Kò͘ Lâu N̂g--sı̄ Gio̍k-iàn

Kò͘ Lâu N̂g--sı̄ Gio̍k-iàn, chhut-sı̀ tı̄ Bêng-tı̄ 28 nı̂(A. D. 1895). I sı̄ Tâi-lâm Kò͘ N̂g Goa̍t-tek--sı̄ ê toā cha-bó͘-sun, (goā kong Ô͘ Kó͘), N̂g Teng-chhàn kap N̂g Ô͘--sı̄ khǹg ê tióng-lú. Tı̄ 17 hoè chut-gia̍p Tâi-oân Tiúⁿ-ló Kàu-hoē Lú-o̍h liáu, pang-chān bó-hāu. Kàu 20 hoè, kè Lâu Iú-chèng kun. Chò Táu-la̍k Lâu Iú-chèng kun. Chù Táu-la̍k Lâu Bān-kiàn--sı̄ ê toā sim-pū, chò thoân-tō sian-siⁿ-niû 5 nı̂ kú, ū toà Hong-goân, Kong-á-nâ, Siān-hoà 3 ūi ê kàu-hoē. In-ūi ta-ke pia̍t-sè, sè-chek phoà-pēⁿ, ko͘-put-chiong thêng-khùn. La̍k-nı̂ āu kàu Tâi-lâm chò sū-gia̍p, Chiau-hô 3 nı̂ poaⁿ kàu Hó͘-boé siat bo̍k-tiûⁿ. Lūn i chò lâng léng-lı̄, ha̍k-būn, chhiú-gē lóng iu-siù. Tı̄ ha̍k-hāu kap tông-chhong, í-kı̍p tùi kàu-hoē ê hoē-iú lâng-lâng hó. Tı̄ ka-têng sı̄ chò hó ê chú-hū, kà-sı̄ chú-lú ū hó ê hoat-tō͘, jia̍t-sim ho̍k-sāi Chú, chá-àm chin tı̀-ı̀ kó͘-bú ka-têng lé-pài, tùi hū-jı̂n-hoē chin chhut-la̍t. Khó-sioh, chit nn̄g nı̂ lâi, sin-thé bô siáⁿ ióng, tı̄ chiaⁿ-goe̍h boé jı̍p Tâi-lâm pēⁿ-ı̄ⁿ, tı̄ pēⁿ-chhn̂g tiong siông-siông kau-poê Chú. Tı̄ 2 goe̍h 19 hō chá-khí, tùi Lâu Iú-chèng kun kóng i ū bāng-kı̀ⁿ chı̍t-ê hó bāng: Sı̄ i ū tı̄ pài-tn̂g teh kà Chú-jı̍t-o̍h, soà kóng i tı̄ chit kúi nı̂, in-ūi ka-sū ê chó͘-tòng, chin ûi-hām. Nā ha̍p Siōng-chú ê chí-ı̀ phoà-pēⁿ ū hó, tek-khak beh poah-khui lóng-chóng lâi pang-chān, Chú-jı̍t-o̍h bô liāu. Siōng-chú ê chí-ı̀ chiâⁿ, i-io̍h bô hāu, jı̍p-ı̄ⁿ tú-tú chı̍t goe̍h-jı̍t kú. Jı̄ goe̍h 21 hō, ē-po͘ 1 tiám 35 hun, tı̄ chē-chē chhin-cho̍k khàn-hō͘ ê tiong-kan, bı̄n-māu êng-kng khùn--khı̀. Kàu keh jı̍t, iā iû-goân bı̄n-sek sin-khu lóng bô piàn-oāⁿ, ná pêng-siông lâng teh khùn án-ni. Hióng-siū 41 hoè. Tı̄ ı̀-sek iáu sián-bêng ê sı̂, kā Lâu kun kóng, Nā Siōng-chú ê sèng chí-ı̀, goá kam-goān sêng-siū; chóng-sı̄ kiáⁿ-jı̂ kap ke-lāi, lí tio̍h chı̄n-sim liāu-lí. Lâu Iú-chèng kun khoàⁿ i ba̍k-chiu niàu-koân teh chhiò, mn̄g i sim-koaⁿ pêng-an bô ? Ìn kóng, pêng-an, Chú kap goá tı̄-teh. Tı̄ hia teh kò͘ ê lâng kóng khoàⁿ i án-ni sí, chin ta̍t. I ū 5-ê hāu-seⁿ, 5-ê cha-bó͘-kiáⁿ. Tióng-lâm tı̄ Loē-tē, tú beh chut-gia̍p Tiong-ha̍k. Siāng sè-hàn--ê iā-sı̄ ta-po͘--ê, tú 4 hoè. Kiám bē siong-sim ! Keh jı̍t ē-po͘ 3 tiám poàⁿ, ū chhiáⁿ Phoaⁿ Tō-êng Bo̍k-su su-sek. Tı̄ Tâi-lâm pēⁿ-ı̄ⁿ kú-hêng kò-pia̍t-sek; lóng-chóng ū pah-goā lâng, saⁿ-kap lâu siong-sim ê ba̍k-sái. I ê hù-im chı̍t-ē thoân, kàu-hoē í-kı̍p kap i saⁿ-bat ê lâng, chin m̄-kam. Bó͘ lâng kóng goán ê chhù-piⁿ thiaⁿ-kı̀ⁿ i sí, tāi-ke lóng lâu ba̍k-sái, chin m̄-kam. Ta̍k pái nā tùi goán hia koè, sui-jiân I khah bô êng, to jı̍p-lâi khiā-khiā--teh, kau-poê hoaⁿ-hí, chhiò-chhiò saⁿ-sı̂ chiah khı̀. Bó͘ lâng kóng, i sı̍t-chāi chin gâu thiàⁿ kan-khó͘ lâng. Bó͘ lâng kóng, goá kám-sim i chı̍t-hāng: Tùi kap i saⁿ-bat kàu taⁿ, m̄-bat thiaⁿ i kóng pa̍t-lâng ê sı̄-hui. Bó͘ lâng kóng, i sı̍t-chāi ū thiàⁿ Kàu-hoē ! (Tâi-oân Kàu-hoē Kong-pò tē 601 koàn, 1935 nı̂ 4 ge̍h)