Kám-siā Chú O-ló Chú

 Goá chêng sı̄ toà tı̄ Hok-kiàn séng ê Tong-san koān lâng; nā-sı̄ hiān-chāi sı̄ kap goá ê kiáⁿ poaⁿ lâi toà tı̄ Tâi-tiong Kong-im Io̍k-iù-ı̄ⁿ. Lūn Tong-san koān sı̄ chı̍t ê chhut-sán iâm kap hı̂ ê hái-tó, iā sı̄ chı̍t ê sèng-jı̂n, kun-chú ê chhut-seng-tē; ū chhut chē-chē siù-châi, kí-jı̂n, kòng-seng, Boán-chheng sı̂-tāi ê koaⁿ. Goá ê lāu-pē iā sı̄ siù-châi, chı̍t ke ū 100 goā lâng, lóng sı̄ Pu̍t-kàu-tô͘; lú-chú m̄-káⁿ chhut mn̂g, bô tha̍k chheh, pa̍k sè-kha, chí-ū o̍h chiam-chí siù-hoe. Bı̂n-kok 4 nı̂ ū siat-kàu kap siat lú ha̍k-hāu. Hit sı̂ ū bo̍k-su-má kap in cha-bó͘-sun siông kàu lâng ê ke, chio-ho͘ cha-bó͘ gín-á chhut-mn̂g tha̍k chheh. Bı̂n-kok 12 nı̂ ū tháu kha kái thâu. 
 Ū chı̍t jı̍t, goá kap ta-ke kàu chı̍t ūi chhin-chhek ê ke chò lâng-kheh, tı̄ hia thâu pái thiaⁿ-kı̀ⁿ lé-pài-tn̂g ê cheng-siaⁿ kap gı̂m-si ê siaⁿ; hit ê siaⁿ chhui-pek goá thau jı̍p lé-pài-tn̂g-thiaⁿ lâi thiaⁿ hok-im ê siaⁿ kóng, “Siōng-tè thiàⁿ lâng sı̄ oân-choân ê thiàⁿ, bô lūn pı̂n-chiān hù-kùi, koân-kē toā-sè, I to͘ lóng thiàⁿ.” Iok-hān 3:16, “Siōng-tè chiong to̍k-seⁿ ê Kiáⁿ siúⁿ-sù sè-kan......” chit kù chin-chiàⁿ kám-tōng goá ê sim. Nā-sı̄ tò-khı̀, ta-ke toā siū-khı̀, mē goá bô bı̄n-phoê, m̄ kiaⁿ kiàn-siàu, khı̀ chia̍h hoan-á-kàu. Tē 2 jı̍t, bo̍k-su-má chhut-lâi mn̄g goá, “Lí chā-jı̍t thiaⁿ sím-mı̍h?” Goá chiàu só͘ thiaⁿ kóng hō͘ i thiaⁿ, i chin hoaⁿ-hí, sàng iân-pit, saⁿ-se chò kı̀-liām. Āu-lâi i siông lâi thàm-hóng, soà kap ta-ke saⁿ-bat saⁿ-chhin, ta-ke chiām-chiām hoaⁿ-hí chún goá àm-sı̂ khı̀ chò lé-pài. Khó-sioh ta-ke sí, tiōng-hu soà m̄-chún goá khı̀. In-ūi bo̍k-su oāⁿ jı̄m, chheng-liân thoân-tō tò-jı̄m, só͘-í tiōng-hu kóng, “Í-āu m̄ chún lí khı̀, ká-sú khı̀, tio̍h chū-kak ū khı̀ bô jı̍p.” Goá ê chhùi khiok sı̄ ı̀n hó, m̄-kú ta̍k pái ê cheng-siaⁿ lóng chhui-pek goá khı̀ thiaⁿ. Jı̂n-ke cháu lâi kā goá ê tiōng-hu kóng, “Lín bó͘ cháu khı̀ chia̍h hoan-á-kàu lah, lí bô iàu-kín mah?” Tiōng-hu toā siū-khı̀, m̄-nā mē, soà phah; goá chông-tio̍h chàu-kak, hoeh lâu moá bı̄n. Chú hit sı̂ pang-chān goá hó-táⁿ khui chhùi kiàn-chèng kóng, “In lé-pài lâng chin hó, goá khı̀ sı̄ o̍h hó, bô o̍h pháiⁿ, cháiⁿ-iūⁿ m̄-hó.” Tiōng-hu it-tēng ū siū Chú kám-tōng, chēng-chēng m̄-káⁿ ı̀n sím-mı̍h. Ū chı̍t pái kiáⁿ-jı̂ phoà-pēⁿ, i khı̀ thiu io̍h-chhiam sı̄ pó͘-io̍h; goá kóng, “M̄-thang hō͘ i chia̍h.” I toā siū-khı̀, chiong pn̄g-oáⁿ siak phoà, goá iā m̄-káⁿ siū-khı̀, ēng hó oē khó͘-khǹg i. Koh chı̍t pái, i phoà-pēⁿ thiah hàn-io̍h tò-lâi, chin-chiàⁿ siū-khı̀, phùi noā tı̄ goá ê bı̄n, goá iā hoaⁿ-hí chhit khí-lâi, kiû Chú chín-kiù i. Chhin-chhiūⁿ án-ni siông-siông siū i bú-jio̍k. Iū-koh chı̍t pái, i phoàⁿ-pēⁿ tı̄ bı̂n-chhn̂g teh chhan, goá m̄-chai jı̍p pâng-lāi, i ēng oáⁿ kā goá tı̀m-lâi, kai-chài tit-tio̍h Chú pó-hō͘ bô siong-hāi. Goá un-jiû khó͘-khǹg i, “Lí m̄-thang kip-sèng, nā bô Chú Iâ-so͘ chiàu-kò͘, bı̄n lâu hoeh, chı̄-chūi beh kiò i-seng lâi kô͘.”
 Ū chı̍t jı̍t i koh phoà-pēⁿ, ka-kı̄ thó͘-khùi kóng, “I beh cháiⁿ-iūⁿ?” Goá thàn ki-hoē khó͘-khǹg i, “Lí tio̍h sı̀n Chú Iâ-so͘, it-seng chiah ū ǹg-bāng, nā bô lí ê it-seng ē chò Mô͘-kúi ê lô͘-lē, goá ūi lí siū khó͘ thài chē lah.” Kám-siā Chú! Chú khui i ê sim, hō͘ i kam-goān phoà-tû bê-sı̀n, hâng-ho̍k tı̄ Chú ê kha-ē. Hit sı̂ tiōng-hu khoà-lū bo̍k-chú, pu̍t-siōng beh cháiⁿ-iūⁿ siat-hoat. Goá kóng thang chhiáⁿ bo̍k-su siat-hoat, āu-lâi kó-jiân chiong bo̍k-chú, pu̍t-siōng the̍h khı̀ an-pâi hoà-sin. Tio̍h kám-siā I, o-ló I ê miâ! Chú ê kiù-un kàu goá ê ke! 
 Jiân-āu goá chı̍t ke poaⁿ kàu Ē-mn̂g, tı̄ hia tú-tio̍h Jı̍t Chi sū-piàn ê khùn-lân, tiōng-hu ū siū Chú kéng-tiàu. Tı̄ ı̄ⁿ-tē chheⁿ-so͘ bô khó-khò ê só͘-chāi, kai-chài tùi chı̍t ūi chhin-lâng tit-tio̍h 20 kho͘ lâi chò tiōng-hu ê song-hùi. Chú ê chí-ı̀ tit chiâⁿ, gū-tio̍h Sòng Phok-sū lâi Ē-mn̂g hùn-heng, goá chiū hōng-hiàn beh ūi Chú chò kang, chı̀n-jı̍p Kó͘-lōng-sū Hū-lú hok-im ha̍k-ı̄ⁿ tha̍k 4 nı̂ poàⁿ; hit sı̂ tú-tio̍h chhit-chhit sū-piàn chà Ē-mn̂g, goá chiū tńg-lâi Tong-san kò͘ pài-tn̂g kiam chò thoân-tō. In-ūi bo̍k-su thè-jı̄m khı̀ Siōng-hái cho͘-kài-tē. Goá chho͘ chhut ı̄ⁿ-mn̂g, siā-hoē keng-giām chió, tı̀-sek chhián-po̍h, só͘-í ū kám-kak tām-po̍h ê hân-sim. Koh tú-tio̍h te̍k-ki siông lâi chà Tong-san oá ū poàⁿ-nı̂ kú. Tong-san siâⁿ-bı̂n lóng tô-miā ún-ku khı̀ hiong-chhoan; siâⁿ-lāi chha-put-to bô hoé-hun, hı̂-bı̂n sit-gia̍p, hái-bı̄n chiu-ûi to͘ ū chúi-lûi hoé-phàu, hái-bı̄n siū sí chin chē; ke-thâu hāng-bé chí thiaⁿ lâng khàu ê siaⁿ; ke bô thı̂, káu bô pūi, chin-chiàⁿ sı̄ chheⁿ-chhı̀n khó-lı̂n ê Tong-san koān. Goá iā chhoā jı̂-lú, siāng sı̂ toà kàu-hoē ê su-lūi, ı̀n-chiong tô-miā kàu hiong-chhoan, m̄-káⁿ chū-su ún-chông, chhoē ki-hoē thàm hoē-iú, ūi chhoan-bı̂n kiû Chú lı̂n-bín chín-kiù, sūn ki-hoē káng Chú ê kiù-un. Kám-siā Chú! Chú thiaⁿ kı̂-tó, chiàu-kò͘ kàu-hoē pêng-an sūn-sū, êng-kng kui hō͘ Chú. Chhoan-bı̂n iā chai, kàu pêng-chēng ê sı̂, koān-chèng jı̂n-oân lâi chham-ka sèng-koa-tūi, chò lé-pài.
 O-ló Chú! Goá ê kiáⁿ iā iú-hàu, hò͘-o̍h, khı̂m-khiām, khı̂m-tha̍k, toè goá chia̍h han-chı̂ phoè chhài-pó͘ iā hoaⁿ-hí kam-goān. Tióng-lú jı̄-cha̍p hoè chhut-kè, bô-lâng thang tàu-pang-bâng, chhin-cho̍k tiong bô-lâng sı̀n Chú, m̄-káⁿ hiòng lâng kiò khó͘. Sui sı̄ án-ni, Chú ê pêng-an tı̄ sim-lāi; jı̂n-ke ū chı̍t-ūi cha̍p hoè ê lú-chú pun goá chò phoāⁿ; i lêng-lı̄ chhong-bêng, gâu pang-chān ka-têng. Goá chhiú phāng-se, chhùi chhiùⁿ si-koa kà lú-jı̂. Kàu Sèng-tàn-cheh ū chú-pān tō-ián chhit, peh bō͘ ê oē-kio̍k, chí-moē ta̍k-ê kiò goá hı̀-thâu-ke. Goán ta̍k-jı̍t chhiò-ha-ha, chhiò-hi-hi. Iā-kan chı̍t-ki sè-teng-hoé, chiō goán bú-kiáⁿ saⁿ-lâng kap lı̂n-siā it lú-chú lâi o̍h chhiú-gē. I phoe-phêng kóng: “Lán chhin-chhiūⁿ Bēng-bú kà kiáⁿ it-iūⁿ.” Jı̂-lú hàu-sūn, khı̂m-khiām, khı̂m-tha̍k, lóng sı̄ Chú léng-tō chiok-hok. Tiōng-hu chāi-sè ê sı̂ siū pah-poaⁿ ê kan-khó͘, ka-chài tit-tio̍h siōng Chú si-un lı̂n-bín sù-hok, chiah thang tit-tio̍h kin-á-jı̍t ê khoài-lo̍k. Tio̍h kám-siā Chú, o-ló i ê miâ.

（Lú-soan Ge̍h-khan Tē 11 kı̂, 1960 nı̂ 11 ge̍h)