Kán A-chhoan, sı̄ Koe-lâng kàu-hoē ê Chip-sū, i tı̄ Chú-āu 1920 nı̂, tùi Gô͘ Têng-hong thiaⁿ phoà-bê-lô ê tō-lí, tùi hit-tia̍p chiū koat-sim lâi sı̀n Chú, liáu-āu chin jia̍t-sim gián-kiù tō-lí, Pe̍h-oē-jı̄ ê Sèng-keng tha̍k kàu chin se̍k. 1922 nı̂, ū siū soé-lé, tùi kàu-hoē chin jia̍t-sim; lé-pài chin tı̀-ı̀, jı̍p pài-tn̂g chin khiân-sêng, chiū-sı̄ tiām-chēng kı̂-tó, tha̍k Sèng-keng. I it-seng sı̄ khı̂n-khiām ê lâng, chóng-sı̄ chin kam-goān hiàn-kim tı̄ kàu-hoē.
1926 nı̂, kàu-hoē ū kéng i choè Chip-sū, tùi kàu-hoē ta̍k hāng ê sū-bū, chin ū chı̄n chek-jı̄m. 1931 nı̂, ū koh têng-jı̄m Chip-sū, tı̄ 3 nı̂ chêng, pài-tn̂g ê siok-sià ū thiah toā-lō͘ koh kái-tiok, I choan-sim lâi kàm-tok kàu oân-sêng,sı̍t-chāi chin kám-sim. Bô phah-sǹg, tı̄ kū-nı̂ tiong, ū kap kàu-hoē chiām-sı̂ saⁿ-lı̄, khı̀ gián-kiù Thian-chú-kàu, kàu kin-nı̂ Tiong-hoē chêng, chiū koh tit-tio̍h Siōng-tè be̍k-sı̄, hoán-hoé, soà chhoā ke-lāi lâi kui Chú. Khó-sioh I kú-kú tı̄ pı̄ⁿ-ı̄ⁿ, i ê pı̄ⁿ ná tāng, tı̄ 2 ge̍h chhoe, chiū thè ı̄ⁿ tńg-lâi. Tùi hit-tia̍p kàu i lı̄-khui sè-kan, goán ū siông-siông khı̀ thàm i, kap i kı̂-tó, i iā kap goán kı̂-tó.
Kàu 2 goe̍h 13 jı̍t, hit chá-khí 11 tiám, an-jiân siū Chú kéng-tiàu, chı̀n-jı̍p Thiⁿ-siâⁿ, hit-tia̍p i ê toā-soè choân-pō͘, kap goá ê hū-jı̂n-lâng, kap goá ê kiáⁿ iā tı̄ i sin-piⁿ lâi sàng i siān-chiong. Goá in-ūi khı̀ hù Tiong-hoē, bô tı̄-teh. I ê kiáⁿ ū ēng ¥ 200.00 hiàn choè kàu-hoē ê ki-pún châi-sán, ū the̍h ¥100.00 lâi pı̄-pān Song-sū-hoē ēng ê mı̍h, chiū-sı̄ koan-tà kap kı̂-á, í-kı̍p pa̍t-hāng. Jı̄-ge̍h 19 hō téng-po͘, ū tı̄ pún-tn̂g kú-hêng kò-pia̍t-sek, ū chin-choē ūi ê bo̍k-su, thoân-tō-su lâi hù, iā ū hū-kūn ê kàu-hoē chin-choē lâi hù; ū chhiáⁿ Tiuⁿ Bo̍k-su, Chhı̂ Bo̍k-su kı̂-tó; Tân Chheng-gı̄ Bo̍k-su, Kai Sian-siⁿ soat-kàu; pún-tn̂g Bo̍k-su kóng lí-le̍k; koh ū tiàu-sû tiàu-tiān chin-choē, sek-āu ū siá-chin. Chit jı̍t ū 500 goā lâng hoē-chòng, chhı̄-bı̂n lóng choah--khí-lâi. Goá siá tām-po̍h, thang hō͘ tāi-ke lâi siàu-liām i, chı̍t bı̄n thang siong-sim, in-ūi kàu-hoē sit-lo̍h chı̍t-ūi Chú ê tiong-po̍k; chı̍t bı̄n thang hoaⁿ-hí, in-ūi i oa̍t tò-tńg, chhoā ke-lāi kui Chú, an-jiân kàu Pē ê chhù, hióng-siū kú-tn̂g ê hok-khı̀. Chhiáⁿ lia̍t-ūi thoè i ê ûi-cho̍k kı̂-tó.
(Tâi-oân Kàu-hoē Kong-pò tē 601 koàn, 1935 nı̂ 4 goe̍h)
