Kò͘ Khó͘ Tēng-chhân Tiúⁿ-ló

Khó͘ Tēng-chhân Tiúⁿ-ló, sı̄ Tiân-tiong kàu-hoē hiān-jı̄m ê Tiúⁿ-ló, chin-chē lâng bat i; in-ūi i sı̀n Chú í-keng ū 40 nı̂, chò Tiúⁿ-ló kú-kú, jia̍t-sim kó͘-bú kàu-hoē. I tı̄ 40 nı̂ chêng, chiū-sı̄ 30 hoè ê sı̂; ū siū-tio̍h hit-sı̂ ê sı̀n-chiá Siau A-hi, Lâu Kok-tı̄, Siau A-keⁿ ín-chhoā lâi sı̀n Chú. Tı̄ 1896 nı̂, chiū-sı̄ i 34 hoè ê sı̂, tı̄ Lūn-ngá kàu-hoē, tùi Sòng Tiong-kian Bo̍k-su niá sé-lé chı̀n-kàu. Bô loā-kú, chiū chò Chip-sū, oá chı̍t nn̄g-nı̂ kú, chiū koh hō͘ lâng kéng chò Tiúⁿ-ló. Āu-lâi in-ūi Tiân-tiong ū siat kàu-hoē; i ê chhù khah kı̄n Tiân-tiong, chiū tı̄ 1927 nı̂ 9 goe̍h 17 jı̍t, ı̂-choán lâi sio̍k Tiân-tiong kàu-hoē. Tâng hit nı̂ 12 goe̍h 11 jı̍t, chiū jı̄m Tiân-tiong kàu-hoē ê Tiúⁿ-ló. Bô phah-sǹg tı̄ sin-le̍k 1 goe̍h 9 jı̍t, jiám-tio̍h hı̀-iām ê pēⁿ, kàu 18 jı̍t chá-khí, oá 7 tiám ê sı̂, an-jiân kui-thian, kap Chú saⁿ-kap toà, hióng-siū 71 hoè. Tı̄ 19 jı̍t ē-po͘ nn̄g-tiám, tı̄ i chhù chò kò-pia̍t-sek, hù-sek ê lâng ū 500 chó-iū. Tāi-ke lóng chin m̄-kam, thang chai i ê chò lâng. Taⁿ kı̀ kúi-hāng lâi siàu-liām i :-- 1.I ê sı̀n-gióng kian-khò. I sı̀n Chú ê sı̂, sui-jiân tú-tio̍h ka-cho̍k, chhù-piⁿ, pêng-iú ê thí-chhiò khún-tio̍k, iū-koh siū-tio̍h seng-oa̍h khùn-lân ê ap-pek, i bô sit-chı̀, tùi I ê sı̀n-gióng lâi hùn-tò͘, ē-thang ín-chhoā i ê ka-cho̍k sı̀n Chú, iū-koh tit-tio̍h seng-oa̍h ê hù-jū. 2.Jia̍t-sim ho̍k-sāi Chú. Tiúⁿ-ló sı̀n Chú kàu-taⁿ 40 nı̂ kú, kan-ta ūi-tio̍h phoà-pēⁿ 5 lé-pài bô kàu pài-tn̂g nā-tiāⁿ. Iū-koh ta̍k lé-pài tùi pài-it kàu pài-la̍k, lóng khı̀ ta̍k só͘-chāi thàm hoē-iú, pò͘-tō. Tı̄ pēⁿ-tiong iáu chin siàu-liām kàu-hoē, iā khó͘-khǹg lâng tio̍h tı̀-ı̀ ho̍k-sāi Chú, só͘-í tùi I ín-chhoā lâi sı̀n Chú ê lâng chin-chē. Iū-koh nā khoàⁿ-tio̍h hoē-iú léng-tām, lé-pài chió lâng, chiū chin hoân-ló. 3.Gâu tông-chêng lâng. Chin gâu tông-chêng tú-tio̍h kan-khó͘ ê lâng; koh-khah tı̀-ı̀, chiū-sı̄ kàu-hoē tú-tio̍h kan-khó͘ ê lâng nā chai, chiū siông-siông khı̀ an-ùi i, pang-chān i. Só͘-í chin-chē lâng thiaⁿ-tio̍h i sí, ūi-tio̍h i lâi lâu ba̍k-sái. 4.Hoaⁿ-hí koan-tê. Nā ū lâng khı̀ kā i koan-tê, chē-chió lóng ū. 5.Hô-pêng ê lâng. I ê chò lâng, ta̍k hāng sū chin gâu thun-lún, hoān-sū ài niū--lâng, bô ài kap lâng kè-kàu. Tiúⁿ-ló it-seng jia̍t-sim ho̍k-sāi Chú, ūi Chú ê kàu-hoē tio̍h-boâ, chin thang hō͘ lâng siàu-liām, hō͘ lâng o̍h. Sèng-keng kóng, “Taⁿ í-āu tı̄ Chú lâi sí ê lâng ū hok-khı̀; Sèng Sı̂n kóng, Sı̄ lah, hō͘ in soah in ê tio̍h-boâ lâi an-hioh, in só͘ chò ê kang iā toè in” (Khé 14:13). I ū 4 ê hāu-seⁿ, chı̍t ê cha-bó͘-kiáⁿ; toā-kiáⁿ hiān-jı̄m Tiân-tiong kàu-hoē ê Chip-sū, tē-jı̄--ê, chiū-sı̄ Thoân-tō-su Khó͘ Thian-sù Sian-siⁿ. Kiû Chú pang-chān i ê kiáⁿ-jı̂, ē chiap-soà i ê kha-pō͘.

(Tâi-oân Kàu-hoē Kong-pò tē 612 hō, 1936 nı̂ 3 ge̍h)