Kàu-hùn m̄-thang hun lūi

Ìn-tō͘-kok pún-tē ê peh-sı̀ⁿ chiông-chêng ū hun-pia̍t kùi-chiān tāng-khin ê lūi, in-ūi hia ê tha̍k-chheh-lâng khah chió, só͘-í nā ē tha̍k-chheh-tit, chiū ka-tı̄ phah-sǹg in pí pa̍t lâng khah kùi-khı̀. Khoàⁿ hiah-ê bô tha̍k-chheh ê lâng it-khài biáu-sı̄ in; kiâⁿ án-ni koàn-sı̀ chiâⁿ hong-sio̍k, kàu-taⁿ í-keng kú lah.

Kı̄n-lâi Au-lô-pa kap Bí-chiu kok kàu- hoē thoân-tō ê Bo̍k-su tı̄ Ìn-tō͘ siat lâm- lú ê o̍h-tn̂g, choan-choan siu hiah-ê bô tha̍k-chheh--ê lâi jı̍p o̍h siū kà-sı̄, tùi sió-o̍h khí, chiām-chiām ko-seng kàu jı̍p toā Chu-ı̄ⁿ chí. Só͘ sêng-chiū ê jı̂n- châi ke̍k chē, tı̀-kàu chāi-chá hō͘ lâng khoàⁿ-khin--ê, hit-tia̍p tian-tò hō͘ lâng kèng-tiōng koh khah iâⁿ-koè pún-tē ê tha̍k-chheh-lâng. Sı̍t-chêng Ìn-tō͘ ê sin-pò lūn chit chân sū ū kóng, “Ìn-tō͘ pún- tē ê tha̍k-chheh-lâng hiàng-sı̂ khoàⁿ-khin kàu-hoē, hiān-chāi kàu-hoē-lāi ū sêng-chiū jı̂n-châi; bô-lūn ta-po͘ cha-bó͘ lóng ē tha̍k-chheh, chhin-chhiūⁿ hiaⁿ-tı̄ chí-moē chı̍t-poaⁿ-iūⁿ, lóng bô khin-tāng ê hun-pia̍t, chiong-lâi thang chò kok-ka peng-hêng chiân-kok thong-siong ê toā lō͘-ēng; Eng-kok ê tiâu-têng hoaⁿ-hí kéng chit-hō lâng khı̀ ēng, kàu āu-lâi chiū soà thang kám-hoà pún-tē ê tha̍k- chheh-lâng. Chāi-chá chheng-ho͘ chò tha̍k-chheh-lâng ê chú-tē, éng-éng pí pa̍t-lâng khah chhong-bêng. Hiān-sı̂ keng-koè kàu-hoē án-ni lâi chai-poê, bô hun-pia̍t lūi, kiaⁿ-liáu hiah-ê tha̍k-chheh-lâng ê chú-tē kàu boé káⁿ bô tek-khak ē pí pa̍t-lâng khah-iâⁿ lah”. Kong-pò kóng-khí án-ni, khó-kiàn in tha̍k-chheh í-keng chhim-chhim chun-kèng kàu- hoē lah.

(Tâi-oân Hú-siâⁿ-kàu-hoē-pò tē 76 tiuⁿ,1891 nı̂ 4 ge̍h)