Kà-o̍h Sian-siⁿ koa

Ēng-mn̂g, Jı̀n Ko͘-niû

1. Kà-o̍h ê kang sı̍t-chāi chun-kùi,
  Ín-chhoā ha̍k-seng kap Chú Choè-tui,
  Siat-sú kam-goān tio̍h-boâ tı̀-ı̀,
  Kàu-sı̂ oē tit pó-poè ké-chi.

2. Kà-o̍h sian-siⁿ iàu-kín tio̍h khéng
  Iok-sok sèng-tē, kín-sı̄n phín-hēng,
  In-ūi ha̍k-seng ba̍k-chiu kim-kim
  Khoàⁿ i bô͘-iūⁿ, o̍h i ê sim.

3. Kà-o̍h sian-siⁿ ê kang bô khoài,
  Tú-tio̍h lāi-goā sū-bū chó͘-gāi,
  Ka-kı̄ ê sim nā bô liāu-lí.
  Thài-oē khan-sêng soè-hàn kiáⁿ-jı̂?

4. Ha̍k-seng chū-jiân bô lóng-chóng koai,
  Ū ê kiau-ngō͘ thàn sim só͘ ài,
  Ū ê ok-sèng, ū ê pı̂n-toāⁿ,
  M̄-siū kà-sı̄, bô beh koé-oāⁿ.

5. Ha̍k-seng ta̍k-ê ū i ê khoán,
  Ū ê gâu tha̍k ta̍k-hāng kam-goān,
  Sian-siⁿ tio̍h siūⁿ siōng hó hoat-tō͘,
  Hō͘ chèng ha̍k-seng oē toā chı̀n-pō͘.

6. Ha̍k-seng bô lūn sı̄ gâu á tūn,
  Kà-o̍h sian-siⁿ eng-kai thun-lún,
  Bô toā-soè sim, m̄-thang ài hiâm,
  Chiàu-sı̂ tio̍h khoan, chiàu-sı̂ tio̍h giâm.

7. Sian-siⁿ iàu-kín m̄-thang hoat-sèng,
  M̄-thang gı̄-lūn gín-ná phín-hēng,
  Tio̍h chheng-khı̀-siùⁿ tio̍h hó chhin-kūn,
  Koh tio̍h hò͘ⁿ-ha̍k, cheng-sı̂n, un-sûn.

8. Kiù-chú chiū-sı̄ chı̀-koâiⁿ Sian-siⁿ,
  Khoàⁿ-kò͘ toā-lâng, thiàⁿ-sioh kiáⁿ-jı̂,
  Tio̍h khoàⁿ I khoán, tè I lâi kiâⁿ,
  Thàn I kà-sı̄, thiaⁿ I ê siaⁿ.

9. Kiau-ngō͘ ha̍k-seng chiū pı̀ⁿ khiam-pi,
  Sian-siⁿ ê sim boē bián hoaⁿ-hí,
  Pháiⁿ pı̀ choè hó, hòng-sim oāⁿ khûn,
  Khah-iâⁿ thàn chı̂ⁿ, tit-tio̍h kim-gûn.

10. Sian-siⁿ chı̄n-tiong khoán-thāi ha̍k-seng,
  Toā-soè têng-siⁿ o̍h-tn̂g toā-heng,
  Kiù-chú hoaⁿ-hí,tāi-ke pêng-an,
  Siōng-tè sù-hok : sı̄ sim só͘ goān.

(Tâi-lâm Kàu-hoē-pò tē 256 koàn, 1906 nı̂ 7 ge̍h)