Pún-nı̂ chiaⁿ-goe̍h 20 jı̍t, tı̄ Éng-khong lé-pài-tn̂g ū kú-hêng chı̍t ê chin m̄-kam ê kò-pia̍t-sek, chiū-sı̄ pún-tn̂g ê Gô͘ Pit Tiúⁿ-ló-niû (Lâu Hoâ-gı̄ Bo̍k-su ê tiūⁿ-ḿ) ūi-tio̍h koaⁿ-gâm, tı̄ chiaⁿ-goe̍h 18 jı̍t lı̄-khui sè-kan, Chú ū in-tián i tı̄ pia̍t-sè ê 18 jı̍t chêng, chhoā i kàu Thian-tông kap tē-ge̍k. Taⁿ chiong i só͘ khoàⁿ ê kán-tan siá chò kiàn-chèng.
(1) Cha̍p-jı̄ goe̍h 31 jı̍t téng-po͘ ū kā Gô͘ Tiúⁿ-ló-niû kóng, kin-á-jı̍t lí m̄-thang khı̀ óng-chín, kiám-chhái Chú oē tiàu goá tńg-khı̀, āu-lâi 10 tiám kàu ē-po͘ 4 tiám poàⁿ lóng m̄-chai lâng, ba̍k-chiu kim-kim chhùi ngē-ngē, ū khoàⁿ-kı̀ⁿ chı̍t ê chhēng pe̍h-saⁿ, koh pe̍h chhùi-chhiu ê Chú Iâ-so͘, chhoā i kàu thian-tông, tı̄ hia thiaⁿ-kı̀ⁿ im-ga̍k, hó thiaⁿ ê siaⁿ-im. Iā chèng-lâng lóng chhēng pe̍h-saⁿ hoan-gêng. Koh chhoā kàu i ê pâng-keng, lāi-bı̄n ê pò͘-tı̀ chin súi, ū í, toh, koh pò͘-lı̂ chı̍t-ē khui, iā ū kim sih-sih ê bı̂n-chhn̂g. Tiúⁿ-ló-niû tùi Chú kóng, goá bē kham-tit chē chiah súi ê í, bē kham-tit khùn chiah súi ê bı̂n-chhn̂g, in-ūi goá ê saⁿ kiaⁿ-lâng. Chú kóng, Goá khoàⁿ sim-lāi, Goá bô khoàⁿ goā-phoê, lí ū hó-sim gâu thiàⁿ-lâng, kiâⁿ chē-chē hó-sū, lí sı̄ chin koai ê cha-bó͘-kiáⁿ, Goá chin thiàⁿ lí, koh khoàⁿ-kı̀ⁿ toh-téng ū chı̍t téng chin súi ê bián-liû, sı̄ sè-kan bô thang pí tit ê súi. Chú hō͘ i chē, gı̂m 257 siú si an-ùi i, tiúⁿ-ló-niû tùi Chú kiû kóng, chún i tńg-khı̀ thang an-ùi i ê kiáⁿ kap ka-cho̍k, Chú chún i soà kóng, nā koh tiàu lí, lí tio̍h koh lâi, Chú chiū koh chhoā i tńg-lâi.
(2) Kāng-jı̍t àm-sı̂ 11 tiám poàⁿ kàu 12 tiám goā, koh chı̍t pái m̄-chai lâng, ū chı̍t ê lâng chhoā i kiâⁿ chin pháiⁿ kiâⁿ ê lō͘, kàu-ūi thiaⁿ-kı̀ⁿ kiaⁿ-hiâⁿ ê siaⁿ, in-ūi chin chē lâng tı̄ hoé-kheⁿ teh siū sio, ū toā chio̍h-bō, ū toā ê iû-tiáⁿ, ū thih-káu, ū tâng-choâ lóng teh hêng-hoa̍t phái-lâng, chèng-lâng kiò m̄-káⁿ, thı̂-khàu, Mô͘-kúi kóng, bô lō͘ thang tô-siám, koh ū ê hoah kóng, hoán-hoé bô ki-hoē. Tiúⁿ-ló-niû chin kiaⁿ m̄-káⁿ khoàⁿ, hit lâng kóng, m̄-bián kiaⁿ, Chú kap lí tı̄-teh, chiū koh chhoā i khı̀ thian-tông kā i kóng, lí tio̍h tiàm chia; i kiû kóng, in-ūi kiáⁿ-jı̂ chhut-goā, iáu-boē kap in saⁿ-sı̂, iông-ún goá tńg-khı̀, chiū koh chhoā i tńg-lâi, chhéⁿ khí-lâi iáu-kú chin kiaⁿ. Khó-lı̂n hiah ê pháiⁿ-lâng siū hêng-hoa̍t, ke-lāi ê lâng ài i tùi Chú kiû, hō͘ i ū oa̍h-miā thang koh tı̄ sè-kan, ūi I chò kiàn-chèng; i kóng i m̄-káⁿ, seⁿ-sí chhut-chāi Chú ê ı̀-sù.
Chiaⁿ goe̍h chhe-it ê-àm 11 tiám goā kàu 12 tiám goā, i ū khoàⁿ-kı̀ⁿ chı̍t ê o͘-o͘ koh pháiⁿ khoàⁿ ê lâng chhoā i beh khı̀ tē-ge̍k, i m̄-ài khı̀, kap i kè-kàu saⁿ-phah iok 20 hun kú, hit tiong-kan khoàⁿ-kı̀ⁿ mô͘-kúi chē-chē kia̍h tn̂g-tn̂g ê chhe teh chhiám pháiⁿ-lâng hiat tı̄ hoé-kheⁿ, chèng-lâng thı̂-khàu kiò m̄-káⁿ ê siaⁿ-im chin khó-lı̂n, hō͘ i ê sim chin kan khó͘, tùi Mô͘ kúi kóng, Goá beh khı̀ thian-tông, lí cháiⁿ-iūⁿ chhoā goá lâi tē-ge̍k? Ke-lāi ê lâng thiaⁿ-kı̀ⁿ kap khoàⁿ-kı̀ⁿ chit ê sū, chhut-la̍t kiû Chú pang-chān i, āu-lâi khah-iâⁿ mô͘-kúi, hoah Ha-le-lu-iah, phah chhiú. Chú chiū koh lâi chhoā i kàu chin súi ê hoe-hn̂g, koé-chí moá-moá sı̄, Chú chiū chiong hit téng súi ê bián-liû beh kā i tı̀, i khiam-pi kóng, Goá ê thâu-mn̂g chin kiaⁿ-lâng, bē kham-tit tı̀.
Khoàⁿ chiah ê sū í-āu, Chú hō͘ i koh tiàm sè-kan 18 jı̍t kú, thang chò kiàn-chèng. Chiaⁿ goe̍h 18 àm, tı̄ chin súi ê bı̄n-māu tı̍t-tı̍t kiò Chú, lâi lı̄-khui sè-kan. I pēⁿ chı̍t tang kú, i ê kan-khó͘ lán bē thang hêng-iông, nā-sı̄ i m̄-bat chı̍t kù oàn-thàn, chhin-chhiūⁿ Iok-pek. Tiúⁿ-ló-niû chāi-seⁿ gâu thiàⁿ lâng, thiàⁿ Chú, khiân-sêng sı̀n-khò Chú, hó khoán-thāi phoà-pēⁿ ê sòng-hiong lâng, chò bô oá-khò ê koáⁿ-hū ê pang-chān, chû-ài tı̄ ko͘-jı̂, gâu iú-hàu sı̄-toā-lâng, te̍k-pia̍t tùi Chú ê kang-lâng, sui-sı̄ sı̂n-ha̍k-seng iā chin hó khoán-thāi in, gâu pang-chān kàu-hoē chò Má-tāi ché, koh iā chhin-chhiūⁿ To-ka 30 nı̂ kú.
Thiaⁿ-kı̀ⁿ i ê sí, kàu-hoē lāi-goā ê lâng lâu m̄-kam siàu-liām ê ba̍k-sái. Goá kàu Éng-khong bo̍k-hoē bô loā-kú, Tiúⁿ-ló-niû í-keng sin-khu phoà-pēⁿ, goá ta̍k pái khı̀ thàm i, i tı̄ kan-khó͘ ê tiong-kan iáu chin koan-sim goá ê seng-oa̍h, i lia̍h pa̍t-lâng pí ka-kı̄ khah iàu-kín, ēng khek-kí pún-sin lâi khoán-thāi lâng. I tı̄ kui thian ê chı̍t jı̍t chêng, te̍k-pia̍t chı̍t hāng sū hō͘ goá ê sim siū toā kám-kek ê, tng goá khı̀ khoàⁿ i, i ke̍k kan-khó͘ chhoán-khùi bē chū-jiân ê sı̂, iáu-kú kiò i ê kiáⁿ the̍h kam-á hō͘ goá chia̍h, i ê thiàⁿ-sim hō͘ goá it-seng bô bē kı̀-tit. Goá sı̀n in-ūi i gâu thiàⁿ lâng, gâu thiàⁿ Chú, Chú chhoā i khı̀ khoàⁿ i ê pâng-keng kap súi ê bián-liû. Í-siōng goá siá chiah ê lâi tui-liām i, kap tāi-ke saⁿ-kap siū bián-lē.
“Só͘-í goá só͘ thiàⁿ ê hiaⁿ-tı̄--ah, lín tio̍h kian-kò͘ bô iô-choah, siông-siông chı̄n-le̍k tı̄ Chú ê kang, in-ūi chai lín tio̍h-boâ tı̄ Chú ê m̄ sı̄ khang-khang.” (I-ko 15:58)
(Tâi-oân Kàu-hoē Kong-pò tē 810-811 hō, 1956 nı̂ 6-7 ge̍h)
