Lí mn̄g goá sı̄ án-choáⁿ siūⁿ beh lâi Tâi-Tāi.
“Siūⁿ beh lâi khoàⁿ-khoàⁿ leh.”
Siūⁿ beh kap goá ê siàu-liân-sı̂ saⁿ-sı̂,
Tı̄ chit-ê lo̍h sa̍p-sa̍p-hō͘ ê
Koâⁿ-lâng àm-mı̂.
Toē-hā-tō--nih chēng-chhiⁿ-chhiⁿ,
Lâu-thui khi-khi,
Thian-pông teh tih-chúi.
Chia̍t-ūn kang-thêng tùi thâu-khak-téng lu--koè,
Koân-tah-oê kho̍k-kho̍k ta̍h--koè,
Thô͘-hún kap hoê-im
Thàng-kàu nāu-jia̍t ê kı̀-tı̂;
Kài-giâm choè-āu sı̀-nı̂,
Kha-pō͘ siaⁿ m̄-bat tı̄ chia tn̄g--khı̀,
Kı̀m-chheh chı̍t-pún chı̍t-pún pâi kàu kha-kı̂ⁿ.
”Kéng-chhat lâi lah.”
Ha̍k-seng kap boē-chheh--ê kín-kín sı̀-soàⁿ.
Chhut-kháu chiū tı̄ hāu-mn̂g-piⁿ.
Thiaⁿ-kóng ûi-chhiûⁿ-lāi ū chū-iû ê chhun-thiⁿ,
Ta̍k-nı̂ tō͘-koan lóng toā-khui.
Tē-it Lú-sià tùi-bı̄n,
Lí-khûi-chhiū khiā kui-tı̄n,
Sán-thiu ê seng-khu chhı̂ⁿ-hong gı̍h-gı̍h-chùn.
Sàm-sàm ê hio̍h teh tih-chúi,
Chhin-chhiūⁿ chı̍t-pâi ak-hō͘ ê cha-bó͘-kúi.
Poaⁿ-jı̍p siok-sià ê tē-it-mı̂,
Hō͘ lo̍h boē-lı̄ ê chhiu-thiⁿ àm-mı̂,
Thiaⁿ ı̄-hiong ê lí-khûi chha̍uh-chha̍uh haiⁿ thong-mı̂.
M̄-chai in sı̄ teh oàn-hūn?
Á-sı̄ kap goá kāng-khoán teh sim-būn?
Bûn-ha̍k-ı̄ⁿ àm-àm, toā-mn̂g só ân-ân,
Kan-ta chhun chı̍t-pha ko͘-teng,
Bū-bū chiò tı̄ oan-kiong-mn̂g-téng.
Kiám ū lâng chē tı̄ thian-chíⁿ,
Ná tha̍k Shelley tháu-pàng ê si,
Ná siūⁿ Sturm und Drang ê ı̀-gı̄,
Tng Bí-lē-tó Sū-kiāⁿ koè-liáu bô N̄g-nı̂,
Tân Bûn-sêng ê sin-si lak tı̄ tô͘-su-koán piⁿ?
Nn̄g-kai âng-chng ê phó͘-thong kàu-sek bô--khı̀,
Oāⁿ-choè chı̍t-pâi khòng-ku-lí kàu-ha̍k toā-lâu.
Âng-chng-chhù tùi-bı̄n,
Joa̍h-thiⁿ chháu-po͘ chhiⁿ-gín-gín.
Siuⁿ-si-chhiū ē-kha,
Cha-bó͘-gín-á toâⁿ gi-tá chhiùⁿ-koa.
Chho͘-loân ê sim-siaⁿ chhin-chhiūⁿ chháu-íⁿ,
Té koh chhiⁿ-siap, sng-bı̂ koh kam-tiⁿ.
Chùi-goa̍t-ô͘ ê chúi lô-lô.
Chı̍t-tùi chúi-ah siû--koè-khı̀,
Hioh tı̄ soa-po͘-kı̂ⁿ.
M̄-bián khoà-lū saⁿ-tǹg ê jı̍t-chí,
Tông-ha̍k sio-chio lâi ô͘-piⁿ chok si.
Chiú chı̍t-ē lim, soà chhiùⁿ koa-á-hı̀.
Chhiū-châng-lāi iok-hoē ê lâng-iáⁿ,
Chı̍t-tùi chı̍t-tùi lı̄-khui.
M̄-chai kiám bat phah-kiaⁿ
Chúi-kı̂ⁿ chit-tùi oan-iuⁿ-phoāⁿ?
Hō͘ m̄-chai tı̄-sı̂ thêng.
“Éng-koè Tâi-pak ê hō͘ kiám chiah-nih chió?”
“Chit-kúi-nı̂ Tâi-pak ê hō͘ khak-sı̍t ná chió,
Koâⁿ-thiⁿ ê chu-bı̄ iā ná lâi ná po̍h.”
Hāⁿ-koè Sin-seng Lâm-lō͘ ê piⁿ-á-mn̂g,
Se̍h-jı̍p chá-chêng soè-chhù ê hāng-á-lāi,
Siang-pêng ê tiàm-bı̄n goá lóng boē jı̄n--tit.
Í-chá ê kong-hn̂g gia̍p tı̄ toā-lâu tiong-ng.
Chiū án-ni kap lí saⁿ-sı̂,
Goá ê bú-hāu, goá ê chheng-chhun,
Taⁿ goá chai lí ê kha-pō͘ chı̍t-khı̀ jiok boē tò-tńg.
Ū chı̍t-jı̍t goá thâu-mn̂g pe̍h ê sı̂,
Chiah koh tńg-lâi chia
Siàu-liām lí ut-chut, bí-lē ê kha-jiah.
