Goá siōng-ài tiām-tiām kiâⁿ
Tn̂g-tn̂g-tn̂g ê hái-hoāⁿ
Jı̍t-chhut jı̍t-lo̍h lóng tı̄ hia
Kò͘ goán un-á kap iâm-tiâⁿ
Kò͘ goán bı̂n-bāng ê sè-hàn
Kò͘ goán chı̍t-chng ê sèⁿ-miā
Siàu-liân ê sı̂ goán-hiong hit-tiâu
Ióng-ióng-ióng ê hái-hoāⁿ
Lo̍k-kó͘-chio̍h thô͘-piah kāu-kāu-kāu
Ūi goán sió-sió ê chng-thâu
Tòng chúi-tiòng tòng khe-lâu
I ū-sı̂ phoà-khang
I ū-sı̂ pang-poâⁿ
Hiong-chhin sı̄-toā chiok-sio̍h chio̍k-thiàⁿ
Kiâⁿ tı̄ hong-thàu ê hái-piⁿ
Hái-chiáu iû-goân chı̍t chiah chih chiah
Chá-àm poe-lâi poe-khı̀
Hiān-chāi tı̍t-tı̍t ê âng-mn̂g-thô͘-hoāⁿ
Í-keng bô phàu-tâi chò-phoāⁿ
Bô thiaⁿ-tio̍h phōng-chûn-á siaⁿ
Bô khoàⁿ-tio̍h pò͘-phâng-iáⁿ
Kiâⁿ tı̄ hông-hun ê hái-hoāⁿ
Khoàⁿ goán hn̄g-hn̄g ê chng-thâu
Siau-sit ê tek-á lı̂-pa
Tiām-tiām nı̂-lāu ê âng-hiā
Chı̍t châng hong-siaⁿ ê mô͘-hông-á
Chı̍t phı̀ⁿ khang-khang ê chng--á-tiâⁿ
