Siā-lūn--
Ū chı̍t só͘-chāi chı̍t ê ka-têng, ū chı̍t ê toā-chí kap sió-tı̄. I ê pē-bú lâu chı̍t nn̄g ê bô thang i-oá ê sió pêng-iú, sio-soà lı̄-khui sè-kan.
Bô i-oá ê chit nn̄g ê sió pêng-iú chiū hō͘ i ê a-chek siu-liû lâi ióng-io̍k. I ê a-chek iā sı̄ ū kúi-nā ê kiáⁿ-jı̂. Tı̄ a-chek ê ke ū thang chia̍h kap chhēng-sio, iáu-kú in sı̍t-chāi sı̄ boē thang kè tio̍h chin ê ka-têng ê khoài-lo̍k, in-ūi in a-chím ū sı̂ bô sím-mı̍h hó khoán-thāi in. In-ūi i ka-kı̄ ū kiáⁿ-jı̂ tı̄-teh.
Ū chı̍t jı̍t, chit ê a-chek boé chı̍t chiah saⁿ-lián ê gín-á chhia tńg-khı̀ hō͘ i ê kiáⁿ thit-thô.
Chit ê ko͘-jı̂ in toā-chí í-keng tit-tio̍h a-chek ê thiàⁿ, tı̄ chho͘-tiong teh tha̍k-chheh, i ê sió-tı̄ iáu sı̄ kok-bı̂n ha̍k-hāu ê it-liân seng. Khoàⁿ-tio̍h a-chek ê kiáⁿ ū saⁿ-lián-chhia thang thit-thô, beh kā i chioh, iā bô thang pun i thit-thô, khiā teh gōng-gōng khoàⁿ, iā m̄-káⁿ tùi a-chek thó. Siūⁿ kóng, goán a-bú nā ū tı̄-teh, goá tek-khak iā ū chit khoán ê chhia thang thit-thô. Sim chin ài, só͘-í tùi i ê a-chí kóng, “A-chí, lí boé chı̍t chiah hō͘ goá hó mah?”
I ê a-chí khoàⁿ liáu ba̍k-sái lâu jı̍p-khı̀, siūⁿ-tio̍h i kap i ê sió-tı̄ ê ūn-bēng, hiān-chāi sı̄ hō͘ a-chek teh kā lán khoàⁿ-kò͘, beh thài ū chı̂ⁿ thang boé neh! Iā m̄-káⁿ tùi a-chek thó, m̄-kú siūⁿ-tio̍h i ê sió-tı̄ chit khoán ê ı̀-ài, chiū kā i ê sió-tı̄ kóng, “Hó, goá chiah boé chı̍t chiah hō͘ lí, m̄-kú tio̍h tán kàu saⁿ lé-pài āu chiah oē thang boé hō͘ lí.”
In sió-tı̄ thiaⁿ liáu sim kàu-ke̍k hoaⁿ-hí teh thèng-hāu. In a-chí ūi-tio̍h i ê sió-tı̄, chiū tı̄ ha̍k-hāu tùi tông-o̍h ê tiong-kan te̍k-pia̍t tùi lâng ín chhau-siá ê kang lâi choè, thong-jı̍t thong-mı̂ ūi-tio̍h ài thàn tām-po̍h chı̂ⁿ lâi boé saⁿ-lián-chhia hō͘ i ê sió-tı̄. Ló͘-le̍k choè kang saⁿ lé-pài kú. Iok-sok ê jı̍t í-keng kàu, chóng-sı̄ a-chí thàn iáu boē kàu hiah choē chı̂ⁿ, hit jı̍t te̍k-pia̍t-choè kang choè khah àm, ài thàn kàu-gia̍h ê chı̂ⁿ thang boé chhia tńg-khı̀ hō͘ i ê sió-tı̄.
I ê sió-tı̄ tı̄ chhù-nih tı̍t-tı̍t thèng-hāu, chóng-sı̄ i ê a-chí lóng iáu bē tńg-lâi. Sió-tı̄ tán kui jı̍t, tán bô; só͘-í chiū chhut-khı̀ koe-lō͘ ê goā-bı̄n lâi tán i ê a-chí.
Tán kàu poàⁿ-mı̂, hit jı̍t tú teh lo̍h hō͘. Só͘-í chin koâⁿ, iā soà ak tâm i ê seng-khu. In-ūi ài hit chiah saⁿ-lián-chhia, chiū tı̍t-tı̍t tiàm hia tán i ê a-chí. I ê a-chí kó-jiân kàu chin àm chiah tit-tio̍h kàu-gia̍h ê chı̂ⁿ, chiū boé chı̍t chiah súi-súi ê saⁿ-lián-chhia tńg--lâi. Tı̄ lō͘-tiong khoàⁿ-tio̍h i ê sió-tı̄ hō͘ hō͘ ak-tâm teh thèng-hāu i ê chhia. Khoàⁿ-tio̍h saⁿ-lián-chhia, sim kàu-ke̍k hoaⁿ-hí. M̄-kú i ê sió-tı̄ siū hō͘ ak tâm, tı̀-kàu hit àm hoat jia̍t, soà khí hı̀-iām.
Só͘ ài ê saⁿ-lián-chhia ū tit-tio̍h, chóng-sı̄ iáu boē thit-thô--tio̍h, chit ê khó-lı̂n ê gín-ná lâu i ê a-chí kap saⁿ-lián-chhia, tùi hı̀-iām chiū lı̄-khui sè-kan lah!
Ah! chit ê gín-á cháiⁿ-iūⁿ oē án-ni, in ê ūn-miā thài oē chiah chhiⁿ-chhám, kiám m̄-sı̄ in-ūi i sı̄ ko͘-jı̂ mah!
Só͘-í tı̄ Bú-chhin-cheh ê sı̂, goá siông-siông siūⁿ-tio̍h chit ê kò͘-sū, kek-tōng goá ū kám-siā ê sim moá-moá.
Tē-it, ài kám-siā Siōng-tè, in-ūi ū Siúⁿ-sù lán chiah thang chun-tiōng ê bú-chhin.
Tē-jı̄, sı̄ ài kám-siā bú-chhin, in-ūi i ê chûn-chāi ū hō͘ lán tit-tio̍h choē-choē ê an-ùi. Bú-chhin, ūi-tio̍h lán cháiⁿ-iūⁿ hi-seng, jím-nāi, choè kang. Siat-sú lán nā bô lāu-bú, m̄-chai lán oē tú-tio̍h sím-mı̍h kéng-gū.
Ah! Lāu-bú chiū-sı̄ jı̂n-lūi hēng-hok ê kı̀-hō.
Bô lāu-bú ê gín-á, in ê kéng-ū sı̄ cháiⁿ-iūⁿ? Ū lāu-bú, koh gâu ê lāu-bú éng-hióng i ê kiáⁿ kàu cháiⁿ-iūⁿ?
Chhı̀ khoàⁿ St. Augustine ê lāu-bú kiám m̄-sı̄ hō͘ chit ê hòng-tōng ê kiáⁿ piàn-choè chı̍t ê sèng-jı̂n mah?
Úi-jı̂n ê tiong-kan ū sím-mı̍h lâng bô i ê lāu-bú ê kám-hoà, éng-hióng tı̄-teh neh?
Chit ê úi-tāi, thiàⁿ-thàng moá-moá gâu thun-lún ê bú-chhin, lán sı̄ kan-ta tı̄ Bú-chhin-cheh ê jı̍t lâi siūⁿ-khí, lâi kám-siā, lâi siàu-liām, chàn-iông chiū kàu-gia̍h mah!
Chim-giân 10:1, “Tı̀-hūi ê kiáⁿ hō͘ lāu-pē hoaⁿ-hí; gû-gōng ê kiáⁿ hō͘ lāu-bú iu-būn.”
Chim-giân 15:20, “Tı̀-hūi ê kiáⁿ hō͘ lāu-pē hoaⁿ-hí; gōng-lâng khoàⁿ-khin i ê lāu-bú.”
Tio̍h kám-siā lán múi chı̍t ūi ê bú-chhin, chun-tiōng i. Kiû Siōng-tè sù-hok tı̄ lán ê bú-chhin ê téng-bı̄n hō͘ i tn̂g hè-siū, hoaⁿ-hí khoài-lo̍k.
(Tâi-oân Kàu-hoē Kong-pò tē 785 hō, 1954 nı̂ 5 ge̍h)
