Phí-jı̂n kap kò͘ Choân koaⁿ saⁿ-bat í-lâi tāi-iok 20 chó-iū nı̂, chiàu só͘ chai lâi piáu-pe̍k tām-po̍h i-ê lio̍k-le̍k. I tı̄ Tâi-lâm chiū thiaⁿ-tio̍h tō-lí, chho͘-chhù kàu Kı̂-āu, i kap lāu-bú í-kı̍p i ê jı̂-lú: lâm Lí Hok-lâi kun, Lí Iú-lâi kun; lú Lí--sı̄ Hōng sàng. Sè-sè-hàn chò seng-lí teh seng-oa̍h, tāi-seng sè-sè, ū-sı̂ chhut-goā hêng-siong, keng-koè khùn-lân; chò lâng chin sè-jı̄, bē-bián-tit ū-sı̂ iau-ki sit-tǹg, siū-hong siū-song, siū iām-jia̍t, sı̍t-chāi pit-ba̍k lân-tit hêng-iông hit ê to-tāi, só͘ tit iā-sı̄ sió-khoá. Kai-chài khı̂n-khiām chhı̂-ka, chin gâu siat-hoat, kàu-io̍k chú-lú iú-gı̄-hong, tı̀-kàu lóng tit-tio̍h siong-tong ê chai-poê, tāi-ke tı̄ Ko-hiông it-kong pı̍t-gia̍p, siōng-sio̍k lāu-bú ê ı̀-chı̀ chò seng-lí, lāu-bó chò ka-têng kò͘-būn, iā chò chóng chí-hui, kàu-taⁿ hoat-ta̍t hui-hoān. Tiàm-hō “Hia̍p-hô,” chin-chiàⁿ ū ta̍t hia̍p-le̍k hô-sim ê bo̍k-tek. Lú-chú Lí--sı̄ Hōng sàng, chài chı̀n ko-lú, kàu pı̍t-gia̍p, hō͘ Kı̂-āu Kàu-hoē phèng-chhiáⁿ chò Ài-jı̂-hn̂g ê sian-siⁿ. Āu-lâi ūi tō͘-ha̍p-siōng chiām-thêng. Jiân-āu sı̄ ū phèng-chhiáⁿ chò Pêng-hô Iù-tı̄-hn̂g ê sian-siⁿ. Ná keng-giām, ná kám-kak kho-ha̍k ê chu-bı̄, choè-kı̄n liû-ha̍k Tang-kiaⁿ Pó-bó ha̍k-hāu, pı̍t-gia̍p hoê-hiong, pún kàu-hoē chài-saⁿ kau-sia̍p,chhiáⁿ i oān-chō͘ Ài-jı̂-hn̂g, lâi kàu-io̍k chiah-ê jı̂-tông, tit-tio̍h i ê sêng-ı̀ hoaⁿ-hí sêng-lo̍k. I ê ı̀-chı̀ lia̍h chiah-ê jı̂-tông chò i ê pún-ūi, iā sı̄ i ê ı̂-it ê kang-chok.
Kò͘ Choân koaⁿ chò chip-sū kúi-nā jı̄m, i iā toè lāu-bó ê kha-pō͘ chò chip-sū, hiān-sı̂ iáu chāi-chı̍t. Kiáⁿ thàn lāu-bó chò seng-lí, chò cha-bó͘-kiáⁿ iā án-ni teh chiân-chı̀n, che chin chió, chin-chiàⁿ sı̄ siān kı̂-kiû, chú sêng hū-gia̍p; khoe siān sū, chú chiū ka-seng ê sū-sı̍t, ē tit liông chú sêng-gia̍p lú-chú ê iu-siù, chhut-lūi poa̍t-chūi, lóng sı̄ tùi Choân koaⁿ ê chiat-lia̍t, chiú-koáⁿ chheng-pe̍k ê kiat-chiⁿ. Chhui kı̂ goân-in, chiū-sı̄ Choân koaⁿ sı̀n-tō kian-sim, kam-goān pē Chú ê sı̍p-jı̄-kè.
Ah! Bô phah-sǹg tı̄ cha̍p-sò͘ jı̍t chêng siⁿ chhùi-kak-teng, se-hàn bóng-hāu, lāi-chhin goā-chhek, pêng-iú, hiaⁿ-tı̄ chí-moē, chhian-poaⁿ bān-kè, siūⁿ bô liông-hong, bû-hoat khó-i. Ou-ho͘ ai-chài! Jı̂n-seng jio̍k tiau-lō͘, bān-sū ê kiat-kio̍k kàu lah, tı̄ 7 goe̍h 7 hō ē-po͘ kı̄n 4 tiám, Chú kéng-tiàu i soah i ê kang-tiâⁿ, jı̍p thiⁿ-siâⁿ, tı̄-hia bô pēⁿ, bô sí, bô lâu ba̍k-sái. Taⁿ jı̍p tı̄ Chú ê khoài-lo̍k lah! Tùi bu̍t-chit-tek lâi siūⁿ, sı̄ tú-tú beh jı̍p hióng-lo̍k tı̄ ka-têng, chiū éng-bı̂n, bē kı̀m-tit lâu tông-chêng ê ba̍k-sái. Nā tùi cheng-sı̂n-siōng lâi siūⁿ, sı̄ put-chí thang hoaⁿ-hí ê só͘-chāi. I chhut-goā tı̄ sè-kan 50 nı̂ tı̄ thian-bēng, taⁿ hoê thian-ka, sı̄ hoaⁿ-hí ê sū, bián hoân-ló, in-ūi Iâ-hô-hoa khoàⁿ I ê sèng-tô͘ ê sí, chò pó-poè. Iâ-so͘ kóng, “Sı̀n goá ê lâng, sui-bóng sí, iáu-kú beh oa̍h.”
I ê ûi-cho̍k, hiān-sı̂ nn̄g ê hāu-seⁿ, nn̄g ê sim-pū, chı̍t ê cha-bó͘-kiáⁿ, chı̍t ê cha-bó͘-sun-á, í-kı̍p nı̂-lāu ê lāu-bó. Goān Chú pó-siú in, khoàⁿ-kò͘ i ê ûi-cho̍k, ē-tit kè-sio̍k thiàⁿ Chú, āu-lâi tı̄ thiⁿ thang saⁿ-kı̀ⁿ.
(Tâi-oân Kàu-hoē Kong-pò tē 654 hō, 1939 nı̂ 9 ge̍h)
