Kín-sı̄n Só͘-kiâⁿ

Sam-kok chheh kı̀ chı̍t chām Koan Hûn-tióng pó-hō͘ in nn̄g ê hiaⁿ-só beh kap Chô Chhò chiūⁿ kiaⁿ khı̀, tı̄ lō͘-nı̍h Chô chhò tiâu-kò͘-ı̀ ēng chı̍t keng pang hō͘ in saⁿ lâng toà, ı̀-sù sı̄ beh hun-loān in kun-sı̂n ê lé-sò͘. Chóng-sı̄ Koan Hûn-tióng chò i tiám la̍h-chek chhut lâi chhù-goā khoàⁿ chheh kàu thiⁿ-kng, lóng bô sió-khoá ià-lán ê bı̄n-sek. Chô Chhò khoàⁿ-kı̀ⁿ án-ne, ná koh khah kèng-tiōng i.

Koan Hûn-tióng ê só͘ chò sǹg-sı̄ kun-chú ê só͘ kiâⁿ sı̀-chiàⁿ kong-bêng; lóng bô kò͘-ı̀ chng-chò. Khoàⁿ Sam-kok chheh ê lâng lóng kóng i sı̄ ài kò͘-ı̀ chò kun-chú ê miâ-siaⁿ, chiah án-ne lâi siám-pı̄ hiâm-gı̂, nā-sı̄ chāi Koan Hûn-tióng ê ı̀-sù chiū bô án-ne kóng, in-ūi Koan Hûn-tióng só͘ kò͘ chiū-sı̄ Lâu Pı̄ ê bı̄n-chiūⁿ, kap in hiaⁿ-só ê tek-hēng, chèng-lâng ê lām-sám kóng tio̍h m̄-tio̍h i lóng bô khoà-ı̀.

Chiàu án-ne kā i siūⁿ, lán kàu-hoē lāi ê hoē-iú nā oē chiàu i ê hoat-tō͘ lâi kiâⁿ, ū kun-chú ê kha-pō͘ kiám m̄-sı̄ chin hó mah? Kı̀ⁿ-nā ū hiâm-gı̂ ê só͘-chāi, chhin-chhiūⁿ chiú-lâu, hı̀-hn̂g, hoe-ke-liú-hāng, kiáu-tiûⁿ, che lóng m̄ thang khı̀, m̄ kan-ta pó-choân ka-kı̄ ê miâ-siaⁿ, chiū lán ê Chú kap kàu-hoē ê miâ-siaⁿ koh khah iàu-kín tio̍h pó-choân. Sèng-keng ū kóng, "Kiâⁿ só͘ tio̍h kiâⁿ, ū chhin-chhiūⁿ jı̍t-sı̂, bo̍h-tı̍t chiú-chùi lâi hòng-tōng; bo̍h-tit hòⁿ-sek, kiâⁿ siâ ê tāi-chı̀, bo̍h-tit saⁿ-cheⁿ, siū-khı̀, oàn-tò͘." (Lô-má 13 : 13) (Hoan-e̍k)

(Tâi-lâm-kàu-hoē-pò tē 367 koàn, 1915 nı̂ 10 goe̍h)