put-chiong koh-chài jı̍p-khı̀ , chiū khoàⁿ hit-ê lâng-kheh chē tı̄ bı̂n-chhn̂g, teh chia̍h hun. Hit-ê lâng-kheh khoàⁿ-kı̀ⁿ tiàm-chú sim-sı̂n tah-hiahN , chiū mn̄g i , Lí ū jı̍p-lâi chia khoàⁿ-kı̀ⁿ sáⁿ-hoè ? Tāi-seng tiàm-chú m̄-káⁿ kóng , kan-ta the-sı̂ kóng , Bô--ah , Bô--ah！ Hit-ê lâng-kheh koh kóng , Lí tek-khak ū khoàⁿ-kı̀ⁿ sím-mı̍h--leh ; lí tio̍h bêng-bêng kā goá kóng. Hit-ê tiàm-chú jiân-āu chiah kā i kóng láu-sı̍t , Goá ū khoàⁿ-kı̀ⁿ chı̍t-ki hô͘-lı̂ boé. Hit-ê lâng-kheh chiah ı̀n i kóng, Hm̄-hm̄ , lí taⁿ í-keng ū khoàⁿ-kı̀ⁿ, goá put-hông sı̍t-chāi kā lí kóng . Goá chiū-sı̄ lāu hô͘-lı̂ , siông-sı̂ tiàm tı̄ soaⁿ--nı̍h ; chit-tia̍p lâi chia sı̄ beh pān tāi-chı̀ . Lí só͘-khoàⁿ só͘-thiaⁿ chit-hō sū , lí toàn-toàn m̄-thang kā lâng kóng . Lí nā kó-jiân án-ni , sio̍k-hō͘ lí put-lūn ū chı̂ⁿ hē tı̄ biō--nı̍h , goá beh hō͘ lí ke chı̍t-poē . Kóng liáu chiū chò i khí-sin, lóng bô poàⁿ-ı̂ⁿ só͘-hùi hō͘ i ; hit ê tiàm-chú iā m̄-káⁿ kā i the̍h . Thèng-hāu kàu bı̂n-á-chài chiū chin-chiàⁿ the̍h 50 chı̂ⁿ hē tı̄ biō--nı̍h chhı̀-khoàⁿ ; kàu āu--jı̍t lâi khoàⁿ, kó-jiân ū pı̀ⁿ chı̍t-pah . Hē kàu kúi-nā jı̍t ,iû-goân sı̄ án-ni , chāi hit-ê tiàm-chú put-chí chhim-sı̀n lah .

Sim-koaⁿ ná tham , kàu lō͘-boé chiū khioh kàu 100 kho͘ ; koh khı̀ hē hia . Kàu bı̂n-á-chài khı̀ khoàⁿ, m̄-nā bô ke , hām i ka-tı̄-ê iā soà bô--khı̀ . Iáu-kú m̄ sí-sim , chiū koh khı̀ hē chı̍t-pái , keh-jı̍t khı̀-khoàⁿ ,iû-goân sı̄ bô--khı̀ . Kàu hit-tia̍p , chiū chai--kio̍h sı̄ hō͘ kong-kùn phah-phiàn--khı̀ ; hit-ê lâng sêng-sı̍t m̄-sı̄ hô͘-lı̂ , put-kò sı̄ chai in ū tùi-tiōng hit-ê khiàn-sńg , só͘-í chhoē chit-ê phāng lâi choán-chia̍h--i.

(Tâi-lâm-hú-siâⁿ Kàu-hoē-pò tē-7-tiuⁿ, 1886 nı̂ 1 goe̍h)