Kò͘ Tân Sı̀n-chiong Kun Sió-toān

Kò͘ Tân Sı̀n-chiong--sı̄, chiū-sı̄ Sek-kháu kàu-hoē Tân Ho̍k-lé, Tân Iok-hān jı̄-ūi Tiúⁿ-ló ê hiaⁿ-tı̄. I ê chhin-lâng choē-choē choè Thoân-kàu-su, i pún-sin iā bat saⁿ nı̂ kú choè Thoân-tō. Khoàⁿ Pak-pō͘ Tâi-oân Ki-tok Tiúⁿ-ló kàu-hoē ê le̍k-sú tē 102 bı̄n ū i ê siōng, chiū chai i soè-hàn tha̍k Gı̄-o̍h, āu-lâi tha̍k Kok-gú Ha̍k-hāu ê tē-saⁿ hù-sio̍k, iā saⁿ nı̂ kú jı̍p I-ha̍k, sı̀ nı̂ kú jı̍p Tām-chúi Sèng-tō Su-ı̄ⁿ. Āu-lâi siū phài khı̀ Pat-lí-siā choè Thoân-tō, in-ūi ka-sū-siōng chiū hioh-kang, kap i ê hiaⁿ-tı̄ tāi-ke chhut-la̍t keng-êng thoàⁿ-khòng sêng-kong, lâi lı̄-ek toē-hng kap ke-lāi í-kı̍p kàu-hoē. Lūn i ê sèng sı̄ tiong-tı̍t kap phoh-sı̍t. Khoàⁿ i ê keng-le̍k chiū chai i ū kau-poê choē-choē pêng-iú. Tı̄ bô phah-sǹg ê sı̂, Chiau-hô 2 nı̂ 1 ge̍h 1 jı̍t ē-po͘ 4 tiám, ló chhut-huih; kè 12 tiám kú hō͘ Siōng-tè tiàu-khı̀; hióng-siū 45 hè. Kàu 15 jı̍t ē-po͘ 2 tiám kú-hêng chòng-sek, hoē-chòng-chiá iok 1500 chó-iū. Thang chai in ê kau-chè khóng-khoah. I ū siⁿ 10 ê kiáⁿ-jı̂, ū-ê soè-hàn. Bat i ê lâng bē bián-tit siong-sim, m̄-kam i ê choè lâng. Chóng-sı̄ I taⁿ tı̄ thiⁿ-nı̍h hióng-hok, sı̄ ǹg-bāng tāi-ke oē siū an-ùi. (Tâi-oân Kàu-hoē-pò tē 504 koàn, 1927 nı̂ 3 ge̍h)