Mn̄g: Tı̄ 14 nı̂ chêng, goá tú-hó sı̄ 19 hoè, hit sı̂ chia̍h thâu-lō͘ tı̄ x x chò chit-oân. Goá hit sı̂ ū kap chı̍t-ūi lú-chú káu-poê. Hit ūi lú-chú sı̄ tú 16 hoè, i sı̄ bı̄-sı̀n-chiá, sı̄ ko-lú 3 nı̂. Goán 2 lâng ê kám-chêng jı̍t-jı̍t ke-thiⁿ. I tùi goá chin hó, kā goá sé saⁿ-khò͘, hó-mı̍h lóng khiām hō͘ goá iōng. Múi-àm goán 2 lâng lóng chhoā khı̀ kong-hn̂g thit-thô. Keng-kè 2 nı̂ kú bı̍t-chhiat ê kau-poê liáu āu, goá siū Jı̍t-pún chèng-hú tiàu khı̀ tng peng, put-tek-í tio̍h kap i lı̄-khui. Beh khı̀ tng peng hit àm, goá koh chhoā i kàu kong-hn̂g ê só͘-chāi tâm-oē. Goá kā i kóng, goá khı̀ chò peng, seⁿ-sí lóng chāi tı̄ goán ê Siōng-tè, goá nā bô sí tńg lâi ê sı̂, goá tı̄ Siōng-tè ê bı̄n-chêng lı̍p-iok, bô poē lí ê chêng-gı̄ (ı̀-sù sı̄ beh kah i thèng-hāu goá tńg lâi thang kap i kiat-hun). Hit sı̂ i thiaⁿ-tio̍h goá kóng chia ê oē, i chiū lâu ba̍k-sái, chiū ı̀n goá kóng: “Goá bô-lūn cháiⁿ-iūⁿ, to beh thèng-hāu kàu lí tńg lâi. Lí nā ká-tēng bô tńg lâi, goá iā chı̍t-sı̀-lâng m̄ kè.” Che sı̄ i tùi goá kóng ê oē. Goá thiaⁿ-tio̍h i chit khoán ū chêng-gı̄ ê lı̍p-iok, goá iā koh tùi i kóng, goá nā bô chhoā lí, goá it-seng iā m̄ chhoā bó͘.
Goá kap i kau-poê hiah-nı̍h kú ê kı̂-kan, lóng m̄-bat pò goá kò͘-hiong ê chū-chí hō͘ i chai, só͘-í i lóng m̄-chai goá ê pún-ki-tē, keh-jı̍t goá chiū kap i lı̄-khui kàu kun-iâⁿ. Goán 2 lâng sui-bóng pun-lı̄, chóng-sı̄ phoe-sı̀n lóng bô choa̍t-tn̄g. Chı̍t kò-ge̍h choè chió iáu 20 tiuⁿ í-siōng ê phoe-sı̀n. Chin khó-sioh, in-ūi khong-sı̍p lı̄-hāi ê koan-hē, chhı̄-lāi ê jı̂n-bı̂n lóng tio̍h so͘-khai, kè bô kúi-jı̍t goán ê pō͘-tūi iā soá khı̀ pa̍t-ūi. Tùi hit tia̍p khí phoe-sı̀n chiū choa̍t-tn̄g. Keng-kè 1 nı̂ koh 8 ge̍h jı̍t lóng bô siau-sit, hō͘ goá ê sim-sı̂n chin iu-būn kàu-ke̍k. Bô-lūn hùn-liān á-sı̄ ha̍k-khò lóng bô cheng-sı̂n, só͘-í sı̂-siông siū tio̍h siōng-si ê chhú-hoa̍t. Keng-kè bô loā kú, chiàn-cheng kiat-sok. Goá hit sı̂, chiū tı̍t-chiap chē chhia kàu x x lú-chú in tau thàm-thiaⁿ i ê chêng-hêng, thàm-thiaⁿ ê kiat-kó bē thang chai i ê siau-sit. Hit sı̂ hō͘ goá chin sit-bāng kap sit-chı̀. Āu-lâi goá chiū tńg khı̀ kò͘-hiong, chhin-lâng chin hoan-gêng goá tńg lâi, chóng-sı̄ goá lóng bô hoaⁿ-hí, in-ūi bô kı̀ⁿ-tio̍h goá só͘ thiàⁿ ê lâng. Koè bô kúi jı̍t, goá koh khı̀ tiâu-cha kúi-nā pái, lóng bô siau-sit. Tùi hit tia̍p khí, goá ê sim m̄-bat ū chı̍t-jı̍t ê chheng-sim. Múi-jı̍t lóng siàu-liām goá ê ài-jı̂n. Í-āu, goá koat-sim lı̄-khui kò͘-hiong khı̀ chia̍h thâu-lō͘. Hit sı̂ sui-bóng ū chin chē lú-chú kap goá kau-poê, chóng-sı̄ goá kū-choa̍t in. Goá sim-sim liām-liām, lóng teh siūⁿ chêng só͘ kau-poê hit ê lú-chú. Bı̂n-bāng tiong siông-siông bāng-kı̀ⁿ kap i kóng-oē, che-sı̄ goá só͘ khó͘-thàng ê sū.
Keng-koè 3 nı̂ āu, ū chı̍t-ūi hó pêng-iú kài-siāu chı̍t-ūi lú-chú hō͘ goá. Hit sı̂ goá sam-sim lióng-ı̀, nā-sı̄ siū pêng-iú ê khó͘-khǹg kap bián-lē, āu-lâi goá ū ı̀n-tap i hó. Koè chı̍t goe̍h-jı̍t goá chiū kap hit ūi lú-chú kiat-hun, keng-koè 2 kò goe̍h goá chiū choán-chit khı̀ x x chhı̄ ho̍k-bū. Āu-lâi, in-ūi seng-oa̍h ê koan-hē, goán chiū tńg-khı̀ kò͘-hiong, goán hu-hū ê tiong-kan thang kóng chin bí-moá.
Kū-nı̂ 10 goe̍h 28 jı̍t, goá khı̀ x x, hut-jiân tn̄g-tio̍h chêng tı̄ x x kap goá kau-poê ê lú-chú, hō͘ goá tio̍h chı̍t-kiaⁿ, iā chin tio̍h-kip, Chit ūi chiū-sı̄ goá só͘ ài ê lâng, chit pang i choán-khı̂n lâi chia ho̍k-bū. Goá mn̄g i ê keng-koè, iā mn̄g i hiān-sı̂ kè tı̄ tó-ūi? Hit sı̂ i lóng bô ı̀n goá, chí ū lâu ba̍k-sái nā-tiāⁿ. Keng-koè iok 20 hun cheng kú, i chiah khui siaⁿ tùi goá kóng: “Ūi-tio̍h lí chit ê lâng, kin-á-jı̍t goá piàn-chiâⁿ chit khoán ê chhiⁿ-chhám. In-ūi pē-bú chú-ı̀ goá kap pa̍t-lâng tēng-hun, goá lóng m̄-khéng. Hit sı̂ goá ê pē-bú chin toā ê kong-kek goá, kóng lí sui-jiân ū tùi goá hit khoán ê lı̍p-iok, chiong-lâi lí tek-khak oē pàng-sak goá, khó͘-khǹg goá tio̍h kè pa̍t-lâng. Tng-sı̂ goá in-ūi chun-tiōng lí ê oē, m̄-káⁿ poē-poān lí, só͘-í goá m̄-khéng siū pē-bú khó͘-khǹg, put-tek-í tio̍h lı̄-khui ka-têng lâi phiau-liû tı̄ chit ê siā-hoē. Lí tng-sı̂, beh kap goá lı̄-khui hit àm tı̄ kong-hn̂g kap goá lı̍p-iok ê sū, lí kiám boē kı̀-tit mah? À! sè-kan choè tē-it bô-chêng bô-gı̄ ê, sı̄ lâm-sèng! ” Che sı̄ i tùi goá só͘ kóng ê oē. Goá hit sı̂ thiaⁿ-tio̍h chit khoán ê oē, chhin-chhiūⁿ lāi-kiàm tùi goá ê sim-koaⁿ chha̍k jı̍p-khı̀ chı̍t-iūⁿ. Āu-lâi, goá ū kóng-khí goá tùi i ê chı̄n-chêng hō͘ i thiaⁿ. I thiaⁿ liáu, chiū kóng ài beh hō͘ goá choè sè-ı̂, goá kóng bē ēng-tit, in-ūi goá sı̄ Ki-tok-tô͘, bē ēng-tit chhoā sè-ı̂. I thiaⁿ liáu chiū koh lâu ba̍k-sái, tùi goá kóng bē ēng-tit chò sè-ı̂, mā ē-thang chò sió-moāi. Goá hit sı̂ ū siūⁿ chı̍t-ê pān-hoat, chiū kā i kóng, “Goá hiān-sı̂ ū chı̍t-ūi pêng-iú, iáu-bē chhoā bó͘, goá kài-siāu lí kap i kiat-hun hó-bô?” I kóng: “Goá kàu sí to m̄ kè. In-ūi lâm-sèng sı̄ po̍k-chêng po̍k-gı̄, chhin-chhiūⁿ lí chit khoán ê lâm-sèng chin chē.” Goá thiaⁿ-tio̍h i só͘ kóng ê oē, sim-koaⁿ chhin-chhiūⁿ beh iûⁿ-khı̀ ê khó͘-thàng. Choè-āu i koh kóng chı̍t-hāng, i kóng, i m̄-káⁿ koh tńg khı̀ kı̀ⁿ pē-bú, in-ūi pē-bú hiān-sı̂ chin khoàⁿ-khin iàm-chiān i, só͘-í i kóng tû sí í-goā bô lō͘. Ūi-tio̍h chit ê sū, goá múi-jı̍t thòng-khó͘ koè-jı̍t.
Ah, goá ê choē chin tāng, èng-kai tio̍h sí. Goá múi chı̍t-pái nā khoàⁿ-tio̍h Oa̍h-miā ê Bí-niû, chiū lâu ba̍k-sái. Chit-pang lín ū beh kái-tap tho̍k-chiá ê gı̂-būn, só͘-í goá hó-táⁿ bô kiaⁿ kiàn-siàu lâi chhéng-mn̄g goá tio̍h cháiⁿ-iūⁿ chò, cháiⁿ-iūⁿ kiâⁿ. Goá ài chhéng-kàu ê kúi-tiám sı̄: (1) Goá nā khoàⁿ-tio̍h hit ūi lú-chú ê bı̄n, chiū siūⁿ-tio̍h kū ê kám-chêng, hoat-khí kū ê io̍k-liām, goá tio̍h cháiⁿ-iūⁿ chiah oē-thang siau-bia̍t kū ê io̍k-chêng? (2) I koat-ı̀ m̄ kè, beh cháiⁿ-iūⁿ chò? (3) Beh hō͘ goá chò sió-moāi thang m̄-thang? (4) Goá tio̍h cháiⁿ-iūⁿ tùi-hù i chiàⁿ tio̍h? (5) I ū kóng beh sí, tio̍h cháiⁿ-iūⁿ khó͘-khǹg i?
Tap: (1) Beh cháiⁿ-iūⁿ siau-bia̍t kū io̍k-liām? Tio̍h tui-kiû tiông-seng sèng-kiat ê seng-oa̍h. In-ūi tùi chêng ê chí-moāi í-keng sit-iok, tùi hiān-chāi chit ê oân-boán ê ka-têng tio̍h pó-siú sèng kiat m̄-thang koh sit-iok. Iok-hān 8:11, “Chú kóng taⁿ í-āu m̄-thang koh hoān-choē. ” Tùi chêng chit-ê sı̄ 私約, tùi hiān-chāi chit ê sı̄ 公約, ū kiat-hun tián-lé. Só͘-í tio̍h tùi hiān-chāi ê hū-jı̂n-lâng kóng-bêng chêng ê keng-koè. Tio̍h tùi chêng 私約chit ê lú-chú jı̄n-choē kiû sià-bián. Tio̍h sı̍t-chāi thiat-té tùi Chú jı̄n-choē kiû sià-bián. Án-ni kap Sı̂n, jı̂n lóng chheng-chhó sǹg sı̄ bô choē ê lâng, tı̄ Sı̂n un-tián tiong teh seng-oa̍h. Chêng ê koè-sit, Chú kap lâng í-keng bô tēng i ê choē, sǹg sı̄ têng-thâu-siⁿ sin chhòng-chō ê lâng. Chiong kū io̍k-liām í-keng kap Chú saⁿ-kap tèng-sí, tâng bâi-chòng. Taⁿ teh oa̍h, sı̄ Chú tı̄ lāi-bı̄n teh oa̍h. (Ēng kı̂-tó, Chú oē tháu-pàng)
(2) I koat-toàn m̄ koh kè, tio̍h án-choáⁿ-iūⁿ choè? Chı̄n só͘ chò oē tit kàu ê thêng-tō͘ tio̍h hū-tam i ê seng-oa̍h-hùi. It-seng chò ū chek-jı̄m ê pang-chān. (Bu̍t-chit kap cheng-sı̂n)
(3) Chò sió-moāi thang m̄-thang? Thang. Chóng-sı̄ tio̍h kín-sı̄n. Boē-thang poâⁿ-koè pêng-iú kap sió-moāi ê thêng-tō͘----
(4) Tio̍h cháiⁿ-iūⁿ tùi-hù i? Tio̍h ín-chhoā i sı̀n Iâ-so͘. I nā sı̀n Iâ-so͘ liáu tit-tio̍h têng-thâu-siⁿ liáu-āu, it-chhè ê lân tê, chū-jiân kái-koat.
(5) I ài beh sí tio̍h án-choáⁿ khǹg i? Khǹg i sı̀n Iâ-so͘. Tē-ge̍k sı̄ choa̍t-bāng ê lâng ê chū-só͘. Iâ-so͘ sı̄ it-chhè choa̍t-bāng ê lâng ǹg-bāng. Iâ-so͘ Sèng-miâ chı̀-kùi chı̀-pó----oē koé goá sim iu-būn khó͘-thàng. Pún i só͘ ǹg-bāng ê, sı̄ lí, taⁿ tio̍h khó͘-khǹg i, chhiáⁿ i chiong ǹg-bāng ı̂-choán hē tı̄ Chú Iâ-so͘, chiân-tô͘ chiū kng-bêng. I nā sı̀n Iâ-so͘ chiap-la̍p I chò Kiù-chú liáu-āu, i thang koh jı̍p Sı̂n-ha̍k gián-kiù, āu-lâi oē-thang kái-kiù choē-choē chhin-chhiūⁿ chit khoán ê lú-chú ê lân-tê. Chhiáⁿ i tek-khak m̄-thang sit-bāng. Bo̍k-tek khǹg tı̄ lâng tek-khak sit-bāng, bo̍k-tek nā khǹg tı̄ Chú Iâ-so͘ chiū tek-khak boē sit-bāng.
(Oa̍h-miā ê Bí-niû tē 34 kı̂,1957 nı̂ 3 ge̍h)
