Kò͘ Ông Kang Tiúⁿ-ló sió-toān

Tı̄ Chú-āu 1904 nı̂ tit-tio̍h tō-lí, sı̄ tùi Hoe-the̍h kàu-hoē Ko-chhiàng hiaⁿ ê ín-chhoā lâi sı̀n Chú. Tùi sı̀n Chú liáu, só͘ keng-koè ê lō͘-tô͘ chin khi-khu, bô-lūn hó pháiⁿ kéng-gū, bô khoàⁿ lâng, bô khoàⁿ khoân-kéng. Tng Hoe-the̍h chho͘ siat kàu-hoē ê sı̂, i sı̄ thâu-chúi ê koé-chí, chho͘-tāi ê sı̀n-tô͘, ū sûn-chūi ê sı̀n-gióng, láu-sı̍t ê I-sek-lia̍t lâng,sim bô khúi-khiat--ê! Lūn i ê seng-oa̍h chit-gia̍p, sı̄ khiā-khí tı̄ hái-piⁿ, hái-lio̍k khang-khè cha̍p-chhap, hái-siōng ê kan-kí, sı̄ chō chûn, kò chûn, lia̍h hı̂; lio̍k-siōng sı̄ ba̍k-kang kap thô͘-chúi; thang kóng hái-lio̍k cheng-thong ū keng-giām. Pó-lô kóng, hoān-sū lāu-liān. Ah! Bô phah-sǹg, tı̄ sin-le̍k 10 goe̍h 29 hō ē-po͘ 6 tiám 10 hun, hō͘ Siōng-tè kéng-tiàu chiùⁿ thiⁿ, giám-jiân ná Í-lı̄-a kap Í-lı̄-sa saⁿ lı̄-pia̍t chı̍t-iūⁿ! I hióng-siū 65 hoè. Lūn hō͘-è, sı̄ ngó͘ lâm sam lú, sun-jı̂ kiōng 21 miâ. Chhù-lâm Ông Heng-bú Sian-siⁿ, hiān-jı̄m Oân-lí kàu-hoē khı̂n-bū. Sui-jiân bu̍t-chit sàn-hiong, nā-sı̄ cheng-sı̂n hong-hù, jia̍t-sim hōng-sū kàu-hoē. Sèng-keng kóng, “Sèng-tô͘ ê ke-gia̍p kap hó-gia̍h.” Ông Tiúⁿ-ló sı̍t-chāi ū tit-tio̍h lah! Nā tùi kàu-hoē hong-bı̄n lâi khoàⁿ, sı̄ sit-lo̍h chı̍t ê tòng-liông. Chóng-sı̄ tùi sı̂n-kok hong-bı̄n lâi khoàⁿ, sı̄ ke chı̍t ê pè kàu-hoē ê tāi-piáu jı̍p tı̄-hia, thang an-sim lah. Lūn i chò lâng sim phāu tiong-sêng, jia̍t-sim chun-siú lé-pài-jı̍t, ū pı̄ soán chò Kı̂-āu kàu-hoē ê chip-sū. Āu-lâi seng chò tiúⁿ-ló, keng-koè kúi-nā jı̄m, chū-sè bô tha̍k-chheh, chóng-sı̄ gâu chò si-koa, bat chiūⁿ Kàu-hoē-pò, iā sı̄ i it-seng ê toā chhù-bı̄. O̍h pe̍h-oē-jı̄ chı̍t jı̍t chiū sêng-kong, thang kóng sı̄ chhian-lí-má. Lūn kan-khó͘, gâu thun-lún; lūn khı̂n-khiām, gâu khek-kí; lūn sûn kàu-hoē, bē-su chiú-keⁿ-peng; lūn chû-siān, m̄-ài hián-jiân hō͘ lâng chai. Í-siōng hiah-ê sı̍t-chāi hō͘ lán thang o̍h, goān Chú pó-siú i ê ûi-cho̍k. A-bēng. (Tâi-oân kàu-hoē Kong-pò tē 623 hō, 1937 nı̂ 2 ge̍h)