Lı̄-khui AN Arbor tē-sı̀ ê chhiu-thiⁿ, Bāng-tiong koh tò-tńg-khı̀ i ê sin-piⁿ, Hō͘-chúi sé--koè ê png-á-hio̍h hoán-âng, Goá ê thâu-mn̂g piàn pe̍h, Tı̄ jı̍t-kng--nih siám-sih.
Hiu-lûn Hô ê khe-chúi chha̍p-chha̍p lâu--koè, Tân Bûn-sêng ê kha-pō͘ ta̍uh-ta̍uh ta̍h--koè, Burton tower ê cheng-siaⁿ thoân--lâi, Png-á -hio̍h poe kui sı̀-koè.
Goá thiaⁿ-tio̍h tiong-nı̂ ê siaⁿ Í-keng kūn-oá. AN Arbor hong-seh ê àm-mı̂, Phiau-lōng ı̄-hiong ê tông-chı̀ Sı̂-kiâⁿ kheh-thiaⁿ kek-bēng.
Nā ha̍p-chhiùⁿ ‘Hông-hun ê kò͘-hiong’, In ê sim chiū gêng, ná chúi kian-tàng. Tò-tńg-lâi se̍k-sāi ê tó-sū, Ūi-tio̍h saⁿ-tǹg, goá mı̂-jı̍t thoa-boâ, Tông-chı̀ ê bı̄n-iông chiâu piàn, Goá boē jı̄n-tit in. Khah-lá-o͘-khe nā hòng-sàng ‘Hông-hun ê kò͘-hiong’, Goá chiū mn̄g ka-kı̄, kò͘-hiong tı̄ tó-ūi?
Lı̄-khui AN Arbor tē-sı̀ ê chhiu-thiⁿ, Bāng-tiong an-hioh tı̄ i ê sin-piⁿ Chheng-chhun ê lêng-choâⁿ, goá í-keng lim-ta.
Bâi-chòng lí-sióng ê thó͘-toē ah, Tı̄-sı̂ thang kap lí saⁿ-kı̀ⁿ--- Koh chı̍t-pái, Bián koh tı̄ lo̍k-phek ka-hiong ê Bı̂n-bāng-tiong?
