Kín-tiuⁿ lāu-bú tiâu-tı̍t kiáⁿ

Ū 1 ê kiò A-bêng ê ha̍k-seng gín-á, taⁿ-á tha̍k sió-ha̍k 3-nı̂-á. Ū 1 kang chái-khí khùn 1-ē siuⁿ oàⁿ, bē-hù ka-tı̄ ēng kiâⁿ--ê khı̀ ha̍k-hāu, in lāu-bú kiò i chhùi-bı̄n sé-sé--le, chah 1 lia̍p bán-thô, chheh-phāiⁿ-á phāiⁿ--le, beh ēng o͘-tó͘-bái kā chài khı̀ ha̍k-hāu. Hiông-hiông-kông-kông o͘-tó͘-bái chhui--le, 1 lián sái 50, phû-ú--1-ē tō sái--chhut-khı̀, 1-ba̍k-nih tō kàu poàⁿ-lō͘ chheⁿ-âng-teng kha, tú tio̍h âng-teng tòng-tiâu--le, in bú--á oa̍t-thâu khoàⁿ tio̍h A-bêng bô chē tı̄ o͘-tó͘-bái téng, khiā tı̄ o͘-tó͘-bái piⁿ--á chhoán, tō mn̄g A-bêng kóng: “Ha̍k-hāu iáu-boē kàu, lí nah ē hiah kín tō thiàu--lo̍h-lâi?” A-bêng ı̀n kóng: “Goá iáu-boē chē khí-lih o͘-tó͘-bái téng--le, goá sı̄ toè tı̄ lí āu-piah, ēng cháu--ê!” (Tâi-bûn Bóng-pò tē 84 kı̂, 2003 nı̂ 9 ge̍h)