Che Chiū-sı̄ Goá Ê Sèng-tàn Lé-mı̍h
Ē-bı̄n ê kò͘-sū sı̄ tı̄ Lâm Hui-chiu chı̍t ê siâⁿ-chhı̄ hoat-seng ê.
Lé-Pài-Tn̂g lāi jia̍t kún-kún, chèng sı̀n-tô͘ tú teh hiàn in ê lé-mı̍h. Gín-ná hiàn in ê sim só͘ ài ê thn̂g-á kap thit-thô mı̍h, hū-jı̂n-lâng hiàn in siōng ài chhēng ê i-ho̍k kap chng-thāⁿ, sin-sū tùi in ê tē-á lāi bong chı̂ⁿ chhut-lâi hiàn. Tùi án-ni, káng-tâi téng chiū ū chē-chē chin súi koh ta̍t-chı̂ⁿ ê mı̍h-kiāⁿ pâi-lia̍t chin hó khoàⁿ. Tı̄ Sèng-tàn-cheh hit-jı̍t chiah-ê mı̍h beh chı̍t-hāng chı̍t-hāng pun hō͘ hiah-ê eng-kai tit-tio̍h ê lâng.
Bo̍k-su kı̂-tó chiok-hok í-āu, chiū chhiò-chhiò hoan-sàng chèng sı̀n-tô͘ sı̀-soàⁿ. Múi chı̍t ê lâng ê bı̄n in-ūi sim-lāi chhiong-moá hoaⁿ-hí chiū hoat-chhut kng, in-ūi in chai-iáⁿ só͘ hiàn ê lé-mı̍h, í-keng hō͘ Chú hoaⁿ-hí kàm-la̍p.
Lâng lóng sı̀-soàⁿ liáu, lé-pài-tn̂g lāi chin an-chēng. Chóng-sı̄ ū chı̍t ê i-ho̍k phoà-phoà ê o͘-bı̄n lâng ê cha-bó͘ gín-ná iáu tı̄ lé-pài-tn̂g lāi, i bān-bān kiâⁿ kı̄n káng-tâi.
“Thang tò--khı̀ lah, ” bo̍k-su tùi i kóng. “Goá m̄…” I ê ba̍k-chiu teh khoàⁿ káng-tâi téng ê lé-mı̍h.
“Sèng-tàn-cheh ê sı̂, ē pun hō͘ lí.” Bo̍k-su ê chńg-thâu-á kí chı̍t ê nı̂-thô͘ chò ê âng-á, chin un-jiû tùi i án-ni kóng.
“M̄ sı̄……”
“Án-ni chiū kin-á-jı̍t hō͘ lí.” Bo̍k-su the̍h hit sian nı̂-thô͘ âng-á beh hō͘ i, kā i kóng: “Taⁿ thang tò--khı̀ lah.”
“M̄ sı̄ án-ni, bo̍k-su, ……” I sak-khui bo̍k-su chhiú-lāi ê thô͘ âng-á, chiong chhiú chhun jı̍p-khı̀ saⁿ-á-tē: “Goá iā beh hōng-hiàn.”
“Hó.” Bo̍k-su tùi toh-téng the̍h chı̍t ê poâⁿ lo̍h-lâi. Cha-bó͘ gín-ná chiong 12 ê kim-pōng (Eng-kok chı̂ⁿ 12 kho͘) khǹg tı̄ hit téng-bı̄n, bo̍k-su the̍h poâⁿ ê chhiú chhoah chı̍t-ē.
“Sím-mı̍h! Lí,----che sı̄ tùi tó-ūi lâi ê ? ” Bo̍k-su in-ūi kiaⁿ-hiâⁿ gông-ngia̍h, chiū ēng giâm-hat ê thài-tō͘, tı̍t-tı̍t kā i mn̄g: “Láu-sı̍t tùi goá kóng!”
“Che sı̄ goá hiàn hō͘ Chú ê……” Cha-bó͘ gín-ná siūⁿ beh án-ni kóng, chóng-sı̄ kóng bē tit chhut-lâi, in-ūi hut-jiân khoàⁿ-kı̀ⁿ bo̍k-su giâm-hat ê thài-tō͘ soà tio̍h-kiaⁿ.
“Goá chhoā lí the̍h khı̀ hêng lâng, koai gín-ná, goá bô beh hō͘ lí tú-tio̍h ûi-lân, in-ūi lán ê Chú bô ài chiap-la̍p thau-the̍h lâi hiàn ê mı̍h.”
“M̄ sı̄ án-ni, che sı̄ goá bē sin-khu ê kè-chı̂ⁿ.” Ou-bı̄n lâng ê cha-bó͘ gín-ná, bı̄n-māu hut-jiân hoat-chhut kng, i kóng: “Goá bô sím-mı̍h thang hiàn hō͘ Chú, goá ê mı̍h iā bô lâng ài. Chú ūi-tio̍h goá hiàn sèⁿ-miā, goá cháiⁿ-iūⁿ ē-thang bô hōng-hiàn ah? só͘-í goá chiong ka-kı̄ bē-lâng.”
Bo̍k-su tùi káng-tâi téng hāⁿ lo̍h--lâi. Cha-bó͘ gín-ná koh kóng: “Goá kin-nı̂ tú 12 hoè, só͘-í chú-lâng hō͘ goá 12 ê kim-pōng, goá í-keng bē hō͘ i chò lô͘-lē, tùi Sèng-tàn-cheh khí, goá chiū bô chū-iû lah. Bo̍k-su, che chiū sı̄ goá ê Sèng-tàn lé-mı̍h!”
Bo̍k-su toā siū kám-tōng, phō chit ê cha-bó͘ gín-ná, oē kóng bē chhut-lâi, tı̍t-tı̍t kā i chim, ba̍k-sái chhin-chhiūⁿ lo̍h-hō͘, tih-lo̍h tı̄ cha-bó͘ gín-ná o͘-o͘ ê bı̄n.
Lia̍t-ūi! Lí beh ēng sím-mı̍h chò Sèng-tàn ê lé-mı̍h hiàn hō͘ thiàⁿ lí ê Chú?
Ki-tok Nā Bô Lâi
Kúi-nı̂ chêng, tı̄ goā-kok ū hoat-hêng chı̍t khoán te̍k-sek ê Sèng-tàn khà-phı̀ⁿ, toê-ba̍k hō choè “Ki-tok nā bô lâi.” Chit ê toê-ba̍k sı̄ ín-ēng lán ê Kiù-chú só͘ bat kóng: “Siat-sú goá nā bô lâi” chit-kù oē. Khà-phı̀ⁿ ê loē-iông sı̄ teh biâu-siá chı̍t ūi bo̍k-su tı̄ Sèng-tàn-cheh ê chheng-chá bāng-kı̀ⁿ i tiàm tı̄ Iâ-so͘ bē-bat lı̂m-kàu ê sè-kài.
Tı̄ bı̂n-bāng tiong, i chhē piàn chhù-lāi, chhē bē tio̍h Sèng-tàn chhiū, Sèng-tàn hoe-khoân, Sèng-tàn cheng chiah-ê mı̍h-kiāⁿ, iā chhē bô Ki-tok ê an-ùi, hí-lo̍k kap kiù-sio̍k! I tı̄ toā-tiâu koe-lō͘ kiâⁿ, chhē bô chı̍t keng lé-pài-tn̂g, iā bô thang khoàⁿ-tio̍h chin koân ê cheng-lâu. I tò-lâi ka-kı̄ ê tha̍k-chheh pâng, hoat-hiān ta̍k-pún chheh lāi-bı̄n só͘ ū lūn Kiù-chú ê pō͘-hūn lóng sit-lo̍h!
Mn̂g ê tiān-lêng tân, ū chı̍t ê gín-ná lâi beh chhiáⁿ i khı̀ khoàⁿ chı̍t-ūi teh beh sí ê lāu-bú. I koáⁿ-kín kap chit ê teh háu ê gín-ná saⁿ-kap khı̀. Kàu tè, bo̍k-su chiū kóng: “Goá lâi, tek-khak oē-thang an-ùi lí.” I chiū liâm-piⁿ hian-khui Sèng-keng, beh tha̍k chı̍t-toāⁿ chin se̍k ê èng-ún hō͘ pı̄ⁿ-lâng thiaⁿ, chóng-sı̄ i hian kàu Má-lia̍p-ki chiū liáu lah! Lāi-bı̄n chhē bô Sin-iok ê hok-im! Chhē bô kiù-sio̍k ê èng-ún! Tùi án-ni, i iā tı̂m-lo̍h tı̄ choa̍t-bāng tiong, àⁿ-thâu kap pı̄ⁿ-lâng saⁿ-kap khàu!
Nn̄g-jı̍t āu, bo̍k-su khiā tı̄ koaⁿ-chhâ piⁿ chú-chhı̂ chit ūi chí-bē ê song-sū. Bô ū an-ùi ê siau-sit thang thoân, bô ū koh-oa̍h ê ǹg-bāng thang kóng, iā bô ū khui--teh ê thiⁿ-mn̂g thang pò hō͘ tāi-ke khoàⁿ! Chí-ū sı̄ “Lí pún sı̄ thô͘-hún, iû-goân beh kui thô͘-hún, ”chit khoán pi-chhám ê lı̄-piat! Bo̍k-su í-keng siông-sè thé-hoē “Ki-tok nā bô lâi” ê chêng-kéng sı̄ sím-mı̍h khoán. Tı̄ chit khoán iu-chhiû ê bı̂n-bāng tiong, bo̍k-su toā khàu!
Hut-jiân, bo̍k-su hō͘ hiáng-liāng gı̂m-si ê siaⁿ kiaⁿ-chhéⁿ, peh khí-lâi tiô-thiàu hoan-ho͘. Bo̍k-su boē-kı̀m-tit iā kap pò ka-im ê gı̂m-si pan saⁿ-kap gı̂m:
“Sèng-tô͘ saⁿ-kap lóng lâi,
Khoài-lo̍k koh hoan-ho͘,
Sèng-tô͘ saⁿ-kap lâi,
Tāi-ke chiūⁿ Pek-lı̄-hêng,
Tiâu-kı̀ⁿ Sèng Eng-jı̂.
Thiⁿ-sài Ông taⁿ kàng-seng,
Khiân-sêng chông-pài Ki-tok,
Chun I miâ choè sèng.”
Lia̍t-ūi ah! Kin-á-jı̍t lán eng-kai chı̄n-chêng ài hoan-lo̍k! In-ūi “I í-keng lâi lah!” Chhiáⁿ thiaⁿ thiⁿ-sài só͘ pò ê ka-im: “Goá pò lín toā hoaⁿ-hí ê hó siau-sit, hō͘ peh-sı̀ⁿ lóng ū hūn; in-ūi kin-á-jı̍t tı̄ Tāi-pı̍t ê siâⁿ í-keng ūi-tio̍h lín siⁿ chı̍t ê chín-kiù ê, chiū-sı̄ Chú Ki-tok!”
Chit-lia̍p Soān-chio̍h Oāⁿ Chı̍t-pun8 Sèng-keng
Kū-nı̂ joa̍h-thiⁿ goá khı̀ Hui-chiu tang-hoāⁿ thàm-hóng goá ê a-chek. I sı̄ tı̄ hia ê chı̍t keng Sèng-keng ha̍k-hāu teh kà-chheh. Tng goán chē tı̄ pān-kong-sek ê sı̂, goá khoàⁿ-kı̀ⁿ goā-bı̄n ū chı̍t ê phoê-hu o͘-sek ê ta-po͘ gín-ná tı̄ cháu-lông teh chhit tē-pán.
Goá chiū tùi Pí-tek chek kóng: “Hit ê gín-ná seⁿ-chò chin hó khoàⁿ, khó-sioh bı̄n ū chı̍t khı̂.” Pí-tek chek chiū kóng: “Hit ê gín-ná miâ A-pok-to͘ Kiat-hàn, i pang-chān goán chin toā, lí-ài thiaⁿ i ê kò͘-sū mah?” Ē-bı̄n chiū-sı̄ goá ê a-chek kóng hō͘ goá thiaⁿ lūn hit ê A-la̍h-pek ê gín-ná ê kò͘-sū.
Pí-tek chek kóng: “Goá éng-oán bô boē kı̀-tit goá tı̄ A-la̍h-pek pak-pō͘ tē-it pái gū-tio̍h ê chêng-hêng. Hit sı̂ goá tı̄ chı̍t châng chang-chhiū-kha hioh-liâng, goá ê thó͘-jı̂n chō͘-chhiú tú teh ēng chúi hō͘ lo̍k-tô lim. Goá chē tı̄ hia sim-lāi teh siūⁿ, tı̄ soa-bô tiong tú-tio̍h chı̍t-phiàn chhiⁿ-chhùi ū chúi ê le̍k-chiu, sı̄ hō͘ lâng cheng-sı̂n joā-nı̍h sóng-khoài. Hut-jiân goá kia̍h-thâu khoàⁿ-kı̀ⁿ ū kúi ê lâng khiâ bé ǹg goán chia pháu--lâi, khiâ tı̄ bé-téng ê lâng thâu-khak pau thâu-kin, chhiú kia̍h chhiuⁿ. Tng in pháu-oá goá ê sin-piⁿ ê sı̂, hiah-ê A-la̍h-pek lâng chiong bé-kiuⁿ giú chı̍t-ē, bé chiū thêng leh. In lo̍h--lâi ēng sûn-chūi ê Eng-gú tùi goá kóng: “Goān lí pêng-an, Hap-sim A-lí ê kiáⁿ A-pok-to͘ Kiat-hàn khoàⁿ-kı̀ⁿ lín ê lo̍k-tô-tūi, chiū bēng-lēng goán thêng leh, lâi chhéng-an lín.”
Tng goá thiaⁿ-kı̀ⁿ chit ê miâ ê sı̂, goá kín kia̍h-thâu koan-khoàⁿ. A-pok-to͘ Kiat-hàn put-kò sı̄ chı̍t ê 12 hoè ê gín-ná, chóng-sı̄ choân A-la̍h-pek bô ū chı̍t ê lâng m̄-bat i ê miâ. I ê lāu-pē Hap-sim A-lí sı̄ hit só͘-chāi choè pù-ū ê iû-tiúⁿ ê chı̍t ê. I ū chin toā ê iûⁿ-kûn, ū soa-bô tiong choè gâu cháu ê A-la̍h-pek bé, ū chı̍t-chheng miâ chiàn-sū, sûi-sı̂ thang èng i ê bēng-lēng chhut-chiàn. Thiaⁿ kóng i ū hui-siông chē ê pó-chio̍h, ū chı̍t-tē chı̍t-tē ê chin-chu, koh ū chı̍t-a̍h chı̍t-a̍h ê pó-chio̍h. Hap-sim A-lí sı̄ khiân-sêng ê Hoê-kàu-tô͘, tùi Khó-lân-keng chin se̍k. Goá chin hò͘ⁿ-kı̂ siūⁿ ài kı̀ⁿ chit ê gín-ná, chiū kā in kóng: “Khı̀ kā lín ê siú-léng ê kiáⁿ A-pok-to͘ Kiat-hàn kóng, goá Hân Pí-tek ǹg i piáu-sı̄ cha̍p-jı̄ bān hun ê hoan-gêng.”
Hit ê lâng, chiū-sı̄ tùi bé-téng lo̍h-lâi kap goá kóng-oē ê lâng, chiū pháu tò-tńg khı̀ chiong goá ê ı̀-sù ǹg hit ê gín-ná pò-kò, A-pok-to͘ Kiat-hàn chiū gia̍h-chhiú kap goá chhéng-an. Chı̍t-ē-á hit lâng koh tńg-lâi kā goá kóng: “A-pok-to͘ Kiat-hàn siūⁿ ài kap lí kóng-oē, kap lí pún-sin kóng oē.” Goá kóng: “Chhiáⁿ kā i kóng goá ê chō͘-chhiú lóng chhoā lo̍k-tô khı̀ lim-chúi, i nā khéng, chhiáⁿ i lâi chit châng chhiū-kha kóng, chóng-sı̄ ū chı̍t-hāng chiū-sı̄ goá boē-hiáu kóng A-la̍h-pek oē.”
“Oh! A-pok-to͘ Kiat-hàn chin gâu kóng Eng-gú, i kap i ê lāu-pē khı̀ Eng-kok í-chêng chiū o̍h Eng-gú, ” hit ê A-la̍h-pek lâng án-ni hoê-tap. Só͘-í goá kap A-pok-to͘ Kiat-hàn chiū tı̄ chang-chhiū-kha tâm-oē. Goá chù-ba̍k tı̄ i só͘ koà chı̍t-kha soān-chio̍h chhiú-chí, i chiū kóng: “Che sı̄ choân A-la̍h-pek choè hó ê chı̍t-lia̍p, sı̄ kham-tit koà tı̄ tè-ông ê chńg-thâu á ê. Che o͘-àm ê Hui-chiu ū sàng chhut boē chió ê châi-pó hō͘ sè-kài, iā hō͘ sè-kài boē chió ê pi-ai. Lí khoàⁿ chit-lia̍p soān-chio̍h, ba̍k-chiu hoe hò͘ⁿ?” I án-ni mn̄g goá.
Goá chha-put-to boē hiáu ı̀n i, goá sim-lāi siūⁿ chit ê gín-ná sı̄ chin liáu put-khí ê jı̂n-bu̍t. I chiū kè-sio̍k kóng: “Tng tāi-chiàn ê sı̂, ū goā-kok ê kun-tūi tı̄ chia, kı̂-tiong ū chı̍t ê siū lâng thí-chhiò ê lâng, pa̍t-lâng chheng i choè bo̍k-su. Chóng-sı̄ i ǹg goá kóng ê oē hō͘ goá éng-oán boē boē-kı̀-tit, i sàng goá chı̍t-pún chheh, sı̄ goá boē bat tha̍k koè ê. Kiám-chhái lí iā sı̄ hit pún chheh ê tho̍k-chiá sı̄ bô?”
Goá sui-jiân sim-lāi chai-iáⁿ i só͘ kóng ê sı̄ chí sím-mı̍h chheh, chóng-sı̄ goá kò͘-ı̀ mn̄g i kóng, “m̄-chai lí só͘ chí ê sı̄ sím-mı̍h chheh.”I chiū chē khah oá goá, soè-siaⁿ tùi goá kóng: “Chiū-sı̄ Ki-tok-kàu ê Sèng-keng là! Goá í-chêng ū chı̍t pún, chóng-sı̄ goá ê lāu-pē tı̄ toā siū-khı̀ tiong chiong i sio-khı̀.”
“Ah! Lí sı̄ kóng chit pún chheh mah?” Goá tùi tē-á lāi the̍h chhut chı̍t-pún Sèng-keng. A-pok-to͘ Kiat-hàn sûi-sı̂ chiong goá the̍h Sèng-keng ê chhiú iap tı̄ saⁿ-á-ē, tùi goá kóng: “Tùi kū-nı̂ khí, goá nā tú-tio̍h goā-kok lâng chiū kap i tâm-khí chit pún chheh, goá chin ǹg-bāng tit-tio̍h chı̍t-pún, chóng-sı̄ in lóng bô. Chhiáⁿ mn̄g, lí ū siong-sı̀n koh ū chun kiâⁿ chit pún chheh só͘ kı̀ ê kàu-hùn mah?” I chin sêng-khún án-ni mn̄g.
Goá kóng: “A-pok-to͘ Kiat-hàn, lí ê ı̀-sù sı̄ mn̄g goá sı̄ m̄-sı̄ chı̍t ê Ki-tok-tô͘, ū bô siong-sı̀n Iâ-so͘ sı̄ Sı̂n ê Kiáⁿ, koh ūi goá ê choē sí mah?”…… “Goá khak-sı̍t siong-sı̀n.”
I hit-tùi o͘-lúi-lúi ê ba̍k-chiu chek-sı̂ hoat-chhut thiⁿ-téng ê kong-hui, koh ēng khiân-sêng ê siaⁿ-tiāu kóng: “Sı̂n sı̄ eng-kai siū o-ló ê! Lán sı̄ hiaⁿ-tı̄, goá tàu-té chhoē tio̍h chı̍t-ūi Ki-tok-tô͘ là ! Goá chai-iáⁿ hit pún chheh sı̄ lí ê pó-poè, chóng-sı̄ goá beh ēng chit kha soān-chio̍h chhiú-chí hō͘ lí chò tāi-kè kap lí oāⁿ hit pún Sèng-keng.”
“M̄-bián, goá pe̍h-pe̍h sàng lí, goá tńg-khı̀ chiū koh ū pa̍t-pún là !” Goá kū-choa̍t i ê chhiú-chí, chóng-sı̄ i m̄-khéng pe̍h-pe̍h chiap-siū Sèng-keng, i sı̄ chı̍t ê chin ū chū-chun-sim ê A-la̍h-pek lâng, i it-tēng ài goá chiap-siū i bí-lē ê soān-chio̍h chhiú-chí. Goá chiū chiong Sin-iok Sèng-keng kau hō͘ i, chiong chhiú-chí siu tiàm lāi-saⁿ lāi. I chiong Sèng-keng chhàng tı̄ saⁿ-á lāi, jiân-āu tùi goá kóng: “Siōng-tè chiok-hok lí. Goān Chú Iâ-so͘ Ki-tok ê pêng-an kap lí tông-chāi. Goá oē kı̀-tit thè lí kı̂-tó, hō͘ lí chı̍t-lō͘ tit Siōng-tè chiok-hok, thang chō-chiū pa̍t-lâng ê hēng-hok.” I thiàu chiūⁿ bé-téng, ǹg goá gia̍h-chhiú saⁿ-sı̂, chiong bé piⁿ chı̍t-ē, bēng-lēng chı̍t-siaⁿ, chiū kap kun-tè ê lâng kín pháu khı̀ là ! Nā m̄ sı̄ goá ê Sèng-keng bô khı̀, nā m̄ sı̄ goá ê lāi-saⁿ ū chı̍t-kha soān-chio̍h chhiú-chí, goá iáu lia̍h choè che sı̄ chı̍t-tiûⁿ ê bı̂n-bāng nè!
Tng goá khiâ tı̄ bé-téng chı̍t-lō͘ siūⁿ-tio̍h A-pok-to͘ Kiat-hàn, chiū ūi i kı̂-tó. Goá m̄-káⁿ sióng-siōng i nā ūi-tio̍h sı̀n Chú Iâ-so͘ hō͘ i lāu-pē koáⁿ chhut-lâi, sin-piⁿ it-bû só͘-iú, kiû-khit iā bô lâng beh thiaⁿ ê sı̂ ê seng-oa̍h. In-ūi Hoê-kàu-tô͘ kheng-sı̄ iàm-ò͘ⁿ hiah-ê choán-jı̍p Ki-tok-kàu ê lâng. In kian-sı̀n chí ū chı̍t-ūi sı̂n A-la̍h, koh sı̀n Bo̍k-hán-be̍k-tek chiū-sı̄ in ê sian-ti.
Nn̄g-nı̂ āu goá ū ki-hoē kàu Be̍k-ka, chia sı̄ Hoê-kàu-tô͘ chong pài ê tiong-sim. Tùi Hoê-kàu ta̍k só͘-chāi lâi tiâu-sèng ê lâng lóng chı̍p-tiong tı̄ chia, in-ūi in siong-sı̀n kàu chia lâi tiâu-pài, oē tit-tio̍h A-la̍h ê toā chiok-hok. Goá thêng tı̄ hit ê lāu-jia̍t ê chhı̄-tiûⁿ chı̍t keng thoaⁿ-hoàn chêng, beh boé tām-po̍h kı̀-liām-phín sàng pêng-iú. Tng goá tú teh kéng mı̍h ê sı̂, goá khoàⁿ-tio̍h chı̍t ê chhēng phoà-noā ê saⁿ ê gín-ná, teh boē soè pún chheh, goá jı̄n tit i bı̄n-téng ê khı̂, goá ǹg i kiâⁿ khı̀, i kia̍h-thâu khoàⁿ goá. Goá bô khoàⁿ chhò －i chiū-sı̄ A-pok-to͘ Kiat-hàn! I tú teh boē Iok-hān Hok-im-su. Goá bô koán hia sı̄ ke-lō͘, goá boē kı̀m-tit lám i, i iā chiong goá lám tiâu, nn̄g lâng chhin-chhiūⁿ kú-kú lı̄-pia̍t koh saⁿ-kı̀ⁿ ê hiaⁿ-tı̄ chı̍t-poaⁿ.
I chhoā goá kàu i só͘ toà ê sió pò͘-tō-só͘, goán tı̄ hia tâm-oē kàu poàⁿ-mê. I kā goá kóng, cháiⁿ-iūⁿ tùi Má-thài tē I chiuⁿ tha̍k-khí, táⁿ-sǹg beh chiong Sin-iok siông-sè tha̍k chı̍t-pái, chóng-sı̄ kàu tē 10 chiuⁿ, chiū ū oē chhı̀-chha̍k i ê sim. Hiah-ê oē chiū-sı̄ “Kı̀ⁿ-nā tı̄ lâng ê bı̄n-chêng m̄ jı̄n Goá ê, Goá tı̄ Goá Pē ê bı̄n-chêng iā m̄ jı̄n i.” A-pok-to͘ Kiat-hàn kóng: “Goá tha̍k-tio̍h chiah-ê oē, goá chai-iáⁿ goá eng-kai kā goá ê lāu-pē kóng goá sı̄ Ki-tok-tô͘, bô-lūn sím-mı̍h sū oē lı̂m-kàu, goá iā eng-kai kóng, Goá ê lāu-pē chek-sı̂ toā siū-khı̀, chiong goá choè thiàⁿ ê bé siu-hoê. Chóng-sı̄ goá iā bô pàng-sak tùi Chú Iâ-so͘ Ki-tok ê sı̀n-gióng. Lāu-pē khoàⁿ goá bô kái-piàn, chiū chiong goá só͘ ū súi ê i-ho̍k chhiúⁿ-khı̀, chhú-siau goá chò kiáⁿ ê koân-lı̄, hō͘ goá chiâⁿ-choè chı̍t ê lô͘-po̍k. Goá chiū tı̄ lāu-pē ê ke-tiong, chèng-lâng ê bı̄n-chêng siū lêng-jio̍k, āu-lâi goá siū piⁿ-phah. Ū chı̍t-jı̍t tı̄ toā siū-khı̀ ê sı̂, goá ê lāu-pē ēng i ê té-chhèng piaⁿ-lâi, toā siaⁿ hoah kóng: “Chhut-khı̀! Put-siàu kiáⁿ, lí m̄ sı̄ Hap-sim A-lí ê kiáⁿ!” Goá ê lāu-bú mō͘-hiám pang-chān goá thau-cháu. Goá siông iau-gō khiàm-kheh, chóng-sı̄ Siōng-tè ū khoàⁿ-kò͘ goá.”
Āu-lâi i tú-tio̍h Ki-tok-kàu ê soan-kàu-su, in chiū siu-liû i. Chóng-sı̄ i sı̄ chin sàn-hiong, pí tē-it sàn-hiong ê khah sàn, tng-sı̂ tı̄ A-la̍h-pek khiâ-bé niá kui-chheng ê oē-peng, só͘ chhēng sı̄ ông-chú ê súi-saⁿ, koà moá chin-chu pó-chio̍h ê A-pok-to͘ Kiat-hàn, hiān-chāi in-ūi Chú Iâ-so͘ Ki-tok ê thiàⁿ chiong it-chhè lóng pàng-sak. I ūi-tio̍h Ki-tok khoàⁿ bān-hāng choè pùn-sò, ūi beh tit-tio̍h Ki-tok.
Goá thiaⁿ i kóng liáu chiū chhun chhiú tùi lāi-saⁿ the̍h hit kha soān-chio̍h chhiú-chí chhut-lâi, khǹg tı̄ i ê chhiú-lāi kóng: “A-pok-to͘ Kiat-hàn, lí ê hiaⁿ-tı̄ chiong che sàng lí.” I chiap khı̀ chí-ū kóng: “Hiaⁿ-tı̄, to-siā.”
Āu-lâi goá chiah chai i kiû Siōng-tè siúⁿ-sù i chı̍t-phit chı̂ⁿ hō͘ i thang khı̀ tha̍k Sèng-keng ha̍k-ı̄ⁿ. I chai-iáⁿ, goá iā chai-iáⁿ, che chiū-sı̄ Siōng-tè tah-èng i ê kı̂-tó ê hong-hoat.
Pí-tek chek kóng kàu kiat-sok ê sı̂ án-ni kóng: “Che chiū-sı̄ lí só͘ khoàⁿ-tio̍h tı̄ goā-bı̄n chhit tē-pán ê gín-ná ê kò͘-sū.”
Goá tùi thang-á khoàⁿ chhut-khı̀, chit sı̂ i sı̄ tı̄ cháu-lông ê hit pêng, goá sim-lāi án-ni siūⁿ: “A-pok-to͘ Kiat-hàn, chit ê A-la̍h-pek choè ū koân-sè ê iû-tiúⁿ ê kiáⁿ, i sı̄ choa̍t-tùi boē chhat tē-pán; chóng-sı̄ Siōng-tè ê lô͘-po̍k A-pok-to͘ Kiat-hàn khiok goān-ı̀ choè chit ê kang.” Goá chiong mn̂g khui chı̍t phāng, chiū thiaⁿ-kı̀ⁿ i ná chhit, ná teh chhiùⁿ “Siōng-tè ah! Lí ê sı̀n-sı̍t khoah toā, goá ê Sı̂n, goá Thiⁿ Pē……”
