Kò͘ Phoaⁿ Táⁿ-bı̂ Sian-siⁿ

Phoaⁿ Sian-siⁿ chhut-sı̀ tı̄ 1894 nı̂. Sè-hàn ê sı̂ pē-bó lı̍p-chı̀ beh chiong i hiàn hō͘ Siōng-tè chò Chú ê kang. Só͘-í Kong-ha̍k-hāu chut-gia̍p āu chiū jı̍p Tâi-lâm Tiúⁿ-ló-kàu Tiong ha̍k-hāu. Āu-lâi chut-gia̍p liáu koh jı̍p Sı̂n-ha̍k-hāu, pı̍t-gia̍p sı̄ tú i 22 hoè ê sı̂. Tı̄ 1916 nı̂ 4 goe̍h 1 hō siū phài tiàm Soaⁿ-pà Kàu-hoē iok saⁿ nı̂ kú. Āu-lâi choán-jı̄m-khı̀ Chháu-tun, Po͘-lí, Toā-làm, Gû-khùn-soaⁿ chiah-ê kàu-hoē. Thâu-boé ūi Chú choè kang tio̍h-boâ iok peh-nı̂ kú. Āu-lâi ūi-tio̍h ka-têng ê to͘-ha̍p sı̂-jı̄m tò-lâi sū hāu pē-bó. Put-hēng tı̄ 8 goe̍h 1 hō siū Chú kéng-tiàu chiap-la̍p chiūⁿ-thiⁿ; hióng-siū 34 hoè. Hoē-lāi ê hiaⁿ-ché oán-jiân hō͘ o͘-hûn jia-ba̍t, bô-m̄ ūi-tio̍h i thòng-chhiat thı̂-khàu. Chhe-jı̄ tı̄ i ê pún-chhù kú-hêng chòng-sek, hoē-chòng-chiá iok 400 miâ, thang kóng ke̍k-kı̂ sēng-hóng. Lūn i ê it-seng choè lâng: 1.Jı̂n-ài. Sian-siⁿ ê sèng-chêng ke̍k-kı̂ un-jiû, khiam-sùn, put-chí ài hô-pêng. Tiàm kàu-hoē m̄-bat thiaⁿ-kı̀ⁿ kap hoē-iú ū kháu-kak, kap chhù-piⁿ pêng-iú iā chin-hó lâi-khı̀. Bô-lūn ló-iù i put-chí hó chhin-kı̄n, só͘-í bat kap i kau-poê ê lâng bô-m̄ siàu-liām i ê hó choè-lâng. 2.Sı̀n Siōng-tè. Tùi sè-hàn ê sı̂ put-chí kèng-ùi Iâ-hô-hoa. Só͘-í lūn kèng sı̂n chin jia̍t-sêng. Bat chı̍t-pái, i ê hāu-seⁿ phoà-pēⁿ siong-tiōng ê sı̂, kūi-lo̍h kiû, kóng, “ Pē ah! Kiû lí khó-lı̂n, kiù goá chit ê sè-kiáⁿ. Kiû lí bo̍h-tit ūi-tio̍h choè kang put-chiok lâi chek-hoa̍t goá. Nā-sı̄ Pē ê chí-ı̀ , pa̍t-jı̍t goá hoaⁿ-hí chiong chit ê sè-kiáⁿ hiàn hō͘ Lí, lâi pó͘ goá ūi-tio̍h lí só͘ choè bô kàu ê kang.” Chit hō jia̍t-chhiat kiû-kiò ê siaⁿ-im chhin-chhiūⁿ phang-hiuⁿ chhèng kàu Siōng-tè ê bı̄n-chêng. Kó-jiân sè-kiáⁿ ê pēⁿ tit-tio̍h hó. 3.Hiàn-kang. Tùi sı̂ Thoân-tō-su tò-lâi pún kàu-hoē, chiū tam-tng Chip-sū ê chit-hūn. Ūi-tio̍h kàu-hoē ê châi-chèng put-chí chhut-la̍t liāu-lí. Iā chêng-nı̂ bat choè Chú-jı̍t-o̍h Hāu-tiúⁿ lâi kó͘-bú Chú-jı̍t-o̍h. Kàu-hoē ê sū put-chí koan-sim, hoaⁿ-hí hiàn-kang. Tùi khí-pı̄ⁿ kàu pia̍t sè chiah ū nn̄g lé-pài kú nā-tiāⁿ；sui-jiân jı̍p-ı̄ⁿ tı̄-liâu,chóng-sı̄ siōng Chú ê chí-ı̀ hō͘ lâng bē gâu-tit,Kin-á-jı̍t Sian-siⁿ kap Chú tâng khiā-khí tı̄ An-lo̍k-kok, m̄-bián koh tiàm choē ok ê khó͘ hái; chóng-sı̄ I só͘ lâu ê iù-lâm jio̍k lú kap ûi cho̍k, mı̂ jı̍t ūi tio̍h I teh thı̂ khàu lâu ba̍k sái. Goān lia̍t ūi khoàⁿ pò ê hiaⁿ-ché tı̄ kı̂-tó tiong siàu liām I ê ka-cho̍k,o̍h I ê kèng khiân kap sı̀n gióng.

(Tâi-oân Kàu-hoē-pò tē 510 koàn, 1927 nı̂ 9 ge̍h)